Gusto sang Amay nga Langitnon nga Maghambal sa Imo

Isa ka anghel ang nagsugo kay Adan kag Eva kag sa tanan nga magasunod sa ila, “maghinulsol kag magpanawag ka sa Dios sa ngalan sang Anak sa wala’y katubtuban” (Moises 5:8).

Si Jesus nagtudlo: “Pangayo, kag kamo hatagan; pangita, kag kamo makakita; panuktok, kag kamo pagabuksan” (Mateo 7:7). “Kon magpangamuyo ka, … magpangamuyo sa imo Amay … sa tago” (Mateo 6:6). “[Gani] pangamuyo kamo sing subong sini: Amay namon nga yara sa langit, Pakabalaanon ang imo ngalan” (Mateo 6:9).

Nagpangamuyo si Jesus sing dalayon sa Iya Amay. “Nagtaklad Sia sa [bukid] agud magpangamuyo, kag nagpadayon sa bilog nga gab-i sa pagpangamuyo sa Dios” (Lucas 6:12). “Kag … nagkadto sia sa isa ka [bukid] sa pagpangamuyo” (Marcos 6:46). “Kag nag-abot sila sa isa ka lugar nga ginatawag Getsemani: kag nagsiling sia sa iya mga gintuton-an, Pungko kamo diri, samtang nagapangamuyo ako” (Marcos 14:32). Samtang ara sa krus, nagpangamuyo si Jesus para sa mga soldado nga naglansang sa Iya sa krus: “Amay, patawara sila; kay wala sila makahibalo sang ila ginahimo” (Lucas 23:34).

Ang balaan nga mga kasulatan nagalaygay sa aton nga “magpangamuyo pirme” (Lucas 21:36; 2 Nefi 32:9; 3 Nefi 18:15; Doktrina kag mga Kasugtanan 10:5; 19:38; 20:33; 31:12). “Magkonsulta sa Ginuo sa tanan mo nga ginahimo, kag tuytuyan ka niya para sa kaayohan” (Alma 37:37). Dugang pa, aton “ihatag ang tanan nga pagpasalamat kag pagdayaw nga ang [aton] bug-os nga mga kalag may gahum sa pag-angkon” (Mosias 2:20), nga ginakilala ang tanan nga ginahimo sang aton Amay para sa aton.

Si Pangulong Russell M. Nelson nagpaathag: “Ang espirituhanon nga pagtahod sa kaugalingon nagasugod sa pagkilala nga ang tagsa ka bag-o nga adlaw regalo halin sa Dios. … Ginaamligan Niya kita tagsa ka adlaw kag ginasuportahan kita sa tagsa ka hitabo (tan-awa sa Mosias 2:21).”

Si Nefi nagsiling, “Kon kamo magpamati sa Espiritu nga nagatudlo sa isa ka tawo sa pagpangamuyo, inyo mahibal-an nga kinahanglan gid kamo nga magpangamuyo; kay ang malain nga espiritu wala nagatudlo sang isa ka tawo nga magpangamuyo, kundi nga nagatudlo sa iya nga kinahanglan gid nga indi sia magpangamuyo” (2 Nefi 32:8).

Detalye sa Christ Raising the Daughter of Jairus [Si Cristo nga Nagapabangon sang Anak nga Babayi ni Jairo], ni Greg K. Olsen

Sa ehemplo sang aton Manluluwas kag sa mga laygay sang mga anghel kag mga propeta sa madamo nga mga siglo, maathag nga dapat kita magpangamuyo adlaw-adlaw agud magpahayag sang kapasalamatan para sa aton mga bugay, kag dalayon nga magpangamuyo sa aton tagipusuon. May responsibilidad kita nga magpakigsugilanon sa aton Amay.

Pero mas dalayawon, ang aton Amay sa Langit nagasabat sa aton mga pangamuyo. Isa ka madalum nga pamangkot sa sining kalibutan amo ang, kon paano naton mabaton kag maintiendihan sing mas maayo ang mga sabat, paggiya kag kaumpawan halin sa aton Amay?

Paagi sa akon masobra pito ka dekada sang pagkabuhi, nakahibalo ako nga ang aton Amay nagahambal sa aton. Wala kita nagaisahanon. Ang langitnon nga mga tinuga nagabantay sa aton kag nagabulig sa aton sa aton pagtinguha nga sundon ang Manluluwas.

Ang pagbaton sang mga sabat sa aton mga pangamuyo nagasugod sa aton pagtuo sa aton Amay nga Langitnon kag sa Iya Anak, si Jesucristo. Si Jesus nagsiling, “Indi ka magkahadlok, kundi magtuo ka lang” (Marcos 5:36). Nagasalig kita sa Iya, ginahimo naton ang tanan naton nga masarangan agud tumanon ang mga kasugoan, kag ginapangita ang Iya kamot sa tanan nga butang. “Wala sa bisan ano nga paagi nga makasala ang tawo sa Dios … luwas sinang wala nagaako sang iya kamot sa tanan nga butang, kag wala nagatuman sang iya mga kasugoan” (Doktrina kag mga Kasugtanan 59:21).

Ang kamot sang Dios sa aton mga kabuhi wala nagakahulugan nga ginapahanabo Niya ang malain ukon makahaladlok nga mga trahedya sa aton kalibutan. Pero, nagakahulugan ini nga sa imo mga tinion sang kabudlayan kag inhustisya, suportahon ka Niya, pabakuron ang imo mga ikasarang, paumpawan ka, kag “ikonsagrar niya ang imo mga pag-antos para sa imo kaayohan” (2 Nefi 2:2).

Kon may pagtuo kita sa Iya kag ginatuman ang Iya mga kasugoan, natural kita nga makatuon nga mabatian sing mas maayo ang Iya tingug.

Sang Septyembre 1993, sa una ko nga tuig bilang General Authority, si Pangulong James E. Faust (1920-2007), sadto miyembro sang Korum sang Dose ka Apostoles, nag-imbitar sa akon kag sa akon asawa nga si Kathy nga mag-attend sang isa ka debosyonal sa Brigham Young University upod sa iya. Dumduma nga ang 1993 antes pa nga lapnagon nga matigayon ang mga smartphone, social media, kag internet.

Sa iya pamulongpulong nga may tig-ulo “The Voice of the Spirit,” si Pangulong Faust nagpaandam: “Sa inyo henerasyon paarakan kamo sang madamo nga tingug nga magahambal sa inyo kon paano magpangabuhi, paano busgon ang inyo mga gusto, paano makuha ang tanan ninyo nga ginahandum. May hasta lima ka gatos ka channel sa telebisyon nga mahapos lang ninyo matigayon. May lainlain nga sari sang software, interactive nga computer modem, database, kag elektroniko nga mga porum sa diin pwede kamo magsulat kag magbasa sang mga mensahe; may mga publikasyon paagi sa computer, mga satellite receiver, kag mga network sang komunikasyon nga magatambak sa inyo sang tuman kadamo nga impormasyon. … Ang tingug nga kinahanglan ninyo pamatian amo ang tingug sang Espiritu.”

Si Pangulong Boyd K. Packer (1924-2015), Pangulo sang Korum sang Dose ka Apostoles, nagtudlo parte sa mahinay, diutay nga tingug sang Espiritu sang ginsugid niya ang eksperiyensia ni John Burroughs, isa ka naturalist (manugtuon sang kinaugali), samtang nagalakat sia upod sa iya mga abyan sa isa ka gutok nga parke. Ari ang mga tinaga ni Pangulong Packer:

“Bisan pa sa magahod nga pangabuhi sa siyudad nakabati si [Mr. Burroughs] sang pagkanta sang isa ka pispis.

“Nagpundo sia kag namati! Ang mga upod niya wala nakabati sini. Nagtulok sia sa palibot. Wala sang iban pa nga nakabati sini.

“Natublag sia nga indi manotaran ang tanan sang butang nga tama kanami.

“Nagkuha sia sang sinsilyo halin sa iya bulsa kag gin-itsa ini. Naglagting ini pagtupa sa semento, nga pareho lang katunog sa kanta sang pispis. Nagbalikid ang tanan; mabatian nila ato!

“Mabudlay iseparar ang kanta sang pispis sa tanan nga gahod sang trapiko sang siyudad. Pero mabatian ninyo ini. Mahimo ninyo ini mabatian sing maathag kon tudloan ninyo ang inyo kaugalingon nga pamatian ini.”

Ang mga panudlo ni Pangulong Packer parte sa Balaan nga Espiritu natabo sang 1979, panahon nga ang pangabuhi mas malinong kag ang impluwensya sang kalibutan mas hagan-hagan sangsa subong.

Si Pangulong Nelson nagtudlo, “kon mas ginatalupangod mo ang mga feed sa social media sangsa mga paghutik sang Espiritu, ginabutang mo ang imo kaugalingon sa espirituhanon nga risgo.”

Si Pangulong Faust nagsiling, “Para mabatian naton ang tingug sang Espiritu, dapat naton buksan ang aton mga dulunggan, iliso ang aton mata sang pagtuo sa ginahalinan sang tingug, kag ituon sing malig-on ang aton panulok sa langit.”

Ining tingug sang Espiritu nagaabot sa aton kinaalam kag aton mga balatyagon. “Sugiran ko ikaw sa imo panghunahuna kag sa imo tagipusuon paagi sa Balaan nga Espiritu nga magaabot sa imo kag magapuyo sa imo tagipusuon” (Doktrina kag mga Kasugtanan 8:2). Magpamati sa inyo konsensiya—ang rebelasyon masami nagasugod dira.

Magpangamuyo nga May Matinuohon nga Tagipusuon

Ang mga sabat kag mga pagpabatyag indi mahimo piliton. Nagapangamuyo kita kag nagahulat nga may matinuohon nga tagipusuon. Ang iban nga mga sabat indi mabaton sa sini nga kabuhi, pero sa mga matarong, ang Ginuo pirme gid nagapadala sang Iya kalinong (tan-awa sa Juan 14:27). Ang mga sabat masami nagaabot kon nagapangamuyo kita agud buligan ang mga ara sa aton palibot. Kon kis-a, nagaabot ang mga ini “dinalan sa dinalan, pagsulundan sa pagsulundan” (Doktrina kag mga Kasugtanan 98:12).

Ang tingug sang langit mahimo mag-abot sa aton sa wala ginapaabot nga mga tinion kag sa wala ginalauman nga mga lugar, pero masalapoan naton ang aton pinakatalalupangdon nga mga oportunidad sa mahipos kag sagrado nga mga lugar. Sa kalinong sang akon mga pangamuyo kag mga pamalandong sa kaagahon, makasalapo ako sang tumalagsahon nga mga bugay. Ang adlaw-adlaw, personal, wala-disturbo nga pagbasa sang balaan nga mga kasulatan, bisan nga kinaandan lang kon kis-a, nagadala sang tingug sang Espiritu sa aton mga tagipusuon pareho sang kalayo sa iban nga tinion.

May mga tinion nga ang mga pagpabatyag nagahalin mismo sa aton ginabasa, kag sa iban nga tinion, ang aton ginapamalandongan nagadala sang sabat sa lain naman katama naton nga ginapaligban. Dumduma ang mga pulong ni Elder Robert D. Hales: “Kon luyag naton makighambal sa Dios, nagapangamuyo kita. Kag kon luyag naton nga makighambal Sia sa aton, ginabasa naton ang balaan nga mga kasulatan.”

Samtang ang kagahod kag mga pagpanghaylo sang kalibutan nagabuyung sa aton palibot, ang Ginuo nagsugo sa Iya propeta sa pagpatindog sang mas madamo pa nga mga templo. Sa sining sagrado nga mga balay sang Ginuo, kon ginabilin naton ang aton mga hangkat sa gwa pero nagasulod upod sang aton mga pangamuyo kag mga kahangawa, ginatudloan kita sang mga kamatuoran sang walay katapusan.

Sang nagligad nga tuig, si Pangulong Nelson naghatag sa aton sining talalupangdon nga promisa: “Pinalangga ko nga mga utod, ari ang akon promisa. Wala sing mas labing makabulig sa imo sa paghawid sing hugot sa barandilya nga salsalon sangsa regular nga pagsimba sa templo kon ginatugot sang imo kahimtangan. Wala sing mas labing makaprotekta sa imo sa imo pag-atubang sa mga panganod sang kadudulman sang kalibutan. Wala sing mas labing makapabakod sang imo testimonya kay Ginuong Jesucristo kag sa Iya Pagbayad-Sala ukon makabulig sa imo nga maintiendihan ang dalayawon nga Plano sang Dios. Wala sing mas labing makapaumpaw sang imo espiritu sa mga tinion sang kasakit. Wala sing mas labing makapabukas sang mga kalangitan. Wala gid!”

Ang tagsa ka pangkabilogan nga komperensya nagadala sang dugang nga bugana nga mga bugay. Sa maabot nga bulan sang Abril, magakit-anay kita liwat sa pangkabilogan nga komperensya agud magpamati sa tingug sang Ginuo. Nagakadto kita sa pangkabilogan nga komperensya nga nakapangamuyo kag nakahanda. Para sa tagsa sa aton, may mabug-at nga mga kabalaka kag seryoso nga mga pamangkot. Nagakadto kita agud bag-ohon ang aton pagtuo sa Manluluwas nga si Jesucristo, kag pabakuron ang aton ikasarang nga mabatuan ang tentasyon. Nagakadto kita para matudloan halin sa kahitaasan. Ginapromisa ko nga sa inyo paghanda kag pagkadto nga mapangamuyuon sa mga sesyon sang pangkabilogan nga komperensya, mabatyagan ninyo ang mga sabat sa inyo mga kabalaka, kag mahibal-an ninyo nga ang “mga kamot sang langit” ara sa inyo.

Magtuo nga ang inyo Amay nga Langitnon nagahambal sa inyo. Nagahambal Sia! Tugoti nga ang inyo pagtuo sa Iya kag sa Iya Pinalangga nga Anak magbulig sa inyo nga buksan ang tabon kag batunon ang tingug sang inyo Amay. Nagapamatuod ako nga ara Sia dira kag nagapalangga sa inyo labaw pa sa mapabutyag sang mga pulong.