Ɔsor Egya Pɛ dɛ Ɔkasa kyerɛ Wo

Adam na Eve na hɔn a wɔbɔtoa do nyinara no, ɔbɔfo kyerɛkyerɛɛ dɛ, “Nu woho na bɔ Nyankopɔn ne dzin frɛ no wɔ Ɔba ne dzin mu daapem” (Moses 5:8).

Jesus kyerɛkyerɛɛ dɛ: “Hom mbisa, na wɔbɛma hom; hom nhwehwɛ, na hom bohu; hom mbɔ mu, na wobobue hom” (Matthew 7:7). “Sɛ ebɔ mpaa a, … bɔ mpaa ma w’Egya … wɔ kokoa mu” (Matthew 6:6). “Dɛm ntsi hom nsɔr kwan yi do: Hɛn Egya a ewɔ sor, wo dzin ho Ntsew” (Matthew 6:9).

Jesus kɔr do bɔ mpaa maa N’Egya. “Ɔkɔr bepɔw bi mu kɔbɔ mpaa, na ɔkɔr do bɔɔ mpaa maa Nyankopɔn anafua no nyinara” (Luke 6:12). “Na … ɔkɔr bepɔw bi mu kɔbɔɔ mpaa” (Mark 6:46). “Na wɔbaa bea a wɔfrɛ no Gethsemane: na ɔsee n’esuafo no dɛ, Hom ntsena ha, ber a Mobɔ mpaa” (Mark 14:32). Mbeamudua do no, Jesus bɔɔ mpaa maa nsordaafo no a wɔbɔɔ no mbeamudua mu no: “Egya, fakyɛ hɔn; osiandɛ wonnyim dza wɔreyɛ” (Luke 23:34).

Kyerɛwsɛm no tu hɛn fo dɛ “bɔ mpaa aber nyina” (Luke 21:36; 2 Nephi 32:9; 3 Nephi 18:15; Nkyerɛkyerɛ na Ahyɛmudzi 10:5; 19:38; 20:33; 31:12). “Enye Ewuradze mfa apam wɔ biribiara a ebɛyɛ ho, na obegya wo akɔ papa ho” (Alma 37:37). Ɔka ho no, “yɛdze ndaase na ayɛyi nyina a [hɛn] kra wɔ tum dɛ obenya” (Mosiah 2:20), hu dza hɛn Egya yɛ ma hɛn nyinara.

President Russell M. Nelson kyerɛkyerɛɛ mu dɛ: “Sunsum mu gyedzi wɔ ɔwoara wo mu hyɛ ase sɛ ihu dɛ da fofor biara yɛ akyɛdze fi Nyankopɔn hɔ. … Ɔkora hɛn ofi ber to ber na ɔwowaw hɛn fi ber to ber (hwɛ Mosiah 2:21).”

Nephi kaa dɛ, “Na sɛ hom ritsie Sunsum no a ɔkyerɛkyerɛ nyimpa ma ɔbɔ mpaa no a nkyɛ hom bohu dɛ ɔsɛ dɛ hom bɔ mpaa; osiandɛ sunsum bɔn kyerɛkyerɛ nyimpa ma ɔmmbɔ mpaa, mbom ɔkyerɛkyerɛ no dɛ onnyi dɛ ɔbɔ mpaa” (2 Nephi 32:8).

Christ Orinyan Jarius ne Babaa no, nhwehwɛ mu, Greg K. Olsen yɛɛ nsaano mfonyin no

Yɛdze Hɛn Agyenkwa ne fasusu na abɔfo hɔn afotu na nkɔnhyɛfo fi mfe ɔha ɔha mu abɛsen no, yenyim no pefee dɛ yɛbɔ mpaa daa daa dze kyerɛ hɛn enyisɔ ma hɛn nhyira, na dɛ yɛakora mpaabɔ wɔ hɛn akoma mu aber biara. Yɛwɔ asodzi dɛ yɛnye hɛn Egya dzi nkɔmbɔ.

Na enyimnyam mu ara, hɛn Ɔsor Egya bua hɛn mpaabɔ. Asɛmbisa wɔ hɛn ɔnnkyebo wiadze yi mu nye dɛ, yesi dɛn nya na yɛtse nyiano, akwankyerɛ, na awerɛkyekyer a ofi hɛn Egya hɔ no ase yie?

Me mfe eduosoun na no mboree nyinara mu no, minyim dɛ hɛn Egya kasa kyerɛ hɛn. Yɛnnyɛ ankonam. Ɔsor abɔfo hwɛ hɛn do na wɔboa hɛn ber a yɛhwehwɛ dɛ yɛbɛka Agyenkwa no do.

Yerinya hɛn mpaabɔ ne nyiano no, hɛn gyedzi wɔ hɛn Ɔsor Egya na Ne Ba Jesus Christ mu no na ɔhyɛ ase. Jesus kaa dɛ, “Mma nnsuro, gye dzi ara” (Mark 5:36). Yɛwɔ awerɛhyɛmu wɔ No mu, yɛbɔ mbɔdzen ankasa dzi ne mbrasɛm do, na yɛhwehwɛ Ne nsa wɔ adze nyinara mu. “Na biribiara nnyi hɔ a nyimpa nam do fom Nyankopɔn … kã hɔn a wɔnngye nnto mu dɛ ne nsa wɔ biribiara mu, na wonndzi ne mbrasɛm do” (Nkyerɛkyerɛ na Ahyɛmudzi 59:21).

Nyankopɔn ne nsa wɔ hɛn abrabɔ mu no nnkyerɛ dɛ Ɔno na ɔma bɔn anaa esian huhu ba hɛn wiadze mu. Mbom, ɔkyerɛ dɛ wɔ wo nkõdzen na nsisi ber mu no, Obegyina wo nkyɛn, ahyɛ w’ahom dzen, akyekye wo werɛ, na “obehyira wo wɔ w’amandzehu mu ma eesi wo yie” (2 Nephi 2:2).

Ber a yenya gyedzi wɔ No mu na yedzi Ne mbrasɛm do no, ɔbɛyɛ hɛn ntɔyɛɛ dɛ yesũa dɛ yetsie Ne ndze yie.

Fankwa 1993 mu no, m’afe a nna odzi kan dɛ Wiadze Mfɛndzanan Tumdzifo no, President James E. Faust (1920–2007), a nna ɔkã Asomafo Duebien no hɔn Quorum no ho, too nsa frɛ emi na me yer, Kathy, dɛ yɛnye no nkɔ Brigham Young Sũapɔn mpaabɔsom bi. Kae, 1993 yɛ ber a nna abaefo foon, social media, na internet nntahyee.

Ne kasaa, a wɔato no dzin “The Voice of the Spirit,” mu no, President Faust bɔɔ kɔkɔ dɛ: “Hom ebusuasantsen mu no hom bɛtse ndze horow piinara a wɔrekã kyerɛ wo mbrɛ ibesi bɔbɔ bra, kwan a ebɛfa do enya w’akɔndɔdze, na mbrɛ ibesi benya dza erohwehwɛ nyinara. Hom benya tɛlɛbihyɛn channel ahaenum wɔ hom nsa ano. Software asorɔtow, kɔmputa nkitahodzi horow, database horow na bulletin boards, desktop publishing, satellite ɔfama, na nkitahodzi network horow dze nsɛm bɛhyɛ hom do mbordo. … Ndze a otwar dɛ isũa dɛ ibetsie nye Sunsum no ne ndze.”

President Boyd K. Packer (1924–2015), Asomafo Duebien no hɔn Quorum ne President, kyerɛkyerɛɛ fa ndze, ketseaba bɔkɔɔ no ho ber a ɔkyɛɛ John Burroughs, obi a oeetu no ho esi hɔ dɛ obosua ɔdomankoma abɔdze no suahu, ber a nna ɔnye n’anyɛnkofo nam enyigyebea bi a dɔm ahyɛ hɔ mã. President Packer ne nsɛm nye yi:

“Kuropɔn abrabɔ a ɔrokɔ do ndze horow do no, [Mr. Burroughs] tsee anoma bi no ndwom.

“Ogyinae na otsiee! Nna hɔn a wɔka no ho no nntsee. Ɔhwɛɛ noho aporɔw. Obiara nnhyɛɛ no nsew.

“Ɔhaw no dɛ obiara nntum nntse biribi a ɔyɛ dɛw ara yie dɛm.

“Oyii dadze sika fi no kotoku mu na ɔtoow no wɔ mframa no mu. Ɔtɔɔ anamɔnkwan no do na ɔgyegyee, a ngyegyee no ano nnyɛ dzen nnkyɛn anoma no ndwom no biara. Obiara daan noho, wɔtsee ɔno!

“Ɔyɛ dzen dɛ ebɛtsew kuropɔn mu ndze horow efi anoma no ndwom ho. Naaso ibotum atse. Ibotum atse no pefee sɛ etsetse wo ho dɛ ebɛyɛ aso ama no a.”

President Packer ne nkyerɛkyerɛ fa Sunsum Krɔnkrɔn no ho sii 1979 mu, mber a nna abrabɔ mu yɛ dzinn na wiadze ne dede no wɔ famu koraa kyɛn sesei.

President Nelson kyerɛkyerɛɛ dɛ, “Sɛ edze w’adwen nyina kɔ social media ndzɛmba do kyɛn dɛ ibetsie Sunsum no n’awɔse a, nna edze woho rehyɛ sunsum mu esian mu.”

President Faust kãa dɛ, “Sɛ yɛbɛtse Sunsum no Ne ndze a, otwar dɛ hɛnara so yebuei hɛn asowa mu, yɛdan gyedzi enyiwa dze ma ndze no ne fibea, na yɛhwɛ sor hann.”

Sunsum ndze yi ba hɛn adwen na nkãtse ebien no mu. “Na, hwɛ, mubodua Sunsum Krɔnkrɔn no a ɔbɛba wo do na ɔabɛtsena w’akoma mu no do akã akyerɛ wo wɔ w’adwen nye w’akoma mu” (Nkyerɛkyerɛ na Ahyɛmudzi 8:2). Tsie wo tsibowa—nyikyerɛ taa hyɛ ase fi hɔ.

Fa Gyedzi Akoma Bɔ Mpaa

Nyiano na Sunsum mu nkenyan nnyɛ nnhyɛ. Yɛbɔ mpaa na yɛdze gyedzi akoma tweɔn. Nyiano binom remmba abrabɔ yi mu, naaso atseneneefo no dze, Ewuradze dze N’asomdwee behyira hɔn daa (hwɛ John 14:27). Ɔtaa dɛ nyiano ba ber a yɛrobɔ mpaa dze aboa hɔn a woetwa hɛnho ehyia. Ɔyɛ a, wɔba “nsensaneeba tsia nsensaneeba (Nkyerɛkyerɛ na Ahyɛmudzi 98:12).

Ɔsor ndze no botum aba hɛn nkyɛn wɔ ber na bea a hɛn enyi nnda, mbom yenya ho kwan tsitsir wɔ mbea a hɔ yɛ dzinn na mbea krɔnkrɔn. Mo kommyɛ anapa mpaabɔ na adwendwen mu no, muhu nhyira horow soronko. Daa daa, ankorankor, biribiara ennsianka kyerɛwsɛm akenkan dze Sunsum no ne ndze ba hɛn akoma mu tse dɛ ogya wɔ mber binom mu.

Ɔyɛ a, nkenyan no fi dza yɛrekenkan no mu pɔkyee, na ɔyɛ so a, dza yɛrodwendwen ho no dze nyiano ba wɔ ɔhaw soronko bi koraa mu. Kae Elder Robert D. Hales ne nsɛm: “Sɛ yɛpɛ dɛ yɛnye Nyame kasa a, yɛbɔ mpaa. Na sɛ yɛpɛ dɛ Ɔnye hɛn kasa a, yɛhwehwɛ kyerɛwsɛm no mu.”

Ber a wiadze ne dede na dza ɔdan enyi twa hɛn ho hyia no, Ewuradze ama No nkɔnhyɛnyi akwankyerɛ dɛ onsisi temple horow piinara. Ewuradze n’efiefi krɔnkrɔn yinom mu no, ber a yegya hɛn nkõdzen horow wɔ abowano na mbom yɛdze hɛn mpaabɔ, na haw horow hɛn mu no, wɔkyerɛkyerɛ hɛn mfesantsen ho no nokwar horow.

Afe kor abasen no, President Nelson maa hɛn anohoba a ɔyɛ nwanwa dɛ: “M’enuanom na nkyerɛbaa dɔfo, m’anohoba nye yi. Biribiara rommboa wo ma nnsuo dadze poma no mu yie nnkyɛn dɛ eretaa akɔsɔr wɔ temple dɛ mbrɛ wo gyinabew bɛma ho kwan. Biribiara rommbɔ woho ban yie ber a ihyia wiadze yi mu sum ehubɔwhubɔw no. Biribiara rennkenyan wo dasegye wɔ Ewuradze Jesus Christ na No Werdambɔ ho anaa ɔmboa wo ma nntse Nyankopɔn ne nhyehyɛɛ nwanwa no ase yie. Biribiara ronndwedwe wo sunsum yie wɔ yaw ber mu. Biribiara rummbue ɔsorsor yie. Hwee ara!”

Wiadze mfɛndzanan ehyiadzi biara dze nhyira beberee ba. Ebɔbira bosoom a ɔreba no, bio no, yebehyia mu wɔ wiadze mfɛndzanan ehyiadzi ase etsie Ewuradze ne ndze. Yɛba wiadze mfɛndzanan ehyiadzi ase a yɛabɔ mpaa na yesiesie hɛn ho. Hɛn mu kor biara dze, ɔhaw na atseetsee horow na nokwar nsɛmbisa wɔ hɔ. Yɛba bɛyɛ hɛn gyedzi wɔ hɛn Agyenkwa, Jesus Christ, mu fofor na yɛhyɛ hɛn tum a yɛdze tsĩa nsɔhwɛ dzen. Yɛba ma wɔkyerɛkyerɛ hɛn efi sor. Mobɔ hom anohoba dɛ ber a hom siesie homho na mpaabɔ mu ara hom ba wiadze mfɛndzanan ehyiadzi no, hom benya nyiano atsenkã ama hom haw horow, na hom bohu dɛ “ɔsor nsa” wɔ hom do.

Nya gyedzi dɛ hɛn Ɔsor Egya rekasa kyerɛ wo. Ɔrekasa kyerɛ wo! Ma wo gyedzi wɔ No mu na No Dɔba mu no mboa wo ma bue ntwamutam no mu na tse w’Egya Ne ndze. Megye dase dɛ Ɔwɔ hɔ na ɔdɔ wo kyɛn ma nsɛm tum kã.