Ete eke Heaven Oyom Nditiŋ Ikɔ nnɔ Fi

Eke Adam ye Eve ye kpukpru mme owo emi editienede mmɔ, angel kiet ama ekpep ete, “Mbufo eyekabare esit enyuŋ ekot Abasi ke enyiŋ Eyen ke nsinsi (Moses 5:8).

Jesus ama ekpep ete: “Ebup, ndien eyenɔ mbufo; eyom, ndien eyekut; ekɔŋ, ndien eyeberede enɔ mbufo” (Matthew 7:7). “Ke ini afo ɔbɔŋde akam, … bɔŋ akam nɔ Ete fo … ke ndibe” (Matthew 6:6). “Ebɔŋ akam ntem ndien ete: Ete Nnyin emi odude ke heaven, Yak ikpono enyiŋ fo” (Matthew 6:9).

Jesus ama esika iso ndibɔŋ akam nnɔ Ete Esie. “Enye ɔwɔrɔ ɔdɔk ke akamba obot ndibɔŋ akam, onyuŋ akaiso ofuri okoneyo ke eribɔŋ akam nnɔ Abasi” (Luke 6:12). “Ekem … enye adaha aka ke akamba obot ndibɔŋ akam” (Mark 6:46). “Ndien mmɔ edi ebiet emi ekerede Gethsemane: enye onyuŋ ɔdɔhɔ mbet esie ete, Mbufo etie mi, ke ini mbɔŋde akam” (Mark 14:32). Ke ini enye eke ɔkɔŋɔde ke cross, Jesus ama ɔbɔŋ akam ɔnɔ mbon ekɔŋ emi ekekɔŋde Enye: “Ete, dahado nnɔ mmɔ; koro mmɔ mifiɔkke se mmɔ enamde” (Luke 23:34).

Ŋwed Abasi eteme nyin ete “ibɔŋ akam kpukpru ini” (Luke 21:36; 2 Nephi 32:9; 3 Nephi 18:15; Doctrine and Covenants 10:5; 19:38; 20:33; 31:12). “Nneme kpukpru se oyomde ndinam nɔ Ɔbɔŋ, ndien enye eyeda fi usuŋ ke eti” (Alma 37:37). Ke ndidian do, nyin “inɔ kpukpru ekɔm ye itoro emi odude ke ukpɔŋ nyin” (Mosiah 2:20) ke ndikut kpukpru se Ete nyin anamde ɔnɔ nyin.

President Russell M. Nelson ama anam anwaŋa ete: “Uko-idem eke spirit ɔtɔŋɔ ke ndifiɔk nte ke obufa usenubɔk kiet-kiet edi enɔ otode Abasi. Enye ekpeme nnyin kusen kusen onyuŋ aŋwam nnyin osio ke ini kiet ekesim eken. (se Mosiah 2:21).”

Nephi ɔdɔhɔ ete, “Edieke afo edikpaŋde utɔŋ unɔ Spirit emi ekpepde owo ndibɔŋ akam, afo eyefiɔk ete ke ana nte afo ɔbɔŋ akam, koro idiɔk spirit ikpepke owo ndibɔŋ akam, edi enye ekpep enye ete ke inaha enye ɔbɔŋ akam” (2 Nephi 32:8).

Mbuk otode Christ Anamde Eyen-aŋwan Jairus Eset, otode Greg K. Olsen

Ye uwutŋkpɔ Andinyaŋa nyin ye mme item eke mme angel ye mme prophet ke ediwak isua, nyin itim ifiɔk ndibɔŋ akam kpukpru usen ndiwut esit ekɔŋ mbaŋa mme edidiɔŋ nyin, ye ndinim akam ke esit nyin kpukpru ini. Nyin imiyene ubiɔŋ utom ndineme nneme ye Ete nnyin.

Edi kpa mfɔn-ŋkan edi ke, Ete Heaven nyin ɔbɔrɔ akam nyin. Akpan mbume kiet ke uwem isɔŋ emi edi, didie ke nyin ikeme nditim mbɔ nyuŋ mfiɔk mme ibɔrɔ, ndausuŋ, ye ndɔŋesit emi otode Ete nyin?

Otode ke isua uwem emi awakde ebe Ata ye duop, ami mmɔfiɔk ke Ete nyin etiŋ ikɔ ɔnɔ nyin. Nnyin iduhe ikpɔŋ. Mbon Heaven ke ekpeme nyin enyuŋ eŋwam nyin nte nyin iyomde nditiene Andinyaŋa.

Ndibɔ ibɔrɔ ke akam nyin ɔtɔŋɔ ye mbuɔtidem nyin ke Ete nnyin eke Heaven ye ke Eyen Esie, Jesus Christ. Jesus ɔdɔhɔ ete, “Kufehe ndik, kam nim ke akpanikɔ” (Mark 5:36). Nyin ibuɔtidem ke Enye, inam ofuri ukeme nyin ndinim mbet, inyuŋ inyom ubɔk Esie ke kpukpru ŋkpɔ. “Iduhe ŋkpɔ emi owo eduede Abasi … mibɔhɔke mmɔ emi mmitiŋke ibaŋa ubɔk Esie ke kpukpru ŋkpɔ, miyuŋ inimke mbet Esie.” (Doctrine and Covenants 59:21).

Ubɔk Abasi ke uwem nyin iwɔrɔke ite ke Enye anam idiɔk mme akwa ŋkpɔ mmɔŋeyet etibe ke ererimbot nyin. Nte ededi, oro ɔwɔrɔ ete ke ini afanekɔŋ ye ini utuk fo, Enye eyeda ye afo, ɔsɔŋɔ ukeme fo, ɔdɔŋ fi esit, onyuŋ “anam ukut fo akabade edi udori fo” (2 Nephi 2:2).

Nte nyin inyenede mbuɔtidem ke Enye inyuŋ inim mbet Esie, nyin itim ikpep nditim ŋkop uyo Esie.

Ke ɔyɔhɔ Ɔfiɔŋ Usukiet ke isua 1993, akpa isua mi nte General Authority, President James E. Faust (1920–2007), ini oro enye ekedi owo Eboho mme Apostle Duopeba, ama okot ŋwan mi, Kathy ye ami ndibuana ye enye ke mbono emi ekenimde ke Brigham Young University. Ti ete ke isua 1993 ekedi isua mbemiso ŋkpɔ utiŋ-ikɔ, ŋkpɔ usuan etop eke ofum ye intanet edidu ke ofuri ebiet.

Ke etop esie, emi ibuot ikɔ ekedide “Uyo eke Spirit,” President Faust ama asian ete, Ke emana fo afo eyekop ediwak uyo emi edɔhɔde fi nte edidude uwem, nte edikopke inem, nte edinyenede kpukpru ŋkpɔ. Afo eyenyene mme ebiet ndise eke ekebe-ndise emi ewakde esim ikie ition ke ibuot nnuen-ubɔk fo. Eyedu mme nsio-nsio ŋkpɔ utom, ŋkpɔ utom eke computer, mme ebiet ubono etop, ye mme ebiet ukot mbuk ŋkpɔ-ntibe; eyedu ebiet umiŋ etop, emi edade ebɔ etop eto satelite, ye ŋkpɔ usuan etop emi edinɔde fi ediwak etop. … Uyo emi anade nte afo ekpep ndikop edi Uyo eke Spirit.”

President Boyd K. Packer (1924–2015), President eke Eboho mme Apostle Duopeba, ama ekpep abaŋa suŋ-suŋ, ekpri uyo spirit ke enye etiŋde abaŋa ifiɔk ukpep eke John Burroughs, owo uduot-obot, nte enye asaŋade ye mme ufan ebe ke aŋwa mbre emi ɔkɔyɔhɔde ye ediwak owo. Emi edi mme ikɔ President Packer ete:

“Ebede uyom uwem eke akwa obio [Mr. Burrough] ama okop nte inuen kiet ɔkwɔde ikwɔ.

Enye atuak ada onyuŋ akpaŋ utɔŋ! Mbon emi edude ye enye ikikopke. Enye ese akanare. Iduhe owo efen emi okokopde oro.

Oro ama afina enye ete ke kpukpru owo eyenana ŋkpɔ ekeyede ntem.

Enye osio okuk ke ekpat esie onyuŋ otop esin ke ofum. Okuk oro edimia ke mben esa onyuŋ anam uyom, edi ikisɔŋke uyo ikan ikwɔ inuen oro. Kpukpru owo ewɔŋɔre iso; mmɔ ekeme ndikop uyom oro.

“Enye edi ɔkpɔsɔŋ ŋkpɔ ndibahade uyo ikwɔ inuen nsio ke ofuri uyom eke akwa obio. Edi afo emekeme ndikop uyom oro. Afo emekeme ndikop enye mfɔn-mfɔn edieke afo ekpepde idem fo ndikpaŋ utɔŋ nnɔ enye.”

Ukpep-ŋkpɔ President Packer kabaŋa Edisana Spirit ekeda itie ke isua 1979, ini emi uwem ekenehede odobo ndien uyom ererimbot ikikponke nte enye edide idahaemi.

President Nelson ama ekpep ete, “Edieke afo akpaŋde utɔŋ ɔnɔ etop otode ŋkpɔ usuan etop ofum akan nte afo akpaŋde utɔŋ ɔnɔ etop ototde Spirit, ndien afo emenim spirit fo ke idiɔk ndaha.”

President Faust ɔkɔdɔhɔ ete “Edieke nyin iyomde ndikop uyo Spirit, ana nyin ŋko itat utɔŋ nyin, iwɔŋɔre enyin mbuɔtidem ise ebiet uyo oro otode, inyuŋ iwuk enyin ise heaven.”

Uyo Spirit emi edi ke mbiba ifiɔk ye ekikere nyin. “Ami nyeteme fi ke ekikere ye ke esit fo, oto ke Edisana Spirit, emi edidide ibine fi emi edinyuŋ iduŋde ke esit fo” (Doctrine and Covenants 8:2). Kpaŋ utɔŋ nɔ esit fo—eriyarare esiwak nditɔŋɔ do.

Bɔŋ akam ye Esit Mbuɔtidem

Owo ikemeke edinyi-nyik mme ibɔrɔ ye mme ntuk. Nyin ibɔŋ akam inyuŋ ibet ye esit mbuɔtidem. Ndusuk ibɔrɔ ididihe ke uwem emi, edi eke mme edinen owo, Jehovah ke ofuri ini eyenɔ emem Esie edi (see John 14:27). Ibɔrɔ esiwak ndidi ke ini nyin ibɔŋde akam ndiŋwam mbon emi edude ekpere nyin. Ndusuk ini, mmɔ esidi ke “udim ke udim, item ke item” (Doctrine and Covenants 98:12).

Uyo heaven ekeme ndidi mbine nyin ke ini emi nyin mmidotke enyin ye ke ebiet emi nyin mmidotke enyin, edi nyin iyekut ata nti ifet nyin ke mme ndobo ebiet ye ke ndisana ebiet. Ke ndobo akam ye ke ekikere esit mi ke usenubɔk, ami ŋkut mme utibe edidiɔŋ. Nditim ŋkot ŋwed Abasi kpukpru usen ke idem nyin, okposukedi oro edide se enamde kpukpru ini, ada uyo spirit esin ke esit nyin nte ikaŋ ke mme ini efen.

Ke ndusuk ini, ntuk esito se nyin ikotde, ndien ke mme ini efen, se nyin ikerede ke esit nyin ɔnɔ ibɔrɔ kabaŋa ata isio isio mfina. Ti mme ikɔ Elder Robert D. Hales: “Ke ini nyin iyomde nditiŋ ikɔ nnɔ Abasi, nyin ibɔŋ akam. Ndien ke ini nyin iyomde Enye etiŋ ikɔ ɔnɔ nyin, nyin iduŋɔre ŋwed Abasi.”

Nte uyom ye ndutime ererimbot akanade nyin okuk, Jehovah eteme prophet Esie ete ɔbɔp ediwak temple. Ke ndisna ufɔk Jehovah emi, nte nyin ikpɔŋde mme mfana nyin ke esien edi iduk esit esie ye akam ye afanikɔŋ nyin, eyekpep nyin nsinsi akpanikɔ.

Ke isua kiet emi ebede, President Nelson ama ɔnɔ nyin akwa eŋwɔŋɔ emi; “Ndima nditɔ eka mi irenowo ye iban, emi edi eŋwɔŋɔ mi. Nkpɔ ndomokiet idiŋwamke mbufo ikan ke ndisɔŋɔ mmum esaŋ ukwak oro ŋkama ikan ndituak ibuot ke temple ke ini ke ini nte ndaha mbufo enyimede. Ŋkpɔ ndomo kiet idikpemeke mbufo ikan nte mbufo esobode mme ekim ke ererimbot. Ŋkpɔ ndomo kiet idimenekere ikɔ ntiense mbufo kabaŋa Jesus Christ ye Erisio-isop Esie mme ndiŋwam mbufo efiɔk ediye uduak Abasi ikan oro. Ŋkpɔ ndomo kiet idinɔhɔ spirit mbufo emem ikan oro ke mme ini ubiak. Ŋkpɔ ndomokiet idiberekede heaven ikan. Iduhe nkpɔ ndomo kiet!”

Akwa mbono kiet kiet ada edidian ekese edidiɔŋ edi. Ke ɔyɔhɔ ɔfiɔŋ Inaŋ emi edide, ini kiet efen, nyin iyesobo ke akwa mbono ndikop uyo Jehovah. Nnyin idi akwa mboho ke ima ikibɔŋ akam inyuŋ ibeŋe idem. Nnyin kiet kiet, iminyene mme akwa mfina ye mme mbume eke ɔwɔŋ-esit nyin. Nyin idi ndinam mbuɔtidem nyin ke Andinyaŋa nyin akabade edi obufa, inyuŋ isɔŋɔ ukeme nyin ndikan idomo. Nyin idi ndibɔ ukpep otode ke enyɔŋ. Ami nnɔ enwɔŋɔ ke nte afo odukde mme ikpehe akwa mboho ke ido akam, afo eyekop ibɔrɔ kabaŋa mme mfina fo, ndien afo eyefiɔk ete ke “ubɔk heaven” odoro fi ke idem.

Yene mbuɔtidem ete ke Ete eke Heaven ke etiŋ ikɔ ɔnɔ fi. Enye ke anam! Yak mbuɔtidem fo ke Enye ye ke Edima Eyen Esie aŋwam fi ndibahade ikpehe nyuŋ ŋkop uyo eke Ete. Ami ntie ntiense nte ke Enye odu onyuŋ ama fi akan nte ikɔ ekemede nditiŋ.