Samach non Nang a Mochen Kapas Ngonuk

Seni Elder Neil L. Andersen

Seni ewe Mwichen Engon me Ruemon Aposel

Mut ngeni om nuku non Samach non Nang me Noun we Achengicheng epwe anisuk ne sukano ewe eppet me angei mongungun ewe Sam.

Kich at me nengin noun Kot, sia aea fengen ewe fonufan mi towaw seni imwach non nang. Iei fansoun manauach iei, ew fansoun sipwe angei inisich, fini och seni ngaw, neni ewe mi kipwin, pwe [sipwe] sinei ne aucheani ewe mi och (Moses 6:55), amari ach nuku non ach Chon Amanau Jises Kraist me An Achasefan mi pin, me etiwa an Samach kokkoten pwapwa. Sia nom ikei pwe sipwe winiti usun Sam non Nang.

Me nuku ach chechemeni manauach me mwen ei manau, kich, fan ekkoch, sia pwositi ewe fonufan sia fen nikitano. Samach a fen ngeni kich ew niffangen ngun ach sipwe chok riri ngeni I me angei ourour, emwen, me ourur seni I. Kich mi sineiochu ei niffang; a iteni iotek.

Iotek ngeni Sememi non Nang

Ngeni Adam me Eve me meinisin ekkewe repwe tapweno mwirir, emon chon nang a ourour, “Oupwe aier me kokkori Kot non iten ewe Nau feinfeino” (Moses 5:8).

Jises a aiti kich: “Oupwe tingor, iwe oupwe angei, oupwe kutta, iwe oupwe kuna, oupwe fichifich iwe ewe asam epwe suk ngeni kemi” (Matthew 7:7). “Nupwen oua iotek, … iotek ngeni Sememi … non monomon” (Matthew 6:6). “Mwirin ei napanap iei minne oupwe iotek: Semach mi nonnom non nang, itom epwe pin” (Matthew 6:9).

Jises a soposopono ne iotek ngeni Seman. “A feita won ew chuk pwe epwe iotek, me sopwosopwono unusen ewe pwin me iotek ngeni Kot” (Luke 6:12). “Iwe … a feinno won ew kukkun chuk pwe epwe iotek” (Mark 6:46). “Ra feinno non ew neeni itan Gethsemane: iwe Jises a apasa ngeni noun kewe chon kuno, Oupwe mottiw ikei, nge ngang upwe feinno iotek” (Mark 14:32). Nupwen a nom won ewe irapenges, Jises a iotek fan iten ekkewe sounfiu ekkewe ra irapengesi I: “Semei, kopwe omusereno; Rese sinei met ra fori” (Luke 23:34).

Ekkewe pukefel ra ouroura kich pwe sipwe “iotek fansoun meinisin” (Luke 21:36; 2 Nifai 32:9; 3 Nifai 18:15; Doctrine and Covenants 10:5; 19:38; 20:33; 31:12). “Aurour ngeni ewe Samon non om foffor meinisin, iwe i epwe emmwenuk non öch” (Alma 37:37). Kapachetan, sia “awora unusen kinisou me mwareiti minne unusen pochokunen ngunumi a tongeni amwochu” (Mosiah 2:20), ren ach esinna mettoch meinisin minne Samach a fori fan itach.

Preseten Russell M. Nelson a awewei: “Ach pwisin aucheani kich non pekin ngun fiti ach esinna pwe iteiten nesosor ew niffang seni Kot. … A tumunu kich seni ran me ran me anisi kich seni ew fansoun ngeni pwan ew (nengeni Mosaia 2:21).”

Nifai a apasa, “Pun ika oupwe ausening ngeni ewe Ngun minne a aiti emon aramas pwe epwe iotek, oupwe sinei pwe mi auchea oupwe iotek; pun ewe ngun mi ngaw a aiti emon aramas pwe esap iotek, nge a aiti i pwe mi auchea esap iotek” (2 Nifai 32:8).

Ren ewe minen awewe an ach Chon Amanau me ewe ourour an chon nang me soufos non unusen fansoun, sia fatoch ne sinei pwe sipwe iotek iteiten ran ach sipwe apasa ach kinisou fan iten ach feioch, me awora iotek non netipach fansoun meinisin. A wor rech ewe wis ach sipwe porous ngeni Samach.

Nge met a kon ning, Samach non Nang a ponuweni ach iotek. Ew ekiekochun kapaseis non ei fonufan iei, ifa usun sipwe angeiochu me weweiti ekkewe ponuwan, emwen, me ourur ra feito seni Samach?

Me non manauei mi nap seni fik ier, Ua sinei pwe Samach a kapas ngeni kich. Sise akanemon. Chon nang ir mi tutumunu kich me anisi kich nupwen sia tapweno mwirin ewe Chon Amanau.

Ach angei ponuwan ach iotek a poputa ren ach nuku non Samach non Nang me Noun we, Jises Kraist. Jises a apasa, “Kosap nuokus, kopwe chok nuku” (Mark 5:36). Sia nuku non I, fori ach tongeni ne aneasochisi ekkewe annuk, me kutta Poun non mettoch meinisin. Esap me non och mettoch aramas ra asonga Kot … tiwenon chok ekkewe ra pwäratä poun non mettoch meinisin, me aneasochi an annuk” (Doctrine and Covenants 59:21).

Poun Kot non manauach esap wewen pwe I a fori ekkewe mettoch mi ngaw ika efeiengaw minne ra nom non ach fonufan. Nge inamo, a wewen pwe non om fansoun weires me pungungaw, I epwe uta reom, apochokuna om tufich, oururuk, me “epinano om kewe riaffou pwe repwe om feioch” (2 Nephi 2:2).

Kutta Mengungun

Nupwen a wor ach nuku non I me aneasochisi An annuk, sia pwisin kaeo ne auseningochu Mongungun.

Non September 1993, aewin ierin ai emon Meinap Unus, Preseten James E. Faust (1920–2007), atun an emon chon ewe Mwichen Engon me Ruemon Aposel, a etiwa punuwei, Kathy me ngang aupwe fiti i non ew mwich non Brigham Young University. Chechemeni, 1993 ina me mwen chewnon tufichin smartphone, social media, me ewe internet.

Non an afanafan, itenapan “Ewe Mongungun ewe Ngun,” Preseten Faust a fonou: “Non ami tappin fansoun oupwe rokopwanino ren chommong mongungu repwe ureni kemi ifa usun oupwe manau, ifa usun oupwe emenemenochu ami mochen, ifa usun oupwe ani meinisin. Epwe wor remi arap ngeni nime puku channel ren tv ren autun poumi. Epwe wor sokopaten software, pekin kampiuter, database, me bulletin board; epwe wor desktop epwe kawor, pekin satellite, me network ren pekin porous epwe opwoususu kemi ren porous. … Ewe mongungu oupwe kaeo ne aneasochis ngeni ina ewe mongungun ewe Ngun.”

Preseten Boyd K. Packer (1924–2015), Presetenin ewe Mwichen ekkewe Engon me Ruemon, a aitikich usun ewe mosonosonen, kukkunun mongungun ewe Ngun non an achema ew mettoch mi fis ngeni John Burroughs, emon chon sinenap ren pwisin fisitan mettoch, nupwen an fetan ren chienan non ew park mi arongorong. Ikkei an Preseten Packer kapas:

“Asan ekkewe neuwen manauen teninimwe [Mr. Burroughs] a rong konun emon machang.

“A kouno me ausening! Ekkewe ir mi nom ren rese rong. A nenefetan. Ese pwan wor emon a apareni.

“A aosukosuka ren an meinisin ir mi miti seni och mettoch mi fokkun ning.

“A angei efou foun senis seni ne pokitan me a onuppa me non ewe asepwan. A ku ewe simen ren ew ring, ese noumwong seni ewe konun ewe machang. Meinisin ra kun; ir mi tongeni rong ena!

“Mi weires ach sipwe eimu seni ekkewe neuwen ewe teninimw mi arongorong ewe konun emon machang. Nge ami mi tongeni rong. Ami mi tongeni rongorongoch ika oupwe aiti inisimi ne ausening ngeni.”

An Preseten Packer osukun usun ewe Ngun mi Fel a fis non 1979, ew fansoun nupwen manau a ekis nuwa me ewe akurangen ewe fonufan a kon neukukun nap seni iei.

Preseten Nelson a aiti kich, “Ika oua nikitu ngeni mosowen social media nap seni ami ausening ngeni ewe mongungun ewe Ngun, iwe oua annomu inisimi non feiengawen ngun.”

Preseten Faust a apasa, “Ika sipwe ausening ngeni mongungun ewe Ngun, mi namot sipwe suki mesach, akunnu ewe mesen nuku ngeni ewe popun ewe mongungu, me nikitu ne neneta nang.”

Ei mongungun ewe Ngun a feito ngeni ir me ru ach ekiek me ach memef. Upwe urenikemi non ami ekiek me non netipemi, me ren ewe Ngun mi Fel, minne epwe feito remi me epwe nom non netipemi (Doctrine and Covenants 8:2). Ausening ngeni ami memef—fan ekkoch pwarata a poputa me ikena.

Fansoun an churi ewe imwen Nengin me At non Markina City, Philippines, non February 2024, Elter Anderson a aiti ekkewe serafo pwe ir noun Kot: “I mi tongei kemi. Me oua tongeni tingor ngeni I. Epwe penuweni ami kewe iotek.”

Iotek ren ew Netipen Nuku

Ponuwan me memef sise tongeni echimwa. Sia iotek me sia witiwit ren ew netipen nuku. Ekkoch ponuwan resap fis non ei manau, nge ngeni ekkewe mi tupwon, ewe Samon epwe tinano An kinamwe fansoun meinisin (nengeni John 14:27). Ponuwan fan ekkoch ra fis nupwen sia iotek ne anisi ekkewe mi nom unukuch. Fan ekkoch, ra fis ekis me ekis, annuk me annuk” (Doctrine and Covenants 98:12).

Ewe mongungun nang a tongeni feito ngeni kich non fansoun sise asuku me non neni sise asuku, nge sia kuna ach wesen auchean tufich non neni mi mosonoson me neni mi pin. Non mosonosonun ukusosorun ai iotek me ekipwich, ua kuna feioch mi sokkono. Ew ai pwisin annea ekkewe pukefel ese tatakis, nupwen fan ekkoch fis non tetten, a wato mongungun ewe Ngun non netipach usun ekkei non ekkoch fansoun.

Fan ekkoch, ekkewe memef ra wesewesen feito seni met sia anneani, me pwan fan ekkoch, met sia ekipwichi a wato ew ponuwan ew ourek mi fokkun sokkono. Chechemeni ekkewe kapas an Elter Robert D. Hales: “Nupwen sia mochen kapas ngeni Kot, sia iotek. Me nupwen sia mochen Epwe kapas ngeni kich, sia kuta ekkewe pukefel.

Usun ewe akurang me osukosukan ewe fonufan me rokopwani kich, ewe Samon a emweni Noun soufos are repwe aueta chommong tempel. Non ekkei imwen ewe Samon mi pin, nupwen sia nikiti ach weires nukun ren ach tonong fiti ach iotek me aurek, sia kaeo ekkewe ennetin fansoun esemuch.

Ew ier a no, Preseten Nelson a ngeni kich ew amwararen pwon: “Pwi me fefinei achengicheng, iei ai pwon. Ese wor met epwe tongeni anisi kemi epwe kon nap ren ami oupwe kamowchunuk ngeni ewe wok mecha me nukun chok oupwe fel ngeni non ewe tempel iteitan ren ukukun ami tongeni. Ese wor met eppeti kemi epwe kon nap nupwen oua tonong non toputopun kirochun ei fonufan. Ese wor met epwe apochokuna ami kapasen pwarata ren ewe Samon Jises Kraist me An we Achasefan ika anisi kemi oupwe weweiti an Kot we amwararen kokkot epwe kon nap. Ese wor met epwe tongeni ekinamwei ngunumi epwe kon nap non fansoun ami metek. Ese wor met epwe suki nang epwe kon nap. Ese wor!”

Ew me ew mwichenap a wato kapachetan chommong feioch. Non ewe maramen April epwe feito, epwe pwan fis sefan, sipwe chu non mwichenap ne ausening mongungun ewe Samon. Sia feito ngeni mwichenap ren ach sia fen iotek me mwoneta. Ren emon me emon kich, moi wor ekkewe weiwietan noninen me ennetin kapaseis. Sia feito ne asofosefani ach nuku non ach Chon Amanau ,Jises Kraist, me apochokuna ach tufichin ungeni sossot. Sia feito sipwe kaeo seni asan. Ua pwon ngeni kemi pwe nupwen oupwe monneta me feito fiti iotek ngeni ekkewe kinikinin mwichenap, oupwe mefi ponuwen ai aurek, me oupwe sinei pwe “poun nang” a nom womi.

Oupwe nuku pwe Sememi non Nang mi kapas ngeni kemi. I mi kapas ngeni kemi! Mut ngeni om nuku non I me Noun we Achengicheng epwe anisuk ne sukano ewe eppet me angei mongunun ewe Sam. Ua pwarata pwe I mi nom me tongeok nap seni kapas a tongeni apasa.