“Gura Golnagrad,” Liahona, Feb. 2025.
Gubin e pul Liahona Fulweg e thin, February 2025
“Gura Golnag Rad”
Fare ulung ko chon e gol ko fare Tathapeg e ba chiib nbay nikan micheg nra golnag doewdad nge y’al rodad ko rofan e rran ko Faskoyam’.
Kibeyib ngan’ug ko pi rran nem npan nigub captain ko airlines niguma murwel riy nge n’uw npan.
Bayreb, niguma chingagnag nge mada’ nga Germany ko 11:00 a.m. mug sulweg nge mada’ ngabuut’ nga California ko 1:00 p.m. u lan t’areb e rran. Ran chagliy ko ngiyal’ nikan chuw nge ngiyal’ nikan taw, mran dag ni sukuki ninge yan u lukngun e maday ko Atlantic nge continent u North American e kemus nl’agrow e awa. Fare Boeing 747 e bpapay, machane kad’ani gel e bpapayriy! Ra ninsap ngay, makinyan riy ni 11 e awa, nibe yan u rogon ko nifeng, nge milekag ko 5,600 miles (9,000 km).
Nibochan nigamad ma chingag ko ngael, fare yal’ e darma yan ngabuut’ npan nigamad bay u dakaen e nifeng. Gamadma falflaen’ ko tomilang u Germany nge mada’ nga California.
Machane bthil rogon nikan weliy, npan, nug tawgad nga Germany. Demturug nig chuwgad u m’on ko misi’, npan nug changaggad ngeak, ma thig ko yal’ ngabuut’ e yib ni papay, dawrug na’abgad mabalayal’.
Npan niguma changag, ma iyib e amithngin ko ya’l rog e falngin ko y’an e fayleng nge rogon yerman e tin nike sunumiy Got. Ndemturug nigubay u dakaen e nifeng, u fathik e lumar, bmich u wun’ug nra sul biyay e yal’ ngalang, me suguy mad ko tomilang nge adag u fathik e milekag romaed. Rogon e chingag nigamad be tay bmarwar rogon e yal’ nibe thig nib papay faba sag’al, machane gumnang ni yal’ e darma thil, nib dugilyarmen, ni yibe taga’ ngak u tharmiy.
Gube thamiy ni amargon Got. Nibochane rib mich u wan’ug e gonop rok Got nge fan e murwel Rok, ma yib e gapas nge falflaen’ ngog npan rag tafiniey nag rogon e yofas rodad u roey. Gadad fpak Got. Gadead ba tu’uf Rok. Manang e tinibe buchbuch rodad. Be soen ninge ayuwegdad. Pi thin ney nib riyul’ e tharma thil, demturug nf’anra thilthil boch binen u charendad.
Gadad gubin nigadma yan u fathik e lumar, kirbaen’, e boch banen’ nibe gathay e gapas rodad. Kug falflaen’ ko thin nib riyl’ nibay kanawo’en e tomilang riy (muguy u Doctrine and Covenants 88:6–11). Yesus Kristus e ir fare tamilang nge fare yafos ko fayleng. Nibochane fare maligach Rok ni tay, make yib e athapeg ngodad ngam’on, ninge yog fare tomilang ngodad u fathik e rran nibay e lumar riy u lane kanawo’ rodad, nge micheg nikan tay nra gel e manggil.
“Ba’adag e Fayleng Rok”
Yesus Kristus e karimus ni yogo’ir m’on ni machalbog ni yan u dakaen e fayleng. Nibochane machalbog e yofas Rok, e Ir e dariy ba malfith nra fulweg. Machane rogon gelngin e adag rok ngodad, me pi’ e yofas Rok ngodad nge gubin pfak Got ninge bing e mab ko yofas ni manemus.
Demturug ko mang e ra’i yoeg moniyan’ ngodad, ma dari’ bagdad nrayog ninge rin’ e tin nike rin’ fare Tathapeg nfan ngodad. Dariy bagdad nran siyeg e n’agfan ngak. Dariy bagdad nibay nib palog “ma oewchen e piʼin nib ʼuf e ra sobutʼaenʼraed” (2 Nephi 1:15).
Bin th’abi ga’ e taw’ath e ke yib ko fare gelngin e Bayul ni tay Yesus Kristus. Nibochane e maligach ni tay fare Tathapeg u dakaen Gethsemane nge Golgotha, e manang rogon nra ayuwegdad u fathik e gafgow rodad (muguy u Alma 7:12).
“Dariy ban’en nibe rin’ ni gathi fan ko fayleng; ya rib t’uf e fayleng rok’, ni pii’ e pogofan rok’ ni gomanga yog ni nge leak gubin e gidii’ ngak” (2 Nephi 26:24).
Yesis Kristus e ir gelngindad!
Be pi’ pa’ ngodad.
Me fulweg yarmen.
Me ayuweg.
“Napan ni [bayul nag fare] Tathapeg fan e gidiiʼ ni gubin, ke bing kanawoʼen ni gidiiʼ ni be leak e rayag ni nge gol nag, me piiʼ gelnginrad, me bayul nag rad u gelngin, ” ni yoeg President Russell M. Nelson.
Re gelngin nem, nwoed e yal’, e gubin ngiyal’ nibay u roem. Ndarma thil. Ran duguliy’anuy ningan laek fare Tathapeg mwoed nikan chuw ko tilmar kanin ko gin nibay e yal’riy, gin nrayog ninge yoeg e taw’ath rok Got ngodad, nge amithin e mangil, nge adag. Gumnang nra boran riy, nigadra sap nga tomur mra sug gumirch’andad ko falflaen’ nike michan’dad ngak Yesus Christus nge adag Rok ni’i pi’ gelngindad.
“Msuled ngog”
Fare Babiyor ku Mormon e weliy mornga’agen e girdii’ nir pired u lan dalip e rran nib tilmar u m’on nin Kruth nag fare Tathapeg. Gin nir piredriy nib tilmar e woed nibe yip’fan e tilmar nibe buchbuch rodad nibochane denen. Me rung’ag e pich’anef liman Kristus nibe piningrad ngar bad u fathik e lumar nge tomilang:
“Dab mu chelgaed ngam suloed ngog, magmed kalngaenʼ ko pi denen romed, me michaenʼmed, ni ra yog nug gol nagmed?” (3 Nephi 9:13).
“Piiʼed ngog ni maligach ni mʼingaenʼ nge kalngaenʼ” (3 Nephi 9:20).
“Ni faʼan gimed ra kalngaenʼ magmed sul ngog u poloʼ i gumʼirchaʼmed” (3 Nephi 10:6).
Fare Tathapeg rodad e ku amorgon nibe piningdad ko tiney e rran ko chiney nf’an gadra malbach u fathik e lumar. Woed rogon e yal’ nima yib ngalang ko gubin e rran, gubin ngiyal’ nigadra kalngan’, mran bi’ech nag kanawo’en rodad, woed ningad dared biyay riy u so’omon.
Dar yip’fan nib moem e pin’ey. Kalngan’uy e be yip’fan ningan thil, machane darma buchbuch nib papay. Bay e falflaen’ riy, machane kalngan’uy e bay e “kirban’ riy” (2 Corinthians 7:10). Woed nib t’uf nigadra yoeg e tin nikad rin’ed nib kireab, migad ning e n’agfan ngak Got nge pich’an nikad kireb niged laniyan’rad. Machane bin th’abi ga’fan, e bt’uf nigadra sap nag “ni gamaed manang ni rib mutrug mab riyulʼ, ni bachan fare Kan ni Thothup rokʼ,” that we may experience “niʼir e ke gagyeg nagmaed kug thil gaed, ara lan e pi gumʼirchaʼ romaed … ni ke chuweg romaed e athap ko ngongol ni kireb” (Mosiah 5:2).
Rogon e tinef e thilthil e bn’uw e kanawo’ riy, machane bin so’omon e tawo’ nigara fek, “ya musap gaed, chiney e ireray e re ngiyalʼ” i nʼen nge re rran ni ngam thap gaed riy, nge “ma rib gur ni yira fek fare woʼen e bayul iyib ngomed.” (Alma 34:31).
U fithik’ e yul’yul’ ko kalngan’ rodad, Got nike micheg nag nra n’agfan ma dabki puguran e denen rodad. Npan nra mom’aw rogon nigadra patlin e denen rodad, migad laminag e micheg nikad ted ngak fare Somoel rodad nima n’agfan e denen rodad ere rayog ningad n’agedfan e denen rok boch e girdii’.
“Ra kireb e y’al rodad npan nra’ud denengad,” binen ni’i fil President Boyd K. Packer (1924–2015). “Machane bay binen ngathi woed doewdad, npanra m’ay e kalngan’uy, mwoed ndariy e faath nibochane fare Bayul ni tay Yesus Kristus.”
Golnag Bm’on nib Ma’ew, nike fal’agin Carl Heinrich Bloch
“Mchuchgur Nagrad Ngog”
Fare Tathapeg e ir e Tapow’iy ko Gol. Reb nike dag gelngin e gol nima tay e bay mornga’agen u lan fare Babiyor ku Mormon, u kakrom ni’i mo’riy u Mariken:
“Bay e piʼin nib mʼar u fithikʼmed?” Me fith. “Ma gimed fekraed iyib ngog ngaray. Bay e piʼin nib mugutgut, fa malmit, fa yaf, fa bilis, fa daraw, fa piʼin ni ke ul ayraed, fa piʼin nib baling, fa piʼin ni demutrug e mʼar ni bay roraed? Mi gimed fekraed iyib ngaray ngug gol nagraed, ya kug runguymed; ya lan ngorngoreg e ke sug ko murnguy. …
“Me yibi buch u napʼan ni non ni aray rogon, ma gubin fare ulung i gidiiʼ, ma ranoed u taʼabang ni kar feked e pi mʼar nge liliy roraed, nge mugutgut roraed, nge malmit roraed, nge maʼay roraed, nge gubin e piʼin ni demutrug e miti mʼar ni bay roraed; me gol nagraed ni gubin e piʼin nni fekraed iyaen ngakʼ” (3 Nephi 17:7, 9).
Fare Tathapeg e gubin ngiyal’ nra golnag be’ “ni demutrug e mʼar ni bay roraed,” u so’omon nge tomur ko fare Fulwegyarmen, e be yip’fan gelngin nrayog ninge golnag e ya’l rodad. Gubin e gol ni’i pi’ e ii tabab fare chiib ko fare micheg ni tay nra buch ko doewdad nge y’al rodad ko rofan ko fare Fulwegyarmen, ni iraram e “rogon nima golnag urngin fare Somoel.”
Nriyul nibay boch e maybil rodad ko biney e yofas ndabni fulweg e thinriy nwoed rogon nigadbe athapeg, machane dabi paltin. Bay e rofan nra yib e gol, ni tilmar e dabichuw—machane re taw ko ngiyal’ nib t’uf— mra iyib fare tomilang.
Nwoed nike yoeg President Nelson: “Dabi patlin e mich rodad. Gumnang nfare Chitamangdad nu Tharmiy Heavenly nrib-lowan’ e manang ko mang e be rin’. Woed nigad manang e kireb nge amith rodad ko biney e yofas, ma Ir e be guy e falngin’dad nge rogon nrayog nigadra m’onog F’angadra maybil migad pi’ed fandad Ngak ko guman’ nge athamgil, ma gol nra yib u tharmiy e b’or ngiyal’ nra yib ngodad.”
Ndawri n’uw npan ni bpin rog, Harriet, nge gag e ug yebliyew e pich’an nrib t’uf romow. Gu yebliyew e ulung ko chon e pich’an niyadma taflay nrayog ningar ayuwegnedrad nge m’ay e m’ar rorad. Mab ngan’ug ninggoeg nf’anra dabi fal’ e taflay, ma fare Tathapeg era golnagrad me fekrad ngabang nibay e gapas riy. Fare gol nima tay fare Tathapeg rodad e bay gelngin nib gel ko boch e falay u fayleng, nra golnagdad ko rogon nigadbe thamiy, y’al rodad, nge doewdad. Yesus Kristus e ir e tapow’iy ko Tagolnigey ko biney e yofas nge manemus.
Walageg ni bpin nge pagal, nge fagar, rigube micheg ni murnguy ko Tathapeg, era bi’ech nag e denen roem, me pi’ gelngim ko mom’aw nibe yib, me taw’ath nigem ko athapeg, lowan’, nge gapas Rok. Gelngin e gubin ngiyal’ nibay uroem—ndabi chuw—demturug nf’an gadra palog rok, boch ngiyal’, nigadad be thamiy nikad paloggad ko adag Rok, tomilang, nge amithin.
Gube maybil ndabda patlined e magar ningad pi’ed ngak Yesus Kristus ko urngin nike pi’ ngodad. Wenig dam patlin nrigab t’uf rok, mag laminag e nen’ nike michegnag ngom ko manemus.
“Ma gomanga bing Got woʼen ngomed ni nge yog ni ngam baʼud gaed, u dakean e falfalaenʼ rokʼ Fak,” Yesus Kristus (Alma 33:23).
© 2025 ko Intellectual Reserve, Inc.Gubin nibay mat’won. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Thiliyeg e thin Ko Liahona ko gubin e pul, February 2025. Yapese. 19609 905