“Ak Mo Omekungil Er Tir”

Mla er a Elder Dieter F. Uchtdorf

Er a Chelechad er a Teruich me a Terung el Apostol

A urerel a Osobel el omekungil a chedaol uchelel e yaksok er a omelemolem el omekungil er a tech me a reng el ngii a merkid sel temel a Okiis er a Kodall.

Ak kmal dirk medengei a ikel bebil er a mekemanget el flight el blek ngarngii sera kureor el captain er a skoki.

Mle tal taem, e ak suebek el tuobed er a Dois er a teruich ma tal klok er a tutau, e mora California er a tal klok er a suebel er a osisiu el sils. Mesel mengaisisiu er a temel serak suebek el tuobed el mo er sel temel ak borngii, eng uai tial flight el loleiong er a Atlantic Ocean me a North America a uai dil ngilai a erul sikang. Sel Boeing 747 a bekerurt, eng di ngdiak el kuk kmal bekerurt! E sel mera er ngii, eng ngilai a teruich ma tal sikang, el ultuil er a eolt, el suebek er a 5,600 miles (9,000 km).

E le ki suebek el loiak a ngebard, me a sils a diak el ngelt sel temel tial flight. Aki bai somam sel dil ngarngii a sils er tial omerolam el ngara Dois el mo er a California.

Sel kuk kaieri el mo er a Dios, a kuk, kmal mle ngodech a teletelel. Me sel ki morael er a chadechesong, el suebek el bedul a ongos, ea sils a di mereched el ngmelt, e sel ki bo motebengir, eng mla mo klebesei.

Sel temel a ikal me kekemanget el flight, eng mo mechas a renguk sel kulbedebek er tial klebekelel a beluulechad ma blebelel a Dios. Me sel kim suebek a le klebesei, el kmal meral milekolk, e ak ungil medengei el kmo a sils a lmuut el mo ngmasech, e tial llomes a lmuut el mo er ngii e meskid a kleald ma klengar a beches el sils ruchei a lebo el merek a omeroled. Tial omerelel a ikal flight er ngak a uai lerulii ma sils a meioud el mo ngmelt malechub eng di mereched el mo ngmelt, eng di ngak a medengei el kmo a sils a di osisiu a teletelel, e diak el le mesim, e usbechall er a babeluades.

Ng di osisiu a renguk el kirel a Dios. E le ngak a kmal ungil medengelii a llemesel a Dios ma moktek el kirel a rokui el Blebelel, eng sebechek el lomelchesuar a deurreng ma budech sel kumdasu er tial klengar er kid. Kid a rengelekel a Dios. Ngii a betik a rengul er kid. Ngii a medengei a ikel tekoi el dechau. Ngii a keldmokl el mo olngeseu. A ikal klemerang a diak el mengodech, el locha bebil er a teletael meliuekl er kid a ngara uldikel e diak dodengei el kirel.

Kid rokui a mo chemau a meringel el teletael, klengit el reng, ma doumedednger el tekoi el melemall a budech er kid. Ak mereng a saul el kirel a ungil e meral tekoi er a klemerang ma llomes (mesa Doctrine and Covenants 88:6–11). A Jesus Kristo a llomes e klengar er a beluulechad. E le Ngii ma Melngakireng er Ngii a uchul, e ngarngii a ongiled el kirel a ngarmedal taem, e olngeseu er a rebebil er a ringel el chau, me a yaksok el mo mesisiich er a klengit ma kodall.

“Ngii a Betik a Rengul er a Beluulechad”

A Jesus Kristo a di chimol cherrungel e diak a kengtil el chad el mle kiei er a beluulechad. Ele ngii a mle cherrungel a klengar er Ngii, Ngii a diak a belsel er a kerekeriil. Ng uchul a beltikerreng el merkid, e Ngii a uldersii a Klengar er ngii el mo er a derta el chad ma rokui el rengelekel a Dios el mo mekengii a chesimer meng sebeched el kiei el mo cherechar e nguu a diak a ulebengelel klengar.

Meng diak el iior a ikel Diablong a soal a bo doumerang, eng diak a ta er kid el Osobel a diak e lak el sebechel el mo olsobel er kid. Ngdiak a ta er kid el tomer er ngii er sel krasia er a klausubes. Ngdiak a ta er kid el diak el lak el sebechel mo nguu a “chimal er a beltik er reng er ngii el mo mengeluolu” (2 Nephi 1:15).

Tial kot el ngarbab er a rokui el sengk a mo er ngii er sel mesisiich e olsobel el klisichel a Tngakireng er a Jesus Kristo. Eleng sel ringel el Osobel a mlo chemau er ngii er a Gethsemane me a Golgotha, Ngii a medengei el kmo ng mekerang e mo olsobel er kid e ngosukid er a ikel rokui el ringeled (mesa Alma 7:12).

Ngii a diak a ngeral loruul ng kmal di mo klungiolir rechad ra beluuelchad; le ngii el betik a rengul ra beluulechad, meng mle odersii a kelngar ngii me rechad bol sobel (2 Nephi 26:24).

A Jesus Kristo a klisiched!

Ngii a olengesu er kid.

Ngii a mesmechokl a tekoi.

Ngii a olsobel.

“A Osobel er a [lodersii a tngakireng er Ngii] el mora rokui el chad, e Ngii a milkengii a rael me tirkel mo oltirakl er Ngii a mo omekungil, e mesisiich, e nguu a klisiich er a mo suobel,” a President Russell M. Nelson milekoi.

Sel klisiich, a uai a sils, el blechoel ngarngii. Ng diak el mesim. Melilt el mo oltirakl er a blekeklel a Osobel a uai a dorael el tuobed er a iilkolk el mora dichel a sils, el ngii a sebeched el ngmai a klengeltengat er a llemesel a Dios, ungilreng, me a beltikerreng. Ak medai el kmo a tara klebesei, e kede mo omtab aikel bla deruul e mo mui er a oumerang saul el kmo ng mle klou a belkul sera de tibir el mo oltirakl er a Jesus Kristo me a chedaol betlkil a Rengul el mo oltekau e melisiich er kid.

“Mluut el me er Ngak”

A Babier er a Mormon ouchais el kirir a rechad el mla er a chelsel a iilkokl el edei el klebesei ruriul er a Osobel a le Medeel er a Kerus. Tial iilkolk el meliuekl er tir a sebechel el olechotel sel iilkolk er a reng el kid rokui a meruul er ngii eleng klengit a uchul. Me a rechad a rirengesii a Kristo el siotai er tirk el mo tuobed er tial iilkolk e mo soiseb er a Dichel:

“Diak mem luut el me er ngak, e bo mouuchel a rengmiu er a kengtmiu, e momult a rengmiu, me bol sebechek el omekungil er kemiu?” (3 Nephi 9:13).

“Modersii a klengiterreng ma ngariou el reng el tenget el me er ngak” (3 Nephi 9:20).

“Bo mouuchel a rengmiu e mo obult el me er ngak el meral ngarngii ra rengum” (3 Nephi 10:6).

A Osobel a odars a ikakid el osisiu el ongit el merkid er a chelechal taem sel bla deriid er a chelsel a iilkolk. Meng di uai a ngesechel a sils el lolechotel a uchelel a beches el sils, e sel bek el taem el douchel a rengud, e kede omuchel loba beches el sils.

Tiang diak el belkul a kmo ng beot. Ouchel el reng a belkul a bult, ea bult a diak el dil mereched el mo er ngii. Meng duerreng, a ouchel reng a uldimukl er ngii a “klengiterreng” (2 Korinth 7:10). Ng belkul a kmo ng kired el kongei e ouchais a klechitechetud, e olengit a klausubes er a Dios ma tirkel tir a dimlak dungil mo er tir. Sel kmal kirel, eng kired el osiik er “a Reng er a Rubak loba Rokui Klisiich,” me bo derellii “a klou el omengodech er a chelsel a … rengud, meng diak a uldesued el mo meruul a mekngit, e bai di mo blechoel meruul a ungil” (Mosiah 5:2).

Tial omengodech a mo melai a taem loureor kirel, engdi sel mnguu a kot el bakes, “a belsechel a kelsel a osebeliu” a omechelang, e “ng di mereched ea klou el tekoi er a rolel a osobeliu a mei er kemiu” (Alma 34:31).

Mesel meral ngarngii a rengud el louchel, a Dios yaksok el mo ousubes e diak el bo lolatk a kengtid. Mesel meringel er kid lobes a kengtid, e dolasem el mo oumerang er sel yaksok er a Rubak el mo ousubes e mesuub el mo ousubes er a rebebil me kid el dirrek.

“A reng er kid a metemall sel doruul a chelbirukl me a klengit,” ngulsisechakl a President Boyd K. Packer (1924–2015). “Meng diak el uai a teletelel a bedenged er a tech, e sel omerellel a ouchel a reng a mekedmokl,eng mo diak a ultil a telemall leng sel Tngakireng er a Jesus Kristo a uchul.”

Omekungil er a Euikeu el Sechal, mla er a Carl Heinrich Bloch

“Mngititerir el mei”

A Osobel a Mastang er a Omekungil. A tara kot el klebokel lolechotel sel klisichel a omekungil er Ngii a betik er ngii er a chelsel a Babier er a Mormon, er sel cheldecheduch el kirel a Urerel el ngara chuodel el Merikel:

“Ngarngii a resmecher er a delongeliu?” Nguleker. “Mngititerir el mei. Te ngarngii ar chitechut, me a lechub e te meiko me a lechub e te tiuach me a lechub e te sechudel, me a lechub e te chebedes, me a lechub e te chelisemsum, me a lechub e tirkel mechad, me a lechub e te chuarm er a ngii di lengerang? Mgititerir el mei me bo kumekungil er tir, leng mekente renguk er kemiu; a blil a klechubechub er a renguk a mla mo mui. …

“Me chelecha bocha lemerek el melekoi, ea rokui el chad a dimle ta el mekiis e mirrael mong lobengterir a rechederir el smecher me a re telemall er tir, me a resechudel er tir, lobengterir a re miko er tir, me a re mechad er tir lobengterir a rokui er tirke el meringel er a ngii di lengerang; me ngulmekungil er tir loudertang se lemei er Ngii” (3 Nephi 17:7, 9).

Bek el taem el Osobel a omekungil er a ngidil chad “el meringel er a ngii di lengerang,” er a uchei ma uriul er a Okisel er a Kodall, a olechotel sel mesisiich el Klisichel el mo omekungil a rengud. A derta er ngii el mengasireng lomekungil a mle chedaol uchelel e yaksok er a omelemolem el omekungil er a tech me a reng el ngii a merkid sel temel a Okiis er a Kodall, el ngii “a tokubets e cherrungel omeruul er a omekungil er a Dios.”

Ng klemerang el nglunguched el kirel a omekungil er tial klengar a diak el blechoel longer er ngii er sel teletael el doureng er ngii, engdi ngdiak lak lodengei. A temel a omekungil a mei, el di uai a iilkolk a mo diak—sel ungil a temel—el morngii a klebokel el ngesechel a sils.

A President Nelson a uluuchais el kmo: “A klaumerang er kid a diak lak lodengelii a Dios. Ak medengei el kmo a moktek er a mellomes a rengul el Chedam er a Babeluades a kmal klou er a ikel dodengei. Meng locha kede medengei a mondai ma ringel er tial klengar, eng di Ngii a medengei el kirel a ikel omeruul ma ikel sebeched el mo uai ngii er a diak ulebengelel klengar. A lsekum me kede meluluuch el mo medengelii a moktek er Ngii e mo oltirakl er ngii loba kellou el reng ma duch er reng, ea omekungil er a babeluades a mo er ngii er sel Teletelel ma temel.”

A bechik, er a Harriet, ma ngak a meluluuch e olengit a ongiil el kirir a rebebil el betik a rengmam er tir. Aki meluluuch me tirkel loureor er a healthcare bol sebechir lomekungil a secherir. Ng ulekrael a mlei er kemam el mo dochelii er a nglungucham el kmo meng locha diak el dil mereched el mo ungil a lechub eng omerollel merael mo ungil diak el sebechel morngii, engdi a klisichel a omekungil er a Osobel a mo mengelaod er tir e mesterir a budech. Sel omekungil klisichel a Osobel a bai ngarngii a klou el rellii el mera rengud, chedaol tekoi, ma omengedmeklel a bedenged er ta tech ra bai omekungil er a beluulechad el bo dengai. A Jesus Kristo a Chad er a Omekungil er tial klengar a ma diak a ulebengelel klengar.

Rodam ma rodos er ngak, ma resechelei, Ak ouchais el kmo a chubechub er a Osebeled a kmal medeel el mo omekungil a telmellem, mengikiid er kau er a klengit, melisiich er kau er a omelasm el mo er ngii, e omekngeltengat er kau loba ongiil, llomeserreng, me a budech er Ngii. A Klisichel a blechoel ngarngii—e melemolem el ngarngii e sebeched lultuil er ngii—e sel kid, a lebil er a taem, e kede omelchesiu er kid el cheroid er a beltkil a Rengul, llomes, me a ungilreng.

Ak meluluuch meng diak dobes el mereng a saul kirel a ikel rokui el Jesus Kristo a mla remuul el merkid. Kulengit me bo modengei el kmo a Dios ma rechad a oubeltikerreng el mo er kau, e bo molatk aikel blel yaksok er kau el mo cherechar.

“A Dios bol lomekngeltengat er kau ma beraod el molab bo el mekebekakl, lokiu a deurreng er a Ngelekel,” el Jesus Kristo (Alma 33:23).