“Kuv Yuav Kho Kom Lawv Zoo,” Liyahaunas, Ob Hlis Ntuj. 2025.
Zaj Lus hauv phau Liyahaunas Txhua Hli, Ob Hlis Ntuj 2025
“Kuv Yuav Kho Kom Lawv Zoo”
Tus Cawm Seej txoj hauj lwm kho neeg mob los yuav tsum muaj ua ntej thiab yog txoj kev cog lus tias peb txhua leej txhua tus yuav txais kev kho mob ntawm sab cev nqaij daim tawv thiab kev kho lub siab thaum txog lub caij Txoj Kev Sawv Rov Los.
Kuv tseem nco tej lub sij hawm thaum kuv ua ib tug kws tsav nyab hoom es kuv yuav tsum tsav nyab hoom ntev heev.
Muaj ib zaug uas kuv ya ntawm teb chaws Yelemes Teb thaum 11:00 sawv ntxov thiab tsaws hauv California thaum 1:00 tav su tib hnub ntawd xwb. Thaum muab lub sij hawm ya thiab tsaws sib piv, tej zaum yuav zoo nkaus li twb siv ob teev xwb hla Dej Hiav Txwv Atlantic mus rau Teb Chaws Amelikas. Lub nyb hoom Boeing 747 ceev, tiam sis tsis ceev npaum ntawd! Tiag tiag, peb tau siv 11 teev, nyob ntawm seb puas muaj cua hlob, tau mus 5,600 mais (9,000 km).
Vim peb ya mus sab hnub poob, lub hnub tsis poob thaum peb ya. Peb tau zoo siab nyob nruab hnub ntawm Yelemes Teb mus rau California.
Tiam sis, thaum rov qab ya mus rau Yelemes Teb los tsis zoo li ntawd. Txawm peb pib ya thaum ntxov los, thaum peb ya mus sab hnub tuaj, lub hnub poob sai sai, thiab tsis ntev, twb tsaus ntuj lawm.
Thaum tej lub siij hawm kuv ya nyab hoom ntev no, kuv lub siab xav tsis thoob thaum kuv xav txog lub ntiaj teb no uas zoo nkauj heev thiab tej yam uas Vajtswv tau tsim. Txawm kuv ya thaum tsaus ntuj, es tsis pom dab tsi hlo li los, kuv paub tseeb hais tias lub hnub yuav rov tuaj, yuav rov qab ci ntsa iab thiab ua ntej peb tsaws hnub tshiab yuav tawm tuaj nrog kev sov so. Txawm yog kuv txoj kev tsav nyab hoom ua rau kuv xav tias lub hnub maj mam poob los sis poob sai sai los, kuv yeej paub tias lub hnub yeej nyob khov kho thiab ruaj nrees saum ntuj.
Kuv xav ib yam li ntawd txog Vajtswv. Vim kuv paub tseeb tseeb tiag txog Vajtswv lub tswv yim thiab lub hom phiaj rau tag nrho tej uas Nws tsim, kuv muaj kev cia siab thiab kev kaj siab lug mus tas ib txhis thaum kuv xav txog peb lub neej ntawm no. Peb yog Vajtswv cov me nyuam. Nws hlub peb. Nws paub txog peb tej xwm txheej. Nws xav pab peb tam sim no. Tej yam tseeb no yeej tsis hloov, txawm lwm yam ib puag ncig peb zoo nkaus tsis khov thiab tsis paub yuav zoo li cas.
Peb sawv daws raug tej kev tsaus ntuj, kev tu siab, thiab kev ua xyem xyav uas ua rau peb tsis nyob kaj siab lug. Kuv ua Vajtswv tsaug rau lub hauv paus ruaj khov ntawm txoj kev tseeb thiab txoj kev kaj (saib Lus Qhuab Qhia thiab Kev Khi Lus 88:6–11). Yexus Khetos yog txoj kev kaj thiab txoj sia ntawm lub ntiaj teb. Los ntawm Nws thiab Nws txoj kev theej txhoj, peb cia siab rau yav tom ntej, txais tau txoj kev kaj uas los saum ntuj los kom ci ntsa iab rau tej lub sij hawm tsaus ntuj hauv peb lub neej, thiab kev cog lus tias peb yuav kov yeej kev txhaum thiab kev tuag.
“Nws Hlub Neeg Ntiaj Teb”
Yexus Khetos yog tib tug neeg zoo tag nrho uas tau nyob hauv ntiaj teb no. Vim Nws lub neej zoo tag nrho, Nws tsis tshuav nqi them rau kev txim lij. Vim Nws hlub peb, Nws txo Nws txoj sia rau peb txhua tus thiab rau tag nrho Vajtswv cov me nyuam kom txais tau txoj kev tsis txawj tuag thiab txoj sia nyob mus ib txhis.
Tus Cawm Seej muaj peev xwm cawm peb txhua tus dim, txawm yog Dab Ntxwg Nyoog xav kom peb tsis ntseeg li ntawd. Peb txhua tus txais tau Vajtswv txoj kev tshav ntuj uas los ntawm kev zam txim. Peb txhua tus muaj peev xwm txais tau “ob txhais npab ntawm nws txoj kev hlub tau muab kuv puag khawm mus ib txhis li” (2 Nifais 1:15).
Lub txiaj ntsim zoo tshaj plaws yeej los ntawm Yexus Khetos txoj Kev Theej Txhoj lub hwj chim txhiv dim. Vim tus Cawm Seej raug txom nyem hauv Khexamenes thiab Khaulakhauthas, Nws paub cawm peb dim thiab pab peb kov yeej peb tej kev qaug dag qaug zog (saib Amas 7:12).
“Nws tsis ua ib yam dab tsi tsuas yog ua tej yam uas pab neeg ntiaj teb xwb; vim nws hlub neeg ntiaj teb, nws thiaj tso nws txoj sia xwv kom nws yuav coj tau neeg txhua tus los cuag nws” (2 Nifais 26:24).
Yexus Khetos yog peb lub dag zog!
Nws ncav tes tuaj.
Nws kho peb zoo.
Nws cawm peb dim.
Thawj Tswj Hwm Russell M. Nelson hais tias, “Thaum tus Cawm Seej tau theej peb txhua tus lub txhoj, Nws tau qhib kev rau cov uas coj raws li Nws kom lawv txais tau Nws lub hwj chim kho mob, txhawb zog, thiab txhiv dim.”
Lub hwj chim no, zoo li lub hnub, yeej nyob tas li. Lub hwj chim no yeej tsis tu tsis tseg. Txoj kev xaiv kom coj raws li tus Cawm Seej tau ua zoo ib yam li thaum yus taug kev tawm ntawm duab ntxoov ntxoo thiab mus rau qhov chaw uas muaj kev tshav ntuj, qhov chaw uas peb txais tau koob hmoov los ntawm tus Tswv txoj kev kaj, kev sov siab, thiab kev hlub. Kuv paub tias yuav muaj ib hnub, peb yuav ntsia yav tas los thiab ua Vajtswv tsaug vim peb tau xaiv ib qhov tseem ceeb kawg nkaus kom tso siab rau Yexus Khetos thiab Nws txoj kev hlub uas pab txhawb nqa peb thiab ua rau peb muaj zog.
“Tig Rov Qab Los Cuag Kuv”
Phau Ntawv Maumoos qhia txog ib cov neeg uas nyob hauv qhov tsaus ntuj nti peb hnub tom qab tus Cawm Seej tau raug ntsia saum ntoo khaub lig. Qhov tsaus ntuj nti uas nyob ib puag ncig lawv yog lub cim txog qhov tsaus ntuj ntawm sab ntsuj plig uas peb sawv daws raug vim muaj kev txhaum. Ces cov neeg no hnov Khetos lub suab caw lawv tawm ntawm qhov tsaus ntuj nti thiab mus rau Nws txoj kev kaj:
“Nim no nej puas tseem tsis kam tig rov los cuag kuv, thiab hloov siab lees txim ntawm nej tej kev txhaum, thiab hloov siab los ntseeg, xwv kom kuv yuav kho tau nej?” (3 Nifais 9:13).
“Muab lub siab mob thiab lub siab xav ua zoo ua kev txi rau kuv” (3 Nifais 9:20).
“Hloov siab lees txim thiab tig rov qab los cuag kuv kawg siab kawg ntsws” (3 Nifais 10:6).
Tus Cawm Seej twb caw peb li ntawd hnub no thiab thaum peb nyob hauv kev tsaus ntuj nti. Ib yam li qhov uas lub hnub tuaj qhia tias yog ib hnub tshiab, txhua zaus peb hloov siab lees txim, peb txais kev rov qab ua dua tshiab.
Tiam sis qhov no yeej tsis yooj yim. Kev hloov siab lees txim txhais tias yuav tsum hloov, thiab peb hloov tsis tau sai sai. Yeej muaj kev zoo siab, tiam sis kev hloov siab lees txim kuj muaj “kev tu siab” thiab (2 Kauleethaus 7:10). Peb yuav tsum lees txhaum, thov kom Vajtswv zam txim pub rau peb thiab thov cov uas peb tau ua tsis zoo rau kom zam txim pub rau peb. Qhov tseem ceeb tshaj, peb yuav tsum nrhiav “Tus Tswv uas Muaj Hwj Chim Loj Tshaj Plaws tus Ntsuj Plig,” kom ua rau peb “hloov loj heev … hloov peb lub siab, xwv kom peb tsis txhob muaj siab xav ua phem ntxiv, tiam sis xav ua zoo tsis tu ncua mus li” (Mauxiyas 5:2).
Kev hloov ntawd yuav siv sij hawm ntev, tiam sis thaum koj xub thawj pib, “hnub ntawm nej txoj kev cawm seej” yuav pib, thiab “tam sim no Vajtswv yuav ua kom muaj raws li txoj hau kev txhiv dim uas tseem ceeb los rau nej” (Amas 34:31).
Los ntawm peb txoj kev hloov siab lees txim tiag tiag, Vajtswv cog lus tias Nws yuav zam txim thiab tsis nco qab peb tej kev txhaum ntxiv. Thaum nyuaj rau peb tsis nco qab txog peb tej kev txhaum, cia peb siv zog tso siab rau tus Tswv txoj lus cog tseg kom zam txim rau peb thiab pab peb kawm zam txim rau lwm tus thiab peb tus kheej.
“Peb tus ntsuj plig raug mob thaum peb ua yuam kev thiab ua txhaum,” Thawj Tswj Hwm Boyd K. Packer tau qhia (1924–2015). “Tiam sis tsis zoo li peb sab cev nqaij daim tawv, thaum peb hloov siab lees txim, tsis muaj caws pliav vim muaj Yexus Khetos txoj Kev Theej Txhoj.”
Kho tus Neeg Dig Muag, los ntawm Carl Heinrich Bloch
“Coj Lawv Los Ntawm No”
Tus Cawm Seej yog tus xib hwb uas txawj kho mob. Ib lub sij hawm zoo kawg nkaus thaum Nws siv Nws lub hwj chim kho mob nyob hauv Phau Ntawv Maumoos, hauv zaj dab neeg txog Nws txoj hauj lwm qhuab qhia hauv Amelikas puag thaum ub:
“Nej puas muaj neeg mob nyob hauv nej? Nws nug. “Coj lawv los ntawm no. Nej puas muaj neeg ceg tawv, los sis dig muag, los sis neeg khoov duav, los sis neeg tu ceg tu npab, los sis neeg mob ruas, los sis cov uas qhuav tes qhuav taw, los sis cov uas lag ntseg, los sis cov uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev khuv leej rau nej; kuv lub siab muaj kev hlub tshua puv npo. …
“Thiab tau muaj tias thaum nws hais li no tas lawm, tag nrho cov neeg coob coob, ua ib ke, coj lawv tej neeg muaj mob mus thiab lawv tej neeg uas raug txom nyem, thiab lawv tej neeg ceg tawv, thiab nrog rau lawv tej neeg dig muag, thiab nrog rau lawv tej neeg hais tsis tau lus, thiab nrog rau tag nrho lawv tej neeg uas raug txom nyem txhua yam; thiab nws kho tau lawv txhua tus zoo thaum lawv coj cov neeg no mus rau nws.” (3 Nifais 17:7, 9).
Txhua zaus tus Cawm Seej kho ib tug uas “raug txom nyem txhua yam,” ua ntej thiab tom qab Nws Sawv Rov Los, yeej yog ib zaj lus tim khawv txog Nws lub hwj chim kho peb sab ntsuj plig. Txhua qhov txuj ci tseem ceeb kho neeg mob yog ib txoj kev cog lus tias peb txhua leej txhua tus yuav txais kev kho mob ntawm sab cev nqaij daim tawv thiab kev kho lub siab thaum txog lub caij Txoj Kev Sawv Rov Los, uas yog “tus Tswv kev khov zoo tag nrho.”
Yeej muaj tseeb tias peb tej lus thov kom tau kev kho mob hauv lub neej no tsis txais kev teb li peb xav tau, tiam sis Nws yeej hnov peb tej lus thov. Lub sij hawm txais kev kho mob yuav los, ib yam li thaum kev tsaus ntuaj nti yeej yuav ploj zuj zus—thaum lub sij hawm yog—cia lub hnub tuaj.
Ib yam li Thawj Tswj Hwm Nelson tau ua tim khawv hais tias: “Nws yeej zoo siab thaum peb muaj kev ntseeg. Kuv paub tias Leej Txiv Saum Ntuj Ceeb Tsheej uas muaj tswv yim tag nrho pom tau ntau dua li peb pom tau. Peb paub txog peb tej teeb meem thiab kev mob kev nkeeg hauv lub ntiaj teb no, tiam sis Nws paub txog peb txoj kev txawj hloov ua neeg uas tsis txawj tuag. Yog peb thov Vajtswv kom paub Nws lub siab nyiam thiab ua siab ntev thiab ua siab loj ua raws li ntawd, ces raws li Nws txoj kev thiab lub siab nyiam Nws yuav kho peb zoo.”
Tsis ntev tas los kuv tus poj niam, Harriet, thiab kuv wb tau thov Vajtswv nrog kev cia siab thiab kev thov rau ib co neeg uas wb hlub. Wb thov kom lawv cov neeg pab kho mob yuav muaj tswv yim txaus kho lawv tus mob. Tau tshoov wb lub siab kom thov ntxiv tias yog kho tsis tau tam sim ntawd los sis yog zoo hlo tsis tau, thov kom lawv txais kev nplij siab thiab kev kaj siab lug los ntawm tus Cawm Seej lub hwj chim kho mob. Tej zaum tus Cawm Seej txoj kev kho mob ntawm Nws lub hwj chim txhiv dim kho tau peb lub siab, sab ntsuj plig, thiab lub cev nqaij daim tawv zoo dua cov tshuaj uas peb txais tau hauv lub ntiaj teb no. Yexus Khetos yog Tus Kws Kho Mob hauv lub neej no thiab lub neej mus ib txhis.
Kuv cov kwv tij thiab cov muam, cov phooj ywg zoo, kuv ua tim khawv hais tias tus Cawm Seej txoj kev hlub tshua yeej txaus kho peb tus mob, ntxuav peb tej kev txhaum mus, txhawb peb lub dag zog thaum raug kev sim siab, thiab foom koob hmoov rau peb kom muaj kev cia siab, lub tswv yim, thiab Nws txoj kev kaj siab lug. Nws lub hwj chim yeej nyob tas zog—ruaj khov thiab and ruaj nrees—txawm tias peb, rau ib ntus, nyob deb ntawm Nws txoj kev hlub, kev kaj, thiab kev sov so.
Kuv thov kom peb yuav nco ntsoov hwm thiab ris Yexus Khetos txiaj rau tag nrho teu yam uas Nws ua rau peb. Thov kom koj paub hais tias Nws hlub koj zoo tag nrho, thiab nco qab tias Nws tau cog lus dab tsi rau koj mus tas ib txhis.
“Thov Vajtswv pub rau nej kom nej tej nra yuav sib, los ntawm txoj kev xyiv fab txog nws Leej Tub,” Yexus Khetos (Alma 33:23).
© 2025 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message,February 2025. Hmong. 19609 295