“Paayohon Ko Sila”

Si Jesucristo gid lang ang perpekto nga tawo nga nagkabuhi sa duta. Tungod sang Iya perpekto nga kabuhi, wala Sia sang utang sa hustisya. Bangod sang gugma para sa aton, ginhatag Niya ang Iya kabuhi para sa kada isa sa aton kag para sa tanan nga anak sang Dios sa kabilogan agud mangin posible ang imortalidad kag kabuhi nga wala katapusan.

Sa pihak sang gusto ni Satanas nga aton patihan, wala sang isa sa aton nga lapaw sa ikasarang sang Manluluwas nga luwason kita. Wala sa aton nga indi kwalipikado sa grasya sang kapatawaran. Wala sing isa sa aton nga labaw agud “wala’y katapusan nga [mahakos] sa mga butkon sang iya gugma” (2 Nefi 1:15).

Ining pinakadaku nga regalo sa tanan resulta sang nagabulig kag nagatubos nga gahum sang Pagbayad-Sala ni Jesucristo. Tungod sang pag-antos sang Manluluwas sa Getsemani kag sa Golgota, nakahibalo Sia kon paano kita luwason kag buligan nga malampuwasan ang bisan ano kag ang tanan naton nga mga kahuyangan (tan-awa sa Alma 7:12).

“Wala sia sing ginahimo nga bisan ano luwas lang nga ini para sa benepisyo sang kalibutan; kay palangga niya ang kalibutan, bisan nga ginhatag niya ang iya kaugalingon nga kabuhi agud mapapalapit niya ang tanan nga tawo sa iya” (2 Nefi 26:24).

Si Jesucristo ang aton kusog!

Nagadab-ot Sia sa paghatag sang bulig kag suporta.

Nagapasag-uli Sia.

Nagasagop Sia.

“Sang nagbayad-sala ang Manluluwas para sa tanan nga katawhan, ginbuksan Niya ang alagyan nga atong mga nagasunod sa Iya makabaton sang Iya pagpang-ayo, pagpabakod, kag nagapangtubos nga gahum,” siling ni Pangulong Russell M. Nelson.

Ina nga gahum, pareho sang adlaw, ara lang dira pirme. Wala ini nagapalya. Ang pagpili nga sundon ang ehemplo sang Manluluwas kaangay sa paggwa sa mga landong sang pagkanegatibo kag kawala-paglaum pakadto sa kasanag sang adlaw, sa diin sarang naton mabaton ang mga bugay sang kasanag, kainit, kag pagpalangga sang Dios. Nakahibalo ako nga pila ka adlaw, hunahunaon naton ang nagligad kag mapuno sang kapasalamatan nga ginhimo naton ang dalayon kaimportante nga desisyon nga magsalig kay Jesucristo kag sa Iya diosnon nga pagpalangga sa pag-alsa kag pagpabakod sa aton.

Ang Libro ni Mormon nagasugid parte sa katawhan nga nag-antos sing tatlo ka adlaw sa tuman nga kadulom pagkatapos sang Paglansang sang Manluluwas sa krus. Ang pisikal nga kadulom sa ila palibot mahimo nga nagasimbolo sang espirituhanon nga kadulom nga ginaagyan naton tanan tungod sang sala. Dayon nabatian sang katawhan ang tingug ni Cristo nga nagaagda sa ila nga maggwa sa kadulom pakadto sa Iya kasanag:

“Indi bala kamo subong magbalik sa akon, kag maghinulsol sang inyo mga sala, kag mahaylo agud nga mapaayo ko kamo?” (3 Nefi 9:13).

“[Maghatag] kamo bilang halad sa akon sing isa ka masinulub-on nga tagipusuon kag mahinulsulon nga espiritu” (3 Nefi 9:20).

“Maghinulsol kamo kag magbalik sa akon nga may bug-os nga tinutuyo sang tagipusuon” (3 Nefi 10:6).

Ang Manluluwas nagatanyag sang amo man nga pangagda sa aton subong kon masapwan naton ang aton mga kaugalingon nga nadula sing espirituhanon. Pareho nga ang pagbutlak sang adlaw tanda sang panugod sang bag-o nga adlaw, tagsa nga maghinulsol kita, nagabaton kita sang bag-o nga tsansa, isa ka masanag bag-o nga panugod.

Indi buot silingon nga mahapos ini. Ang paghinulsol nagakahulugan sang pagbag-o, kag ang pagbag-o wala nagakatabo gilayon. Bisan makalilipay, ang paghinulsol may upod gid nga “diosnon nga kasubo” (2 Mga Taga-Corinto 7:10). Nagapangayo ini nga akuon kag ikumpisar naton ang aton mga sala, magpangayo sang patawad sa Dios kag sa mga tawo nga mahimo nahalitan naton. Labi sa tanan, nagapangayo ini nga tinguhaan naton nga maangkon “ang Espiritu sang Ginuo nga Makagagahum,” agud maeksperiyensiahan naton ang “isa ka dako nga pagbag-o … sa [aton] mga tagipusuon, sa bagay nga wala na [kita] sing huyog nga maghimo sing malain, kundi dalayon nga maghimo sing maayo” (Mosias 5:2).

Ina nga klase sang pagbag-o madugay malab-ot, pero sa tion nga sugdan ninyo ang una nga tikang, “ang adlaw sang inyo kaluwasan” nagasugod, kag “sa gilayon ang dako nga plano sang pagtubos mapahanabo sa inyo” (Alma 34:31).

Paagi sa aton sinsero nga paghinulsol, ang Dios nagapromisa nga magpatawad kag indi na pagdumdumon ang aton mga sala. Kon nabudlayan kita nga kalimtan ang aton mga sala, tinguhaan naton nga magsalig sa promisa sang Ginuo nga magpatawad kag tun-an nga patawaron ang iban kag ang aton kaugalingon.

“Ang aton mga espiritu nagakapilasan kon magsayop kita kag maghimo sang mga sala,” tudlo ni Pangulo Boyd K. Packer (1924–2015). “Pero indi pareho sang aton dutan-on nga mga lawas, kon ang proseso sang paghinulsol natuman na, wala na sing nagapabilin nga pinalian tungod sa Pagbayad-Sala ni Jesucristo.”

Healing the Blind Man [Pag-ayo sang Bulag nga Tawo], ni Carl Heinrich Bloch

“Dal-a Sila Diri”

Ang Manluluwas amo ang Dakung Manugbulong. Isa sang pinakamanami nga pagpakita sang Iya nagapang-ayo nga gahum makita sa Libro ni Mormon, sa panaysayon sang Iya personal nga pag-alagad sa dumaan nga Amerika:

“May mga masakiton bala dira sa inyo?” Pamangkot Niya. “Dal-a sila diri. May mga lupog bala kamo, ukon bulag, ukon piang, ukon baldado, ukon aruon, ukon mga naitos, ukon mga bungol, ukon nagaantos sa ano man nga paagi? Dal-a sila diri kag paayohon ko sila kay naluoy ako sa inyo; ang akon tagipusuon napuno sang kaluoy. …

“Kag natabo ini nga sang nakahambal sia sini, ang bug-os nga kadam-an, dulungan nga nagpalapit, upod ang ila mga masakiton kag ang ila mga nagaantos, kag ang ila mga lupog, kag upod ang ila mga bulag, kag upod ang ila mga apa, kag upod sila tanan nga nagaantos sa ano man nga paagi; kag ginpaayo niya sila ang tagsa-tagsa nga gindala sa iya” (3 Nefi 17:7, 9).

Tagsa nga ginaayo sang Manluluwas ang bisan sin-o “nga nagaantos sa bisan ano man nga paagi,” antes kag pagkatapos sang Iya Pagkabanhaw, saksi ini sang Iya tuman kadako nga gahum nga ayuhon ang aton mga kalag. Ang tagsa ka milagroso nga pag-ayo panugod lang kag promisa sang permanente nga pisikal kag emosyonal nga pag-ayo nga magaabot sa tagsa sa aton sa Pagkabanhaw, nga amo “ang perpekto nga buhat sang Ginuo sa pagpang-ayo.”

Matuod nga ang aton mga pangamuyo para sa pag-ayo sa sini nga kabuhi wala pirme ginasabat sa paagi nga ginalauman naton, pero wala gid ang mga ini ginabale-wala. Ang tion sang pag-ayo magaabot, pareho nga ang kadulom sang gab-i pirme nagahatag lugar—sa husto nga tion—sa mahimayaon nga pagbutlak sang adlaw.

Sa pagpanaksihon ni Pangulong Nelson: “Ang aton pagtuo pirme gid ginaapresyar. Nakahibalo ako nga ang panan-aw sang labing maalam nga Amay nga Langitnon mas masangkad sangsa aton. Bisan nakahibalo kita sang aton mga problema kag mga kasakit sa kabuhi, nakahibalo Sia sang aton wala katapusan nga progreso kag potensyal. Kon magpangamuyo kita agud mahibal-an ang Iya pagbuot kag sundon ini nga may pasensya kag kaisog, ang langitnon nga pag-ayo magaabot sa Iya kaugalingon nga pamaagi kag tion.”

Sang sini lang, gindala namon sang akon asawa nga si Harriet sa amon mga pangamuyo ang pinasahi nga paglaum kag pangabay para sa pila namon ka pinalangga. Nagpangamuyo kami nga ang mga manugtatap sang ila ikaayong lawas mahatagan sang pinasahi nga ikasarang nga bulngon ang ila mga balatian. Ginpabatyag kami nga idugang nga bisan indi matigayon ang gilayon nga pagbulong ukon pag-ayo, ang nagapang-ayo nga gahum sang Manluluwas tani maghatag sa ila sang kasulhay kag kalinong. Ang nagapang-ayo nga epekto sang nagatubos nga gahum sang Manluluwas mahimo nga may mas daku nga epekto sa aton emosyonal, espirituhanon, kag bisan gani pisikal nga ikaayo sangsa iban ano pa man nga dutan-on nga pagbulong nga aton mabaton. Si Jesucristo ang Manugbulong sa sini nga kabuhi kag sa wala katapusan.

Mga kauturan, mahal kong mga abyan, nagapamatuod ako nga ang kaluoy sang Manluluwas bastante nga ayuhon ang inyo mga pilas, tinloan kamo sang inyo mga sala, pabakuron kamo sa mga pagtilaw nga magaabot, kag bendisyonan kamo sang paglaum, kaalam, kag sang Iya kalinong. Ang Iya gahum ara lang pirme—tayuyon kag masaligan—bisan pa kon kita, sa pila ka tinion, nagabatyag nga malayo sa Iya pagpalangga, kasanag, kag kainit.

Kabay nga indi gid naton dulaon ang aton balatyagon sang pagdayaw kag daku nga kapasalamatan para sa tanan nga ginhimo ni Jesucristo para sa aton. Palihog hibaloa nga lubos kamo nga ginapalangga, kag dumduma kon ano ang wala katapusan nga ginpromisa sa inyo.

“Kabay nga itugot sa inyo sang Dios nga ang inyo mga palas-anon mangin mamag-an, paagi sa kalipay sang iya Anak,” nga si Jesucristo (Alma 33:23).