“Mebɛsa Hɔn Yarba,” Liahona, Kwakwar 2025.
Bosoom bosoom Liahona Amandzɛɛbɔ, Kwakwar 2025
“Mebɛsa Hɔn Yarba”
Agyenkwa no n’ayarsa somdwuma no yɛ ahyɛse krɔnkrɔn na daapem honam mu nye atsenka mu ayarsa anohoba a ɔbɛba hɛn mu kor biara do wɔ Wusoɛr no mu.
Medaho kaa pefee ara wimu akwantu atsentsen no mu pii a mokɔree wɔ m’abrabɔ edwumayɛ mu dɛ meyɛ wimuhɛn panyin no.
Kor mu no, mubotu efi Germany anapa 11:00 a.m. na mesi famu wɔ Carlifornia ewiaber 1:00 p.m. dɛm da noara. Sɛ edze nkɔree na ndurii mber a ɔwɔ hɔ no toto ho a, ɔbɛyɛ wo dɛ ma irutu etwa mu wɔ Atlantic Po na America Etisfi asaasetɔw do no gye ndɔnhwer ebien ara. Nna Boeing 747 no ho yɛ har, mbom ne har no nndu dɛm! Nokwar mu no, nna odzi hɛn bɛyɛ ndɔnhwer 11, a ogyina mframa no do, ma yɛdze etwa aborɔfo kwansin 5,600 (9,000 km).
Ɔnam dɛ nna yerutu akɔ anee afamu ntsi, nna ewia no nntɔ da wɔ hɛn akwantu no mu. Nna yenya adzekyee kan hee fi Germany ara kesi California.
Yɛresan akɔ Germany no no, mbom, nna ɔyɛ asɛm fofor koraa. Nna mpo sɛ yetu ntsɛm ewiaber a, yɛrokɔ bokã afamu no, witɔree no ba ntsɛm kyɛn dza yenyim no, na ansaana hɛn enyi bɛba hɛnho do no, nna adzesaa ato hɛn.
Dɛm wimu akwantu atsentsen yinom mu no, nna ahobow taa hyɛ me kra mã ber a modwendwen asaase yi ne fɛw ho na Nyankopɔn n’abɔdze ne nhyehyɛɛ ho. Sɛ murutu adzesaa mpo, wɔ sum kebii mu a, minyim nokwar mu ara dɛ ewia bopue bio, dɛ kan hyerɛnee bɛsan aba na ɔdze hyew na nkwa aba da fofor mu ana hɛn akwantu no aba ewiei. Mbrɛ osi na mo wimu akwantu no tse ntsi nna ɔma ɔyɛ dɛ ma ewia no kɔtɔ bɔkɔɔ anaa ntsɛntsɛm ara, mbom nna minyim dɛ ewia no gyina fakor, onnhihim, na otsim hɔ wɔ wimu.
Dɛm ara na menya Nyankopɔn ho atsenkã. Ɔnam dɛ mowɔ gyedzi a otsim yie ankasa wɔ Nyankopɔn ne nyansaa na botaa ma N’abɔdze nyina ho ntsi, mutum tse enyigye enyidado na daapem asomdwee nkã ber a modwendwen hɛn ɔnnkyebo asetsena ho. Yɛyɛ Nyankopɔn ne mba. Ɔdɔ hɛn. Onyim hɛn tsebew. Ɔayɛ krado dɛ Ɔbɔboa hɛn. Dɛm nokwar yinom nnsesa, mpo ber a ndzɛmba binom a etwa hɛnho ehyia no yɛ dɛ wohihim na wonnsi pi.
Hɛn nyinara yehyia mber a ɔyɛ sum, awerɛhow, na mber a yennyim dza ɔreba a ɔhaw hɛn asomdwee. Mbrɛ m’enyi si sɔ nokwar na kan fibea papa a yetum twer no (hwɛ Nkyerɛkyerɛ na Ahyɛmudzi 88:6–11). Jesus Christ nye wiadze kan na nkwa. Ɔnam Ɔno na No werdam afɔrbɔ no ntsi, yɛwɔ ndaamba ho enyidado, yɛwɔ kwan wɔ ɔsor kan ho dze ama hɛn akwantu no sum nda mu kan, na yɛwɔ anohoba wɔ bɔn na owu do konyimdzi ho wɔ ewiei no.
“Ɔdɔ Wiadze”
Jesus Christ nyi nyimpa kortsee a odzi mu a ɔnantseew asaase no do. Ɔnam Ne bra a odzi mu ntsi, nna Ɔnndze pɛrpɛrdzi ho kaw biara. Ofi No dɔ mu ma hɛn no, Ɔdze No nkwa maa hɛn mu kor biara dɛ yɛyɛ ankorankor, na Nyankopɔn ne mba nyina wɔabɔ mu, dze buee bɛkyebo na onnyiewiei nkwa abow no.
Dza Abɔnsam bɛpɛ dɛ yɛgye dzi nyinara ekyir no, hɛn mu biara nntraa Agyenkwa no No tum dɛ Ɔgye hɛn no do. Wonnyii hɛn mu biara mmfii mu dɛ yɛnnkã bɔnfakyɛ adom no ho. Hɛn mu biara nnyi hɔ a wɔatra dɛ “no dɔ abasa no [bo]twa [n]oho ehyia dze kɔ onnyiewiei mu”(2 Nephi 1:15).
Dɛm akyɛdze a ɔsõ kyɛn akyɛdze nyina yi fi Jesus Christ No Werdambɔ ne dzenhyɛ na ɔpon tum no mu ba. Osian Agyenkwa no ne brɛ wɔ Gethsamane na Golgotha ntsi, Onyim mbrɛ Obesi bɛgye hɛn efi mu na Ɔaboa hɛn ma yeedua hɛn mberɛwyɛ nyinara mu (hwɛ Alma 7:12).
“Ɔnnyɛ adze biara gyedɛ dza ɔyɛ mfaso dze ma wiadze; osiandɛ ɔdɔ wiadze, dɛm ntsi na ɔdze noara no nkwa too hɔ ama ɔaatwe adasa nyinara ama noho” (2 Nephi 26:24).
Jesus Christ yɛ hɛn ahoɔdzen!
Ɔtserɛw n’abasa mu.
Ɔsan ananmu ba.
Ɔgye nkwa.
President Russell M. Nelson kãa dɛ, “Ber a Agyenkwa no bɔɔ werdam maa adasa nyina no, Obuee kwan maa hɔn a wɔka No do no ama woeetum eenya N’ayarsa, ahoɔdzen, na ɔpon no tum.”
Dɛm tum no, tse dɛ ewia no, wɔ hɔ daa. Onnhihim dabiarada. Ɔpɛ no dɛ yebetsiatsia Agyenkwa no n’anamɔn mu no tse dɛ yɛrenantsew fi sum mu aba ewia ne kan mu, bea a hɛn nsa botum aka Nyankopɔn ne kan, hyew, na ɔdɔ. Minyim dɛ dabi, yɛbɔhwɛ hɛn ekyir na ndaase bɛhyɛ hɛn mã dɛ yesii onnyiewiei gyinae a ohia dɛ yɛbɔtwer Jesus Christ na No dɔ krɔnkrɔn no ma wɔama hɛn do na wɔahyɛ hɛn dzen.
“Hom Nsan Mbra Me Nkyɛn”
Mormon Nwoma no kã nkorɔfo binom a wodzii nda ebiasa wɔ sum kebii koraa mu wɔ Agyenkwa no ne mbeamuduabɔ ekyir hɔn ho asɛm. Honam mu sum a otwaa hɔnho hyiae no botum egyina hɔ ama sunsum mu sum a hɛn nyinara fa mu ɔnam bɔn ntsi. Nkyii nkorɔfo no tsee Christ ne ndze a ɔroto nsa frɛ hɔn fi sum no mu ba Ne kan mu:
“Ana hom rennsan mmba me nkyɛn, na hom nnu homho wɔ hom bɔn ho ma wɔasakyer hom ama maasa hom yarba?” (3 Nephi 9:13).
“Afɔr a hom bɔbɔ ama me nye akoma a abobɔ nye sunsum a abotow”(3 Nephi 9:20).
“Hom nnu homho na hom [mfa] akoma a odzi mu [n]san [mbra] me nkyɛn” (3 Nephi 10:6).
Agyenkwa no to nsa frɛ hɛn dɛmara ndɛ ber a yehu dɛ yɛayew wɔ sum no mu. Dɛ mbrɛ wipuei biara kyerɛ da fofor n’ahyɛse no, ber biara a yenu hɛn ho no, yenya ahyɛse fofor, ahyɛse fofor a ɔhyerɛn.
Ɔno nnkyerɛ dɛ ɔyɛ mberɛw. Nnuhu kyerɛ dɛ nsesa, na nsesa mmba amonmu ara. Ber a ɔyɛ enyigye no, “Nyankopɔn kwan do awerɛhow” kã nnuhu ho (2 Corinthfo 7:10). Ɔgye dɛ yɛgye hɛn mfom to mu na yɛkã hɛn bɔn, ber a yeribisa bɔnfakyɛ fi Nyankopɔn hɔ nye hɔn a bia yɛahaw hɔn hɔ. Tsitsir ara, ɔgye dɛ yɛhwehwɛ “Ewuradze Tumfo no Sunsum no,” ama yeenya “nsakyer kɛse wɔ hɛn akoma mu [a dɛm] ntsi yennyi pɛ biara bio dɛ yɛbɛyɛ bɔn, na mbom dɛ yɛbɛyɛ papa aber nyina” (Mosiah 5:2).
Nsakyer a ɔtse dɛm no no kwan war, mbom inya ara tu anamɔn a odzi kan no a, “[wo] nkwagye da” hyɛ ase, na “wɔdze ɔpon nhyehyɛɛ kɛse no bɛma [wo] ntsɛmara” (Alma 34:31).
Ɔnam hɛn nokwar nnuhu do, Nyankopɔn bɔ anohoba dɛ ɔdze hɛn bɔn bɛkyɛ hɛn na ɔrennkaa hɛn bɔn bio. Sɛ ɔyɛ hɛn dzen dɛ hɛn werɛ befir hɛn bɔn a, hom mma yɛmper dɛ yɛbɔtwer Ewuradze n’anohoba no dɛ ɔdze bɛkyɛ hɛn na yensũa dɛ yɛdze bɔn bɛkyɛ binom na hɛnara hɛnho.
President Boyd K. Packer (1924–2015) kyerɛkyerɛɛ dɛ, “Ber a yɛfom na yɛyɛ bɔn no hɛn esunsum sɛɛ.” “Mbom ɔnntse dɛ hɛn ɔnnkyebo honam no, sɛ nnuho kwan no ba ewiei a, epirakur biara nnka wɔ ekyir osian Jesus Christ no Werdambɔ no ntsi.”
Healing the Blind Man [Wɔresa Onyifuranyi no Yarba], Carl Heinrich Bloch yɛɛ nsaano mfonyin no
“Hom Mfa Hɔn Mbra.”
Agyenkwa no nye Ayarsa Wura. N’ayarsa tum no mu ndwuma kor a ɔyɛ ahomka yie no yehu no wɔ Mormon Nwoma no mu, wɔ Nankasa No somdwuma mu wɔ tsetse America:
“Ana hom wɔ ayarfo bi wɔ hom mu?” Obisae. “Hom mfa hɔn mbra. Ana hom wɔ ebubuafo, anaa efurafo, anaa mpakye, anaa hɔn a woedzi dzɛm, anaa akwatafo, anaa hɔn a wɔadwedwe, anaa etsitsifo, anaa hɔn a biribi rehaw hɔn? Hom mfa hɔn mbra na mebɛsa hɔn yarba, osiandɛ me yamu hyehye me wɔ hom ho; ehumbɔbɔr ahyɛ m’abadaa mu mã. …
“Na ɔbaa dɛ ber a ɔkãa dɛm wiei no, nyimpadodow no nyina tuu punkum kɔree kɛfaa hɔn ayarfo nye hɔn nkorɔfo a woruhu amandze, nye hɔn ebubuafo, nye hɔn efurafo, nye hɔn a wɔatotɔ mmum, nye hɔn a woruhu amandze wɔ kwan biara do nyina bae; na ɔsaa obiara a wɔdze no brɛɛ no no yarba” (3 Nephi 17:7, 9).
Ber biara a Agyenkwa no saa obi a “oruhu amandze wɔ kwan biara do” yarba no, ansaana Orubowu nye No Wusoɛr ekyir nyina no, nna ɔyɛ dase wɔ No tum a ɔkrɔn ho dɛ ɔsa hɛn akra yarba. Anwanwadze ayarsa kor biara no nna ɔyɛ ahyɛse na daapem honam mu nye atsenka mu ayarsa a ɔbɛba hɛn mu kor biara do wɔ Wusoɛr no mu no ho anohoba, a ɔyɛ “Ewuradze N’ayarsa dwuma a odzi mu mapã.”
Ɔyɛ nokwar dɛ abrabɔ yi mu no nnyɛ dabaa na hɛn mpaabɔ ma ayarsa ne nyiano no ba dɛ mbrɛ hɛn enyi da kwan, naaso wommbu enyi nngu do da. Ayarsa ber no bɛba, dɛ mbrɛ daa—mber pa mu no—anago sum fi hɔ ma wipuei enyimnyam kwan no.
Dɛ mbrɛ President Nelson agye ho dase no: “Hɛn gyedzi nnyɛ kwa da. Minyim dɛ Ɔsor Egya nyansafo no no nhumu sõ koraa kyɛn hɛn dze. Ber a yenyim hɛn ɔnnkyebo asetsena mu haw na yawdzi no, Ɔno nyim hɛn bɛkyebo mpontu na hyɛber. Sɛ yɛbɔ mpaa dɛ yebohu Ne pɛ na yɛdze abotar na akokodur gyaa hɛnho ma Ne pɛ a, ɔsor ayarsa tum ba mu wɔ Noara No kwan do na Ne mber mu.”
Ɔnnkyɛree na emi na me yer, Harriet, dze enyidado soronko na ntotɔserɛ wɔ binom a yɛdɔ hɔn hɔn afã kãa hɛn mpaabɔ ho. Yɛbɔɔ mpaa dɛ hɔn eduryɛfo kuw no benya ahom soronko dze etu hɔn yarba yarba no ase. Yenyaa nkenyan dze kãa ho dɛ sɛ mpo mprɛmprɛ ayarsa anaa ahotɔ remmba a, Agyenkwa no n’ayarsa tum no mbrɛ hɔn awerɛkyekyer na asomdwee. Ayarsa nsunsuando a ɔwɔ Agyenkwa no no ɔpon tum no mu no benya nsunsuando kɛse koraa wɔ hɛn atsenkã mu, sunsum mu, na mpo honam mu apɔwmudzen do kyɛn asaase do ayarsa biara a yebenya. Jesus Christ nye Yarsafo wɔ abrabɔ yi mu na onnyiewiei mu.
Mo nuambanyin na nkyerɛbaa, anyɛnkofo adɔfo, megye dase dɛ Agyenkwa no n’ehumbɔbɔr no sõ dɛ ɔsa w’epirakur, ɔsan woho fi bɔn ho, ɔhyɛ wo dzen ma nsɔhwɛ a ɔbɛba, na ɔdze enyidado, nyansa, na N’asomdwee hyira wo. No tum no wɔ hɔ daa—otsim hɔ daadaa—mpo sɛ, mber kakra mu, yɛtse nka dɛ yennya No dɔ, kan, na ahomka a.
Mobɔ mpaa dɛ yɛnnkɛyew hɛn ahobow atsenka na enyisɔ kɛse ma dza Jesus Christ ayɛ ama hɛn no nyinara. Meserɛ kaa dɛ wɔdɔ wo emudzi mu, na kaa onnyiewiei anohoba a wɔdze ama wo no.
“Nyankopɔn ndua ne Ba [Jesus Christ] no n’enyigye do mma hom adzesoa nyɛ har” (Alma 33:23).
© 2025 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, February 2025. ne nkyerɛasee Fante. 19609 502