Rohng Kaperen en Limpoak oh Popohl

Rahn kapw pwaradahng aramas koaros nan sahpw en tuhke kan, ni ansou me Koht Sahm oh Sapwellime Iehros, Sises Krais, pwarehng oh mahsenieng Joseph Smith sang ni duwen eh wia pasapengpen en mwahnakapw Joseph kapakap duwen ohng ni mehnia pelien lamalam e konehng iang (kilang Joseph Smith—History 1:14–20). Sises Krais mahsanihong Joseph en dehr iang ehu pelien lamalam. E ketin inoukihda me unsekpen Sapwellime rongamwahu pahn kamarainihong Joseph nan ehu ansou kohkohdo.

Ong me tohto, re sohte kasik me Joseph pahn malipilipieng doadoahk kesempwalo, oh irail pwung. E wia pwutak men me sohte neksang sukuhl oh sohte nohn kesempwal me kohsang sahpw tikitik nan kanihmw tikitik ehu. Me rasehng ekei aramas kosoiada duwen Sounkomouro rahno me E ketiket pohn Sampah, “Ia duwe, kakete mehkot mwahu en pwarada sang Nasaret?” (Sohn 1:46), me tohto medewe ma mehkot mwahu kak pwarada sang pwutak sounpar eisek pahieu [14] me sohte sukuhl sang Palmyra, New York. Eri sang Joseph—mendahte e mwomwen sohte mehkot—Sahm Nanleng oh Kauno Sises Krais pahn kahrehda meh kopwuriamwei mehlel. Met en wahdo koapwoaroapwoar me nan atail wiewia tikitik oh karakarahk, kitail kak pil kapatahieng ni wiewia kesempwal kan ong ni doadoahk en Kauno.

Mwurin ansou kis, Kauno ketin malipe Joseph “oh mahsanihong ih sang nanleng, oh ketkihong ih kosonned akan“ (Tepin Padahk oh Inou kan 1:17). Joseph alehdi kaudiahl sarawi kan oh padahk kesempwal akan me wahdo marain kapw ong wehwehpen Sapwellimen Sahm Nanleng pilahn limpoak oh Sapwellimen Sises Krais kupwurkalahngan oh manaman en Sapwellime tohnmetei. Ni kopwuriamwei, rohng kaperen pwukat kohdo ni ansou ohte me kapikadahn sidohsa kan, koasoai kan, oh wasa teikan tepda mweidehng Sapwellimen Koht marain en kamarainihla laud Sapwellime serihkan.

The Angel Moroni Delivering the Plates to Joseph Smith, by C. C. A. Christensen

Kadehde Manaman en Sapwellimen Koht Limpoak

Pwaradahn tohnleng Moronai ong Joseph Smith anahne wiawi pwe Kopwurupwurdo kak wiawi oh dehde manaman en Sapwellimen Koht Limpoak. Moronai mahsanihong Joseph duwen rekohd, me ntingidi pohn pleit kohl kan, me sarepedi wasa me keren (kilang Joseph Smith—History 1:33–34). Kedekedeo, Joseph pahn alehdi “manaman sang wasa ile“ (Doctrine and Covenants 20:8) en kawehwehdi rekohdo ong dahme pahn wiahla Pwuhken Mormon, me kin doadoahkpene nan Pwuhk Sarawi oh kin wia pil ehu kadehdehpen Sises Krais.

Nan Pwuken Mormon, kitail kin wadek duwen aramas akan me, sounpar epwiki kei mwohn Krais, re esehier oh kohpada duwen Sapwellime ketido oh re awiawihong ansou me e pahn ketido. Kitail pil diar poadoapoad kopwuriamwei en Sounkomour Iasadao ah pwarada oh padahk kan ohng mehn Nihpai ko, erein ansouo E ketin luke koaros en kohdo Reh oh doake pengpenge oh lipwen mete kan nan lime kan oh alualuwe kan (kilang 3 Nihpai 11:14-15). E ketin kamwahuiala me soumwahu kan, me nehtok, me maskun—“irail koaros me ahneki kahpwal sohte lipilipil“—oh ahpw kapaiada seri tikitik kan oh kapakapkin irail (kilang 3 Nihpai 17:7-9, 21). Kitail esehla laud duwen Sapwellimen Sounkomour limpoak oh kalahngan sang poadoapoad sarawi wet.

Pwuken Mormon kin kadehdehki me ”Sises iei Krais.” Irehkan nan Pwuken Mormon kalapw katamanikin kitail me Samatail Nanleng oh atail Sounkomour poakpoake kitail laudsang dahme kitail kak wehwehki.

Kopwuropwurdohu doukihla pwaradahn meninkidehr teikan sang nanleng ong Joseph Smith. ”Sohn soun Pepdais me iasadahro kapwurehdo mweimwei en pepdais ni kaduhdi ong ni lapwapen dihp akan. Wahnpoaron silimen—Piter, Seims, oh Sohn—kapwurehdo pwukoahn wahnpoaron oh kih kan en mweimwei en prihsduhd. Mehteikan pil pwarada, me iangahki Elaisa, me kapwurehdo mweimwei en katengepene peneinei kan kohkohlahte mwurin mehla.”

Epreil 6, 1830, Sises Krais ketin kawada sang ni Soukohp Joseph mwomwohdiso ehu me duwehte mwomwen mwomwohdiso me E ketin koasoanehdi nan Kadehde Kapw (kilang Iren Pwoson kan 1:6), me unsengkihla ”poahson en wahnpoaron kan oh soukohp akan, Sises Krais me pein wia poahsonpen mehkoaros” (Episos 2:20). Mwomwohdiso en Sises Krais en Souleng en Imwin-Rahn akan kin wahdo kapai kan en manaman en prihsduhd kopwuropwurdo ong Sapwellimen Koht serihkan koaros me pein kaunopada en alehdi.

Ni Preseden Russell M. Nelson padahngki, kitail kak diar popohl ni atail kin koluhla ehu ehu rahn oh ni atail sohpeihong Sahm Nanleng oh atail Sounkomour. Ong irail akan me mih nan pahtou de leme me re sohte kakohng arail kahpwal kan: koaros lukehng en kohdo rehn Krais oh Sapwellime Mwomwohdiso. Mwomwohdiso wet sohte kin wia wasa sarawi ong me unsek kan ahpw imwen wini ong me soumwahu kan. Elder Dieter F. Uchtdorf en Pwihn en Wahnpoaron Ehk-riemen ko katamanikihong kitail me “kitail kodohng mwomwohdiso wet kaidehn en ekihla atail kahpwal kan ahpw en kamwahuihirailla.“

Ni atail iang sarawi kitail kin diar popohl nan ansou mwahu kan me kitail kak sohpeila, papahki mehteikan limpoak, oh ehukihda pein atail pepehm kan en unsekpen kupwursapan en Krais. Kitail kak “wadekada rehn aramas en mwomwohdiso en Krais“ oh “tamataman oh apwalihki mahsen en Koht mwahuo“ (Moronai 6:4). Ehu kapai kapwuriamwei met!

Soukohp Joseph Smith padahngki, “Ansou wet, dahme kitail kin rong nan rongamwahu me kitail alehdier? Ngilen peren! Ngihl en kupwurkalahngan sang nanleng; oh ngihl en me mehlel sang sampah; rohng kaperen ong me melahr akan; ngihl en kaperen ong me momour oh me melahr akan; rohng kaperen en popohl laud” (Doctrine and Covenants 128:19).

Rohng kaperen pwukat kohdo pwehki Sahm Nanleng oh Sapwellime Iehros kempoake, Sises Krais, ketin poakohng kitail oh kupwurki—laudsang mehkoaros—en pwurehng kasamwoh kitail Rehra, me kitail kak ahneki soangen mour me ira sapwellimaniki kohkohlahte. Kopwurpwurdohu kasalehda me Ira ketin wialahr soahng koaros me anahnepe pwe met mweimweiengehr kitail koaros. Nan atail seiloak soutik, kitail pahn lelohng kahpwal akan, ahpw “[kitail] mie, pwe [kitail] en kak peren“ (2 Nihpai 2:25) nan mour wet oh mour kohkohdo. Mwein Soukohp Joseph me keieu ese met mehlel.

Joseph kalapw sohpai songosong oh kahpwal kan, ahpw e kolokol ong ah “pepehm en peren” (Joseph Smith—History 1:28). E ahnikihte peren, kehl, oh koahiek, oh e kapwaiada doadoahk kopwuriamwei me e pwukoahki. I tamataman irail souleng kan me tepin kamehlele, utungada, oh idawehn Soukohp Joseph Smith oh tohnmeteikihla pein irail ong kawadahn Mwomwohdiso. Kitail konehng kihong irail atail kaping oh wahu mehlel.

E sohte mengei ni tepin rahn akan en Mwomwohdiso, oh e kak pil sohte mengei rahn pwukat. Ahpw Kopwurupwurdo wenwenlahte. Ni Sises Krais eh wia moangen Mwomwohdiso wet, soukohp ieias kan pahn kawkaweidkitail. Tehnpas akan en Kauno pahn kin kokouda, pwe kapai kan en inou soutik kan rehn Koht kak kihkitailpene Reh oh kempoakepahtail me mih pali koaros en kahdengo (kilang Madiu 16:19). Limpoak en Koht oh Sises Krais pahn kohieng sampah pwon ni atail idawehn Sapwellimen Sounkomour poahngok en kamwenge Sapwellime sihpw kan oh ehukihda Sapwellime rongamwahu. Kitail pahn kadehdehki mehlel kan en Kopwurupwurdo kohiei ni wiepe kan oh wasa kan me sohte kak medewehda ni rahn akan en Joseph.

Kitail kak diar kehl oh peren laud—ni dahme Soukohp Joseph wiahier—ni atail koledi oh momourki mehlel kesempwal pwukat. Pakair me Joseph kihong Soulengko mahs mihmihte rehtail rahnwet: ”Kitail sou doulahte nan doadoahk kesempwal wet? Wenla mwowe oh kedehr pweiek. Ahniki eimah, … oh kohkohlahte, wonowei pwehn pweida! Mweidehng mohngiongamwail en perenda, oh popohl douluhl” (Doctrine and Covenants 128:22).

Rohng kaperen en limpoak oh popohl me Kopwuropwurdohu kin wahdo en kin kapaida oh kaweid atail mour kan—met oh kohkohlahte.