Pweng Wolacna ke Luhngse ac Engan

Sie lwen sasuc tuhkuh nuh in sie sucu muhta insahk uh, suc God Pahpah ac Wen Nahtuhl, Jisus Kraist, sikyang ac sramsram nuh sel Joseph Smith in topuk pruhe lal Joseph fuhsr lah alu fuhkah el enenuh in wi (liyeJoseph Smith—History 1:14–20). Jisus Kraist el fahk nuh sel Joseph elan tiac wi kuhtwena alu. El olwelah muh fohnlah luhn wosasuc Lal ac fah ikacklah nuh sel Joseph ke pacl fahsruh uh.

Nuh sin mwet puhs, Joseph el motkwoeyuck muh pa suhfal emet in pahngonyuck nuhke sie orekma yohk srihpac, ac pwacye selos. El tiac lutlut ac tuhlihk mukul tiac etweyuck se tuhkuh ke sie imac srihsrihk ke inkucl wihklac se. Oacna ke kuhtuh fahk ke Mwet Lahngo in pacl Lal ah, “Kuh oasr ma wo kuh in tuhkuh Nazareth me?“ (John 1:46), puhkwanten mwet motko lah mac wo kuh in tuhkuh ke sie tuhlihk yac-14 tiac lutlut fin acn Palmyra, New York. Tuhsruhk kacl Joseph—oacna ma motkwoeyuck muh el suhfal kac—Pahpah Lucng ac Leum Jisus Kraist ac fah ikacslah ma pwacye in etweyuck. Ma inge fah use finsrak nuh sesr tuh in ohiac srihsrihk ac puhsisacl lasr, kuht kuh pac in oruh kahsruh ke inkacnek yohk srihpac nuhke orekma luhn Leum.

Pacl puhs, Leum el pahnglol Joseph“ ac sramsram nuh sel liki kuhsrao, ac sang nuh sel masap“ (Olweacng ac Wuhlweacng 1:17). Joseph Smith el eis fwackyuck sacohklacna ac mwe luti yohk srihpac ma use kahlwem sasuc nuhke etwacack lasr ke plwacn wowo luhn Pahpah Lucng ac molwelah wolacna luhn Jisus Kraist ac ke luhn kuhiyen iwaclah kihsackuhnla Lal. Kalmeyac, pweng wolacna inge tuhkuh arulacna falyang nuhke kahsruh luhlahp ke inkacnek in forfor, sramsram, ac kuhtuh pac inkacnek ma lwelah kahlwem luhn God in sahrmwelihk in ahkinsewowoye tuhlihk puhs ac pucspucs Nahtuhl.

Lupufacn Moroni El Sang Puhlwet Kol ah nuh sel Joseph Smith, sel C. C. A. Christensen

Mwe Ahkpwacye Fokoko se ke Luhngse luhn God

Sikyak luhn lupufacn Moroni nuh sel Joseph Smith ah enwenweyuck nuhke Fohlohkyak ac mwe ahkpwacye fokoko ke luhngse luhn God. Moroni el fahk nuh sel Joseph ke ma suhmuhslah se, sihmlac fin puhlwet kol, pihkihnyucki an fototo (liyeJoseph Smith—History 1:33–34). Kuhtuh pacl tok, ituckyang nuh sel Joseph “kuh lucng me“ (Olweacng ac Wuhlweacng 20:8) in luhngaslah ma sihmlac inge nuhke ma suc eklac Puk luhn Mormon, suc tu sisken Pwacpuhl ac el sie pac loh kacl Jisus Kraist.

Nohfohnna ma lihn Puk luhn Mormon, kuht rit ke mwet suc, siofok yac met luhkwel Kraist, etuh ac sruhmuhm ke tuhkuh Lal ac mukuikuiyak kac. Kuht oacyacpac konwacack ma suhmuhslah ke sikyak luhn Mwet Lahngo suc misac moulyak ac luti inmahsrlon mwet Nephi, pacl se ma El suli mwet nuhkwewa in tuhkuh nuh yohrohl ac puhla akucl ke sisken Mahnol ac mahk ke osra lun Pahol ac Niacl (liye3 Nephi 11:14–15). El ahkkeyelah mwet mas, ul, sulongihn—“elos nuhkwewa ma puhlakihn kuhtwena ohiyac“— ac tohkoh ahkinsewowoye tuhlihk srihsrihk ac pruhe kaclos (liye 3 Nephi 17:7–9, 21). Kuht luti yohklacna ke luhngse ac pahkomuhta luhn Mwet Lahngo ke ma suhmuhslah muhtal se inge.

Puk luhn Mormon ahkpwacyei lah “Jisus pa Kraist.“ Ma pwacye ke Puk luhn Mormon sulpac ahkacsmakihnye kuht lah Pahpah Lucng ac Jisus Kraist luhngse kuht yohk liki ma nuhkwewa kuht kuh in motko.

Fohlohkyak sac tahfweyucklac ke sikyak luhn kuhtuh pac mwet utuck pweng inkuhsaro me nuh sel Joseph Smith. “John Pacptis suc sifilpac moulyak el tuh fohlohkohnwack wal in pacptais ke tili otyak nuhke elah luhn ma koluk. Tolu sin Mwet Sap Singucul luo emet ah—Peter, James, ac John—elos fohlohkohnwack kunohkohn luhn mwet sap ac ki ke wal luhn pristut. Kuhtuh pac sahyac tuhkuh, weluhlwacng Elijah, suc tuh fohlohkohnma kuh in kapsrweni sucu nuh sie ne tok ma pahtpaht ke inmahsrlo wacngihn sahflahiyac ma som ahluhkwelah misac.“

Ke Eprel 6, 1830, Jisus Kraist el akiac yohrohl Mwet Pahluh Joseph Smith sie pactuhn in alu tukihn alu se El tuh akiac ke pacl luhn Wuhlweacng Sasuc ah (liye Article of Faith 1:6), ahksahf ke “pwelucng luhn mwet sap ac mwet pahluh, Jisus Kraist sifacna pa yot insroasrihk sac.“Ephesians 2:20). Alu luhn Jisus Kraist luhn Mwet Luhlahlfongi Lal ke Lwen-Sahflah oraclah mwe insewowo ke fohlokyak luhn kuh luhn pristut in oasr nuh sin tuhlihk nuhkwewa nuhtin God ma ahkwoeloslac in eis.

Oacna ke President Russell M. Nelson el luti kuht, kuh kuh in konwacack engan ke auilyak lwen nuhkwewa ke kuht forlah nuh sin Pahpah Lucng ac Mwet Lahngo lasr. Nuh suwos ma puhlakihn muhnahs kuh elos ma suhfal kuh tiac enwenweyuck: kowos nuhkwewa suliyuck in tuhkuh nuh yurin Kraist ac Alu Lal. Alu uh tiac acn in tuhkweni luhn mwet fokoko tuhsruhk ohspituhl se luhn mwet mas. Elder Dieter F. Uchtdorf ke U luhn Mwet Sap Singucul Luo ahkacsmakihnye kuht lah “kuht tuhkuh nuhke alu uh tiac in okwanlah praplwem lasr uh tuhsruhk in unweloslac.“

In alu uh kuht konwacack engan in pacl wo ke kuht ahollah ohiyacsr, kahsruh mwet sahyac ke luhngse, ac akacsruhi ke puhla lasr sifacna ke ma wolacna pucpucs luhn Kraist. Kuht kuh in “oacwaclah inmahsrlon mwet ke alu luhn Kraist“ ac “in esamyuck ac kihtweyuck ke kahs wo luhn God“ (Moroni 6:4). Fuhkah luhpan mwe insewowo askuhlacna se inge!

Mwet Pahluh Joseph Smith el fahk sie pacl ah, “Ingena, meah kuht lohng ke wosasuc ma kuht eis tari? Sie puhsra luhn kaksak! Puhsra pahkotwen se tuhkuh inkuhsrao me; ac puhsra pwacye se liki facluh; pweng wolacna nuh sin mwet misac; puhsra in kaksak se nuh sin mwet moul ac misac; pweng wolacna luhn engan luhlahp“ (Olweacng ac Wuhlweacng 128:19.

Pweng wolacna inge tuhkuh ke srihpen Pahpah Lucng ac Wen Sacohk, Jisus Kraist, luhngse kuht ac kena—yohk liki nuhkwewa—in uskuht fohlohk nuh Yohrohltahl, in oasr yohrohsr ne tok kain moul se Eltahl moulkihn uh. Fohlohkyak sac fahkwack lah Eltahl oraclah tari ma nuhkwewa enwenweyuck in oraclah inkacnek wolacna se inge nuh sin nuhkwewa. Ke fuhfahsryucsr lasr nuh tok ma pahtpaht, kuht fah puhla kweok ac ma upac, tuhsruhk “[kuht] pa, tuh [kuht] in kuh in engan“(2 Nephi 2:25) ke moul se inge ac ma se tok uh. Mwet Pahluh Joseph Smith el etuh ke ma se inge yohk liki nuhkwewa.

Joseph el sun lainyuck pacl puhs ac ahkkweokyeyuck, ne ohinge el sruokyac na “mongfihsrwacs el mahtuhlah kac“ (Joseph Smith—History 1:28). El srwackna engan, fokoko, ac kuh in sulpac tuyak, ac el ahksahfyelah orekma na yohk se ma ituckyang elacn oruh. Nga kaksakihn Mwet Luhlahlfongi met ah suc luhlahlfongi, tahpuhk, ac fahsr tohkohl Joseph Smith ac kihsackuhnuhlosyang in muhsaheack Alu uh. Kuht misac luhlahp seltahl ke kaksak ac ahkfuhlwact.

Tikuclkucl in lwen oemeet luhn Alu uh, ac kuh pac in tikuclkucl misenge. Tuhsruhktuh Fohlohkyak srackna fahsr. Ke Jisus Kraist pa sifen Alu se inge, mwet pahluh moul ac fah tahfwelah in kol kuht. Lohm sin God inge ac fahlacna in muhsahiyuck, tuh mwe insewowo ke wuhlweacng ma pahtpaht yurin God kuh in kuhpwacsri kuhti nuh Sel ac nuh sin mwet kuht luhngse ke kwewana siskac ke lihsrlihsr sac. (liyeMatthew 16:19). Luhngse luhn God ac Jisus Kraist ac fah fahsrwelihk nuh fin facluh nohfohn ke kuht fahsr tukihn masap luhn Mwet Lahngo in kihtwacacng sip Nahtuhl ac akacsruhi ke wosasuc Lal. Kuht fah mwet loh ke ma pwacye luhn Fohlohkyak fahsr nuh met in ohiyac ac nuhke acn ma tuh arulacna upac in motkwoeyuck ke pacl lal Joseph ah.

Kuht kuh in konwacack kuh ac engan luhlahp—oacna ke Mwet Pahluh Joseph el tuh oruh—oacna ke kuht sohkihn ac moulkihn ma pwacye wolacna inge. Pahng se ma Joseph el oraclah nuh sin Mwet Luhlahlfongi in pacl lal ah tahfweyucklac yohrohsr mihsenge: “Yac kuht ac tiac fahsr nuh met ke srihpac yohk se inge? Fahsr nuh met ac tiac fohlohk nuh tok. Puhlaik, … nuh met, nuh ke kuhtanglah! Lwelah insiom in enganwack, ac in kaksak ma luhlahp“ (Olweacng ac Wuhlweacng 128:22).

Lwelah tuh pweng wolacna ke luhngse ac engan ma Fohlohkyak use ahkinsewowoye ac kol moul lasr—ingena ac pacl nuhkwewa.