Tej Moo Zoo Siab ntawm Kev Hlub thiab Kev Xyiv Fab

Yog ib lub caij nyoog tshiab rau tib neeg thaum uas nyob hauv ib koog ntoo, Vajtswv Leej Txiv thiab Nws Leej Tub, Yexus Khetos, tshwm sim thiab hais lus rau Joseph Smith, teb nws thaum tus tub hluas Joseph tau thov seb nws yuav tsum koom lub koom txoos twg (saib Joseph Smith—Keeb Kwm 1:14–20). Yexus Khetos qhia Joseph kom nws tsis txhob koom tej lub koom txoos ntawd. Nws cog lus tias yuav muaj ib lub sij hawm yav tom ntej thaum Nws yuav qhia txhij txhua ntawm Nws txoj moo zoo rau Joseph.

Tib neeg coob xav tias ntshe Joseph tsis zoo li ib tug neeg uas tus Tswv yuav xaiv kom ua ib txoj hauj lwm tseem ceeb no, es lawv yeej xav yog lawm. Joseph yog ib tug tsis tau kawm ntawv tiav thiab yog ib tug me nyuam tub uas tsis tseem ceeb uas nyob hauv ib thaj teb me me ntawm ib lub zos me me. Ib yam li ib cov uas tau hais txog tus Cawm Seej hauv Nws lub caij nyoog, “Puas muaj ib yam dab tsi zoo uas tuaj hauv lub nroog Naxaies tuaj?” (Yauhas 1:46), neeg coob xav paub seb ib tug uas muaj 14 xyoos uas tsis kawm ntaub kawm ntawv hauv lub zos Palmyra, New York puas ua tau ib yam dab tsi zoo. Tiam sis los ntawm Joseph—tus uas tsis zoo li ib tug uas txawj ua tej no los—Leej Txiv Saum Ntuj Ceeb Tsheej thiab tus Tswv Yexus Khetos tau ua kom muaj raws li ib yam dab tsi zoo tshaj plaws. Qhov no kuj ua rau peb muaj kev cia siab tias los ntawm tej yam me me thiab peb txoj kev txo hwj chim, peb kuj pab tau ua tej yam uas muaj nqis rau tus Tswv txoj hauj lwm.

Tom qab ntawd, tus Tswv tau hu Joseph “thiab hais lus saum ntuj ceeb tsheej los rau nws, thiab muab tej lus txib rau nws” (Lus Qhuab Qhia thiab Kev Khi Lus 1:17). Joseph tau txais kev tshwm sim thiab tej lus qhuab qhia uas pab peb to taub Leej Txiv Saum Ntuj Ceeb Tsheej txoj hau kev thiab Yexus Khetos txoj kev hlub uas txhiv dim thiab to taub lub hwj chim ntawm Nws txoj kev theej txhoj. Tej moo zoo siab no los thaum lub sij hawm uas muaj txuj ci tshiab ntawm kev thauj neeg mus los, kev sib txuas lus, thiab lwm yam uas cia Vajtswv txoj kev kaj ci ntsa iab tuaj foom koob hmoov nxtiv rau Nws cov me nyuam.

Tus Tim Tswv Maulaunais Muab cov Phiaj Kub rau Joseph Smith, los ntawm C. C. A. Christensen

Ib Qhov Tim Khawv txog Vajtswv txoj Kev Hlub

Tus tim tswv Maulaunais txoj kev tshwm sim rau Joseph Smith pom yog ib qhov tseem ceeb ntawm txoj Kev Muab Txoj Moo Zoo Txum Tim Rov Qab Los thiab qhia tias Vajtswv hlub peb. Maulaunais qhia Joseph txog ib phau ceev xwm txheej, sau rau cov phiaj kub, uas muab faus ze (saib Joseph Smith—Keeb Kwm 1:33–34). Thaum kawg, Joseph tau txais “hwj chim los saum ntuj los” (Lus Qhuab Qhia thiab Kev Khi Lus 20:8) kom txhais ib phau ceev xwm txheej uas yog Phau Ntawv Maumoos, uas zoo li Phau Npaivnpaum thiab ua tim khawv txog Yexus Khetos thiab.

Hauv Phau Ntawv Maumoos, peb nyeem txog cov neeg uas, nyob ntau pua xyoo ua ntej Khetos yug los, uas paub thiab qhia txog Nws txoj kev los thiab xav xav kom Nws los tiag. Peb kuj nyeem txog zaj uas qhia txog tus Cawm Seej uas sawv rov los txoj kev tshwm sim thiab txoj hauj lwm qhuab qhia rau cov Neeg Nifais, es thaum ntawd Nws caw lawv sawv daws los cuag Nws thiab los muab lawv tej tes xuas qhov mob ntawm Nws sab tav, thiab xuas tej qhov ntsia hlau hauv Nws tes thiab hauv Nws taw. (saib 3 Nifais 11:14–15). Nws kho cov mob, cov neeg ceg tawv, cov neeg dig muag—“rau tag nrho lawv tej neeg uas raug txom nyem txhua yam”—thiab foom koob hmoov rau cov me nyuam thiab thov Vajtswv rau lawv (saib 3 Nifais 17:7–9, 21). Peb kawm ntau yam txog tus Cawm Seej txoj kev khuv leej thiab siab hlub hauv zaj no.

Phau Ntawv Maumoos yog ib zaj lus tim khawv tias “Yexus yog tus Khetos.” Tej yam hauv Phau Ntawv Maumoos pheej qhia peb tias peb Leej Txiv Saum Ntuj Ceeb Tsheej thiab peb tus Cawm Seej hlub peb tshaj qhov uas peb to taub.

Twb muab txoj moo zoo ntxiv txum tim rov qab los thaum lwm tus tub txib saum ntuj ceeb tsheej tau tshwm sim rau Joseph Smith pom. “Yauhas tus uas Muab Neeg Ua Kev Cai Raus Dej tau sawv rov los thiab tau muab txoj cai txum tim rov qab los txoj cai ua kev cai raus dej kom zam txim rau tej kev txhaum. Peb tug ntawm Yexus kaum ob tug Thwj Tim thaum ub—Petus, Yakaunpaus, thiab Yauhas—tau muab kev ua thwj tim thiab cov yawm sij ntawm txoj cai pov thawj hwj txum tim rov qab los. Muaj lwm tus uas nqis los thiab, xws li Eliyas, uas muab txoj cai txum tim rov qab los kom khi tsev neeg ua ke mus ib txhis dhau kev tuag.

Thaum lub Plaub Hlis Ntuj hnub tim 6, 1830, dhau los ntawm Joseph, Yexus Khetos tau txhim tsa ib lub koom txoos uas coj raws li lub koom txoos Nws tau txhim tsa hauv Phau Tshiab (saib Tej Nqe Kev Ntseeg 1:6), “saum lub qua tsev uas cov [thwj tim] thiab cov [yaj saub] twb ncaws tau cia lawm. Tus ncej tas ntawd yog Yexus Khetos ntag” (Efexus 2:20). Tag nrho Vajtswv cov me nyuam uas npaj tos txais tej koob hmoov los ntawm lub hwj chim pov thawj hwj uas txum tim rov qab los, yuav txais tau los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Thawj Tswj Hwm Russell M. Nelson tau qhia rau peb tias, peb nrhiav tau kev xyiv fab hauv kev hloov siab lees txim txhua hnub thaum peb tig mus rau Leej Txiv Saum Ntuj Ceeb Tsheej thiab peb tus Cawm Seej. Rau tag nrho cov uas ntxov siab los sis xav tias lawv ua tsis tau los sis xav tias tsis haum xeeb: peb caw nej sawv daws los cuag Khetos thiab Nws lub Koom Txoos. Lub Koom Txoos tsis yog ib lub tsev rau cov neeg zoo tag nrho tiam sis yog ib lub tsev kho mob rau cov uas mob. Txwj Laug Dieter F. Uchtdorf ntawm Pawg Kaum Ob tug Thwj Tim tau qhia peb tias “Peb tuaj koom lub koom txoos kom kho tau peb tej teeb meem.”

Tom lub koom txoos peb nrhiav tau kev xyiv fab thaum muab peb lub siab tsom ntsoov rau cov neeg nyob sab nraud, pab lwm tus nrog kev hlub, thiab qhia txog tej lub sij hawm hauv peb lub neej thaum txais Khetos txoj kev zoo. “Cov ntseeg yuav suav [peb] nrog cov neeg ntawm Khetos lub koom txoos” thiab “yuav nco qab [peb] thiab Vajtswv txoj lus zoo yuav los yug [peb]” (Maulaunais 6:4). Yeej yog ib txoj koob hmoov zoo kawg!

Tus Yaj Saub Joseph Smith tshaj tawm tias, “Nim no, peb hnov dab tsi nyob hauv txoj moo zoo uas peb tau txais? Ib lub suab ntawm kev zoo siab! Ib lub suab ntawm kev hlub tshua los saum ntuj ceeb tsheej los; thiab ib lub suab ntawm kev tseeb tawm hauv av los; tej moo zoo siab rau cov tuag; ib lub suab ntawm kev zoo siab rau cov ciaj thiab cov tuag; tej moo zoo siab ntawm kev xyiv fab heev” (Lus Qhuab Qhia thiab Kev Khi Lus 128:19).

Tej moo zoo siab no tau rov qab los vim tias Leej Txiv Saum Ntuj Ceeb Tsheej thiab nws tus Tub uas Nws hlub, Yexus Khetos, hlub peb thiab xav —tau tshaj plaws txhua yam—kom peb rov qab mus nyob hauv Nkawd lub xub ntiag, kom peb thiaj li ua lub neej li Nkawd tas mus li. Txoj Kev Muab Txoj Moo Zoo Txum Tim Rov Qab Los qhia peb tias Nkawd tau ua txhua yam uas yuav tsum ua kom peb sawv daws thiaj tau lub cib fim zoo tshaj plaws no. Nyob hauv peb lub neej mus ib txhis, peb yuav raug tej kev sim siab thiab tej yam nyuaj, tiam sis “muaj [peb], xwv kom [peb] yuav muaj kev xyiv fab” (2 Nifais 2:25) hauv lub neej no thiab lub neej tom ntej. Tus Yaj Saub Joseph paub tej no zoo tshaj ntau tus.

Txawm Joseph raug kev tawm tsam thiab tsim txom los, nws tseem “muaj kev zoo siab” (Joseph Smith—Keeb Kwm 1:28). Nws tseem muaj kev xyiv fab, muaj zog, thiab nyob khov kho, thiab nws tau ua tas txoj hauj lwm zoo tshaj uas Vajtwsv tau muab rau nws ua. Kuv qhuas txhua tus Neeg Ntseeg thaum ub, cov uas ntseeg, txhawb nqa, thiab raws tus Yaj Saub Joseph Smith thiab, muab lawv tus kheej thiab lawv tej ntiag tug fij tseg pab lub Koom Txoos loj tuaj. Peb ris lawv txiaj heev.

Hauv lub Koom Txoos thaum chiv keeb, yeej nyuaj thiab hnub no los yeej nyuaj tau thiab. Tiam sis Txoj Kev Muab Txoj Moo Zoo Txum Tim Rov Qab Los los yeej ua ntxiv mus. Yexus Khetos yog tus thawj coj ntawm lub Koom Txoos no, thiab cov yaj saub uas muaj sia nyob yuav coj peb txoj hau kev. Yuav tseem ua Tus Tswv tej tuam tsev kom thiaj li txais tau tej koob hmoov ntawm tej kev khi lus mus ib txhis nrog Vajtswv kom peb thiab cov uas peb hlub uas nyob ob sab ntawm daim ntaub thaiv khi rau Vajtswv (saib Mathais 16:19). Vajtswv thiab Yexus Khetos txoj kev hlub yuav mus thoob plaws lub ntiaj teb thaum peb ua raws li tus Cawm Seej cov lus txib kom cia li yug Nws pab yaj thiab qhia Nws txoj moo zoo. Peb yuav pom tej lus tseeb ntawm txoj Kev Muab Txoj Moo Zoo Txum Tim Rov Qab Los mus rau tej qhov chaw uas hauv Joseph lub caij nyoog tib neeg xav tias ua tsis tau.

Peb nrhiav tau dag zog thiab kev xyiv fab heev—ib yam li tus Yaj Saub Joseph nrhiav tau—thaum peb ua li tej yam tseeb no uas muaj nuj nqis heev. Tej lus uas Joseph tshaj tawm rau cov Neeg Ntseeg thaum ub yeej tseem nrog peb hnub no: “Cov kwv tij, peb yuav tsis mus lawm yav tom ntej nrog txoj hauj lwm tseem ceeb ua luaj no los? Cia li mus lawm yav tom ntej thiab txhob thaub qab. Ua siab loj, … thiab cia li mus, mus tsis tu ncua kom txog thaum yeej! Nej lub siab cia li xyiv fab, thiab cia li zoo siab heev” (Lus Qhuab Qhia thiab Kev Khi Lus 128:22).

Cia tej moo zoo ntawm txoj kev hlub thiab kev xyiv fab uas los ntawm Kev Muab Txoj Moo Zoo Txum Tim Rov Qab Los foom koom hmoov thiab coj peb lub neej-- tam sim no thiab mus ib txhis.