’O Iesu Mesia te puna nō te ti’aturira’a « ora » ’e te « pāpū » ’e te « rahi a’e »

Te hōro’a pae vārua nō te ti’aturira’a i roto i te Mesia ’o te tīa’ira’a ’oa’oa ïa i te ora mure ’ore nā roto i te « maita’i rahi, ’e te aroha, ’e te maita’i o te Mesia mo’a » (2 Nephi 2:8) ’e te hina’aro pūai nō te mau ha’amaita’ira’a nō te parauti’a tei fafauhia mai. Tē fa’a’ite nei te mau ha’apāpū i’oa « ora », « pāpū », ’e « rahi a’e » i roto i teie mau ’īrava i te hō’ē ha’apāpūra’a tāmau ’e te ’ū’ana nō te ti’afa’ahoura’a ’e nō te ora mure ’ore nā roto i te fa’aro’o ia Iesu Mesia.

’Ua ha’amāramarama mai te peropheta Moromona :

« ’E teie fa’ahou ā, e tō’u mau taea’e here, e parau atu vau ia ’outou nō ni’a i te ti’aturi. E nāhea ho’i e ti’a ai ia ’outou ’ia fa’ari’i i te fa’aro’o, maori rā ’ia vai tō ’outou ti’aturira’a ?

« ’E e aha ïa tā ʼoutou e ti’aturi atu ? Inaha, tē parau atu nei au ia ’outou, ’ia vai tō ’outou ti’aturira’a i te tāra’ehara a te Mesia ’e i te mana nō tōna ti’afa’ahoura’a, ’ia faʼati’ahia nō te fa’ari’i i te ora mure ʼore, ’e te tumu nō te reira nō tō ’outou ïa fa’aro’o iāna mai te au i tei parauhia mai ra.

« Nō reira, mai te mea e fa’aro’o tō te ta’ata, ’ia vai ato’a ïa tōna ti’aturira’a ; ’ia ’ore te fa’aro’o ’aita ato’a ïa e ti’aturira’a » (Moroni 7:40–42).

E ha’amata te ti’aturira’a i roto i te Mesia, te ti’aturira’a ora ’e te pāpū ’e te rahi a’e, nā roto i te ’itera’a ē tē ora nei te Atua te Metua mure ’ore. ’O ’oia tō tātou Metua, ’e ’o tātou tāna mau tamari’i vārua. E mau tamaiti ’e e mau tamāhine vārua mau tātou nā te Atua ’e ’ua fa’ari’i tātou i te mau maita’i hanahana nō ’ō mai iāna ra.

’O te Metua te ta’ata i feruri i te fa’anahora’a nō te ’oa’oa (hi’o Aberahama 3:22–28). E mau tamaiti ’e e mau tamāhine vārua nā te Atua, « ’ua fa’ari’i [tātou] i tāna fa’anahora’a e ti’a ai ’i tāna mau tamari’i ’ia roa’a te hō’ē tino ’i’o ’e te ivi ’e ’ia roa’a ho’i te ’itera’a rau i te tāhuti nei nō te haerera’a i mua ē tae atu ai i te maita’i-roa-ra’a ’e ’ia fa’atupu ho’i i tō rātou hope’a hanahana ’ei ta’ata ’āi’a nō te ora mure ’ore. » I roto i te mau pāpa’ira’a mo’a, tē ha’api’i nei tātou ē : « E tino ’i’o ’e te ivi tō te Metua mai te au i tō te ta’ata nei te huru ; ’e tō te Tamaiti ato’a ho’i » (Te Ha’api’ira’a Tumu ’e te mau Fafaura’a 130:22). Nō reira, e mea faufa’a rahi roa te fa’ari’ira’a i te hō’ē tino tāhuti i roto i te ’ohipa nō te haerera’a i mua ē tae atu ai i tō tātou hope’ara’a hanahana.

E mau tino heterua tātou. ’Ua ’ahuhia tō tātou vārua, tō tātou tuha’a mure ’ore, i te tino tāhuti, tei raro a’e ho’i i te mau hina’aro ’e te mau hia’ai o te tāhuti nei. ’Ua fa’ata’ahia te fa’anahora’a nō te ’oa’oa a te Metua nō te arata’i i tāna mau tamari’i, nō te tauturu ia rātou ’ia ho’i i te fare ma te hau, iāna ra, ma te tino ti’afa’ahou ’e te fa’ateiteihia, ’e nō te fa’ari’i i te mau ha’amaita’ira’a nō te ’oa’oa ’e te poupou mure ’ore.

The Christ Child [Te Tama Mesia], nā Sharlotte Andrus

Te ti’ara’a fa’aora o Iesu Mesia i roto i te fa’anahora’a a te Metua

’O Iesu Mesia te Tamaiti fānau tahi a te Metua mure ’ore. ’Ua haere mai ’oia i roto i te ao nei nō te rave i te hina’aro o tōna Metua (hi’o 3 Nephi 27:13). ’O Iesu Mesia tei fa’atāhinuhia e te Metua ’ei ti’a nōna iho i roto i te mau mea ato’a e au i te fa’aorara’a o te huita’ata nei. ’O ’oia tō tātou Fa’aora ’e tō tātou Tāra’ehara nō te mea ’ua upo’oti’a ’oia i ni’a i te pohe ’e te hara.

’Ua tohu Alama i te nūna’a o Gideona nō ni’a i te ’ohipa fa’aorara’a a te Mesia :

« ’E e haere atu ’oia ma te fa’a’oroma’i i te mau māuiui ’e te mau ’ati, ’e te mau huru fa’ahemara’a ato’a ra ; ’e e nā reira ’oia ’ia tupu te parau ’o tei nā ’ō mai ē, e rave ’oia i ni’a iāna te mau māuiui ’e te mau ma’i o tōna mau ta’ata.

« ’E e rave ’oia i te pohe i ni’a iāna, ’ia ti’a iāna ’ia tātara i te mau tā’amu nō te pohe i ru’uru’uhia ai tōna ra mau ta’ata ; ’e e rave ’oia i tō rātou mau paruparu i ni’a iho iāna, ’ia fa’a’īhia tōna ra ’ā’au i te aroha, mai te au i te tino, ’e ’ia ’ite ’oia nā roto i te tino i te rāve’a nō te fa’aora i tōna mau ta’ata ’ia au i tō rātou mau paruparu.

« I teienei, ’ua ’ite te Vārua i te mau mea atoa ; ’āre’a rā e fa’a’oroma’i te Tamaiti a te Atua i te mamae tino nei, ’ia ti’a iāna ’ia rave i te mau hara a tōna ra mau ta’ata i ni’a iāna, ’e ’ia ti’a iāna ’ia fa’a’ore i tā rātou mau hapa mai te au i te mana nō tāna fa’aorara’a » (Alama 7:11–13).

Te parau tumu mātāmua o te ’evanelia ’o te fa’aro’o ïa i te Fatu ia Iesu Mesia. E fa’atumu te fa’aro’o mau i ni’a i te Fa’aora ’e e fa’ati’a ia tātou ’ia ti’aturi iāna ’e ’ia ti’aturi hope roa i tōna mana nō te fa’aora ia tātou i te pohe, nō te tāmā ia tātou i te hara, ’e nō te ha’amaita’i ia tātou ma te pūai hau atu i tō tātou iho.

’Ua fa’a’ite pāpū ’o Moroni ē : « ’E nō te mea ’ua tae mai te fa’aorara’a i te ta’ata nei nā roto ia Iesu Mesia, ’ua fa’aho’ihia atu ïa rātou i mua i te aro o te Fatu ; ’oia ïa, nā roto ho’i i te reira te mau ta’ata ato’a i te fa’aorahia, nō te mea ’ua fa’atae mai te pohe o te Mesia i te ti’afa’ahoura’a, ’o tei fa’aora i te ta’ata nei i te ta’oto hope ’ore, ’e e fa’aarahia ho’i te mau ta’ata ato’a e te mana o te Atua i taua ta’oto ra i te taime e fa’a’otohia ai te pū ; ’e e ti’a mai rātou, ta’ata ri’i ’e te feiā rarahi, ’e e ti’a mai rātou pā’āto’a i mua i tāna ra ha’avāra’a, ma te fa’aorahia ’e ma te fa’ata’a-’ē-hia i te tāpe’a mure ’ore nō te pohe, ’oia te pohe pae tino » (Moromona 9:13).

Tē fa’a’ite pāpū nei au ē, ’ua ha’amotu te Fa’aora i te mau tā’amu nō te pohe. ’Ua ti’afa’ahou mai ’oia, tē ora nei ’oia, ’e ’o ’oia ana’e te puna nō te ti’aturira’a ora ’e te pāpū ’e te rahi a’e.

’Ua fa’a’ite pāpū te peropheta Etera : « Nō reira, ’o ’oia ’o tē ti’aturi i te Atua, e riro ato’a ’oia i te ti’aturi ē tē vai ra te hō’ē ao maita’i roa, ’oia ïa, te hō’ē vāhi i te rima ’atau o te Atua, ’e e tae mai ho’i taua ti’aturira’a ra nā roto i te fa’aro’o, ’e e riro ho’i te reira ’ei tūtau nō te vairua o te ta’ata nei, nō te ha’apūai ’e nō te tāpe’a māite ia rātou, ’ia tāmau noa i roto i te mau ’ohipa maitata’i, ’e ’ia arata’ihia nō te fa’ahanahana i te Atua. » (Etera 12:4 ; reta tei fa’ahuru-’ē-hia).

I roto i teie pu’e tau ta’a ’ē nō te fa’ahanahanara’a i te fānaura’a o te ’aiū i Betelehema, ’ia ha’amana’o tāmau noa tātou ē ’ua haere mai Iesu Mesia i te ao nei nō te riro ’ei Fa’aora ’e ’ei Tāra’ehara nō tātou. Tē hōro’a mai nei ’oia ia tātou i te mau hōro’a pae vārua faufa’a rahi o te ora, te māramarama, te fa’a’āpīra’a, te here, te hau, te hi’ora’a ātea, te ’oa’oa ’e te ti’aturira’a.

Tē ani nei au ia ’outou ’ia ’imi māite i te hōro’a pae vārua nō te tīa’ira’a i te Fa’aora nā roto i te tuatāpapara’a i te mau ha’api’ira’a ’e te mau ’itera’a pāpū o te mau peropheta i tahito ra ’e nō teie ’anotau nō ni’a i tāna tusia tāra’ehara ’e tōna ti’afa’ahoura’a mau. ’Ia nā reira ’outou, tē fafau atu nei au ē e ha’apūaihia tō ’outou ’itera’a pāpū nō ni’a i te hanahana o te Fa’aora, e hōhonu atu ā tō ’outou fa’afāriura’a iāna, e tupu tō ’outou hia’ai ’e tō ’outou hinaaro pāpū ’ia ti’a ’ei ’ite itoito nōna, ’e e ha’amaita’ihia ’outou i te hoê tutau nō tō ’outou vārua—te ti’aturira’a ora ’e te pāpū ’e te rahi a’e.

Nā muri i te mau ’āpōsetolo tei fa’a’ite i tō rātou ’itera’a pāpū nō ni’a iāna i te roara’a o te mau tau, tē fa’a’ite nei au i tō’u ’itera’a pāpū ma te ’oa’oa ē ’o Iesu Mesia te Tamaiti ora a te Atua ora. ’O ’oia tō tātou Tāra’ehara tei ti’afa’ahou mai ma te tino ’i’o ’e te ivi hanahana, ’o tē nehenehe e fāfā. ’E nā roto i te fa’aorara’a ’e te fa’afaitera’a ’e te Atua tā te Fatu i fa’atupu nō te mau ta’ata ato’a, e nehenehe tātou e fa’ari’i i te ha’apāpūra’a pae vārua ’e te ti’aturira’a ora ’e te pāpū ’e te rahi a’e ē « e hope roa te ta’ata i te fa’aorahia i te Mesia » (1 Korinetia 15:22).