Sises Krais Me Wia Audepen “Momour,” “Mwahu,” oh “Koapwoaroapwoar Mehlel”

Kisakis en popohl sang ngehn sarawi iei insenamwahu me kitail kin ahniki ni mour soutik sang “wiewia pwung kan, oh mahk, oh kalahngan en Mesaia” (2 Nihpai 2:8) oh ineng laud en alehdi kapai en inou en wia me pwung. Atsedip en “momour,” “mwahu,” oh “mwahu douluhl” nan ire tikitik pwukat udahn kesempwal oh e poahsoankihda mehlel en Iasadahu oh mour soutik sang ni pwoson Sises Krais.

Soukohp Mormon kawehwedahr:

“Oh pil, riei kesempwal oko, I men koasoiaiong kumwail duwen koapworopwor. Ia mwomwen amwail pahn kak alehdi pwoson, ma kumwail sohte ahneki koapworopwor?

“Oh dahme kumwail pahn koapworopworki? Kilang I ndaiong kumwail me kumwail pahn koapworopworki tomwpen Krais oh manaman en sapwellime iasadao, en alehdi mour soutuk, oh met pwehki amwail pwoson ih nin duwen inouo.

“Eri, ma aramas men ahneki pwoson e udahn pahn anahne koapworopwor; pwe ma sohte pwoson e sohte kak en mie koapworopwor” (Moronai 7:40–42).

Koapwoaroapwoarki Krais me momour, mwahu, oh mwahu douluhl tepsang ni atail kin kamehlele me Koht Samatail Nanleng ieias. Ihme wia Samatail oh kitail iei Sapwellime seri ni pali ngehn. Kitail udahn sapwellimen Koht seri ni pali ngehn kei oh kitail wia aramas sohso kei sang Reh.

Samatailo me wiahda atail pilahn en popohlo (kilang Abraham 3:22–28). Nin duwen seri ngehn en Koht kei, kitail “alehda Sapwellime pilahn me iei Sapwellime serihkan en alehdi paliwar oh mour pohn sampah pwehn keirda ohng unsekla oh diarada arail sohso ohng mour soutik.” Nan pwuhk sarawi kan, kitail kin kasikuhlki me: “Samatailo mie paliwar en uduk oh tih me duwehte aramas men; duwehte Sapwelllime Iehroso” (Doctrine and Covenants 130:22). Eri, alehda paliwar kan wia mehkot kesempwal ni keirdahn atail doadoahk me kitail songosong en wiahla ehu rahn.

Kitahil ahniki paliwar riau. Ngenitail, me wia kisehn paliwar, kin likoukihda paliwaratail pwehn idawehn ineng oh kakehlepen paliwar. En Samatailo pilahn en popohl wiawihda pwehn kaweid sapwellime seri kan, en sewese irail en kak pwurala reh sang ni iasadahu, paliwar unsek, oh en alehda kapai kan en popohl oh pereperen.

Seri pwelel Sises, sang Sharlotte Andrus

En Sises Krais Pwukoahn Doarehla nan en Samatailo Pilahn

Sises Krais iei Sapwellimen Samatail Nanleng Iehroso. E kohdo pohn sampah pwehn wia kupwur en Semehu; (kilang 3 Nihpai 27:13). Sises Krais me Samatail Nanleng keiehdi oh kasarawihla pwehn weliandi Ih ni soahng koaros me pid komourlahn aramas koaros. Ihme wia atail Sounkomour oh Soundor pwehki Eh ketin powehdier mehla oh dihp.

Alma alehdi kokohp ohng aramas en Gideon kan me pid duwen en Mesaia doadoahk en komourlahu:

“Oh e pahn ketiwei, oh ketin lokolongki medek kan oh kahpwal akan oh kasongosong kan koaros; oh met pwehki mahseno en kak pweida me ketihtihki me e pahn ketin alehda medek koaros oh soumwahu koaros me sapwellime aramas akan pahn tungoalenki.

“Oh e pahn pwoula, pwe en kak sapwadada selin mehla me saliedi sapwellime aramas akan; oh e pahn ketin alehda arail luwet akan, pwe nan kapehde en ketin audaudiki kupwur kalahngan, nin duwen paliwar, pwe en mwahngi nin duwen paliwar mwomwen eh pahn ketin sowese sapwellime aramas akan nin duwen arail luwet akan.

“Met Ngehno mwahngi soahng koaros; ahpw Sapwellimen Kohto ketin lokolok nan paliwar pwe en kak ketikihda dihp en sapwellime aramas akan, pwe en kak ketikihsang arail dihp akan sang ni sapwellime manaman en kapitala” (Alma 7:11–13).

Tepin padahk en rongamwahuo iei pwoson Kaun Sises Krais. Pwoson mehlel kin uhlahngte rehn Sounkomouro oh kin kahrehda atail kak likih Ih oh kamehlele Sapwellime manaman en doarehsang kitail mehla, mwakelekeldahsang nan dihp, oh kiheng kitail kehl me laudsang dahme kitail kakehng.

Moronai kadehdeki, “Oh pwehki komourepen aramas, me Sises Krais ketikidohr, iei me kapwurehdo irailehr rehn Kauno; ei, met iei me aramas koaros komourkilahr, pwehki matalahn Krais kahrehda iasada, me kahrehda komourla sang ni mour soutuk, sang soangen meirlao me aramas koaros pahn pirikihda manaman en Koht ni ahnsou me sewi pahn pepeuk; oh irail pahn iasada, me tikitik oh me lapalap koaros, oh koaros pahn kesihnen mwohn sapwellime mwoahlo, sang ni arail komourla oh mweisangehr ni arail selidiong mehla kohkohlahte, mehla me wia mehlahn paliwar.” (Mormon 9:13).

Ih kadehdehki me Sounkomouro powehdier mehla. Eh ketin iasadahr, Eh ketin momour, oh Ih me wia poahsoan en momour, mwahu, oh koapwoaroapwoar mehlel.

Soukohp Ihder kadehdedahr, “Eri, mehmen me pahn kamehlele Koht kak koapworopworiki mehlel ehu sampah mwahu, iei, ni pali maun en Koht, koapworopwor wet kohdo sang ni pwoson, me kin wiahla angkehn palingehn en aramas akan me kak wiahiong irail en kehlail oh tengeteng, kalapw wiwia doadoahk mwahu kan, oh pahn kaluwahlang en kalingana Koht” (Ihder 12:4; ire kapatapat).

Nan rahn kesempwal wet ni ansoun kataman ipwidien seri pwelel nan Bethlehem, kitail en taman me Sises Krais ketdo pohn sampah pwehn wia atail Sounkomour oh Soundor. E ketkiheng kitail kisakis en ngehn kan en mour, marain, ipwsapahl, limpoak, meleilei, kalimangih, peren, oh koapwoaroapwoar.

I lukei komwi en rapahki mwahu kisakis en popohl en ngehn sarawi rehn Sounkomouro sang ni kasikuhlki padahk kan oh kadehde kan en soukohp en mahs oh rahn pwukat me pid duwen tohnmetei oh Iasadahu. Ni ahmw pahn wia met, I inouki me ahmw kadehde duwen Soundoro pahn kehlailda, ahmw kadehde duwen Ih pahn loalla, ahmw ineng oh men uhkihda duwen kadehdepen Ih ni mehlel pahn lalaudla, oh ke pahn kapaikihda ni angkehn ahmw mour—iangahki momour, mwahu, oh koapwoaroapwoar mehlel.

Pwehn patehngte Wahnpoaron kan me kadehdekihda Ih sang mahs, I men kadehdehki Ih ni ei udahn peren pwehki Sises Krais me wia Iehros en Koht ieias. Ih me wia atail Soundor en iasada ni paliwar unsek, paliwar ehu me mie uduk oh tih. Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais” (1 Korint 15:22).