ព្រះយេស៊ូវគ្រីស្ទគឺជាប្រភពនៃ ‹ សេចក្ដីសង្ឃឹមដ៏រស់ › ‹ ដ៏ប្រសើរ › និង ‹ ដ៏ប្រសើរលើសលែង › » លីអាហូណា ខែធ្នូ ឆ្នាំ២០២៤ ។
សារលិខិតប្រចាំខែនៃទស្សនាវដ្តី លីអាហូណា ខែធ្នូ ឆ្នាំ២០២៤
ព្រះយេស៊ូវគ្រីស្ទ គឺជាប្រភពនៃ « សេចក្ដីសង្ឃឹមដ៏រស់ » « ដ៏ប្រសើរ » និង « ដ៏ប្រសើរលើសលែង »
នៅក្នុងរដូវកាលក៏ពិសេសនេះនៃការប្រារព្ធពិធីការប្រសូត្ររបស់ព្រះឱរសនៅបេថ្លេហិម សូមឲ្យយើងចងចាំជានិច្ចថាព្រះយេស៊ូវគ្រីស្ទបានយាងមកក្នុងពិភពលោកនេះ ដើម្បីក្លាយជាព្រះអង្គសង្គ្រោះ និងជាព្រះប្រោសលោះរបស់យើង ។
The Nativity [ ប្រសូតិកម្ម ] ដោយ សាឡុត អេនឌ្រឺស៏
សាវកពេត្រុស និងព្យាការីយ៉ាកុប និងមរ៉ូណៃក្នុងព្រះគម្ពីរមរមន បានសង្កត់ធ្ងន់ទៅលើអំណោយទានខាងវិញ្ញាណនៃសេចក្តីសង្ឃឹមនៅក្នុងព្រះគ្រីស្ទ តាមវិធីស្រដៀងគ្នានេះ ។
ឧទាហរណ៍ ពេត្រុសបានប្រកាសថា « សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាដែលទ្រង់បានបង្កើតយើងឡើងជាថ្មី តាមសេចក្តីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបាន សេចក្តីសង្ឃឹមដ៏រស់ ដោយសារព្រះយេស៊ូវគ្រីស្ទទ្រង់រស់ពីស្លាប់ឡើងវិញ » ( ពេត្រុសទី១ ១:៣ បានបន្ថែមការគូសបញ្ជាក់ ) ។ សូមកត់សម្គាល់ការប្រើប្រាស់ពាក្យ « ដ៏រស់ » ដើម្បីពិពណ៌នាអំពី « សេចក្តីសង្ឃឹម » ។
យ៉ាកុបបានប្រកាសថា « ហេតុដូច្នោះហើយ ឱបងប្អូនជាទីស្រឡាញ់អើយ ចូរស្រុះស្រួលនឹងទ្រង់ទៅតាមរយៈដង្វាយធួននៃព្រះគ្រីស្ទ គឺជាព្រះរាជបុត្រាបង្កើតតែមួយរបស់ទ្រង់ នោះអ្នកអាចបានទទួលដំណើររស់ឡើងវិញ តាមរយៈអំណាចនៃដំណើររស់ឡើងវិញ ដែលនៅក្នុងព្រះគ្រីស្ទ ហើយត្រូវថ្វាយដល់ព្រះ ជាផលដំបូងនៃព្រះគ្រីស្ទ ដោយមានសេចក្ដីជំនឿ ហើយបានទទួល សេចក្ដីសង្ឃឹមដ៏ប្រសើរ នៃសិរីល្អដែលនៅក្នុងទ្រង់ មុនពេលទ្រង់នឹងសម្ដែងរូបអង្គទ្រង់នៅក្នុងសាច់ឈាម » ( យ៉ាកុប ៤:១១ បានបន្ថែមការគូសបញ្ជាក់ ) ។ សូមកត់សម្គាល់ការប្រើប្រាស់ពាក្យ « ដ៏ប្រសើរ » ដើម្បីពិពណ៌នាអំពី « សេចក្តីសង្ឃឹម » ។
ហើយមរ៉ូណៃបានថ្លែងថា « ហើយទូលបង្គំក៏ចាំដែរថា ព្រះអង្គមានព្រះបន្ទូលថា ព្រះអង្គបានរៀបចំវិមានមួយសម្រាប់មនុស្ស មែនហើយ គឺក្នុងចំណោមវិមានទាំងឡាយនៃព្រះវរបិតារបស់ទ្រង់ នៅក្នុងនោះ មនុស្សអាចមាន សេចក្ដីសង្ឃឹមដ៏ប្រសើរលើសលែងទៅទៀតហេតុដូច្នោះហើយ មនុស្សត្រូវមានសេចក្ដីសង្ឃឹម បើពុំនោះសោតទេ គេមិនអាចទទួលមរតកនៅក្នុងកន្លែង ដែលទ្រង់បានរៀបចំនោះបានទេ » ( អេធើរ ១២:៣២ បានបន្ថែមការគូសបញ្ជាក់ ) ។ សូមកត់សម្គាល់ការប្រើប្រាស់ពាក្យ « ដ៏ប្រសើរលើសលែង » ដើម្បីពិពណ៌នាអំពី « សេចក្តីសង្ឃឹម » ។
តើសេចក្តីសង្ឃឹមនៅក្នុងព្រះគ្រីស្ទគឺជាអ្វី ?
អំណោយទានខាងវិញ្ញាណនៃសេចក្តីសង្ឃឹមនៅក្នុងព្រះគ្រីស្ទគឺជាការរំពឹងទុកដោយអររីករាយអំពីជីវិតអស់កល្បជានិច្ចតាមរយៈ « បុណ្យគុណ និងសេចក្ដីមេត្តាករុណា និងព្រះគុណនៃព្រះមែស៊ីដ៏បរិសុទ្ធ » ( នីហ្វៃទី២ ២:៨ ) និងបំណងប្រាថ្នាដ៏ខ្លាំងចំពោះពរជ័យនៃសេចក្ដីសុចរិតដែលបានសន្យា ។ គុណនាមនៃពាក្យ « ដ៏រស់ » « ដ៏ប្រសើរ » និង « ដ៏ប្រសើរលើសលែង » នៅក្នុងខគម្ពីរទាំងនេះបង្ហាញអំពីការរីកចម្រើនឥតឈប់ឈរ និងការធានាដ៏រស់រវើកនៃការរស់ឡើងវិញ និងនៃជីវិតអស់កល្បជានិច្ចតាមរយៈសេចក្តីជំនឿលើព្រះយេស៊ូវគ្រីស្ទ ។
ព្យាការីមរមនបានពន្យល់ថា ៖
ហើយម្យ៉ាងទៀត ឱបងប្អូនដ៏ជាទីស្រឡាញ់របស់ខ្ញុំអើយ ខ្ញុំចង់និយាយទៅកាន់អ្នករាល់គ្នា អំពីសេចក្ដីសង្ឃឹម។ តើធ្វើដូចម្ដេចឲ្យអ្នករាល់គ្នាអាចបានសេចក្ដីជំនឿ លើកលែងអ្នករាល់គ្នានឹងមានសេចក្ដីសង្ឃឹម ?
ហើយតើអ្វីទៅដែលអ្នករាល់គ្នាសង្ឃឹមចង់បាន ? មើលចុះ ខ្ញុំប្រាប់អ្នកថា អ្នករាល់គ្នានឹងមានសេចក្តីសង្ឃឹម តាមរយៈដង្វាយធួននៃព្រះគ្រីស្ទ និងអំណាចនៃដំណើររស់ឡើងវិញរបស់ទ្រង់ ដើម្បីឲ្យបានប្រោសឲ្យមានជីវិតដ៏នៅអស់កល្បជានិច្ច ហើយនេះក៏មកពីសេចក្តីជំនឿរបស់អ្នកដល់ទ្រង់ ស្របតាមពាក្យសន្យា ។
« ហេតុដូច្នោះហើយ បើសិនជាមនុស្សណាមួយមានសេចក្ដីជំនឿ នោះគេត្រូវតែមានសេចក្ដីសង្ឃឹម ដ្បិតអត់ពីសេចក្ដីជំនឿទៅ នោះពុំអាចមានសេចក្ដីសង្ឃឹមឡើយ » ( មរ៉ូណៃ ៧:៤០–៤២ ) ។
ផែនការនៃសុភមង្គលរបស់ព្រះវរបិតាសួគ៌
សេចក្ដីសង្ឃឹមលើព្រះគ្រីស្ទដ៏រស់ ដ៏ប្រសើរ និងដ៏ប្រសើរលើសលែង ចាប់ផ្ដើមដោយការដឹងថាព្រះជាព្រះវរបិតាដ៏អស់កល្បជានិច្ចមានព្រះជន្មរស់ ។ ទ្រង់គឺជាព្រះវរបិតារបស់យើង ហើយយើងគឺជាបុត្រាបុត្រីខាងវិញ្ញាណរបស់ទ្រង់ ។ ពួកយើងគឺពិតជាបុត្រា និងបុត្រីខាងវិញ្ញាណនៃព្រះ ហើយបានគ្រងនូវគុណសម្បត្តិដ៏ទេវភាពមកពីទ្រង់ ។
ព្រះវរបិតាគឺជាអ្នកនិពន្ធនៃផែនការនៃសុភមង្គល ( សូមមើល អ័ប្រាហាំ ៣:២២–២៨ ) ។ ក្នុងនាមជាបុត្រា និងបុត្រីខាងវិញ្ញាណរបស់ព្រះ ហើយយើង « ទទួលផែនការរបស់ទ្រង់ ដែលនាំឱ្យកូនចៅទាំងឡាយអាចទទួលរូបកាយ និងទទួលបទពិសោធន៍នៅលើផែនដី ដើម្បីរីកចម្រើនទៅរកភាពល្អឥតខ្ចោះ ហើយនៅទីបញ្ចប់នឹងដឹងពីគោលបំណងដ៏ទេវភាពរបស់ពួកគេ ដោយទទួលជីវិតដ៏នៅអស់កល្បទុកជាមរតក » ។ នៅក្នុងបទគម្ពីរ យើងរៀនថា « ព្រះវរបិតា ទ្រង់មានព្រះកាយជាសាច់ និងឆ្អឹង ដែលជាក់ស្ដែងដូចជារូបកាយមនុស្ស ព្រះរាជបុត្រាក៏ដូច្នោះដែរ » ( គោលលទ្ធិ និងសេចក្ដីសញ្ញា ១៣០:២២ ) ។ ដូច្នេះ ការទទួលបានរូបកាយគឺសំខាន់នៅក្នុងដំណើរការនៃការរីកចម្រើនឆ្ពោះទៅកាន់ជោគវាសនាដ៏ទេវភាពរបស់យើង ។
ពួកយើងគឺជាតួអង្គដែលមានទាំងរូបកាយ និងវិញ្ញាណ ។ វិញ្ញាណរបស់យើង គឺជាផ្នែកដ៏អស់កល្បរបស់យើង ត្រូវបានបំពាក់ដោយរូបកាយសាច់ឈាមដែលស្ថិតក្រោមសេចក្ដីប្រាថ្នា និងចំណង់នៃជីវិតរមែងស្លាប់ ។ ផែនការនៃសុភមង្គលរបស់ព្រះវរបិតា ត្រូវបានរៀបចំឡើងដើម្បីផ្តល់ការដឹកនាំដល់បុត្រាបុត្រីរបស់ទ្រង់ ដើម្បីជួយពួកគេឲ្យត្រឡប់ទៅរកទ្រង់ដោយសុវត្ថិភាពជាមួយរូបកាយដែលរស់ឡើងវិញ ហើយតម្កើងឡើង ហើយទទួលបានពរជ័យនៃសេចក្ដីអំណរ និងសុភមង្គលដ៏អស់កល្បជានិច្ច ។
The Christ Child [ ព្រះឱរសព្រះគ្រីស្ទ ] ដោយ សាឡុត អេនឌ្រឺស៏
តួនាទីប្រោសលោះរបស់ព្រះយេស៊ូវគ្រីស្ទនៅក្នុងផែនការរបស់ព្រះវរបិតា
ព្រះយេស៊ូវគ្រីស្ទ ជាព្រះរាជបុត្រាតែមួយគត់របស់ព្រះវរបិតាដ៏អស់កល្បជានិច្ច ។ ទ្រង់បានមកឯលោកិយដើម្បីធ្វើតាមព្រះហឫទ័យនៃព្រវរបិតារបស់ទ្រង់ ( សូមមើល នីហ្វៃទី៣ ២៧:១៣ ) ។ ព្រះយេស៊ូវគឺជាអង្គដែលបានតែងតាំងដោយព្រះវរបិតា ដើម្បីធ្វើជាអង្គតំណាងផ្ទាល់របស់ទ្រង់នៅគ្រប់អ្វីៗទាំងអស់ដែលទាក់ទងទៅនឹងសេចក្ដីសង្គ្រោះរបស់មនុស្សលោក ។ ទ្រង់គឺជាព្រះអង្គសង្គ្រោះ និងព្រះប្រោសលោះរបស់យើង ព្រោះទ្រង់បានយកឈ្នះទាំងសេចក្ដីស្លាប់ និងអំពើបាប ។
ព្យាការីអាលម៉ាបានព្យាករដល់ប្រជាជនគេឌានអំពីការសង្គ្រោះរបស់ព្រះមែស៊ី ៖
« ហើយទ្រង់នឹងយាងទៅដោយរងការឈឺចាប់ និងទុក្ខវេទនា និងការល្បួងគ្រប់បែបយ៉ាង ហើយទ្រង់ធ្វើយ៉ាងនេះ គឺដើម្បីឲ្យបានបំពេញនូវពាក្យទាំងឡាយ ដែលបានចែងទុកមកថា ទ្រង់នឹងលើកដាក់លើខ្លួនទ្រង់នូវការឈឺចាប់ និងជំងឺទាំងឡាយរបស់រាស្ត្រទ្រង់ ។
« ហើយទ្រង់នឹងយកដាក់លើរូបអង្គទ្រង់នូវសេចក្តីស្លាប់ ដើម្បីទ្រង់អាចស្រាយចំណងទាំងឡាយនៃសេចក្តីស្លាប់ដែលចងរាស្ត្រទ្រង់ ហើយទ្រង់នឹងដាក់រូបអង្គទ្រង់នូវជំងឺ ឈឺចាប់របស់ពួកគេ ដើម្បីឲ្យព្រះហឫទ័យទ្រង់បានពោរពេញទៅដោយសេចក្តីមេត្តាករុណាស្របតាមសាច់ឈាម ដើម្បីទ្រង់អាចដឹងស្របតាមសាច់ឈាមថា តើត្រូវជួយរាស្ត្រទ្រង់បែបណាតាមជំងឺរបស់គេ ។
« ឥឡូវនេះ ព្រះវិញ្ញាណទ្រង់ជ្រាបការណ៍សព្វយ៉ាង ទោះជាយ៉ាងណាក៏ដោយ គង់តែព្រះរាជបុត្រានៃព្រះស៊ូរងឈឺចាប់ ស្របតាមសាច់ឈាម ដើម្បីទ្រង់អាចយកដាក់លើរូបអង្គទ្រង់នូវអំពើបាបទាំងឡាយរបស់រាស្ត្រទ្រង់ ដើម្បីទ្រង់អាចលុបចោលនូវអំពើរំលងទាំងឡាយរបស់គេ ស្របតាមព្រះចេស្ដានៃការដោះលែងរបស់ទ្រង់ ហើយឥឡូវនេះ មើលចុះ នេះគឺជាទីបន្ទាល់ដែលនៅក្នុងខ្លួនខ្ញុំ » ( អាលម៉ា ៧:១១–១៣ ) ។
គោលការណ៍ទីមួយនៃដំណឹងល្អ គឺសេចក្ដីជំនឿទៅលើព្រះអម្ចាស់ព្រះយេស៊ូវគ្រីស្ទ ។ សេចក្តីជំនឿពិតផ្តោតក្នុង និងលើព្រះអង្គសង្គ្រោះ ហើយអនុញ្ញាតឲ្យយើងជឿជាក់លើទ្រង់ និងមានទំនុកចិត្តពេញលេញលើអំណាចរបស់ទ្រង់ ដើម្បីជួយសង្គ្រោះយើងពីសេចក្ដីស្លាប់ សម្អាតយើងពីអំពើបាប និងប្រទានពរដល់យើងជាមួយនឹងកម្លាំងលើសពីខ្លួនយើងផ្ទាល់ ។
ព្យាការីមរ៉ូណៃបានថ្លែងទីបន្ទាល់ថា « ហើយដោយសារសេចក្ដីប្រោសលោះដល់មនុស្ស ដែលព្រះយេស៊ូវគ្រីស្ទបាននាំមកទើបពួកគេត្រូវបាននាំទៅឯវត្តមាននៃព្រះអម្ចាស់វិញ មែនហើយ គឺតាមរបៀបនេះហើយ ដែលមនុស្សទាំងអស់ត្រូវបានប្រោសលោះ ពីព្រោះការសុគតនៃព្រះគ្រីស្ទនាំឲ្យមានដំណើររស់ឡើងវិញ ដែលនាំមកនូវសេចក្ដីប្រោសលោះពីដំណេកលង់លក់ដ៏មិនចេះចប់មិនចេះហើយ ឯមនុស្សទាំងអស់នឹងត្រូវបានដាស់ឲ្យភ្ញាក់ពីដំណេកដ៏លង់លក់នេះដោយព្រះចេស្ដានៃព្រះ នៅពេលដែលសំឡេងត្រែបន្លឺឡើង ហើយពួកគេនឹងចេញមកទាំងតូចទាំងធំ ហើយទាំងអស់គ្នានឹងឈរនៅខាងមុខវេទិការបស់ទ្រង់ដោយបានប្រោសលោះ ហើយបានសា្រយពីចំណងដ៏នៅអស់កល្បជានិច្ចនៃសេចក្ដីស្លាប់ ឯសេចក្ដីស្លាប់់នោះ គឺជាសេចក្ដីស្លាប់ខាងសាច់ឈាម ( មរមន ៩:១៣ ) ។
ខ្ញុំសូមធ្វើទីបន្ទាល់ថា ព្រះអង្គសង្គ្រោះបានផ្ដាច់ចំណងទាំងឡាយនៃនៃសេចក្ដីស្លាប់ ។ ទ្រង់បានរស់ឡើងវិញ ទ្រង់មានព្រះជន្មរស់ ហើយទ្រង់គឺជាប្រភពនៃ សេចក្ដីសង្ឃឹមដ៏រស់ ដ៏ប្រសើរ និងដ៏ប្រសើរលើសលែង ។
យុថ្កាមួយដល់ព្រលឹង
ព្យាការីអេធើរបានថ្លែងទីបន្ទាល់ថា « ហេតុដូច្នោះហើយ អស់អ្នកណាជឿដល់ព្រះ អាចសង្ឃឹមជាប្រាកដថា នឹងបានពិភពលោកមួយដ៏ប្រសើរលើសលែងទៅទៀតមែនហើយ គឺកន្លែងមួយដែលនៅខាងស្ដាំព្រះហស្តនៃព្រះ ឯសេចក្ដីសង្ឃឹមនោះកើតមកពីសេចក្ដីជំនឿ ធ្វើជាយុថ្កាមួយដល់ព្រលឹងមនុស្ស ដែលនឹងធ្វើឲ្យពួកគេស្ថិតស្ថេរនៅនឹងធឹង ហើយខ្ជាប់ខ្ជួន គឺនៅក្នុងកិច្ចការល្អដ៏បរិបូរជាដរាប ដែលនាំឲ្យសរសើរតម្កើងដល់ព្រះ » ( អេធើរ ១២:៤ បានបន្ថែមការគូសបញ្ជាក់ ) ។
នៅក្នុងរដូវកាលក៏ពិសេសនេះនៃការប្រារព្ធពិធីការប្រសូត្ររបស់ព្រះឱរសនៅបេថ្លេហិម សូមឲ្យយើងចងចាំជានិច្ចថាព្រះយេស៊ូវគ្រីស្ទបានយាងមកក្នុងពិភពលោកនេះ ដើម្បីក្លាយជាព្រះអង្គសង្គ្រោះ និងជាព្រះប្រោសលោះរបស់យើង ។ ទ្រង់ប្រទានដល់យើងនូវអំណោយទានខាងវិញ្ញាណដែលមិនអាចកាត់ថ្លៃបាននៃជីវិត ពន្លឺ ការចាប់ផ្តើមជាថ្មី សេចក្ដីស្រឡាញ់ សេចក្តីសុខសាន្ត ទស្សនៈវិស័យ សេចក្ដីអំណរ និងសេចក្ដីសង្ឃឹម ។
ខ្ញុំសូមអញ្ជើញអ្នកឲ្យស្វែងរកអំណោយខាងវិញ្ញាណនៃសេចក្តីសង្ឃឹមនៅក្នុងព្រះអង្គសង្គ្រោះ ឲ្យបានសមស្របតាមរយៈការសិក្សាការបង្រៀន និងទីបន្ទាល់របស់ព្យាការីបុរាណ និងសម័យទំនើប ទាក់ទងទៅនឹងការពលិកម្មធួន និងការរស់ឡើងវិញដ៏ពិតរបស់ទ្រង់ ។ នៅពេលដែលអ្នកធ្វើដូច្នេះ ខ្ញុំសូមសន្យាថា ទីបន្ទាល់របស់អ្នកអំពីទេវភាពរបស់ព្រះប្រោសលោះនឹងត្រូវបានពង្រឹង ការប្រែចិត្តជឿរបស់អ្នកចំពោះទ្រង់នឹងកាន់តែស៊ីជម្រៅ បំណងប្រាថ្នា និងការប្តេជ្ញាចិត្តរបស់អ្នកដើម្បីឈរជាសាក្សីដ៏ក្លាហានរបស់ទ្រង់នឹងត្រូវបានកើនឡើង ហើយអ្នកនឹងត្រូវបានប្រទានពរជាមួយនឹងយុថ្កាមួយដល់ព្រលឹងរបស់អ្នក—មែនហើយ គឺសេចក្ដីសង្ឃឹមដ៏រស់ ដ៏ប្រសើរ និងដ៏ប្រសើរលើសលែង ។
ជាមួយនឹងពួកសាវកដែលបានថ្លែងទីបន្ទាល់អំពីទ្រង់នៅគ្រប់សម័យកាល ខ្ញុំប្រកាសដោយរីករាយនូវសាក្សីរបស់ខ្ញុំថា ព្រះយេស៊ូវគ្រីស្ទ គឺជាបុត្រាដ៏មានព្រះជន្មរស់របស់ព្រះដ៏មានព្រះជន្មរស់ ។ ទ្រង់គឺជាព្រះប្រោសលោះដែលបានរស់ឡើងវិញរបស់យើងជាមួយនឹងសិរីរុងរឿង ដែលមានព្រះកាយជាក់លាក់ជាសាច់ និងឆ្អឹង ។ ហើយដោយសារការប្រោសលោះ និងការផ្សះផ្សាជាមួយនឹងព្រះ ដែលព្រះអម្ចាស់បានធ្វើសម្រាប់មនុស្សជាតិទាំងអស់ ពួកយើងអាចទទួលបានការធានាខាងវិញ្ញាណ និងសេចក្ដីសង្ឃឹមដ៏រស់ ដ៏ប្រសើរ និងដ៏ប្រសើរលើសលែង ដែល « គ្រប់គ្នាក៏នឹងបានប្រោសឲ្យរស់ ក្នុងព្រះគ្រីស្ទយ៉ាងនោះដែរ » ( កូរិនថូសទី ១ ១៥:២២ ) ។
© ឆ្នាំ២០២៤ ដោយ Intellectual Reserve, Inc. All rights reserved ។ បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, December 2024 Cambodian. 19296 258