“Yexus Khetos Yog lub Hauv Paus ntawm ‘Kev Cia Siab Ruaj Khov,’ ‘Zoo,’ thiab ‘Zoo Dua,’” Liyahaunas, Kaum Ob Hlis Ntuj 2024.
Zaj Lus hauv Liyahaunas Txhua Hli, Kaum Ob Hlis Ntuj 2024
Yexus Khetos Yog lub Hauv Paus ntawm “Kev Cia Siab Ruaj Khov,” “Zoo,” thiab “Zoo Dua”
Nyob hauv lub caij nyoog tshwj xeeb uas peb ua koob tsheej txog tus me nyuam mos liab uas yug los hauv Npelehees, thov kom peb nco ntsoov tias Yexus Khetos tau yug los hauv lub ntiaj teb no los ua peb tus Cawm Seej thiab tus Txhiv Dim.
Yexus txoj Kev Yug Los, by Sharlotte Andrus
Tus Thwj Tim Petus thiab Phau Ntawv Maumoos ob tug yaj saub Yakhauj thiab Maulaunais qhia zoo ib yam txog lub txiaj ntsim uas yog kev cia siab rau Yexus Khetos.
Piv txwv hais tias, Petus tshaj tawm tias, “Peb yuav tsum ua Vajtswv tus uas yog peb tus Tswv Yexus Khetos Leej Txiv tsaug! Rau qhov nws hlub peb kawg li, nws thiaj tsa Yexus Khetos sawv hauv qhov tuag rov qab los pab peb kom peb muaj txoj sia tshiab. Nws ua li no peb txoj kev cia siab thiaj ruaj khov” (1 Petus 1:3; ntxiv qhov uas ntawv qaij). Thov saib hais tias kev siv lo lus “ruaj khov” kom piav txog “kev cia siab.”
Yakhauj tshaj tawm tias, “Yog li ntawd, cov kwv tij uas kuv hlub, cia li los sib raug zoo nrog nws los ntawm Khetos, uas yog nws Tib Leeg Tub txoj kev theej txhoj, thiab nej yuav tau txais ib txoj kev sawv rov los, raws li lub hwj chim ntawm txoj kev sawv rov los uas los ntawm Khetos, thiab muab nej uas yog Khetos thawj cov txiv ntoo pub rau Vajtswv, vim nej muaj kev ntseeg, thiab tau txais txoj kev cia siab zoo tias nej yuav tau yeeb koob los ntawm nws ua ntej nws los tshwm sim ntawm sab nqaij daim tawv” (Yakhauj 4:11; ntxiv qhov uas ntawv qaij). Thov saib hais tias kev siv lo lus “zoo” kom piav txog “kev cia siab.”
Thiab Maulaunais hais tias, “Thiab kuv kuj nco qab tias koj tau hais tias koj tau npaj ib lub tsev rau tib neeg, muaj tseeb tiag, twb yog ib lub tsev uas nyob hauv koj Leej Txiv tej chaw nyob, qhov uas ua rau tib neeg yuav muaj kev cia siab zoo dua; yog li ntawd tib neeg yuav tsum cia siab, tsis li ntawd lawv yuav tsis tau txais ib qho qub txeeg qub teg nyob hauv qhov chaw uas koj tau npaj lawm” (Ethaws 12:32; ntxiv qhov uas ntawv qaij). Thov saib hais tias kev siv lo lus “zoo dua” kom piav txog “kev cia siab.”
Kev Cia Siab rau Khetos Yog Dab Tsi?
Lub txiaj ntsim uas yog kev cia siab rau Khetos yog kev zoo siab tos ntsoov txoj sia nyob mus ib txhis uas los ntawm “tus Mexiyas uas Dawb Huv txoj hauj lwm zoo, txoj kev hlub tshua, thiab txoj kev tshav ntuj” (2 Nifais 2:8) thiab kev xav tau cov koob hmoov ntawm kev ncaj ncees. Cov lus “ruaj khov,” “zoo,” thiab “zoo dua” nyob hauv tej nqe no piv tias yeej yuav muaj Kev Sawv Rov Los thiab muaj txoj sia nyob mus ib txhis thaum peb ntseeg Yexus Khetos.
Tus yaj saub Maumoos piav hais tias:
“Thiab ntxiv, kuv cov kwv tij uas kuv hlub es, kuv yuav hais rau nej ntsig txog kev cia siab. Yuav ua li cas nej thiaj muaj tau kev ntseeg, tsuas yog tias nej yuav tsum muaj kev cia siab xwb?
“Thiab nej yuav cia siab rau yam dab tsi? Saib seb kuv hais rau nej tias nej yuav tsum muaj kev cia siab los ntawm Khetos txoj kev theej txhoj thiab lub hwj chim ntawm nws txoj kev sawv rov los, cia siab tias yuav muab nej tsa sawv rau txoj sia nyob mus ib txhis thiab muaj li no los twb vim yog nej txoj kev ntseeg nws raws li txoj kev cog lus.
“Yog li ntawd, yog tias ib tug neeg muaj kev ntseeg nws yuav tsum muaj kev cia siab; vim tias yog tsis muaj kev ntseeg ces yeej muaj tsis tau kev cia siab” (Maulaunais 7:40–42).
Leej Txiv txoj Hau Kev Zoo Siab
Kev cia siab rau Khetos uas ruaj khov, zoo, thiab zoo dua pib thaum yus paub tias Vajtswv tus uas yog Leej Txiv Nyob Mus Ib Txhis Li muaj txoj sia nyob. Nws yog peb Leej Txiv, thiab peb yog Nws cov me nyuam ntsuj plig. Peb yog Vajtswv cov tub thiab cov ntxhais ntsuj plig uas tau txais Nws tej cwj pwm zoo kawg nkaus.
Leej Txiv yog tus uas tau tsim txoj hau kev zoo siab (saib Anplaham 3:22–28). Vim peb yog Vajtswv cov tub ntsuj plig thiab cov ntxhais ntsuj plig, peb “tau txais yuav Nws txoj hau kev uas tau npaj tseg lawm hais tias Nws cov me nyuam yuav txais tau ib lub cev nqaij daim tawv thiab yuav muaj ib lub sij hawm hauv lub ntiaj teb no kom xyaum ua neeg zoo tag nrho thiab thaum kawg txais tau lawv txoj hmoov los saum ntuj los ua cov uas txais txoj sia nyob mus ib txhis ua lawv tug.” Nyob hauv cov vaj lug kub, peb kawm tias: “Leej Txiv muaj ib lub cev muaj nqaij thiab muaj txha uas kov tau ib yam li tib neeg; Leej Tub los muaj thiab” (Lus Qhuab Qhia thiab Kev Khi Lus 130:22). Yog li ntawd, peb yuav tsum txais ib cev nqaij daim tawv kokm thiaj li txais tau peb txoj hmoov zoo kawg nkaus.
Peb yog neeg uas muaj ob sab. Peb cov ntsuj plig, uas nyob mus ib txhis, muaj cev nqaij daim tawv uas raug tej kev xav thiab tej kev ntshaw ntawm lub neej no. Leej Txiv twb tsim Nws txoj hau kev zoo siab kom Nws cov me nyuam kawm tau, kom pab lawv rov qab mus nrog Nws nyob thaum muaj tej cev nqaij daim tawv uas tau sawv rov los lawm, thiab txais cov koob hmoov ntawm kev xyiv fab thiab kev zoo siab mus ib txhis li.
Tus Me Nyuam Khetos, los ntawm Sharlotte Andrus
Yexus Khetos lub Luag Hauj Lwm Nyob hauv Leej Txiv txoj Hau Kev
Yexus Khetos yog Vajtswv Leej Txiv Nyob Mus Ib Txhis Tib Leeg Tub. Nws tau los rau hauv lub ntiaj teb kom ua raws li Nws Leej Txiv lub siab nyiam (saib 3 Nifais 27:13). Yexus yog tus uas Leej Txiv Saum Ntuj Ceeb Tsheej pleev roj rau kom Nws los ua tus uas sawv Nws cev ua txhua yam kom cawm tib neeg dim. Nws yog peb tus Cawm Seej thiab tus Txhiv Dim vim Nws tau kov yeej kev tuag thiab kev txhaum.
Amas tau qhia cov neeg nyob hauv Nkide-oos txog tus Mexiyas txoj hauj lwm cawm neeg txoj sia:
“Thiab nws yuav mus, raug tej kev mob thiab tej kev txom nyem thiab tej kev ntxias txhua yam; thiab ua li no xwv kom yuav muaj raws li txoj lus uas hais tias nws yuav ris nws cov neeg tej kev mob thiab tej kev nkeeg.
“Thiab nws yuav ris txoj kev tuag, xwv kom nws yuav daws tau kev tuag tej hlua uas khi nws cov neeg; thiab nws yuav ris lawv tej kev qaug dag qaug zog, xwv kom nws lub siab thiaj li yuav muaj kev hlub tshua puv nkaus, ntawm sab cev nqaij daim tawv, xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog.
“Nim no tus Ntsuj Plig paub txhua yam; txawm li ntawd los Vajtswv Leej Tub yuav raug kev txom nyem ntawm sab cev nqaij daim tawv xwv kom nws yuav ris tau nws cov neeg tej kev txhaum, xwv kom nws yuav rho tau lawv tej kev ua txhaum tawm raws li lub hwj chim ntawm nws txoj kev txhiv dim” (Amas 7:11–13).
Thawj txoj ntsiab cai ntawm txoj moo zoo yog kev ntseeg tus Tswv Yexus Khetos. Kev ntseeg tiag yeej tsom ntsoov rau tus Cawm Seej thiab ua rau peb tso siab tau rau Nws thiab ntseeg Nws lub hwj chim kom cawm peb dim kev tuag, ntxuav peb huv kom tsis muaj kev txhaum, thiab foom koob hmoov rau peb kom muaj zog ntau dua.
Maulaunais tau ua tim khawv tias, “Thiab vim yog tib neeg txoj kev txhiv dim, uas yog los ntawm Yexus Khetos, thiaj li coj tau tib neeg rov los rau hauv tus Tswv lub xub ntiag; muaj tseeb tiag, qhov no yog txoj kev uas thiaj txhiv tib neeg txhua tus dim, vim Khetos txoj kev tuag ua kom muaj kev sawv rov los, thiaj muaj txoj kev txhiv dim tawm ntawm txoj kev tsaug zog uas tsis txawj kawg, tawm ntawm txoj kev tsaug zog uas Vajtswv lub hwj chim yuav tsa kom tib neeg txhua tus sawv thaum lub suab raj hlau yuav nrov; thiab lawv yuav tawm los, tsis hais tus loj thiab tus me, thiab txhua tus yuav sawv rau ntawm nws lub rooj txiav txim, vim tau muab lawv txhiv dim thiab daws ntawm txoj kev tuag no tej hlua khi uas nyob mus ib txhis, uas yog txoj kev tuag ntawm sab cev nqaij daim tawv” (Maumoos 9:13).
Kuv ua tim khawv tias tus Cawm Seej tau muab ua rau kev tuag tej hlua tu. Nws tau sawv rov los, Nws muaj txoj sia nyob, thiab Nws yog tib lub hauv paus ntawm kev cia siab uas ruaj khov, zoo, thiab zoo dua.
Qhov uas Txheem Neeg tus Ntsuj Plig
Tus yaj saub Ethaws qhia tias, “Yog li ntawd, tus uas ntseeg Vajtswv yeej yuav muaj kev cia siab rau ib lub ntiaj teb uas zoo dua, muaj tseeb tiag, twb yog ib qho chaw nyob ntawm Vajtswv sab tes xis, txoj kev cia siab ntawd twb yog los ntawm kev ntseeg los, yog qhov uas txheem tib neeg tus ntsuj plig, uas yuav ua rau lawv ruaj thiab khov kho, ua tej yam uas zoo tas mus li, uas coj lawv mus qhuas Vajtswv” (Ethaws 12:4; ntxiv qhov uas ntawv qaij).
Nyob hauv lub caij nyoog tshwj xeeb uas peb ua koob tsheej txog tus me nyuam mos liab uas yug los hauv Npelehees, thov kom peb nco ntsoov tias Yexus Khetos tau yug los hauv lub ntiaj teb no los ua peb tus Cawm Seej thiab tus Txhiv Dim. Nws muab tej txiaj ntsim uas muaj nqis tshaj plaws rau peb xws li txoj sia, txoj kev kaj, kev rov qab ua dua tshiab, kev hlub, kev kaj siab lug, lub zeem muag, kev xyiv fab, thiab kev cia siab.
Kuv caw koj nrhiav lub txiaj ntsim uas yog kev cia siab rau tus Cawm Seej thaum koj kawm txog cov yaj saub puag thaum ub thiab cov yaj saub niaj hnub no tej zaj lus qhia thiab zaj lus tim khawv txog Nws txoj kev theej txhoj thiab txoj Kev Sawv Rov Los. Thaum koj ua li no, kuv cog lus tias koj zaj lus tim khawv txog tus Txhiv Dim yuav muaj zog, koj yuav hloov siab los ntseeg Nws ntxiv, koj yuav haj yam xav rau siab ua tim khawv txog Nws, thiab koj yuav tau koob hmoov muaj ib qho uas txheem koj tus ntsuj plig—ib txoj kev cia siab uas ruaj khov, zoo, thiab zoo dua.
Ib yam li cov Thwj Tim uas tau ua tim khawv txog Nws txij thaum ub los, kuv zoo siab ua tim khawv tias Yexus Khetos yog Vajtswv Leej Tub uas muaj txoj sia nyob. Nws yog peb tus Txhiv Dim uas tau sawv rov los kom muaj ib lub cev nqaij daim tawv uas muaj yeeb koob. Thiab vim tus Tswv ua rau txhua tus neeg muaj ib txoj kev txais kev txhiv dim thiab rov qab mus cuag Vajtswv, peb yuav paub tseeb txog kev cia siab uas ruaj khov, zoo, thiab zoo dua hais tias “sawv daws yuav sawv rov muaj txoj sia los ntawm Khetos” (1 Kauleethaus 15:22).
© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, December 2024. Hmong. 19296 295