Jesus Christ Nye “Nkwa Enyidado” “Enyidado Pa,” na “Enyidado Mapã no” Ne Farbaa

Sunsum mu enyidado akyɛdze wɔ Christ mu nye onnyiewiei nkwa dɛwdzi enyidakwan a ɔnam “Messiah Krɔnkrɔn no ndwuma pa, na n’ehumbɔbɔr, na n’dom’’ do no (2 Nephi 2:8) na pɛ dzendzen dɛ yebenya tsenenee nhyira anohoba no. Dzin tamsi horow “nkwa,’’ “pa,’’ na “mapã’’ wɔ nyiyimu yinom mu no kyerɛ Wusoer na onnyiewiei nkwa a ɔnam gyedzi wɔ Jesus Christ do ho ne daa ntserɛw mu na awerɛhyɛmu a ɔyɛ ndam.

Nkɔnhyɛnyi Mormon kyerɛkyerɛɛ mu dɛ:

“Na bio, m’enuanom adɔfo, mebɛkã dza ɔfa enyidado ho asɛm akyerɛ hom. Obesi dɛn bɛyɛ ma hom enya gyedzi gyedɛ hom enya enyidado?

“Na ɔyɛ ebɛnadze na hom benya enyidado wɔ mu? Hwɛ mese hom dɛ hom benya enyidado efi Christ no werdambɔ nye no wusoɛr tum no mu, dɛ hom bɔsoɛr akɔ onnyiewiei nkwa mu, osian hom gyedzi a ɔwɔ no mu wɔ anohoba a ɔdze abɔ hom no ntsi.

“Dɛm ntsi, sɛ obi wɔ gyedzi a otwar dɛ onya enyidado; na sɛ gyedzi nnyi hɔ a enyidado so nnyi hɔ (Moroni 7:40–42).

Enyidado a ɔwɔ Christ mu a ɔyɛ nkwa, pa na mapã no dze nyimdzee no dɛ Onnyiewiei Egya tse ase hyɛ ase. Ɔyɛ hɛn Egya, na yɛyɛ No sunsum mu mba. Nokwar ara yɛyɛ Nyankopɔn no sunsum mu mbambanyin na mbabaa na yenyaa su horow fii No hɔ.

Egya no nye enyigye ho nhyehyɛɛ ne dzikamfo (hwɛ Abraham 3:22–28). Dɛ Nyankopɔn no sunsum mbabanyin na mbabaa no, “yɛgyee Ne nhyehyɛɛ a Ne mba botum edua do enya nyimpadua na woenya asaase do sũahu dze enya kan kɔ wɔ emudzi mu, na ewiei no, obiara enya no krɔnkrɔn nkrabea dɛ onnyiewiei adzedzinyi no, too mu. Kyerɛwsɛm mu no, yesũa dɛ: “Egya no wɔ nyimpadua a ɔyɛ honam na mbiew dɛ mbrɛ nyimpa wɔ; Ɔba no so dɛmara’’(Nkyerɛkyerɛ na Ahyɛmudzi 130:22). Dɛm ntsi yerenya nyimpadua hia tsitsir wɔ kwan a yɛnam do yenya hɛn kankɔ wɔ hyɛbea krɔnkrɔn mu no.

Yɛyɛ nyimpasu horow ebien. Hɛn esunsum, hɛn onnyiewiei ne fã no, wɔdze ahyɛ nyimpadua a wotum nya ɔnnkyebo apɛdze na akɔndɔdze horow. Egya no N’enyigye ho nhyehyɛɛ no wɔhyehyɛɛ no dɛ ɔbɛma Ne mba akwankyerɛ, dze aboa hɔn aba Ne nkyɛn wɔ fie dwudwoodwo a wɔdze nyimpadua a ɔkrɔn, a wɔasoɛr efi ewufo, ma woenya onnyiewiei dɛwdzi na enyigye nhyira.

Abofra Jesus, Sharlotte Andrus yɛɛ nsaano mfonyin no

Jesus Christ no Ɔpon Asɛdze wɔ Egya ne Nhyehyɛɛ mu

Jesus Christ nye Onnyiewiei Egya na Ba Kortoo no. Ɔbaa wiadze bɛyɛɛ N’Egya ne pɛ (hwɛ 3 Nephi 27:13). Jesus Christ nye nyia Egya no seraa no ngo dɛ Ɔmbɛyɛ Ɔno ankasa ne ngyinananmu wɔ ndzɛmba nyinara a ɔfa adasa hɔn nkwagye ho. Ɔno nye hɛn Agyenkwa na Pomfo osiandɛ Odzii owu na bɔn nyina no do konyim.

Alma hyɛɛ nkɔm kyerɛɛ Gideon no nkorɔfo no fa Messiah no ɔgye edwuma no ho dɛ:

“Na obefir edzi, ɔatse yaw na oehu amandze na obenya nsɔhwɛ ahorow biara bi; na iyi bɛma asɛm no aahyɛ mã, dza ɔkã dɛ, na ɔbɛfa no nkorɔfo hɔn yaw nye yarba ato noho do”

“Na ɔbɛfa owu ato no do, ama oesiansian owu mpokyerɛ a ɔkyekyer no nkorɔfo no, na ɔbɛfa hɔn mberɛwyɛ ato no do, ama ehumbɔbɔr aahyɛ n’abadaa mã dɛ mbrɛ ɔtse wɔ honam mu, ama ɔnam honam mu, eehu mbrɛ obesi aboa no nkorɔfo dɛ mbrɛ hɔn mberɛwyɛ tse no.

“Na Sunsum no nyim ndzɛmba nyina; naaso Nyankopɔn ne Ba no bohu amandze wɔ honam mu ama ɔaafa no nkorɔfo hɔn bɔn ato no do, ama ɔnam no nkwagye tum no do aapepa hɔn mbrato dɛ mbrɛ no ɔgye tum no tse’’ (Alma 7:11–13).

Asɛmpa ne fapem a odzi kan nye gyedzi wɔ Ewuradze Jesus Christ mu. Nokwar gyedzi tsim wɔ Agyenkwa no do na wɔ no mu na ɔma hɛn tum ma yɛtwer No na yenya awerɛhyɛmu a odzi mu wɔ No tum mu dɛ ɔbɛgye hɛn efi owu mu, atsew hɛnho efi bɔn ho, na ɔdze ahoɔdzen a ɔbor hɛnara hɛn dze do ehyira hɛn.

Moroni gyee dase dɛ, “Na osian nyimpa no ɔpon a ɔnam Jesus Christ do baa ntsi na wɔdze hɔn asan aba Ewuradze n’enyim; nyew, iyi mu na wɔnam apon nyimpa nyina, osiandɛ Christ no wu na ɔdze wusoɛr aba, dza ɔbɔpon hɔn efi nda a onnyi ewiei no, efi dɛm nda no a wɔnam Nyankopɔn no tum do benyan adasa nyina efi mu no, ber a totorobɛnto no bɔbɔ mu; na wobopue aba, nkuma nye akɛse nyina, na hɔn nyina bɛba ebegyina asɛndzibea enyim a wɔapon hɔn na woesian hɔn efi dɛm owu mpokyerɛ a onnyi ewiei yi mu, dza ɔyɛ honam mu owu no” (Mormon 9:13).

Megye dase dɛ Agyenkwa bubuu owu mpokyerɛ mu. Ɔsoeree fii owu mu, Ɔtse ase, na Ɔno nko nye nkwa enyidado, enyidado pa, na enyidado mapã ne farbaa.

Nkɔnhyɛnyi Ether gyee dase dɛ, “Dɛm ntsi nyia ɔgye Nyankopɔn dzi no enyidado a osi pi dɛ wiadze papa bi wɔ hɔ ma no, nyew, bea a ɔwɔ Nyankopɔn n’abanyimfa hɔ no mpo dza yɛnam gyedzi do dze nya enyidado no yɛ sekyɛ dze ma adasamba hɔn akra, dza ɔma wohu nokwar no na wogyina pintsinn, na daa wɔbor do wɔ ndwuma pa mu, na ɔgye hɔn ma wɔhyɛ Nyankopɔn enyimnyam” (Ether 12:4; woetsĩ mu akã ho).

Mber soronko a yeridzi abɔdomaba a wɔwoo no wɔ Bethlehem ho fa yi, hom mma aber nyina yɛnkaa dɛ Jesus Christ baa wiadze mu dɛ ɔbɛyɛ hɛn Agyenkwa na Pomfo. Ɔma hɛn nkwa, nkenyan fofor, ɔdɔ, asomdwee, nhumu, dɛwdzi, na enyidado sunsum mu akyɛdze horow a wonntwa bo.

Moto nsa frɛ hom dɛ hom nhwehwɛ sunsum mu enyidado akyɛdze a ɔfata wɔ Agyenkwa no mu ber a wosũa tsetse na ndɛ nkɔnhyɛfo hɔn nkyerɛkyerɛ na dasee a ɔfa No werdam afɔrbɔ na no nokwar Wusoer no ho. Ber a hom yɛ dɛm no, mobɔ anohoba dɛ hom dasee wɔ Pomfo no krɔnkrɔnyɛ ho no bɛhyɛ dzen, hom nsakyeree wɔ No ho no mu bɔdɔ, hom pɛ na enyimpisi dɛ hom begyina dɛ adasefo a wɔyɛ dzen wɔ No ho no benyin, na wɔdze ɔkra ne sekyɛ behyira hom—nkwa enyidado, enyidado pa, na enyidado mapã bi mpo.

Menye Asomafo a wɔagye dase wɔ No ho wɔ mber nyina mu no, dɛwdzi mu ara me paa mu kã me dasedzi dɛ Jesus Christ nye ɔtseasefo Nyankopɔn ne Ba ɔtseasefo no. Ɔno nye hɛn Pomfo a ɔdze enyimnyam honam na mbiew asoer efi owu mu. Na osian ɔpon na nkabɔmu a yɛnye Nyankopɔn enya no a Ewuradze ma ɔyɛ hɔ ma adasa nyinara ntsi, yebotum enya sunsum mu awerɛhyɛmu na nkwa enyidado, enyidado pa, na enyidado mapã bi dɛ “hɛn nyina benya nkwa wɔ Christ mu’’ (1 Corinthianfo 15:22).