Te Baeten ibukin te Katiteuanaaki inanon Iesu Kristo

N te 4 Nibwaai 1:1, ti warekia: “Ana reirei Kristo a katea ana ekaretia Iesu n aaba ni kabane ake a uakaan. Ao [aomata] a roko nakoia, ma n rairaki ni koaua man aia bure.”

Ti katiteuanaaki irarikin te Uea ao te Tia Kamaiu Iesu Kristo. Ngkana aomata n tatabemaniia a reiakina taekan Iesu Kristo, Ana euangkerio, ao Ana Ekaretia, te Tamnei ae Raoiroi e kakoaua koauana inanoia aomata n tatabemaniia. N tatabemaniira ti kona ni butimwaea ana kakao te Tia Kamaiu ni karekea te onimaki Irouna ao n Iririia man ara rairannano.

Man anne e na waaki ni kawaina te aomata n te rairannano—ni kararoaki man te iango ni bangaomata ao tangiran te bure ao ni kawaran te Tia Kamaiu. Bon Ngaia aan ara onimaki. Ao ngkai ngaira n tatabemaniira ti tan Nakoina n ara iango n taai nako (taraa Reirei ao Berita aika Tabu 6:36), E riki bwa te korakora n te katiteuanaaki inanon maiura.

Te rekooti n te 4 Nibwaai e waaki nako n taekinna bwa naake a nakon te Ekaretia ao a rairi nanoia man aia bure “a bon bwabetitoaki n aran Iesu; ao e bon reke naba irouia te Tamnei are e Raoiroi.” (4 Nibwaai 1:1). A rin inanon te berita ae tabu—te kabaeaki inanon te reitaki, ae onoti—ma te Atua.

Ngkana ti karaoi ao ni kawakin berita aika tabu, ti katokaa aran te Uea iaora n tatabemaniira. Ti katokaa naba Arana iaora ngkai ana aomata. Ni kabane ake a karaoi berita ao ni kekeiaki ni kawakini a riki bwa ana aomata te Uea, Kaubwaina aika onoti (taraa Otinako 19:5). Ngaia are, ti mwananga iaon kawain te berita ae tabu i bon iroura ao ni uaia ni bootaki. Reitakira n ara berita ae tabu ma te Atua e anganiira te nano n reitaki ao kinaakira ae ti tearona. Ngkai ti kabaei nanora nakon te Uea, E buokiira n “booti nanoia n te nano ae ti teuana i nanon te tangira imarenaia.” (Motiaea 18:21).

Te rongorongo n te 4 Nibwaai e reitinako: “Bon akea te itabaraaraa ao kauntaba imarenaia, ao a na karaoi mwakuri aika riai imarenaia.

Ao a katiteboaki imarenaia, ngaia are a bon aki kaubwai ao aki kainnano, aki kabaeaki ao aki inaomata, ma a bon kainaomataaki, ao a katoonga te bwai n tituaraoi mai karawa” (4 Nibwaai 1:2–3).

N aron ara mwakuri n te maiu n rabwata, te Uea e tangiriira bwa ti na kaboraoaki imarenara ni karaoa ae riai n aki kewekewe ke n aonikai imarenara (taraa 1 I-Tetaronike 4:6). Ngkai ti rikirake ni kaan riki nakon te Uea, “e na aki reke te nano ni kan kaikoaka temanna, ma ti te kan maeka i nanon te rau, ma ni karaoa are katauaki bwa e na reke nakon temanna ma temanna n aron are tau bwa e na reke nakoina” (Motiaea 4:13).

E tuangiira naba te Uea bwa ti na tabeakiniia aika a rarikin ao aika a kainnano. Ti riai “ni ibuokinibwai n [ara] bwai” ni buokiia, ni kaineti ma ara kona ni karaoia, n aki motiki taekaia (taraa Motiaea 4:21–27).

Ngaira n tatabemaniira ti na “iangoiia tarira n ai arora i bon iroura” (Reirei ao Berita aika Tabu 38:24). Ngkana ti na riki bwa ana aomata te Uea ao ni katiteuanaaki, ti na aki ti katitebooira imarenara ma ti na riai naba ni katitebooira n ara taratara ao n namakinna inanora bwa ti te arona ngaira—ni katiteboaki imatan te Atua, ni katiteboaki n aron kakawakiraao n ara konabwai.

Te reirei are imwiina man te 4 Nibwaai e kaota te kanikina ae beebete: “A bon nakonako i mwin tua ake a tia ni karekea mai iroun aia Uea ao Atuaia” (4 Nibwaai 1:12).

Te Uea e a tia n reireiniia aomata aikai Ana reirei, n anganiia tuua, ao e weteiia ana toro bwa a na buokiia. Teuana man Oin ana kantaninga ni karaoan aei bwa e na kakoaua bwa a na akea te ikakaiwi imarenaia (taraa 3 Nibwaai 11:28–29; 18:34).

Ara ongotaeka nakon ana reirei te Uea ao Ana toro e kakaawaki n arora ni katiteuanaaki. Aio e raonaki ma ara motinnano n ongeaba nakon tua n rairinanora n te tai are ti kabwaka iai ao n ibuobuoki imarenara ngkai ti kataia ni karaoa ae tamaroa riki ni katoa bong.

Kaitibo n Ikotaki

Are imwiina ti reiakina bwa aomata n te 4 Nibwaai a “[reitinako] n aki mamatam ao n tataro, ao ni bobotaki n tainako n tataro ao n ongora ana taeka te Uea” (4 Nibwaai 1:12).

Ti riai n ikoikotaki. Ara bootaki n nebonebo ni katoa wiiki bon te tai ae kakakawaki ibukira ibukin karekean korakorara, bon ibukira n tatabemaniira ao n te kurubu. Ti anaa te toa, reirei, tataro, n ikotaki n anene, ao ni boutoka imarenara. Bootaki ake tabeua a ibuobuoki naba ni karekea te namakin ni kaainakin te bootaki, iraorao, ao n tibwa oin te kantaninga.

Te rekooti n te 4 Nibwaai imwiina e anganiira te bwai ae ngaia oin baikai ni kabane —te bwai are ngkana akea ao e aki kona n reke te katiteuanaaki: “Akea te itabarara n te aba, ibukin tangiran te Uea are e maeka inanoia ana aomata.” (4 Nibwaai 1:15).

Te raunnano e reke ngkana ti, nanorinano, n ikakabwarabure, n tangira te Atua ni koaua. Aio te moan tua ae e korakora. Tangiran te Atua n ae korakora nakoia riki tabeman ke iaon riki bwaai tabeua bon kaotan te bwai ae riki are e uota te rau ni koaua, te mwaneaki, te onimakinaki, ao te kimwareirei. Ngkai ti karikirakea tangiran te Atua ao Iesu Kristo, tangiraia ara utu ao kain rarikira a na bon airi i bon irouia.

Te kimwareirei ae ti na namakinna ngkana ti bautaki n te tangira ibukin te Atua ao ibukiia Natina ni kabane.

Te tangira ae kororaoi, ana tangira Kristo ae itiaki, bon bwainaorakian te itabarara. Te tangira ae kororaoi bon katein raoi te aomata ae te tia iriira Iesu Kristo ni koaua. Ngkana ti kananorinanoira imatan te Atua ao n tataro ma korakoran nanora ni kabane te Atua e na anganiira te tangira.(taraa Moronaai 7:48).

Ngkai ti bane n ukoukora karekean ana tangira te Atua bwa e na maeka inanora, te kakai n te katiteuanaaki e na taraa n rangi n kai karaoaki iroura.

N tokina, aomata n te 4 Nibwaai a kaoti kanikinaean te katiteuanaaki are e anai nanora: “Bon akea taan iraa, ke taan tiriaomata, ao akea naba Reimwanaite, ke aekan reeti riki n aomata; ma a katiteuanaki, natin Kristo, ao taan bwaibwai n uean te Atua.” (4 Nibwaai 1:17).

Te kanikina are e kaokoroia aomata inanon tebubua te ririki e taraa n rangi n raroa imwaain reken te teimatoa ao te kinaaki ae karineaki. N nooria i bon irouia—ao aomata nako—ni kaineti nakon reitakiia ma Tamara are i Karawa ao Iesu Kristo.

Katei aika mwaiti ao aron kakaokoroia e kona n tamaroa ao ni kakaawaki ibukira. Ma kinaakira ae kakaawaki bon ake a irekerekera n rikira mai karawa n oin te kantaniga.

Te moanibwai ae kakawaki riki, ngaira n tatabemaniira bon natin te Atua. “Te kauoua, ngkai kaain te Ekaretia, ngaira n tatabemaniira bon naati n te berita ae tabu. Ao te kateniua ngaira n tatabemaniira bon ana reirei Iesu Kristo. I kaungaira ni kabane bwa ti na aki kariaia kinaaki tabeua bwa a na “kamaunai, ke n onei mwiin, ke ni moanibwai iaon kinaaki aika teniua aikai.”

Katiteuanaaki

E kaoiia ni kabane aomata te Atua bwa a na Nakoina. Iai n neia aomata nako. Ti kona ni kaokoro n ara katei, tautaeka, rikira, baika ti tangiri, ao n aaro riki aika a mwaiti. Ma ngkai ti katieuanaaki inanon Iesu Kristo, kakaokoro akanne a na taenako ni kakaawakiia ao ana oneaki mwiia ni kaungaan nanora ni katiteuanaaki—bwa ti na kona n riki bwa Ana bwai.

Katuka inanom te reirei are e reiakinaki n te 4 Nibwaai. Ngkai ngaira n tatabemaniira nako ti kataia ni karekei bwaai aika a kakaawaki n te katiteuanaaki inanon maiura, ti kona n taekinaki, n ai aroia, “E koaua bwa bon akea riki te botanaomata n ai aroia ae a kukurei i buakoia aomata nako ake a karikaki ni bain te Atua” (4 Nibwaai 1:16).