Na iVakarau ni Duavata vei Jisu Karisito

Ena 4 Nifai 1:1, eda wilika kina: “Eratou sa tauyavutaka na tisaipeli i Jisu e dua na lotu i Karisito ena loma ni vanua taucoko vakavolivolita. Era lako mai vei ratou [na tamata], era veivutunitaka vakaidina na nodra ivalavala ca.”

Eda duavata vakavolivolita na Turaga ka iVakabula o Jisu Karisito. Nira vulica na tamata yadua na veika baleti Jisu Karisito, Nona kosipeli, kei na Nona Lotu, na Yalo Tabu ena vakadinadinataka na dina kina yalodra na tamata yadua. Sa na qai rawa nida ciqoma yadua na veisureti ni iVakabula meda vakabauti Koya ka muri Koya ena noda veivutuni.

Sa tekivu kina na nona ilakolako ni saumaki mai e dua na tamata—ka vuki tani mai na gagadre kocokoco kei na ivalavala ca ka torova yani na iVakabula. Sai Koya na yavu ni noda vakabauta. Ia nida sa rai yadua Vua ena vakasama kece (raica na Vunau kei na Veiyalayalati 6:36), sa yaco o Koya me dua na kaukauwa veivakaduavatataki ena noda bula.

E tomana na itukutuku ena 4 Nifai ni o ira era lako mai kina Lotu ka veivutunitaka na nodra ivalavala ca “era a papitaisotaki ena yaca i Jisu; ka soli talega vei ira na Yalo Tabu” (4 Nifai 1:1). Era a curu kina dua na veiyalayalati—e dua na isema digitaki, ka veivauci—kei na Kalou.

Nida cakava ka maroroya na veiyalayalati, eda sa taura na yaca ni Turaga vei keda yadua. Eda sa taura talega na Yacana vei keda vaka dua na matatamata. O ira kece era cakava na veiyalayalati ka segata me ra maroroya era sa tamata ni Turaga, na Nona iyau talei (raica na Lako Yani 19:5). Okoya gona, eda sa lakova kina na salatu ni veiyalayalati vakayadudua ka vakalewelevu. Na noda veiyalayalati kei na Kalou e solia vei keda e dua na inaki raraba kei na ivakatakilakila raraba. Nida vauci keda vua na Turaga, e vukei keda o Koya me “semati na loma[da] ena duavata kei na veilomani vakataki [keda]” (Mosaia 18:21).

E tomana na itukutuku ena 4 Nifai: “Ka sa sega na veicacati kei na veileti ena kedra maliwa, era caka dodonu vei ira na tamata kecega.

“Era sa taukena vata na ka kecega ena kedra maliwa; ka sa sega e dua sa vutuniyau se dravudravua; bobula se itaukei, ia era sa galala kecega ka vakaivotavota ena isolisoli vakalomalagi” (4 Nifai 1:2–3).

Ena noda veimaliwai vakayago, e vinakata na Turaga me da dau dodonu ka veilomani ka kakua ni veivakaisini se veivakayagataki vakai keda (raica na 1 Cesalonaika 4:6). Nida toro voleka yani vua na Turaga, ena “sega vei [keda] na nanuma [me da] veivakacacani, ia [me da] tiko veilomani, ka solia vua na tamata yadua me vaka na ka sa dodonu me nona” (Mosaia 4:13).

Sa vakaroti keda talega na Turaga me da qaravi ira na dravudravua kei na vakaleqai. E dodonu meda “wasea na [noda] iyau” me vukei ira, me vaka na noda rawa ni cakava vakakina, ka sega ni vakalewai ira (raica na Mosaia 4:21–27).

O keda yadua me da “lomana na weka[da] me vaka [eda] sa lomani [keda]” (Vunau kei na Veiyalayalati 38:24). Kevaka meda na tamata ni Turaga ka duavata, sega walega ni dodonu meda veimaliwai vakatautauvata, ia e dodonu talega meda raici ira vakai keda me ra tautauvata ka vakila e yaloda ni da tautauvata—tautauvata ena mata ni Kalou, ka tautauvata na keda yaga kei na tautauvata ena rawa ka.

Na lesoni e tarava mai na ika4 ni Nifai e lako mai ena malanivosa rawarawa oqo: “Era sa muria ga na ivakaro era ciqoma mai vua na nodra Turaga ka nodra Kalou” (4 Nifai 1:12).

A vakavulica na Turaga vei ira na tamata oqo na Nona ivunau, solia vei ira na ivakaro, ka kacivi ira na dauveiqaravi me ra veiqaravi vei ira. E dua na Nona inaki ni kena vakayacori na ka oqo o ya me vakadeitaki ni na sega na veileti ena kedra maliwa (raica na 3 Nifai 11:28–29; 18:34).

Na noda talairawarawa ki na ivakavuvuli ni Turaga kei ira na Nona italai e sa ka bibi sara kina noda duavata. Oqo e oka kina na noda yalodina meda talairawarawa ki na ivakaro ni veivutuni ena veigauna kece eda lutu kina ka veivukei vakai keda nida segata meda caka vinaka cake ka vinaka cake ena veisiga.

Soqoni Vata

Tarava, eda vulica nio ira na tamata ena 4 Nifai era a “ia tiko [ga] na lolo kei na masumasu, era sa dausoqoni vata vakawasoma mera masu ka rogoca na vosa ni Turaga” (4 Nifai 1:12).

Eda gadreva meda dausoqoni vata. Na noda soqoni ni sokalou ena veimacawa sa dua na madigi bibi meda kunea kina na kaukauwa, vakayadudua ka vakalewelevu. Eda vakaivotavota ena sakaramede, vuli, masu, lagasere vata, ka veitokoni vakai keda. Na soqoni tale eso e vukea tale ga na kena vakabulabulataki na vakilai ni noda okati vata, veitokani, kei na inaki wasei.

Na itukutuku ena 4 Nifai sa qai solia vei keda na veika e rairai idola cecere ki na veika kece oqo—na ka e sega ni rawati ke sega na duavata dina: “Sa sega na veileti ena vanua, ni sa tiko e lomadra na tamata na loloma ni Kalou” (4 Nifai 1:15).

Ena yaco na vakacegu ni tamata yadua nida lomana dina na Kalou, ena yalomalumalumu. Oqo na imatai ka ivunau levu. Na lomana vakalevu cake na Kalou mai vua e dua tale se dua tale na ka sa ikoya na ituvaki e kauta mai na sautu dina, vakacegu, nuidei, kei na reki . Nida taracake na loloma vua na Kalou kei Jisu Karisito, ena muria ga mai na loloma ni matavuvale kei ira na wekada.

Na reki cecere duadua eda sotava sa ikoya na noda vakasinaiti tu ena loloma vua na Kalou kei ira kece na Luvena.

Na loloma cecere, na loloma savasava i Karisito, sa iwali ni veileti. Sa ikoya na itovo ni bula bibi duadua ka kilai kina ni dua sa daumuria vakaidina na Karisito. Nida vakamalumalumutaki keda vua na Kalou ka masu ena yaloda taucoko, ena solia vei keda o Koya na loloma oqo (raica na Moronai 7:48).

Ni da segata kece me tikoga e yaloda na loloma ni Kalou, ena vaka ga me matau vei keda na cakamana ni duavata.

Kena itinitini, era a vakaraitaka na tamata ena ika4 ni Nifai e dua na ivakatakilakila ni duavata ka dodonu me da vakarorogo kina: “Sa sega na daubutako, se na daulaba, ka sega na Leimanaiti se dua na mataqali-aiti; ia era sa duavata ga, era sa luvei Karisito, ka sa nodra na matanitu ni Kalou” (4 Nifai 1:17).

A vakasuka yani na ivakatakilakila ka wasei ira tu na tamata me drau na yabaki ni yaco mai e dua na ivakatakilakila tudei ka vakaturaga cake. Era qai ira—kei ira kece tale eso—me vaka na nodra veimaliwai kei na Tamada Vakalomalagi kei Jisu Karisito.

Na ituvaki tani kei na duidui eso e rawa ni vinaka ka bibi vei keda. Ia na noda ivakatakilakila bibi duadua sa ikoya e semati kina noda itekitekivu kei na inaki vakalou.

Taumada e liu duadua, o keda yadua eda sa luve ni Kalou. iKarua, vaka lewe ni Lotu, eda sa luve yadua ni veiyalayalati. Kei na ikatolu, oi keda yadua eda sa tisaipeli i Jisu Karisito. Au vakauqeti keda kece meda kakua ni vakatara e dua tale na ivakatakilakila me “tokitaka, sosomitaka, se me toka eliu vei iratou na tolu na ilesilesi tudei oqo.”

Dou Duabau

Sa sureta na tamata kecega na Kalou mera lako mai Vua. E tiko na tikina me baleti keda kece. Eda na rairai duidui beka ena noda itovo vakavanua, politiki, matatamata, gagadre, kei na vuqa tale na sala. Ia nida sa duavata vei Jisu Karisito, sa na seyavu yani na bibi ni duidui eso oqo ka na vakaisosomitaki ena noda gagadre kaukauwa meda duavata—me rawa kina ni da Nona.

Taura matua e yalomu na lesoni e vakavulici ena 4 Nifai. Nida segata yadua meda ciqoma na veitikina bibi oqo ni duavata ki na noda bula, ena rawa ni qai tukuni me baleti keda, me vaka a baleti ira, “Sa dina sara ni sa sega beka ni dua na matatamata mamarau cake ena kedra maliwa na tamata kecega sa bulia na liga ni Kalou” (4 Nifai 1:16).