Ew Nikinikin Chufengen non Jises Kraist

Non 4 Nifai 1:1, sia aneani: “Ekewe chon kaeon Jises ra fori ew Mwichefenin Kraist non kinikinin ewe fonu meinisin. Me [aramas] ra feito ngenir, me ra enetin aier seni ar kewe tipis.”

Kich sia chefengen nukun ewe Samol me ewe Chon Amanau Jises Kraist. An emon aramas kaeo usun Jises Kraist, An kapas alim, me An ewe Mwichefen, Ewe Ngun mi Fel a kuna ewe enet non netipen emon aramas. Emon me emon kich sia tongeni etiwa an ewe Chon Amanau we tungor an epwe wor nuku non Ii me tapwei Ii ren aier.

A pwopwutani an emon anen ekesiwin—seni tipemong me mwochenia me ngeni ewe Chon Amanau. Ii ewe nongongun ach nuku. Me an emon kich sia nengeni Ii non ach ekiek meinisin (nengeni Doctrine me Covenants 6:36), Ii a winiti emon chon ochufengeni non manawach.

Ewe rekot non 4 Nifai a sopweno me opworousa pwe ekewe ra feito ngeni ewe Miwichefel me aier seni ar tipis “ra papatais non ewe iten Jises; me rapwan angei ewe Ngun mi Fel” (4 Nifai 1:1). Ra fen tonong non ewe pwon mi pin—a echipwer, nefinach—ngeni Kot.

Nupwen sia fori me onomwu pwon mi pin, sia uwei iten ewe Samol won winikapach. Sopwosopwonon, sia wata woch Itan ren emon aramas. Meinisin kewe ra fori pwon mi pin me achocho ar repwe emwechur ra winiti neun ewe Samol aramas, An pisek mi euchea (nengeni Exodus 19:5). Nge, kich sia sai won ewe aanen pwon mi pin ren emon me emom me meinisin. Nefinen ach pwon mi pin ngeni Kot a ngeni kich ew foforuch me nonomwuch. Ren ach sia anomwu manauach ngeni ewe Samol, Ii a anisikich an “netipach epwe riri fengen non chufengen me non tong ew ngeni ekoch” (Mosiah 18:21).

Ewe pworous non 4 Nifai a sopwosopwono: “Ese wor tipengaw me anini fengen nefiner, me emon aramas epwe chu ngeni emon me emon.

“Iwe a wor rer mettoch meinisin mi nonnofengen nefiner; iei minne ese wor mi pisekisek me woungaw, mi fotek me ngaseno, nge ir meinisin mi fis pwe repwe ngaseno, me chon angei niffangen nang” (4 Nifai 1:2–3).

Non nonomwun manauach, ewe Samol a mwochen kich sipwe enet me ew chok ngeni emon me emon me sisapw sona me oumwesi emon me emon (nengeni 1 Thessalonians 4:6). Ach sia mamarita ngeni ewe Samol, kich “esap wor ach ekiekin sipwe efeiengawa fengeni kich, nge sipwe nonnom non kinamwe, me sipwe ngeni emon me emon aramas anongonong won met minne mi pung an epwe angei” (Mosiah 4:13).

Ewe Samol a pwan tungor sipwe tumunu kewe mi osupwang me weungaw. Sipwe fen “angei [ach] mettoch” epwe anisir, ren ukukun ach tongeni, nge sisapw esiter (nengeni Mosaia 4:21–27).

Emon me emon kich sipwe “afona pwiin usun pwisin ii” (Doctrine me Covenants 38:24). Ika kich sipwe neun ewe Samol aramas me chufengen, esapw chok ach sipwe enenew chok emon me emon kich, nge kich sipwe enetin kuna emon me emon kich mi taitap mefi non netipach pwe kich mi nenechok—nenechok memwen Kot, ren nenechok nonomwuch me nenechok ach tongeni.

Ewe nesen mwirin seni 4 Nifai a feito non mecheresin kaworan: “Ra fetan mwirin ekewe annuk minne rafen angei seni ewe Samol me ar Kot” (4 Nifai 1:12).

Ewe Samol a fen aiti ekkei aramas An kapas, ngenir annuk, me kekeri kewe chon angang repwe ngenir. Ew nein An kewe pwopwun non an fori ei an epwe enukunuk pwe esapw wor anini nefiner (nengeni 3 Nifai 11:28–29; 18:34).

Ach aneasosich ngeni kewe pworousen ewe Samol me Neun kewe chon angang a euchea ngeni ach sipwe tongeni chufengen. Ei a kapach ngeni ach foforun afona kewe annukun aier nupwen kich sia tur me sipwe anisi emon me emon ach sipwe achocho ngeni ach sipwe fori mi ech me sipwe echuno iteiten raan.

Mwich fengen

Mwirin, kich sia kaeo pwe kewe aramas non 4 Nifai “[sopweno] non echikipin me iotek, me non mwich fengen me chufengen repwe iotek me rongorong ewe kapasen ewe Samol” (4 Nifai 1:12).

Kich sipwe mwich fengen. Ach mwichen fel iteiten wiik ra euchea ren ach sipwe kuna pechekun, ren emon me emon ika kochu. Kich sia aemon.ngei ewe sakramen, kaeo, iotek, koon fengen, me anisi emon me emon. Ekoch mwicheich a pwan anisi an epwe wor memefin nomwetiw, chiechiech, me aea fengen pwopwun.

Ewe rekot no 4 Nifai a ngeni kich met ewe a tongeni ewe kii ngeni ekkei meinisin—kewe mettoch seni ekkewe enetin chufengen ese fis: “Ese wor osukosuk won ewe fonu, pwokiten ewe tongen Kot ewe a nomw non netipen kewe aramas” (4 Nifai 1:15).

Kinamwe won winikapach a wor nupwen kich, non tipetekison, enetin tongei Kot. Iei ewe aewin me napanap annuk. Ach tongei Kot nap seni emon ika och mettoch ina ewe napanap a wato ennetin kinamwe, ourour, epinukunuk, me pwapwa. Ren kich sia echueno ach tongei Kot me Jises Kraist, tongen famini me chon oruch epwe tapweto.

Ewe watten pwapwa oupwe mefi ina nupwen oua ureno ren tongei Kot me ngeni meinisin Noun semirit.

Tong ennet, ewe tongen Kraist, ina ewe safen tipengaw. Ina ewe nongonongen nikinikin emon ennetin chon tapweno mwirin Jises Kraist. Nupwen sia etekisona kich me mwen Kot me iotek ren unusenpochokunen netipach, Ii epwe ngeni kich tong ennet (nengeni Moroni 7:48).

Ren kich meinisin sia kutta ewe tongen Kot epwe nomw non netipach, ewe feiechun chufengen epwe usun nge a fen nonnomw rech.

Saingonon, ekkewe aramas non 4 Nifai ra fori ew asisinen chufengen ewe a mwochen ach pekin rongorong: “Ese wor chon sona, chon ninino, ika fen pwan kewe Lamanites, ika fen pwan nonomwun -ites; nge iir mi nomw non ew, kewe semiriten Kraist, me pwan ngeni ewe mwuun Kot” (4 Nifai 1:17).

Kewe asisin a fen aimuni aramas non puku ier a wes memwen a chomong foforun me nonnomwuch. Ra kuna manawer—me pwan kewe ekoch—a anongonong won nefiner ngeni Samach non Lang me Jises Kraist.

Sokopat me sokofesen a tongeni eech me unusech ngeni kich. Nge ach ewe euchean nonnomwuch ikena kewe ra kanengeni nonowmuch me pwopwun.

Ewin me euchean, emon me emon kich neun Kot. Oruwan, ren memper non ewe Mwichefen, emon me emon kich noisin ewe pwon mi pin. Me eunungatin, emon me emon kich chon kaeo ren Jises Kraist. Ngang uwa tungor ngeni kich sipwe mwut ngeni kewe ekoch repwe “peutano, siwini, ika angei akaewin ren ekei unungat kinikin.

Epwe ew

Kot a tungor ngeni meinisin repwe feito Ren. Mi wor neni fan iten meinisin. Kich sipwe sokofesen non ach eruni, pekin utut, sokun aramas, mwochen, me pwan chomong wewe. Nge ach sia chufengen non Jises Kraist, kewe sokofesen a morono non echunon me ra wesino ren ach mwochen sipwe ew—pwe sipwe Neun.

Wanong non netip kewe nesen sa kaeo non 4 Nifai. Ren emon me emon kich sia achocho ngeni sipwe wanong ekkei euchean mettochun chefengen non manauach, epwe tongeni kapas usuch, usun pwan usur, “Meienet esapw wor aramas mei pwapwa nein kewe aramas kewe ra for seni peun Kot” (4 Nifai 1:16).