“Bilulu bia Ntempelo bia Buakuidi bua Tshijila,” Liahona, Ngondu wa Tshitema 2024.
Mukenji wa ku Ngondu wa Liahona, Ngondu wa Tshitema 2024
Bilulu bia Ntempelo bia Buakuidi bua Tshijila
Bu tshitupa tshia diambika dia mu ntempelo, tuvua bapeshibua tshivulukilu tshia mubidi tshia tshijila tshia bipungidi bietu—bu tshimanyishilu tshia Mupandishi Nkayenda.
Diumvuija ku Adam and Eve (Adama ne Eve), kudi Douglas M. Fryer
Pakumbusha didilongolola divuabu bapeshibua kakuyi mpata ne dituishibua diakatetabu bua kuvuluka, bivua ne tshia kuikala busami bua dikema bunena kudi Adama ne Eve bua kumbuka mu Budimi bua disanka bua Edene ne kubuela mu buloba bupona.
Ne dimanya dishuwa, bakajandula tshivua tshiumvuija kumbuka ku moyo wa ditalala, kawuyi ne disumpakana bua kubuela mu buloba bua makokangana ne disuluila, meba ne kanyinganyinga—bilonda pashisha kudi tshintu kampanda dîna ne lufu. Kabavua mua kuikala bamanya diambedi tshivua bionso ebi biumvuija, kadi bakalonga pashisha ne dituku dionso divua mua kutuala busami bupia-bupia. Tshia bushuwa, butamba busami bua bionso bivua dijandula ne bavua mua kuluangana ne busami bonsu ebu mu ditapuluka ne Tatu wabu wa mu Diûlu—“bîpata ku mêsu kuenda,” biandika pashisha kudi Mose.
Kumona ditapuluka edi ne kuikala kua nkaya mu buloba bua mashika, bua dibungama, bivua mua kuikala dikankamika bua Adama ne Eve bua kuvuluka tshintu tshimua: ne milayi ivua mienzeka—tshintu tshia tshijila ne tshia tshiendelela tshibikidibua ne bipungidi. Bavua balaya ne bavua mua kutumikila Tatu matuku onsu a moyo wabu, ne uvua mulaya bua kutuma Mupandishi, uvua mua kumbusha busami ne kanyinganyinga, kupikula bilema biabu, ne kubapinguluja mu bukubi ku mêsu Kuenda.
Kadi mushindu kayi uvua bifuaka ebi mua kuvuluka bivuabu balaya? Mushindu kayi uvuabu bashala bamanya bua lutatu luabu—bamanya diba dionsu, butuku ne munya?!
Tshivulukilu tshia Bipungidi Biabu
Bua tshivulukilu esthi Wakabapesha “bivualu bia biseba.” Etshi tshivua dipa dinena ne pa diba diadi. Panyima pa badia tshimuma tshikandika, Adama ne Eve bakafika pabuipi ne kumanya ne bavua butaka. Tshia kumpala, bakateta bua kubuikila butaka buabu ne mabeji a mfigi. Pashisha, mu kumona ne esthi katshivua tshikumbana, bakateta bua kusokoma Mukalenga. (Tshienzedi tshia dipâla etshi tshivua tshijadika bushuwa ne tshifuaka tshikavua tshidileja!) Kubangila ku tshikondu atshi tô ne lelu, Tatu wa dinanga uvua mubikila bana Benda bua bapatuka, kuvuabu basokoma, kudiye. Ne bu ne bivualu bia biseba pashisha ne mishindu mishilangana ya bivualu katshia, Yeya mu lusa Luenda kavua mutulekela butaka nansha kadi mmuvuadika batumikidi mu “tshivualu tshia buakana,” tshivulukilu tshia milayi ne bipungidi bietu. “Bilulu bia lupandu” ebi bidi bimanyisha dipa dinena dia ku onsu, Bupikudi bua Yezu Kilisto.
Bilulu bia Ntempelo bidi Tshimanyishilu tshia Mupandishi
Bimpa, dielangana dionsu dia menji edi pa Adama ne Eve ne bipungidi ne bivualu didi, bulelela, ditamba didienzeja dia mu lungenyi. Kabiena bikola bua kuela menji mushindu udi Adama ne Eve bumvua, bualu tuetu petu tudi tuluangana ne bimvundu mu buloba bupona ebu. Tuetu petu tuvua batapulukangana ku mêsu kua Nzambi, ne tudi tuya kula tshikondu tshionsu tshitudi tutupakana ku mikenji. Bu mudi Adama ne Eve, tuvua bapeshibua Mupandishi umua, Yezu Kilisto wa mu Nazaleta, Tshibangilu ne Nshikidilu, Muana wa Nzambi wa moyo. Bu mudi Adama ne Eve, tudi benza bipungidi ne Nzambi. Ne, bu tshitupa tshia diambika dia mu ntempelo, tudi bapeshibua tshivulukilu tshia tshijila tshia mubidi bua bipungidi ebi—tshimanyishilu tshia Mupandishi nkayenda. Mu tshipungu tshietu bidi bibikidibua bilulu bia Ntempelo bia Buakuidi bua tshijila.
Diumvuija ku The Second Coming (Dilua Dibidi), kudi Harry Anderson
Tudi tuvuala bilulu ebi muinshi mua bivualu bietu bia pambelu. Nansha midimu yonsu indi nayi, mulongo wanyi wa dîku mu moyo, nansha bionsu bidi midimu ya dituku ilomba,ku mutu kua bionsu kudi bipungidi bianyi—misangu yonsu ne bua kashidi. Ku mutu kua bionsu kudi milayi ya tshijila eyi indi mukuatshila mu dipanga ditekemena. Bilulu bia ntempelo kabiena bitadikibua anyi bilejibua kudi bantu, nansha bipungidi bianyi. Kadi ndi mbilama bionsu pabuipi nanyi—pabuipi bu mudibi bikengela. Bidi bia nkaya mu bulelela ne bia tshijila tshia kulu.
Mu kuvuluka bipungidi ebi, milayi ya nseka yonsu ibidi, tudi tuvuala bilulu bia ntempelo mu matuku onsu a mioyo yetu. Tshienzedi etshi tshidi tshileja dijinga dietu bua Mupandishi bua kuikala buenzeji bua mpatshi mu mioyo yetu. Bimanyishilu Bikuabu Bidi bia Tshitupa Tshîpi. Tudi tutambuishibua musangu umua mu mioyo yetu. Tudi tuagata biakudia bia tshijila musangu umua ku lumingu. Tudi tubuela mu ntempelo padi bikondu bitukumbanyina. Kadi bilulu bia ntempelo bia Buakuidi bua Tshijila bidi bishilangana: tshimanyishilu etshi tshitudi tunemeka butuku ne munya onsu.
Ne ki mushindu udi bipungidi bikala—kabiyi bilengulula pambelu pa diumvuangana anyi dilengululangana ne kabiena bienza bua kupetangana ne ngikadilu ne mvuadilu ya tshimenga. Mu moyo wa muyidi wa Yezu Kilisto; mishindu ya buloba idi ne tshia kushintulukibua bua kupetangana ne bipungidi bietu, kabiyi mushindu mukuabu pabuipi.
Patudi tuvuala bilulu bia ntempelo, tudi, bu mudi Bulombodi Bukulu bua Kumpala bulongesha, tuvuala tshimanyishilu tshia tshijila tshia Yezu Kilisto. Bikala nanku, buatshinyi tudi tukeba tubingila bua kumbusha tshimanyishilu esthi? Buatshinyi tudi tudipumbisha nkayetu bua kupeta milayi ya bukola, bukubi, ne lusa bidi bilulu bia ntempelo bileja? Bua kuamba mu bulelela, misangu yonsu itudi tumbusha bilulu bia ntempelo bua tshitupa tshîpi, tudi ne tshia kusumpakana bua kubivuala kabidi, pa lukasa lonsu bu mudibi bikengela, bualu tudi tuvuluka mu bionsu milayi ne manyoka bidi bifuma ku bipungidi bietu. Ku mutu kua bionsu, tudi tuvuluka mutshi mutshiamakana ne lukita lutupu bia Kilisto.
Bamua badi mua kuamba, “Ndi ne mishindu mikuabu bua kuvuluka Kilisto.” Ne ndi mua kuandamuna, bidi bishema! Mu mishindu itudi tuvuluka Yezu bivula ki mushindu walua mioyo yetu milenga. Tuelayi bonsu meji mu mishindu yonsu mutudi mua kulama mapangadika a “kumuvuluka diba dionsu.” Kadi mu kuenza nunku, bidi mua kuikala dishima bua kulengulula ne disua tshivulukilu tshidi Mukalenga nkayenda mufila ku diambika, bilulu bia Ntempelo bia Buakuidi bua Tshijila.
Yezu Kilisto ne lumu luimpa Luenda bidi ne mushinga kundi. Matekemena anyi onsu a tshiendelela ne majinga, tshintu tshionsu tshindi ndama tshia mushinga, bidi bilamata kudiye. Udi “dibua dia lupandu luanyi,” mushindu wanyi wa kufika kudi Tatu wa mu Diûlu, mushindu umuepela wa kupingana ku tshimvua natshi musangu ne mpindiewu njinga bua kutshipeta kabidi, natshi bia bungi kabidi. Dipa dienda kutudi didi dishema bikola dintu tshiyi muanji kupeta, dimpa kupita dintu tshiyi muanji kufila—disumba mu lutatu lua kashidi, ditandula kudi musumba munena, ne difila ne dinanga dia kashidi. Meba ne tusokola, busami ne kanyinganyinga, dibungama ne bubi bua buloba bupona bidi bionsu “bidînyibua mu Kilisto.”
Nanku ndi muvuala bilulu bia Ntempelo bia Buakuidi bua Tshijila—butuku ne munya onsu bu mudibi bikumbana katshia ngampeta diambika bidimu 64 bipita, pamvua ne bidimu 19—bualu ndi mumunanga ne bualu ndi dijinga ne milayi udibi bileja.
Nkonku pa Divuala Bilulu bia Ntempelo?
Bamua ba kunudi badi mua kuikala babala kanungu aka bela menji ne nengandamuna lukonku lua pabualu pa bilulu bia ntempelo. Udi mua kutekemena bua “Mukalenga udi wamba nunku”—anyi nansha “Basadidi Benda badi bamba nunku”—pa bualu budi pabuipi ne mutshima weba. Lukonku lueba ludi mua kufumina ku bualu bua pa nkaya bitangila mudimu, dibidija, mankenda, luya anyi mashika, buimpa, malu a bukola bua mubidi, anyi nansha dilomba dia buanga.
Amua mandamuna ku nkonku ya mushindu ewu adi mua kupetshibua ku temples.ChurchofJesusChrist.org ne mu tshitupa tshia 38.5 mu Mukanda Munena wa Maludiki. Udi mua kuebeja bidimba bia mêku anyi balombodi bawudi mueyemena pa bualu bua nkaya. Kudi, nansha nanku, buludiki butoka bufila mu milulu ya dilongolola, ne kudi bua kashidi ne kashidi Tatu weba wa mu Diûlu, udi mukumanya ne mukunanga ne umvua tshintu tshionsu mu bikondu bieba. Neikala ne disanka bua wewa kumuela konku ya nkaya ya bueneyi.
Foto wa mukete wa St. Ntempelo wa George Utah
Suaku kumvu bibi to. Pawudi ukeba buludiki bua diûlu, Nyuma ka kukunungena bua kuenza bikesa kupita kulonda maludiki mapeta mu ntempelo ne mubelu wa buambi bifila kudi Bulombodi Bukulu bua Kumpala mu diakula dishala. Tatu wa dinanga ka kukuambuluisha bua kufila tubingila bua dienza kakesa kupita kutuangana ne mikenji Yenda ya didifila ne buimpa biakubenesha mpindiewu ne bua kashidi. Kadi Udi umvua nkonku yeba, ne neakuambuluisha bua kupeta mabenesha a dinemeka bilulu bia ntempelo ne dilama bipungidi bieba anyi? Eyowa! Udi kabidi mua kuebeja munganga mukumbana anyi mumanya mupiluka wa malu a bukola bua mubidi padibi bikengedibua anyi? Bia bushuwa! Udi mua kulengulula ngikadilu muimpa anyi kutangila dia muamua dia kipatshila anyi? Ndi nsambila bua ne kuenji nanku to.
Tshiena mua kuandamuna lukonku lonsu luwudi nalu. Tshiena nansha mua kuandamuna lukonku lonsu lundi nalu. Kadi, bu Mupostolo wa Mukalenga Yezu Kilisto, ndi mua kukulaya diambuluisha dia Nzambi wa dinanga, udi ukeba disanka ne dibenesha bieba bionsu, mu mishindu iwudi kuyi mua kumvua anyi kutekemena, pawudi ulama bipungidi biwudi muenza nenda.
© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, September 2024. Tshiluba. 19295 760