Te Atua E na Boutokaira ao ni Kamanoira

Iroun Unimwaane Dale G. Renlund

Man te Kooram n Abotoro n te Tengaun ma Uoman

N aron Kaaben Moronaai, ti kona ni karekea te buoka ao te mwaaka mai karawa ibukin buaka ake ti kaitara ma ngaai inanon maiura.

Kaaben Moronaai e taua te buraeki n inaomata

Ngke I moan wareka ana Boki Moomon, I unga n rongorongon te buaka imarenaia Nibwaite ao Reimwanaite. E anaaki nanou man ana onimaki, wanawanan, ao ana aanga Kaaben Moronaai are e kabonganaa, te kamwaanta n te taanga ni buaka are e rineaki bwa te tia kaira ana taanga buaka Nibwaite ngke 25 ana ririki ni maiu. E wanawana, korakora, ao ni kororaoi ana atatai. E bwanin ana motinnano nakon inaomataia ao mweeraoia ana aomata. (Taraa Aramwa 48:11–12.)

N oneamwiin oin kamoamoaana ao te kan atongaki ngkai e tokanikai n te buaka, e anga ana kamoamoa Moronaai nakon te Atua ibukin reken te tokanikai ao te boutoka ae tabu are a karekea ana taanga ni buaka mairouia aine ao ataei aika tiaki taan buaka. E tuanga te tia kairiiri ae aiana ni buaka ae konaaki irouna: “Te Uea … e a tia n anga ngkami nako nanon baira. Ao ngkanne I tangiria bwa ko na ataia bwa e karaoaki aio … ibukin ara aro ma ara onimaki iroun Kristo.” Ngkanne e a tibwaua te atatai aei n te taetae ni burabeti: “Te Atua e na boutokaira, ma ni kawakinira, man aki kamaunaira, ngkana ti kakaonimaki nakoina, ao nakon ara onimaki, ma ara aro” (Aramwa 44:3, 4).

N te tai teuana ma teuana, I a moanna n nooria bwa e a tia n riki Moronaai bwa te banna ni kakairi i aon taian tua ake ti na kona ni maiuakin bwa a na buokiira n aitara ma kakaewenako inanon maiura n taai aikai. Ngkai ti kamwakura ara onimaki iroun Iesu Kristo, te Tia Kamaiu ibukin te aonaaba, E na kakabwaiaira ni Mwaakana. Ma karaoan aio irouna ibukira bwa ti na kinai ana kakabwaia, ti riai n ataa oin te kantaninga ibukin maiura, ni kakaei nako ara anga bwa ti aonga n tokanikai, ao n katauraoira ibukin taian buaka ake ti kaitara ma ngaai, n aron Moronaai ngke e katauraoia nako iai ao ni kaitarai raoi taian buaka inanon maiuna. Ngkana ti karaoa aei, Tamara are i Karawa ao Iesu Kristo a na boutokaira ao ni kamanoira.

Ataakin Oin te Kantaninga ibukin Maiura

E kaokiokia ni kauringiia aomata Moronai bwa antai ngaiia (taan bwaibwai n ana berita ae tabu Aberaam), are boni ngaiia (natin te Atua aika a tangiraki), ao bon anne bukina ngkai a buaka (aia utu, aia onimaki, ao inaomataia). E reireiniia ana aomata Moronaai bwa a buaka ibukin maiuia ao ibukin inaomataia man te karawawataaki ao te tautoronaki. Ni kaitaraana, a buaka aiaia bwa a kan atongaki bwa a kakawaki man korakora n te aro ni kaiangatoa man taumatoa nakoia aomata.

Ngke tabeman Nibwaite a ukora te mwaaka n tautaeka ibukin reken aroia, E raeuaa ana kabaraaki Moronaai ao e koroboki i aona ma ana rongoronogo ae rangi ni kakawaki: “Kauringan Atuara, ara aro, ma inaomatara, ma ara rau, buura, ma natira.” E tabekarake te buraeki, are e aranna bwa “te buraeki n inaomata,” i tabon te kai ao e kabongana ni kauringiia aomata bwa tera raoi bukin te buaka ao aroia ni barongaiia n aia waaki. (Taraa Aramwa 46:12–13, 19–20.)

N te maiu aei n te buaka n tamnei, “ba ti aki kaunrabata ma te rara ma te iriko, ma … tan tau taekan aonaba aika tan taua aron te ro … [ma] tanga n tamnei aika buakaka” (I-Ebeto 6:12). Ngaira naba, ti riai ni kauringaki bwa tera raoi bukin te buaka. Unimwaane Neal A. Maxwell (1926–2004), kaain ngkoa te Kooram n Abotoro ake Tengaun ma Uoman, e kabwarabwa te iango aei n ana marooro ae mataata raoi, ma ni kimototo.

N 2004, I kawara Unimwaane Maxwell n ana ruu n te onaoraki teutana te tai i mwaain matena. E rangi n akoi nakoia aomata ni kabane ake a kawaria ke ni buokia. Taan mwakuri n taabo ni kamarurung a rinnako inanon ana ruu ao a tang ngke a otinako. I taku nakoina, “Unimwaane Maxwell, aio e bon rangi ni kangaanga.” E wiingare ao e taku, “O, Dale, boni ngaira aomata aika akea tokiia aika ti maeka n te aonaaba ae mamate. Ti otinako man te tabo ae ti taneiai iai, n aron te ika ae otinako man te ran. Bon tii ngke arona bwa ti karekea te nonori ae akea tokina are man aei e na taraa ni bebete ataakina.”

Ti na aki kabuaa ara taratara n ikotaki ma rikira mai ieta ao tokin kawaira ae akea tokina ao taian kairoro ake a kaitaraira. Ataakin raoi ana babaire ni kamaiu Tamara are i Karawa n te aro ae eti e na kaungai nanora bwa ti na teimatoa ni buaka ibukin kamaiuakira ae akea tokina ao ibukin inaomatara man te tautoronaki n te maiu n tamnei.

Kakaean ara Aanga ibukin te Tokanikai

Inanon te tai are a buaka iai ana tanga ni buaka, e kakaei nako ana aanga Moronaai ae a na ataia bwa a karekea te tokanikai. E kabonganaiia tenaann tibwaai bwa a na tutuoa aia waaki ma nanoia aiaia n te buaka. E ukora te kaetieti mairoun te burabeti, ae Aramwa. Ngkanne Moronaai e a kabongana te taeka n reirei aei inanon ana aanga ni buaka. E barongai bwaai ake a kaineti ma kainnanoia, ni kakae oneanmwiia riki tautia n taian kaawa ake aki bati ni mano. E kakaei aanga ni babaronga bwa e aonga ni mwakuri raoi ana baire ni kaineti i aon rongorongo aika a boou.

Ai ngaia are e a karekea aia raka ao n tokanikai iaoia aiaia n te buaka. E bon tuai karerekea te tokanikai mai i mwaaina; ma, e reitinako ni kanakoraoa ana konabwai ma kaain ana tanga ni buaka ni kaitarai kakaewenako ibukin taai aika a na roko.

Ti kona naba ni kabonganai mwakuri akanne ni kaitaraia taan kakaitara n te maiu n tamnei. Ti kona ni waakina karaoana n ataia bwa tera ae kataia ni karaoia Tatan inanon maiura. E kataia ni kamengaoi ara iango man ara kantaninga ibukin maiura. Ngkana ti kaitara ma te kariiri, ti riai ni bon titirakiniira:

E kanga te mwakuri aei man au itera ni kabotauaki ni kaitara ana taeka te Atua are e kaotaki?
Tera ae na riki mwiina ibukin karaoan te mwakuri aei?
E na buokai te mwakuri aei ni kakoroa bukin rokou n te aonaaba aei?

Ti riai naba n ataa mwiin baika a na riki ngkana ti butimwaea teutana te kariiri. Ngkana ti butimwaea te kariiri, ti kana “te bwai ni kamate teutana i mwiin teutana” (Aramwa 47:18), te anga ae moan te korakora ae kabonganaaki man mwaakain te buaka are e kona ni karekea te kangaanga n te maiu n tamnei.

Ti kona ni kamaoira ni kaitara ana kariiri Tatan man iriiran kaeitieti mairouia ara burabeti ni boong aika kaitira. Karaoan aio e buokiira n kateimatoa te nonori ae akea tokina man ukebwaian ara mwakuri. Kakaeakin nako aanga bwa ti na kanga ni kaitarai taian kariiri ake a kaoti n taabo aika a kakaokoro e na buokiira ni karaoi rinerine aika a eti inanon te tai. I mwaain babairean nako aanga ao mwakuri ake a na buokiira ni kamanoira ni kaitarai bwaai ake a na kairii nako ara iango man te kantaninga n te maiu ae akea tokina.

N aron te katooto bon rabakau aika a boou. Rabakau aika a boou kanga ai aron te kabaang ae uaitera wiina ae kakang, e bongana ao kaikoaki naba, e kaineti i aon aron kabonganaakina iroura. Buokara ni karaoi rinerine aika a wanawana ibukin ara tareboon, ataei ao ikawai a kona n taraa “Taking Charge of Technology” ao For the Strength of Youth: A Guide for Making Choices. Aikai a kauringiira n oin te kantaninga ibukin maiura, e kairiira nakon Iesu Kristo, ao ni buokiira ni kaoa te Tamnei ae Raoiroi nako nanon maiura. Babaireana bwa e kanga, nningai, ao iaa te tabo ae ti na kabongana iai rabakau aika a boou a na kamanoira ni kaitarai aroaro aika aki riai, bon ana aanga te aonaaba.

Katauraoi ibukin te Buaka

Te kantaninga ibukin taian buaka aika i aon kawaia ni kaoti, e kataoraoiia ana aomata Moronaai ma otangan bwabwaaia, otangan atuuia, ao kunnikaia aika a matenten. E katauraoiia ana aomata n ae bwanin ni katobibia te kaawa ma te nono, a kena te tano ao ni kabwarietaa te tano ni katobibiaki iai.

N te maiu n tamnei, ti katauraoira temanna i mwiin temanna man kawakiinan ana tua te Atua. Ti karaoi ao ni kawakin berita aika tabu ma te Atua are ti karekea mwaakan Iesu Kristo nako nanon maiura. Ti kabaeaki n arora ae onoti ni kakaonimaki, n aron te tataro, te aki mamatam, ao ukoran booki aika tabu. Ti i mwakuri ma te onimaki, ni kaeka nakon kairiiri n tamnei ake ti karekei. Ti katauraoi ma te taratara raoi ibukiin ao n tau ni butimwaea te toa. Ngkana ti karaoia, e na iai ao ni koaua te Tia Kamaiu inanon maiura, n aron are E bon koaua nakon Moronaai, are e teimatoa n ana onimaki iroun Iesu Kristo. E ataia Moronaai bwa e kona n onimakinia te Tia Kamaiu ibukin kairiiri ao kainaomataakina (taraa Aramwa 48:16). Ngaira, naba, ti kona n onimakina Iesu Kristo ibukin te kairiiri ao te kainaomataaki.

Ti kona ni moantaai ni katauraoira man kakorakorakiia ara utu. E barongaira Tamara are i Karawa inanon taian utu ni buokiira bwa ti na kukurei n reiakinna bwa ti na kanga ni manga Okiria. Ara utu a kona n riki bwa taan ibuobuoki nakoira. Ti bane ni kona n namakina te kimwareirei ao te tangira n uringnga bwa ngaira bon mwakoron ana utu te Atua, n aki tabe ma kangaanga aika a onoti n ara utu.

Ti kona ni karekea te korakora n ae bwanin ao ni katauraoira ibukin taian buaka n te tamnei ngkai ti kaaina aia kaawa Aika Itiaki. Ara titeiki ao mwakoro a katauraoa te nne ni katantan ao te otanga. Ti kona ni kanuaira i bon imarenara n te maiu n tamnei, ni buokiira i bon imarenara ni kawakin ana tua te Atua, ao ni kaungaira i bon iroura bwa ti na onimakina Kristo, n tainako ao riki inanon taai ni kangaanga. Ngkana ti ikotiira, ti nooria bwa ti aki buaka n tii ngaira. Iai raoraora, ara tia reirei, ao ara tia kairiiri ake a kona ni buokiira ao ni kamanora. Ti korakora ngkana ti bane ikotaki ni katauraoira.

N te aro ae kamiimi, e anga ana kamoamoa Moronaai ni kabane ni kukureia ana aomata ngkai a kokoaua nakon aia onimaki iroun te Atua ao aia aro. N aron Moronaai, ti riai n ataia bwa e roko te kimwareirei ibukin Tamara are i Karawa ao ana babaire ao ibukin Iesu Kristo ao Ana Mwakuri ni Kamaiu. Ngkai ti a moan n ataa oin te kantaninga ibukin maiura, kakaean nako ara aanga ibukin karekan te tokanikai, ao ni katauraoi ibukin taian buaka, ti kareka te buoka ao te mwaaka mai ieta.

N aron Moronaai, I ataia bwa Tamara are i Karawa ao Iesu Kristo a uota te kainaomataaki man te tautoronaki—te inaomata man te mate ao te bure. A kakabwaiaira ma Mwaakaia ngkana ti Taraiia ni bwaai ni kabane.