“Tus Tswv txoj Hauj Lwm Tseem Ceeb thiab Peb lub Cib Fim Loj,” Liyahaunas, July 2024.
Zaj Lus hauv phau Liyahaunas Txhua Hli, Xya Hli Ntuj 2024
Tus Tswv txoj Hauj Lwm Tseem Ceeb thiab Peb lub Cib Fim Loj
Thaum peb hlub, qhia, thiab caw lwm tus neeg, ces twb yog peb nrog tus Tswv ua hauj lwm pab txhua tus los cuag Nws.
Txhua tus yaj saub hauv hnub nyoog kawg thiab lub sij hawm zoo heev no yeej tau qhia kom cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg qhia Yexus Khetos txoj moo zoo. Nyob hauv kuv lub neej, yeej muaj ob peb qho piv txwv txog txoj kev qhia no:
Thawj Tswj Hwm David O. McKay (1873–1970), tus yaj saub thaum kuv tseem yau, tau tshaj tawm tias, “Txhua tus mej zeej yog ib tug tub txib.”
Thawj Tswj Hwm Spencer W. Kimball (1895–1985) tau qhia tias, “Lub sij hawm uas yuav tshaj tawm txoj moo zoo mus rau ntau qhov chaw thiab rau coob tug neeg twb los txog lawm thiab yog tam sim no,” thiab “peb yuav tsum rhais ruam kom loj me ntsis” mus qhia txoj moo zoo rau lwm tus neeg.
Thawj Tswj Hwm Gordon B. Hinckley (1910–2008) tau hais tias: “Peb txoj hauj lwm tseem ceeb, peb txoj kev lav ris loj heev kom mus pab nrhiav cov neeg uas yuav tsum qhia. Tus Tswv tau txib kom peb mus qhia txoj moo zoo rau txhua leej txhua tus. Qhov no mas [peb] yuav tsum siv zog rau siab tiag tiag.”
Thiab Thawj Tswj Russell M. Nelson tau qhia tias: “Cov tub txib txoj hauj lwm yeej yog ib feem tseem ceeb ntawm kev muab Ixayees sau los ua ke. Kev sib sau ua ke no yeej yog txoj hauj lwm tseem ceeb tshaj plaws hauv lub ntiaj teb no. Tsis muaj dab tsi uas muaj yeeb koob tshaj. Tsis muaj dab tsi uas tseem ceeb tshaj. Tus Tswv cov tub txib —Nws cov thwj tim—yeej ua qhov tseem ceeb tshaj plaws, lub hom phiaj tseem ceeb tshaj plaws, txoj hauj lwm tseem ceeb tshaj plaws hauv lub ntiaj teb no hnub no.”
Kuv paub li no thaum kuv yog ib tug tub txib hluas heev ntawm qhov Chaw Tshaj Tawm txoj Moo Zoo hauv Askiv Teb. Hnub no kuv haj yam paub tseeb. Vim kuv yog tus Tswv Yexus Khetos ib tug Thwj Tim, kuv ua tim khawv hais tias yeej muaj cib fim nyob qhov txhia qhov chaw rau peb pab lwm tus neeg los cuag Khetos thaum peb muaj kev hlub, qhia txog peb tej kev ntseeg, thiab caw kom los nrog peb koom ua ke muaj kev xyiv fab ntawm Yexus Khetos txoj moo zoo.
Txoj Hauj Lwm Mus Lawm Tom Ntej
Kuv muaj hmoov kawg uas kuv ua hauj lwm rau hauv lub Koom Txoos lub Rooj Tsav Xwm Saib Xyuas Tub Txib thaum muab thawj phau Qhia Kuv txoj Moo Zoo nthuav tawm thaum xyoo 2004, thiab thaum muab phau ob nthuav tawm thaum xyoo 2023. Kuv ntseeg tau tias phau Qhia Kuv txoj Moo Zoo tau foom koob hmoov ntau kawg nkaus rau txoj kev ua tub txib.
Phau Qhia Kuv txoj Moo Zoo tshiab yeej muaj tag nrho tej uas peb tau kawm txij thaum xyoo 2004 los, thiab muaj tej lus qhuab qhia ntawm txhua tus hauv Thawj Pawg Thawj Tswj Hwm thiab Pawg Kaum Ob tug Thwj Tim, thiab yeej hloov kho tej lus kom pab tau sawv daws qhia txoj moo zoo rau lub sij hawm no. Tej kev hloov kho no yeej zoo kawg nkaus li.
Peb pom tau hais tias thaum peb ua tib zoo qhia txoj moo zoo los ntawm “kev hlub, kev qhia, kev caw” ces yuav foom koob hmoov ntau heev rau lub nceeg vaj. Yexus Khetos twb tau qhia txoj moo zoo ib yam nkaus li no thaum Nws nyob hauv ntiaj teb. Nws tau qhia Nws lub neej thiab Nws txoj kev hlub thiab caw txhua tus los cuag Nws (saib Mathais 11:28). Muaj kev hlub, kev qhia, thiab kev caw li Nws tau ua los lawm yog ib qhov koob hmoov tshwj xeeb thiab yog kev lav ris ntawm txhua tus mej zeej hauv lub Koom Txoos.
Pib ntawm kev Hlub
Nyob hauv lub Vaj Khexemanes thiab nyob saum tus ntoo khaub lig, Yexus Khetos ris lub ntiaj teb no tej kev txhaum thiab raug tag nrho tej kev tu siab thiab “tej kev mob thiab tej kev txom nyem thiab tej kev ntxias txhua yam” (Amas 7:11). Qhov no “ua rau [Nws], … tus loj tshaj plaws, kom tshee hnyo vim yog txoj kev mob, thiab los ntshav ntawm txhua lub qhov hws” (Lus Qhuab Qhia thiab Kev Khi Lus 19:18). Dhau ntawm Nws txoj Kev Theej Txhoj thiab Kev Sawv Rov Los, Yexus Khetos tau ua rau peb txhua tus txais tau kev cawm seej thiab kev tsa nto.
Tig mus rau tus Cawm Seej thiab xav txog tag nrho tej yam Nws tau ua rau peb ua rau peb lub siab lub ntsws puv nkaus muaj kev hlub rau Nws. Ces Yexus muab peb tej siab tej ntsws tig mus rau lwm tus neeg thiab txib kom peb hlub lawv (saib Yauhas 13:34–35) thiab qhia Nws txoj moo zoo rau lawv (saib Mathais 28:19; Malakaus 16:15). Yog tias cov neeg nyob ib ncig ntawm peb paub tias peb hlub lawv thiab saib xyuas lawv, lawv yuav qhib lawv tej siab tej ntsws rau peb txoj xov ib yam li tus Vaj Ntxwv Laumaunais qhib nws lub siab txais txoj moo zoo vim yog Amoos txoj kev hlub thiab txoj kev pab nws (saib Amas 17–19).
Thaum peb qhia txoj moo zoo, cia peb pib muaj kev siab hlub rau lwm tus neeg. Thaum peb muaj siab hlub rau lwm tus neeg thiab cev tes mus pab lawv—nco qab ntsoov hais tias lawv yog peb cov kwv tij nus muag thiab yog peb Leej Txiv Saum Ntuj Ceeb Tsheej cov me nyuam—ces yeej yuav muaj tej cib fim rau peb qhia qhov uas peb paub tias muaj tseeb tiag.
Mob Siab Ua Hauj Lwm thiab Qhia txoj Moo Zoo
Tsis muaj leej twg xav qhia txoj moo zoo rau lwm tus neeg ntau dua Thawj Tswj Hwm M. Russell Ballard (1928–2023). Nyob hauv nws zaj lus hais rau lub tuam rooj sab laj thaum kawg, nws ua tim khawv hais tias, “Ib yam loj thiab tseem ceeb heev uas tib neeg hauv ntiaj teb paub tau yog—qhov uas peb Leej Txiv Saum Ntuj Ceeb Tsheej thiab tus Tswv Yexus Khetos tau tshwm Nkawd tus kheej pom hauv lub caij nyoog kawg no thiab tias Joseph [Smith] raug tsa los muab tag nrho Yexus Khetos txoj moo zoo txum tim rov qab los.”
Tas nws ib sim neej, thiab thoob plaws lub ntiaj teb, Thawj Tswj Hwm Ballard mob siab qhia txoj moo zoo no rau txhua tus neeg. Nws yaum kom peb ua ib yam li ntawd, Nws qhia hais tias peb qhia tau txoj moo zoo “thaum peb ua neeg zej zog zoo thiab saib xyuas thiab hlub lwm tus neeg.” Thaum peb ua li ntawd, peb “tshaj tawm txoj moo zoo vim yog peb txoj kev coj ua neej, thiab … peb tshaj tawm rau [lwm tus neeg] txog tej koob hmoov uas txoj moo zoo muaj.” Peb kuj “ua tau tim khawv txog qhov uas [peb] paub thiab ntseeg thiab qhov uas [peb] hnov hauv nruab siab.” Thawj Tswj Hwm Ballard qhia hais tias, “Ib zag lus tim khawv … tau kev txhawb los ntawm tus Vaj Ntsuj Plig Dawb Huv lub hwj chim uas nkag los rau hauv lwm tus neeg uas muaj lub siab kam txais yuav.”
Thawj Tswj Hwm Ballard nyiam qhia txoj moo zoo ntau tshaj plaws. Peb mob siab ua hauj lwm—ib yam li nws—qhia txoj moo zoo txawm yog qhia ncaj qha rau lwm tus neeg los sis ua yam ntxwv rau lawv saib. Peb yeej tsis paub tus twg nrhiav kom tau qhov kaj ntawm txoj moo zoo tiam sis lawv tsis paub yuav nrhiav kom tau qhov twg (saib Lus Qhuab Qhia thiab Kev Khi Lus 123:12).
Mob Siab Caw Tib Neeg
Thaum peb pab lwm tus neeg los cuag Khetos, peb caw lawv los muaj txoj kev xyiv fab uas tus Cawm Seej thiab Nws txoj moo zoo coj los. Peb ua tau li no thaum peb caw lawv tuaj koom ib qho ntxim saib ntxim ua, nyeem Phau Ntawv Maumoos, los sis nrog cov tub txib sib ntsib. Peb kuj caw tau kom lawv koom txoj kev sib ntsib noj lub cim nco txog nrog peb thiab.
Peb mus koom txoj kev sib ntsib noj lub cim nco txog txhua hnub caiv kom “teev tiam Vajtswv thiab noj lub cim nco txog kom thiaj nco ntsoov Yexus Khetos thiab Nws txoj Kev Theej Txhoj.” Nov yog ib lub cib fim zoo kom tib neeg hnov tau tus Ntsuj Plig, txav los ze dua rau tus Cawm Seej, thiab ntxiv dag zog rau lawv txoj kev ntseeg Nws.
Thaum peb nrhiav kev hlub, qhia, thiab caw, peb tej kev npaj thiab tej kev rau siab caw yuav tsum suav qhov uas caw tib neeg tuaj koom txoj kev sib ntsib noj lub cim nco txog. Yog tias lawv yuav txais peb txoj kev caw thiab tuaj koom txoj kev sib ntsib txais lub cim nco txog, feem ntau lawv yuav ua tej yam txuas ntxiv uas coj lawv los mus hloov siab thiab los ua kev cai raus dej. Kuv ntseeg kawg siab kawg ntsws hais tias yuav muaj raws li peb lub siab xav thaum peb caw lwm tus neeg tuaj koom txoj kev sib ntsib txais lub cim nco txog thiab pab lawv pom tau tej koob hmoov lawv txais tau thaum lawv ua li ntawd.
Tus Tswv Yuav Coj Peb Kev
Peb yeej tsis paub saib yuav muaj li cas yuav muaj kev cov nyom li cas thaum peb hlub, faib txoj moo zoo rau, thiab caw lwm tus neeg. Mauxiyas cov tub “tau tawm mus ntawm ib lub nroog mus rau ib lub nroog, thiab ntawm ib lub tsev teev tiam mus rau ib lub, … nyob thoob plaws thaj av hauv cov Neeg Lamas, los tshaj tawm thiab qhia Vajtswv txoj lus nyob hauv lawv; thiab xws li no lawv pib muaj kev vam meej.” Dhau ntawm lawv tej kev rau siab, “txhiab txhiab leej los paub txog tus Tswv,” thiab coob tug “hloov siab los ntseeg … [thiab] tsis tau tso tseg hlo li” (Alma 23:4–6).
Txawm tias tsis muaj li no txhua lub sij hawm, tus Tswv tau cog lus tias Nws yuav nrog peb ua hauj lwm qhia lwm tus neeg vim Nws saib txhua tus neeg rau nqi heev. Thaum peb tso siab rau tus Tswv thiab khiav Nws tes dej tes num, Nws yuav coj peb saib peb yuav ua li cas qhia Nws txoj moo zoo rau lwm tus neeg thaum peb hlub lawv, nrog lawv ntaus phooj ywg thiab ua tim khawv rau lawv, thiab caw lawv los nrog peb koom ua raws li Nws hais.
“[Peb] txoj kev xyiv fab yuav loj heev” (Lus Qhuab Qhia thiab Kev Khi Lus 18:15) thaum peb siv tau tej cib fim ib ncig ntawm peb kom pab tus Tswv Yexus Khetos khiav Nws tej hauj lwm tseem ceeb heev kom coj tib neeg los cuag Nws.
© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, July 2024. Hmong. 19293 295