Ti Weteaki bwa Ti na Karaoa ae Raoiroi

E atai reirei aika a kaairua Kiteon ngkana e ongo. E a tia n ongo mai i mwaina mairoun te Uea ae Noa ao ana ibonga—ibonga ake “moan te kamoamoa ma ni kantiroaki” ao ake “a kamaiuaki n taningarotia, ao n taromauria anti, ao n aia mwakuri ni kabekaau, man taian angabwai ake kamatoai te Uea ae Noa nakoia ana botanaomata” (Motiaea 11:5–6).

Buakaka riki, e a tia te Uea ae Noa ni kamatea te burabeti Abinataai ao n tia n ukora ekinakoan Aramwa ao ana aomata ake a rairaki (taraa Motiaea 17; 18:33–34). Ni katokan te buakaka ae ai aron aei, e berita Kiteon bwa e na katoka te Uea, are e kamanoa maiuna ti ibukin aia waaki n ekianako Reimwanaite (taraa Motiaea 19:4–8).

Rimwi, e kaeta bukinaia ana ibonga Noa ibukin uotakinakoaia 24 natiia Reimwanaite aika aine. E kunea bwa ana taetae ni burabeti Abinataai ni kaitaraia aomata ake a tia ni kakoroaki bukiia ibukina bwa a tia n rawa n rairi nanoia. (Taraa Motiaea 20:17–22.) E a tia n ibuobuoki ni kainaomataia te botanaomata ae Rimwaai, ake n tautoronaki irouia Reimwanaite (taraa Motiaea 22:3–9).

N ikawaina, e kaitaraa te kainikatonga ao te buakaka teuana riki te tai ngke e tei i matan Neooa, are e a tia n kabwarabwara te nakoa ni ibonga ae kewe nakoia aomata. E a bon tia Neooa n “uota rikaaki man kaaitara te ekaretia” ao ni kataia ni kairiia nako aomata man te koaua. (Taraa Aramwa 1:3, 7, 12; ao taraa naba 2 Nibwaai 26:29.)

Ni kabonganaan ana taeka te Atua bwa ana bwai ni buaka, e ninikoria Kiteon ni kauringa Neooa ibukin buakakana. N unin Neooa, e orea ao n tiringa Kiteon n ana kabaang. (Taraa Aramwa 1:7–9.) Ma ngaia are e a toki ana bong “te mwaane ae raoiroi” ae e a tia ni karaoa te raoiroi ae bati ibuakoia te botanaomata aei” (Aramwa 1:13).

Ni boong aika kaitira ae ti maeka iai e anganira te tai n katotonga Kiteon “te bwai ni mwakuri i nanon bain te Atua” (Aramwa 1:8) man maiuakinan “te beku” (Motiaea 22:4) nakoia tabeman, tei ibukin te raoiroi, ao ni kaitarai mwakuri ni kakamaaku nakon inaomatara n nebonebo ao n beku ibukin te Atua. Ngkana ti iriira ana katooto Kiteon n ana kakaonimaki, ti kona naba ni karaoa te raoiroi ae bati.

Bonnano ni karaoan te Mwakuri ni ibuobuoki

“Ngkai a na taan kairiiri te [Tia Kamaiu] ngaira, ti ukora tangiran te Atua ao kaain rarikira ni kabuta te aonaaba,” ana taeka te Moan Beretitentii. E ingainga Ana Ekaretia Iesu Kristo ibukiia Aika Itiaki ni Boong aika Kaitira ni kan kakabwaiaia aomata ao ni buokiia ake a kainnano. Ti kakabwaiaaki n karekea te konaa, bwaai ni ibuobuoki, ao ara reitaki aika a onimakinaki n te aonaaba n karaoan te tabe ae tabu aei.”¹

I kakaitau ibukin te mwakuri ni ibuobuoki ae nako man te nano ao te kakawari ake a tia ni karaoia kaain te Ekaretia n ara tembora ao i nanon ara uoote, mwaanga, ao titeiki. I kakaitau naba ngkai a beku kaain te Ekaretia n kaawa nako aika a rang mwaiti, waaki n angareirei, ao bootaki n anganano ao bwa a mwakuri i nanon ngaa mwaitin karikirake ibukia te botanaomata ni katoa ririki, n anga nano n mwaitin te aoa ae mirion mwaitina i nanon aaba ae kaania 200 mwaitiia ao taabo.²

Te kawai teuana ae karababaa iai ana waaki ni ibuobuoki te Ekaretia n aba tabeua bon i nanon te JustServe. org. E mwanenaki man te Ekaretia ma e tauraoi nakoia aomata ni kabane ake a tangiria ni kakabwaiai maiuia tabeman, JustServe.org “e reitiia taan anganano n te komiunite ni kainnanoia ma taan anganano” ake a “karikirakea nakoraoin te maiuraoi i nanon komiunite.”³

E reitaki naba te Ekaretia ma ana membwa ma bootaki n anga te ibuobuoki ni kabutaa te aonaaba. E kawenea te kakaitau, te Ekaretia nakoia ana membwa, bon te “kabanea ni bubura ni buoka nakon te Kaibangaki Uraura n te anga raraa n 2022.” Ni ikotaki ma anne, e a tia n anga te buoka te Ekaretia n te tai ae aki maan te mwaiti ae $8.7 te mirion nakon te Kaibangaki Uraura.⁴

E ikotaki naba te Ekaretia ma rabwata tabeua ni karokoan te ran ae itiaki ni mwakoron nako te aonaaba. N 2022, e waaki te Ekaretia i nanon 156 karikirake.⁵ Ti waaki n reitaki naba ao n anga te buoka nakoia tabeua taabo n karekea te buoka nakoia natin te Atua aika a rootaki.⁶

“Ngkana ti reitaki ni waaki ni beku ibukia aomata ake a kainano,” e taku Beretitenti Henry B. Eyring, te Kauoman ni Kauntira n te Moan Beretitentii, “e ikotii nanora te Uea n te bonnano.”⁷

Taui i Eta Ami Taura

Ngkai ana reirei ngaira te Tia Kamaiu, ti kakabwaiaia naba kaain rarikira ngkana ti kawakin ara berita aika tabu ao ni kairi maiura n aron maiun te Tia Kamaiu. E reirei Ana Boki Moomon bwa “aomata n te Ekaretia” a riai n aki ti rinea te raoiroi ma ana karaoi bwanaia aika a raraoi bwa a na ongoraeaki ngkana a tangira te Uea bwa e na kakabwaiaia ao n karikirakeia (taraa Aramwa 2:3–7; taraa naba Motiaea 29:27). E kaantaningaira te Uea bwa ti na tibwaa ara onimaki ao ara kakoaua ao n taua ieta ara taura. “Nooria Ngai te ota are kam na taua i eta” (3 Nibwaai 18:24).

“Ti aki beku ibukin ara Tia Kamaiu ngkana ti maaka riki te aomata nakon te Atua,” e taku Beretitenti Dallin H. Oaks, te Moan Kauntira n te Moan Beretitentii. E taku riki, “Ti weteaki bwa ti na katea ana kainibaaire te Uea, ma tina aki iriira ana waaki te aonaaba.”⁸

Tao n te reirei, n te mwakuri, ke n te takakaro, n te tai ni motirawa, n te tai ni marooro, ke i aonrain, ana reirei te Uea a aki “maama ni katoka i aoia aran Kristo” (Aramwa 46:21). Man ara taeka ao ara mwakuri, ti kakoaua bwa e maiu te Atua ao bwa ti iriira Natina.

Ao e na aki mangaongao ara onimaki, ao e na bon riai n aki. Te onimaki bon tiaki ti ibukin te ekaretia, tiaki ti bukin te mweenga, tiaki ti biukin te [reirei],” ana noonori Paul Lambert, te tia rabakau irouia Aomata aika Itiaki i aon kakaokoroia aaro. “Bon ibukin bwaai ni kabane ake ti karaoi.”⁹

Ti aki atai mwiin ara koaua, katooto aika a tamaroa, ao mwakuri aika a raoiroi nakoia aomata tabeman. Ma ngkai ti tei ibukin te koaua ao n taua ieta ootan te Tia Kamaiu, a na noorira aomata ao e na boutokaira karawa.

Tei ibukin Inaomataia Aro

Ibonga ni kewe n boong aikai, ma rikiraken mwaitin akean maiuakinan te aro n kaawa a kaaitarai aia onimaki aomata, akea okorona ma taai ake n Ana Boki Moomon. E a tabe ni rikirake ni butanako bwanaaia ake a totoko nakon kakawakin tibwangaia aaro nakoia te botanaomata ao n taabo ake a kinaaki n tautaeka. Taan kakaitara te aro ao tautaeka, ni ikotaki ma reirei aika a mwaiti ao reirei aika a rietaata, a kaumaka karaoan nanoia ma te kakamaaku ao ni kataia ni kaumaka karaoan ae e aki riai, akean te onimaki, ao kakeaan kainibaaire n reirei aika a raraoi.

Kaitara nakon te inaomata n te aro e na bon tokanikai ngkana ti aki tei ibukin inaomatara nakon ara aaro. Ngkai rabwatan te Ekaretia ngaira, ao I a tia reireia bwa, “ngkana ti reitaki ma aaro ake tabeua ni kamanoia aomata ni kabane ao inaomataia n taetaekina aia koaua.”¹⁰

Te buaka i karawa bon te buaka i aon te inaomata n rinerine ae raoiroi—inaomatara n rinerine. E bon irekereke kawakinan inaomatara ma te nano ni kan kamanoa inaomatara n ara aaro.

Te ninikoria n te onimaki n te aro e kakorakorai ao ni kamanoia utu, komiunite, ao te botanaomata. E karikirakea te ongeaba nakon te tua, karekea te karinerine ibukin te maiu ao te bwai, ao n reireia te tangira ae kororaoi, ao te aro ae riai—a kainnaoaki anua aika a raraoi n karaoa te riai, te inaomata ao inaomata ni waaki i nanon te kaawa. Ti na riai n aki karautaeka ibukin ara koaua.

Ara mwakuri ni mitinare, ara taneiai ni mwakuri n te tembora, ara kekeiaki ni katea abanuean te Atua, te kukurei anne e kakaewanakoira bwa ti na tei ibukin te inaomata n te onimaki. Ti aki kona ni kabua te inaomata anne ni kakeai inaomataia tabeman.

E reirei te Burabeti Iotebwa Timiti, “Bon tangiran te inaomata are e kaungaa nanou—te inaomata n aomata ao n te aro nakon te botanaomata ae bwanin n te aonaaba”¹¹ Te inaomata n te aro e na kakukurei naba nakon tamneira ngkana ti iriiri reirei mairouia taan kairiiri n te Ekaretia:

• “Teimatoa n kakarekei kakawakin rongorongo ibukin te botanaomata, ao i mwiina taetae ma te ninikoria ao te karinerine .”¹²

• “Kinaa bwa te kamangori n inaomatara n te aro e na bon roota kakawakin ara tai n rikirake n te korakora ao te atatai n te euangkerio, ni kakabwaiaaki man otenanti aika a tabu, ao n onimakina te Uea ni kairan Ana Ekaretia.”¹³

• “Teei ibukin ao taetae raoi ni kamatoa bwa e maiu te Atua ao bwa bon iai koauan katean Ana tua.”¹⁴

• “Kaitarai tuua ake a na kamamaara inaomatara n mwakuria ara onimaki .”¹⁵

• “Waaki i nanon te aonaaba ni karaoa ae tamaroa, ni karikirakea te onimaki iroun te Atua ae Moan te Mwaaka, ao n ibuobuoki ni kairiia tabeman nakon te tabo ae moan te kakukurei.”¹⁶

• Kamatebwai booki ni ibuobuoki n religiousfreedom.ChurchofJesusChrist.org ao n religiousfreedomlibrary.org/documents.

Ti katea abanuean te Atua ngke ti beku, ti taua i eta ara taura, ao n tei ibukin te inaomata n te aro. E na kakabwaiaira te Uea n ara kekeiaki ni karaoan “ae raoiroi” nakoia ara utu, komiunite, ao n te aba.