Yɛwɔ Asodzi dɛ Yɛyɛ Papa

Gideon hun ator nkyerɛkyerɛ mber a ɔtsee no. Nna oedzi kan atse efi Ɔhen Noah na n’asɔfoe no hɔ—asɔfo a “nna wɔamema hɔnho do wɔ akoma mu’’ na “wonyaa mboa, wɔ hɔn enyihaw nye hɔn abosonsom mu, na hɔn ndwamambɔ so mu; na tow a nna ɔhen Noah dze ato no nkorɔfo do no ntsi’’ (Mosiah 11:5–6).

Omuo koraa no, nna Ɔhen Noah ama woekum nkɔnhyɛnyi Abinadi na ɔhwehwɛɛ dɛ ɔbɛsɛe Alma na ne nsakyereefo (hwɛ Mosiah 17; 18:33-34). Ɔbɛma emumuyɛdze a ɔtse dɛm no egyaa no, Gideon sii nketse dɛ obokum Ɔhen no, nyia a osian Lamanfo a wotuu hɔn do sa ntsi ɔdze no nkwa kyɛɛ no (hwɛ Mosiah 19:4–8).

Ekyir no, Gideon dze mfom no too Noah n’asɔfoe no do dɛ wɔasoa Lamanfo mbabaa 24 kɔ. Ohun dɛ Abinadi no nkɔnhyɛsɛm a otsia nkorɔfo no ahyɛ mã osiandɛ wɔpoow dɛ wobonu hɔnho. (Hwɛ Mosiah 20:17–22.) Ɔboae gyee Limhi no nkorɔfo, no a nna wɔwɔ Lamanfo nkowaasom mu no ma wofii mu (hwɛ Mosiah 22:3–9).

Afei a nna n’enyi efir no, Gideon sanee hyiaa ahantan na emumuyɛ bio ber a ogyinaa Nehor n’enyim, nyia a ɔhyɛɛ asɔfotorsom ase wɔ nkorɔfo no hɔn mu. Nna “Nehor rokõ tsiã asɔr no’’ na ɔrobɔ mbɔdzen dɛ ɔbɔtwe dɔm no efi nokwar no ho. (Hwɛ Alma 1: 3, 7, 12; san hwɛ 2 Nephi 26:29.)

Ɔdze Nyankopɔn n’asɛm yɛɛ n’akõdze no, ɔkokodurfo Gideon bɔɔ Nehor kɔkɔ wɔ n’emumuyɛ ho. Ɔdze ebufuw no, Nehor tuu hyɛɛ Gideon do na ɔdze ne nkrantsee kum no. (Hwɛ Alma 1:7–9.) Dɛm na “ɔtseneneenyi’’ no “nyimpa a ɔayɛ papa pii wɔ dɔm yi mu’’ ne nda baa ewiei (Alma 1:13).

Nda a odzi ekyir a yɛtse mu no ma hɛn akwan horow a oye dɛ yesũasũa Gideon dɛ yɛyɛ “edwindadze wɔ Nyankopɔn ne nsamu’’ (Alma 1:8) ber “a yɛsom’’ (Mosiah 22:4) binom, yegyina ma tseneneeyɛ, na yegyina ehunahuna enyim ma hɛn fahodzi dɛ yɛsɔr na yɛsom Nyankopɔn. Sɛ yedzi Gideon no nokwar fasusu do a, hɛn so yebotum ayɛ papa pii.

Nkabɔmu wɔ Som mu

President a Odzi Kan na n’Apamfo akã dɛ, “Dɛ [Agyenkwa] n’akadofo no, yɛhwehwɛ dɛ yɛbɔdɔ Nyankopɔn na hɛn anyɛnkofo wɔ wiadze nyina.’’ “Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no enyi ber dɛ obehyira nkaafo na ɔboa hɔnnom a wɔwɔ hia mu no. Ɔayɛ hɛn adom dɛ yɛwɔ ahoɔdzen, akãdze, na wiadze mfendzanan nkitahodzi horow a wɔagye hɔn ato mu dɛ wobedzi asodzi krɔnkrɔn yi dwuma no.’’¹

M’enyi sɔ ahofama som na ɔsom a Asɔr mba dzi no wɔ temple horow na wɔ hɔn ward, nkorbata, na stake ahorow mu. M’enyi san sɔ dɛ Asɔrmba som wɔ sɔn, nwomasũa bea, na adɔyɛ ekuwekuw a wonntum nkan mu na wɔyɛ nyimpa ho mboa dwumadzi ahorow mpempem mu afe biara mu, a wɔdze ndɔnhwer ɔpepe dzi dwuma kwa wɔ amanaman na nkurow nkurow bɛyɛ 200 mu.²

Kwan kor a Asɔr no tserɛw som akwan horow mu wɔ amanaman pii mu nye odua JustServe.org do. Asɔr no na ɔbɔ ho kaw naaso ɔwɔ hɔ ma obiara a ɔpɛ dɛ ohyira nkaafo, JustServe.org “kã sɔn mu ahofamanyi ehiadze bɔ ahofamafo mu’’ hɔn a “wɔma abrabɔ a ɔwɔ sɔn mu no su tu mpon.’’³

Asɔr no na asɔrmba so nye som ekuwekuw a wɔwɔ wiadze nyina bɔmu. Nna Asɔr no, ndaase nkã n’asɔrmba no, “ɔno nye Red Cross bɔgya a wɔdze kyɛ kwa ne kyɛfo saso a bi nnyi hɔ wɔ afe 2022 mu.’’ Dza ɔkã ho no, ɔnnkyɛree na Asɔr no dze $8.7 ɔpepe kyɛɛ Red Cross kuw no.⁴

Asɔr no san nye ekuwekuw bɔmu dze nsu pa na ahotsew ndwuma kɔ apaamu horow wɔ wiadze nyina mu. Afe 2022 mu no, Asɔr no dze no ho hyɛɛ ndwuma ahorow 156 a ɔtsetse dɛm mu.⁵ Yɛsan nye asoɛe ahorow kã bɔmu na yɛkyɛ hɔn ndzɛmba a ɔdze mboa brɛ Nyankopɔn ne mba a woruhu amandze.⁶

President Henry B. Eyring, Ɔpamfo a Otsĩa Ebien wɔ President a Odzi Kan na n’Apamfo mu no kãa dɛ, “Sɛ yɛbɔmu som nkorɔfo a wɔwɔ hia mu a,’’ Ewuradze yɛ hɛn akoma kor.’’⁷

Hom Mma Hom Kandzea Do

Dɛ Agyenkwa n’esũafo no, yɛsan hyira hɛn anyɛnkofo ber a yesie hɛn ahyɛmudzi horow na yɛbɔ Christsu bra. Mormon Nwoma no kyerɛkyerɛ hɛn dɛ “asɔrmba’’ no nnsɛ dɛ wɔsan mu yi tsenenee nko mbom wɔsan so ma wɔtse hɔn tsenenee ndze sɛ wɔpɛ dɛ Ewuradze bɔ hɔnho ban na ɔyɛ hɔn prɔmprɔm a (hwɛ Alma 2:3–7; san hwɛ Mosiah 29;27). Ewuradze n’enyi da hɛn kwan dɛ yɛbɛkyɛ hɛn gyedzi na dza yɛgye dzi na yɛma hɛn kandzea do. “Hwɛ Emi nye kandzea a hom bɛma do no’’ (3 Nephi 18:24).

President Dallin H. Oaks, Ɔpamfo a Odzi Kan wɔ President Odzi Kan na n’Apamfo mu kãa dɛ, “Sɛ yesuro nyimpa kyɛn Nyankopɔn a, yɛnnsom hɛn Agyenkwa yie.’’ Ɔdze kãa ho dɛ, “Ɔafrɛ hɛn dɛ yɛnkyekyer Ewuradze ne gyinapɛn, mma yɛnnka wiadze dze no do.’’⁸

Sɛ ɔyɛ skuul, edwuma, anaa agordzi, akwanma, adɔfo mapasar tu, anaa online o, Ewuradze n’esũafo “hɔn enyi nntõ dɛ wɔbɛfa Christ ne dzin ato hɔn do’’ (Alma 46:21) Ɔnam hɛn nsɛm na hɛn ndwuma do no, yedzi dase dɛ Nyankopɔn tse ase na dɛ yɛka Ne Ba do.

“Hɛn gyedzi no wɔnnkyekyɛmu, anaa nokwar ara onnyi dɛ ɔyɛ dɛm. Paul Lambert, Latter-day Saintnyi a ɔawea wɔ nyamesom asorɔtow ho no hun dɛ gyedzi nnyi hɔ ara mma asɔr, onnyi hɔ ara mma fie, onnyi hɔ ara mma [skuul].’’ “Ɔwɔ hɔ ma biribiara a eyɛ no.’’⁹

Yennyim nsunsuando a hɛn dasegye, fasusu papa, na ndwuma papa botum enya wɔ nkaafo do. Naaso sɛ yegyina ma dza oye na yɛma Agyenkwa ne kandzea no do a, nkorɔfo bohu hɛn na ɔsor bɛgye hɛn abamba.

Gyina ma Nyamesom ho Fahodzi

Ndɛ asɔfotorsom, na wiadze a nyamesom ekyingyefo ka ho no rotwe tsia nkorɔfo a wɔwɔ gyedzi no, nnyɛ soronko nnkyɛn dza nna ɔwɔ Mormon Nwoma mber mu no. Hɔnnom a wɔkõ tsĩa nyamesom n’asɛdze a ohia wɔ bagua mu na amanyɛ mbeambea ndze no reyɛ dede ara yie. Nyimpa nye aban horow a wɔnngye nyamesom nndzi, skuul na esũapɔn ahorow pii kã ho no, dze su rehyɛ nkorɔfo na wɔredaadaa hɔn ma wɔagye edwaman, nyamesom ho ekyingye, na suban gyinapɛn a ɔnnyɛ nnhyɛ ato mu.

Etuatsew wɔ nyamesom ho fahodzi ho botum akɔ kan sɛ yenntum enngyina amma hɛn nyamesom kyɛfa a. “Dɛ yɛyɛ asɔr no,’’ ɔnnkyɛree na me kyerɛkyerɛɛ dɛ, “yɛkã nyamesom horow binom ho ma yɛbɔ nkorɔfo a wɔwɔ gyedzi horow na ndzeyɛɛ horow no hɔn kyɛfa ho ban dɛ wɔbɛkã dza wɔgye dzi ho asɛm.”¹⁰

Ɔkõ sii wɔ sor fa nyimpa ne pɛ ho—hɛn fahodzi dɛ yɛbɛsan mu eyi. Yɛbɔkora hɛn pɛ do no hia dɛ yɛdze enyimia bɔbɔ hɛn nyamesom ho fahodzi ban.

Nyamesom gyedzi a ahoɔdzen wɔ mu no hyɛ ebusua ebusua, sɔn horow, na amanaman dzen na ɔbɔ hɔn ho ban. Okenyan setsie ma mbra, ɔhyɛ enyidzi nkuran ma nkwa na egyapadze, na ɔkyerɛkyerɛ ayamuyie, nokwardzi, na suban gyinapɛn—ɔbra pa a yehia dze bɛma pɛpɛryɛ, ahotɔ, na enyibue kuw akɔdo. Yɛnnhia dɛ yɛbɛyɛ hɛn gyedzi ho mmfeho ekyir dabiara da.

Hɛn asɛmpasomafo mbɔdzembɔ, hɛn edwuma a yegyina yɛma wɔ temple horow mu, hɛn mbɔdzembɔ dɛ yɛbɛkyekyer Nyankopɔn n’ahenman, na hɛn enyigye ankasa hia dɛ yegyina ma nyamesom gyedzi na fahodzi. Yennkotum ayew dɛm fahodzi a yɛnnkɛyew fahodzi horow binom so.

Nkɔnhyɛnyi Joseph Smith kyerɛkyerɛɛ dɛ “Ɔyɛ ɔdɔ ma fahodzi [na] okenyan me kra—ɔman mu na nyamesom ho fahodzi ma adasa mba nyina.”¹¹ Nyamesom ho fahodzi bɛsan so ekenyan hɛn akra ber a yedzi afotu fi Asɔr baanodzifo do:

• “Ma bagua mu nsɛm a ohia a ɔrokɔ do ho mfa woho, na nkyii fa akokodur na enyibue kã ho asɛm.’’¹²

• “Hu dɛ nyamesom ho fahodzi no a ɔrepa no benya nsunsuando tsitsir ara wɔ hɛn akwanhorow do dɛ yebenyin wɔ ahoɔdzen na asɛmpa nyimdzee mu, dɛ ɔnam ayɛdze horow krɔnkrɔn do no wobehyira hɛn, na dɛ yɛbɛdan Ewuradze ma Ɔakyerɛ N’Asɔr kwan.’’¹³

• “Hom nsoɛr ngyina na hom nkãsa mfa nsi no tadua dɛ Nyankopɔn wɔ hɔ na nokwar trodoodo wɔ hɔ a Ne mbrasɛm tsim.’’¹⁴

• “Hom nye mbra horow a wɔbɛsɛe hɛn fahodzi dɛ yɛdze hɛn gyedzi bedzi dwuma no nsi mpre.’’¹⁵

• “Hom nkɔ wiadze nkɛyɛ papa, nkɛkyekyer gyedzi wɔ Nyankopɔn Tumfo mu, na hom nye nkaafo mbra enyigye bea a oye.’’¹⁶

• Adzesũa mboa horow wɔ religiousfreedom.ChurchofJesusChrist.org na wɔ religiousfreedomlibrary.org/documents

Yɛkyekyer Nyankopɔn n’ahenman ber a yɛsom binom, yɛma hɛn kandzea do, na yegyina ma nyamesom ho fahodzi. Ewuradze nhyira hɛn wɔ hɛn mbɔdzembɔ mu dɛ yɛbɛyɛ “papa pii’’ wɔ hɛn ebusua ebusua, sɔn horow, na amanaman mu.