Sounkomour en Koaros, ehu Rongamwahu ong Koaros

Rongamwahu en Sises Krais wet “kopwurpwurdohr nan imwin rahn pwukat pwehn apwalihala … anahn akan en wehi koaros, keinek, lokaia, oh aramas pohn sampah.”¹ Rongamwahu wet daulihla wehi oh koalor koaros ni ah kotehla lain en tiahk kan pwehn padahngki me “koaros duwepene rehn Koht” (2 Nihpai 26:33).² Pwuken Mormon wia ehu kadehdepe kaselel ong mehlel wet.

Rekohd kesempwal wet kadehdehki me Krais tamataman wehi koaros (kilang 2 Nihpai 29:7) oh pahn kasalehda “ pein ih ong irail koaros me kin kamehlele ih, … [oh wiewia] doadoahk me kopwuriamwei kan, kilel kan, oh manaman kan, nanpwungen aramas kan”2 Nihpai 26:13). Nan pwungen mwekid kopwuriamwei pwukat, kilel kan, oh manaman kan iei doudoupeseng en rongamwahu wet. Eri, kitail kin kadar misineri kan ong nan sampah pwon pwehn kadehdehki ah rohng mwahu kan. Kitail pil kin ehukihong rongamwahu wet ong mehn impatail kan. Doadoahngki kihkan en prihsduhd me kopwurpwurdo ong me momour oh me melahr kihong kitail koapwoaroapwoar me rongamwahu unseko pahn miedahr ong sapwellimen sahm oh ihn nanleng seri koaros—mehn mahs, mehn met, oh mehn ehu rahn kohkohdah kan.

Mohngiong en rongamwahuo—padahk keioun kesempwal sang soukohp oh wahnpoaron koaros me malipilip ohngehr doadoahk wet—iei me Sises ihme Krais oh me E ketdohr pwehn kapaiada koaros. Ni atail wia tohn Mwomwohdiso en Sises Krais en Souleng en Imwin rahn akan, kitail ketihtihki me Sapwellime tohnmetei en tompwen dihpo iei ohng sampah pwon.

Ni ahi kin kohkohseli nan sampah, I tuhwengedier tohtohn tohn Mwomwohdisoh. I perenkihda ahi rong duwen arail pepehm ong kapai kan en Tomwpen dihp en Sises Krais nan arail mourkan, menda ansou irail wehkada dihp en mahs kei. Ia uwen kaperen me Sapwellime Tomwpen dihp en kamwakel oh kaloalamwahuo ansou koaros mie ong kitail koaros!

“Uhdahn e pahn mie anahnepen tomw en wiawi,” Amulek padahngkiher, “ma soh aramas koaros uhdahn pahn mwomwla.” Kitail pahn erein “pwupwudier oh … salongalahr, … ma tomw me uhdahn anahnepehu,” me anahne “meirong ehu me soutuk oh potoapoat.” “Eri tomw poatoapoat kelehpw me pahn kak itarohng en tomwkihla dipen sampah”Alma 34:9, 10, 12).

Soukohp wadawad Seikop pil padahngkiher me pwehki “aramas koaros uhdahn pahn mehla, … e konehng en mie manaman en iasada” pwehn wai kitaildohng rehn Koht (2 Nihpai 9:6).

Koaros dihp oh mehla mie anahnepen en powehdi. Met iei ih pwukoahn Sounkomouro, me E ketin kaimwsakala ni komwad ong Sapwellimen Koht seri kan.

Gethsemane, sang J. Kirk Richards, sohte kak koapihdi

En Atail Sounkomouro Tohnmetei

Ni imwilahn pwohng en Ah momour pohn sampah, Sises Krais ketlongehr nan Mwetuwel en Ketsemeni. Wasahu, E ketin kelepwidier nan tukehn olip koa oh tapiadahr kohdieng nan weirek loal me kumwail oh ngehi sohte pahn kak wehwehkihla.

Wasahu, E ketin tapiadahr aledahng Pein Ih dihp akan en sampah. E ketin kehnehr medek koaros, mohngiong ohla, oh insensuwed, oh E ketin aledahr weirek oh lokolok koaros me kowe, ngehi, oh aramas koaros me momourehr oh me pahn mour pahn lelohng. Lokolok laud oh soutuk wet kahreiong [Ih], … me keioun lapalap, eh rerer pwehki weirek, oh inta eh kerasang nan pwoaren kili koaros (Doctrine and Covenants 19:18). Ihte kelehpw me kak wia met.

Sises ahpw wisiklahngehr Kalpweri, oh ni ansou me keioun kansensuwed oh sohte pwung nan poadoapoad en sampah wet, E ketin kalohpwulahr. Sohte emen me kak kihsang Ih Ah mour. Ni ah wia Sapwellimen Koht Iehros, E ketin ahneki manaman pohn mehlahn paliwar. E kakete kapakap ong Semehu, oh karis en tohnleng kan kak kohdo kamwomwala irail kan me kaloke Ih oh kasalehda Ah ketin kaunda mehkoaros. “A ia duwen eh pahn pweida mahsen en Pwuhk Sarawi,” Sises ketin peidengki ni Ah ketin pengpenglahu, “me ih duwen met me pahn wiawi?” (Madiu 26:54).

Sang ni peik unsek ong Semeo—oh limpoak unsek ong kitail—Sises pein kihda Ah mour oh kaunsekala Sapwellime tomwpen dihp soutuk oh poatoapoato, me kak pwuralahng mahso oh kohla mwowe lelahng nan mour soutuk.

Sises ketin kapwukoahki Sapwellime Wahnpoaron kan en wihwiahte Sapwellime doadoahko mwurin Ah pwoula. Ia mwomwen arail pahn kak wia doadoak wet? Pali tohtohn irail wia sounlaid kei, oh sohte emen me alehdi kaskuhl en nan sinakoke kan ong pwukoahn mwomwohdiso. Ni ansouo, sapwellimen Krais Mwomwohdiso mwomwen pahn sohrala. Ahpw Wahnpoaron koa diaredi kehl ong wia arail pwukoahu oh kaunopada poadoapoad en sampah.

Dahme kahrehda kehlail wet kak kohdo sang luwet sansal wet? Fredric Farrar me wia semen men oh sounkaweid nan mwomwohdiso en Anglican kosoaiahier: “Mie ehu, oh ehute pasapeng me kak pweida iei—iasada sang mehla. Doadoahk kalaimwun en uhwengada wet kohsang manaman en iasadahn Krais.”⁴ Ni arail wia soun kadehde ong Kaun iasadahro, Wahnpoaron koa esehier me sohte mehkot kak kauhdi doadoahk wet sang kekeirda. Arail kadehdeo wia poahsoan en kakehlaka manaman ong Mwomwohdiso en tapio en powehdi soahng koaros.

Ansoun Ihster wet, ni ahi wia emen Sapwellime soun kadehde me kasarawilahr, I kadehdehki me menseng en Rahn Sarawi kaselel ehu, Kaun Sises Krais iasadahr sang mehla pwehn kakehlakai kitail oh kauwehla selin mehla ong koaros. Sises Krais ieias! Pwehki Ih, mehla sohte wia imwilahn aramas. Iasadahu iei sapwellimen Krais kisakis ong koaros me sohte isepe.

Christ and Mary at the Tomb, by Joseph Brickley

Kohdo rehn Krais

Rongamwahu wet oh Tomwpen dihp en Sises Krais iei ong koaros—me wehwehki, aramas koaros. Ihte ahl kitail kak alehdi kapai kan unsek ong en Sounkomouro tomwpen dihp iei sang emen emen ah pahn alehda Sapwellime luhk: “Kumwail kohdo rehi”(Madiu 11:28).

Kitail kin kodohng rehn Krais ni atail doadoahngki atail pwoson Ih oh koluhla. Kitail kin kodohng Reh ni atail pepdaisla ni Mware oh alehda kisakis en Ngehn Sarawio. Kitail kin kohdo Reh ni atail kin kolokol kosonned akan, alehdi tiahk sarawi kan, kesempwalki inou sarawi kan, alehda doadoahk en tehnpas sarawi, oh momourki mour en tohnpadahk en Krais.

Nan ansou kan, kumwail pahn lelong pepehm en insensuwed oh pahtou. Mohngiongamwail kan kak ohkihla pein kumwail de emen me kumwail poakohng. Kumwail kak ahneki katoutou pwehki dipen mehteikan. Sapwung kan kumwail wiadahr—mwein me laud kan—kakete kahrehiong kumwail en periki me meleilei oh peren sohrasang kumwailehr erein. Nan soangen ansou pwukat, tamataman me Sounkomouro sohte kin kamarahdahte katoutou en dihp ahpw pil “lokolongki medek kan oh kahpwal akan oh kasongosong kan koaros”(Alma 7:11), iangahki amwail kan! Pwehki dahme E ketin lelongehr ong kumwail, E ketin mwahngih duwen Ah pahn sewesei kumwail ni amwail pahn alehda Sapwellime luhk me kak wekidala-mour: “Kumwail kohdo rehi.”

Sises Krais ketin kasaledahr me koaros sapwellimen Sahm Nanleng seri kan ahneki pwung pahrek ong kapai kan en Sapwellime rongamwahu oh Tomwpen dihp. E kataman kin kitail me koaros “mie en aramas koaros ar pai me duwepenehte, oh sohte me irairdihsang” (2 Nihpai 26:28).

“Kauno luke koaros en kohdo reh oh alehda Sapwellime kalahngan; oh e sohte pahn ketin soikala me kohdo Reh, me tontoal oh pwetepwet, me sensel oh saledek, ohl oh lih” (2 Nihpai 26:33).

“E ketin lukehier irail koaros”—met wehwehki kitail koaros! Kitail en dehr kihong kilel en masliki oh mehn kasansal wiawihda kan pohtail de mehteikan. Kitail en dehr kihda mehkot me pahn perehla limpoak en Sounkomouro de kamwait madamadau kan me kitail de mehteikan E solahr kak ketin alehdi. Ni ahi indahier mwowe, “Sohte [emen] kak kihrla pahnangin marain soutuk en Tomwpen dihp en Krais ah wie lingaling.”⁵

Me ngehi oh Sister Holland padahngkiher sounpwung kei mwohn ah mehlahu, kitail kehkehlikiong en “ahneki limpoak unsek, limpoak unseko iei limpoak”(2 Nihpai 26:30).⁶ met iei limpoak me Sounkomouro ketin kasalehiong kitail, pwe “Soahng koaros me e kin ketin wia kin wiawi ong kamwahupen sampah; pwe e ketin poakohng sampah, kahrehda e ketin mweidala pein eh mour pwe aramas koaros en kak kohdo reh” (2 Nihpai 26:24).

I kadehdehki me rongamwahu wet oh Tomwpen Dihp en Sises Krais iei ong aramas koaros. I kapakapki me kumwail pahn ni popohl alehda kapai kan me E pahn ketin wahdo.