Kamarainpatail nan Sapwtehno

Met duwehte irailko me Kauno ketin malipeiraila nan weihn America en mahso, kitail koaros kin lelehng melimel kan oh rahn rotorot akan ni atail seiseloaklahng nan sapwen inou en mour soutik. Ahpw Kauno pahn ketin wiahiong kitail dahme E ketin wiahngehr mehn Jared oh Nihpai kau. E pahn ketin kahluwai kitail oh kamarainihada atail ahl akan—ma kitail pahn kin peikiong Ih, kalaude atail pwoson Ih, oh kin peki ni ngidingid Sapwellime sawas.

Kauno ketin mahsanihong Nihpai, “Oh ngehi me pahn wia kamarainpamwail nan sapwtehno; oh I pahn kaunopada ahlo mwohmwail, ma kumwail pahn kapwaiada ei kosonned akan; eri, ni amwail pahn kapwaiada ei kosonned akan [I] pahn kahluwaikumwaillahng nan sahpw en inouo; oh kumwail pahn ese me ngehi me kahluwaikumwail.” (1 Nihpai 17:13).

Kauno ketin mahsanihong rien Nihpai pwutak Seikop, “I pahn wia kamarainpen irail akan me kin rong ei mahsen kan kohkohlahte.” (2 Nihpai 10:14).

Soukohp Apinadai ahpw kadehdehki me Sounkomouro iei, “Ih me marain oh ih me mour en sampah; ei, kamarain poatopoat, me sohte kak rotala;” (Mosaia 16:9).

Ohng peihn Ih, Sounkomouro kadehdehki, “Ngehi me marain oh mour en sampah.” E pil ketin kapatahieng mahsanih, “Kilang ngehi me marain; I kasalehiong kumwailehr karasaras ehu.” (3 Nihpai 9:18; 18:16).

Kekehn Maraino

I poakoahng atail soukohp, Preseden Russell M. Nelson. Ih ahniki kapai ni aht kin ehupene papah. Ni ansou me e kin ketilong nan ehu pere, nan perehu kin ansouohte mwomwen marainpeseng. E kin ketin wouwa Maraihn en Krais reh.

Marain en Krais udahn mehlel. Iei “e wia mehn kakehlail, manaman, de mehn kangoang ehu me kohsang rehn Koht ong Krais oh me kiheng mour oh marain nan mehkoaros.” Iei eh wia ehu kisakis sarawi keieu kesemwpwal me kak kahluwalahng sapwellimen Koht serih kan rehn Ngehn Sarawi oh rongamwahu en Sises Krais.¹ Wadwadek Pwuhk en Mormon pahn kakehlakahla Maraino.

Ekei pak kitail anahne kilenglahng atail mour en mahso pwe kitail en tamanda ia mwomwen atail kin alehdi sawas akan nan atail momour kohdo. Ni atail kin kilengla mwuri, kitail kin kak pwurehng kehnda Sounkomouro ah kin kangoangeikitail. Ni ansou me iren pwuhk sarawi kan kin koasoia, “Tamataman, tamataman” (Ilemen 5:12), I inda me irail indindahng kitail me, “Ieremen tamatamante dahme kumwail tepin esehu de kehno; ahpw, kumwail en pwurehng kehn maraino.”

Ohng ekei, e mengei en kin kehn marain sarawio. Ohng mehtei kan, marain sarawio kin kak en apwal en kehnda pwehki kahpwal akan me emen emen kin lelehng de mwekid en sampah me kin kihsang ansou kan. Ahpw ma kitail ahniki pwoson mehlel, maraino pahn kohdo—ni ansou kan me kitail sohte kasik.

Preseden Nelson, me kaweid kitail ehr en “kapakapki ni mehlel en onopki Pwuhk en Mormon rahn koaros,”² ehukieng kitailehr soangen wiepeh kan me Pwuhk en Mormon kak sewesei kitail en karaniala Sounkomouro oh sewesei kitail en kehn maraihn en rongamwahuo, alehdi mehlel kan koaros en rongamwahuo, oh momourki padahk kan en rongamwahuo.

Ni atail pahn kin wadek Pwuhk en Mormon, Preseden Nelson mahsanih me, atail wehwehki, oh kaping ong, Tomwpen Sises Krais pahn wie lalaudla.

Kitail pahn ahniki ineng en “pwurehng ipwsapahl” (Mosaia 27:25) sang ni pwuhk wet ah sewesei kitail en kehn weliakapwalahn mongiong (kilang Mosaia 5:2).

Ni atail pahn wadek oh onopki padahk kan en Pwuhk en Mormon me pid duwen kapokonpenehn men Isrehl, kitail pahn pehmada ineng laud en men rapahki peneinei me melahr akan oh wia tiahk sarawi kan en komour oh mour soutik ohng irail nan tehnpas sarawi.

Kitail pahn kehn marain ni atail pahn alehdi pasapeng en atail kalelapak kan, kaweihd ohng ni ansou en wiahda koasondih kan, oh ahniki kehlail en kak koluhla oh powehdi me suwed.

Oh ni atail pahn wadekada duwen mehlel kan me sansal nan Pwuhk en Mormon, kitail pahn kehn maiauada, kansenamwahu, kaweliakapw, utuht, kehlail, kaloalamwahu, oh peren ong nan atail mour.³

“Eri, me pwukat sou mehlel?” Alma kalelapak duwen umwpwospeseng oh kekeirdahn weren tuhkehn me mehlelo, eripito, oh kadehdehu. “I ndaiong kumwail, Ei, pwehki e wia marain; oh mehkot me kin wia marain, e mwahu, pwehki e kin sansal, eri kumwail pahn kak ese ma e mwahu” (Alma 32:35).

Kilel en Krais, sang Heinrich Hofmann

Rapahki Sounkomouro nan Rotorot

Ni ansou me kempoakepahi Kamryn sounpar 10, e alehdi soumwahu en pworen mas ehu me sohte kin kalahpw dierek ahpw wia soumwahu ieu me sohte kin kak mwahula me mihte ni palimaun en pworen mesehu.⁴ Mie ansou kei, me medek kin dodpene oh e kin sohla kakehng, Kamryn kin sohla kak kilang nan marain. Ah pahpa oh nohno, pwunodikihda pwehki ede maskunla, wiahdahr wenihmwtok kan en ah perehu en rotorotala pwe en kak ahniki insenamwahu. En Kamryn nohno, Jenna, ahpw katamanda:

“Pahn mweihn sounpwung pahieu mwurin ah dierekda ah soumwahu, I aluhlong nan ah pere rotoroto. Ni ai kakehr kilang nan rotroto, I kilangadahr Kamryn ah kospene pohn ah pehto. Udahn e mih nan ah lapalahn weirek me kahrehda e sohte mwekid de pil sengiseng ni ansou me e rong ai aluhlongo. Ihte ah wie wonohn mwo pworen meseh kau koaros udahn umwpwos kunpene.

“I kelepwikihdi limwahn ah pehto, ale peh kau kiheng nan pehi ka, ngehi padikpene pak siluhI—ih aht kisin sikred en inda ‘I poakpoakeiuk.’ Ihme e kin kalapw wia padikpene pak pahieu me wehwehki ‘I poakpoakeiuk laud,’ ahpw e sto wia. E udahn ahniki weirek laud. ni pilen mesei ah kerekeredi ni meseie, I kilang nei kisin serepein sounpar 10 o ah kospene likamw kisin umwpwoi kis. Ai mongiong ohla.”

Jenna ahpw kapakap sang nan mohngiong ni sohte ngile.

“I indahng Sahm Nanleng me I ese me Ih me keieu wehwehki dahme pahn mwahu, ahpw I kapakapki, ‘Menlau sewese ih.’ Ni ai mwomwohd mwo wie kapakap, I kehn mehkot ah kohdieng pohi. I kehnda meleilei ni madamadau ehu duwen Sounkomour Sises Krais ah kodohng nan ai madamadau me: ‘Ih me maraino. Rapahki Ih nan rotoroto.’”

Jenna ahpw sarada oh mwenginingineng nan salengen Kamryn inda: “Ke anahne rapahki Sounkomouro nan rotoroto.”

Mwurin mwo, Kamryn ahpw meirkihla ah rongorong koul en sarawih kan oh iren pwuhk sarawih kan me mih nan app en laiprehri en Mwomwohdiso.

Kilel sang en Kamryn peneinei

En Kamryn soumwahuo pali lauden ansou kin sohte weirek, ahpw ni ansou me e kin pwurehng wereikda, Janna oh ah pwoudo, Darrin, kin kansenamwahu ih oh kin pwurehng kihda pilankes kan ni wenihmwtok en ah perehu. Nan ereihn ansou kau me e kin wie weiweirek, Kamryn inda, “I kin raparapahki Sounkomouro nan rotoroto.”⁵

Ni ansou me mour kin duwehte “ehu sapwtehn me rotorot oh kansensuwed” (1 Nihpai 8:4), kitail pil anahne rapahki Sounkomouro nan wasa rotoroto. I kadehdehki me Pwuhk en Mormon, iangahki ah kadehde“me Sises iei me Krais, me Koht Soutik,”⁶ me pahn kahluwai kitailahng Ih. I ese me irail kan me kin loaloapwoatieng wadek Pwuhk en Mormon, momourki ah kaweid kan, oh kin kapakapki mehlelpen pwuhk wet pahn kehn Ngehn Sarawi oh kalaudehla arail pwoson, oh kadehde Sounkomouro.

Kitail menlau kasalehda atail kaping ong pwuhk “keieu pwung” wet⁷ sang ni kin wadwadek, kesempwaliki, oh kin doadoahngkieng kakehlepen atail pwoson oh pwoson en mehteikan nan Kamaraihn en Sampah.