Fa’aineine nō te haere i te hiero

Hōho’a nō te hiero nō Durban (’Āfirita Apato’a) nā Matthew Reier

Te fare o te Fatu

’Ua parauhia te mau hiero te « fare o te Fatu ». E mau vāhi mo’a i reira tātou e nehenehe ai e putapū i te Vārua o te Atua ’e i tōna here ia tātou. E mau vāhi ato’a i reira e ti’a ai ia tātou ’ia rave i te mau fafaura’a ’e ’ia fa’ari’i i te mau ’ōro’a ta’a ’ē ’o tē fa’aineine ia tātou ’ia fa’ari’i i te ora mure ’ore. (Te mau fafaura’a, e mau parau fafau mo’a ïa i rotopū i te Atua ’e tāna mau tamari’i.) Nā te ha’apa’o-maita’i-ra’a i tā tātou mau fafaura’a ’e te fa’ari’ira’a i teie mau ’ōro’a e tauturu ia tātou ’ia fa’atupu i te hō’ē tā’amura’a ta’a ’ē ’e te Metua i te ao ra ’e ’o Iesu Mesia.

Hōho’a nō te hiero nō Guayaquil (Fenua Ētuatōria) nā Janae Bingham

’O vai tē nehenehe e haere i te hiero ?

E nehenehe te mau melo o te ’Ēkālesia e rave i te mau bāpetizora’a nō te feiā pohe i te matahiti e nae’ahia tō rātou 12 matahiti. E nehenehe tā te hō’ē melo e fa’ari’i i te ’ōro’a hiero mai te mea ē, e 18 matahiti tōna, ’ua riro na ’ei melo nō te ’Ēkālesia hō’ē a’e matahiti te maoro, ’e ’ua hina’aro ’ia rave ’e ’ia ha’apa’o i te mau fafaura’a o te hiero (hi’o Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 27.2.2, ChurchofJesusChrist.org). E nehenehe te hō’ē tāne ’e te hō’ē vahine tei fa’ari’i a’ena i tō rāua ’ōro’a hiero e tā’atihia (fa’aipoipohia) nō te tau a muri noa atu i roto i te hiero.

E rave ’outou i te mau fafaura’a ’e e fa’ari’i ’outou i te mau ’ōro’a i roto i te hiero. « Te tomora’a i roto i te hō’ē autā’atira’a nō te fafaura’a ’e te Atua, e tā’amu te reira ia tātou i ni’a iāna ’a fa’ariro ai i te mau mea ato’a nō ni’a i te orara’a ’ei mea ’ōhie a’e » (Russell M. Nelson, « Upo’oti’a i ni’a i te ao nei ’e ’ia noa’a te ora », Liahona, Novema 2022, 97). Te hō’ē ’ōro’a ’o te hō’ē ïa ’ohipa mo’a ’o tē ravehia nā roto i te mana nō te te autahu’ara’a. E aura’a hōhonu tō te mau ’ōro’a i te pae vārua. ’Ei hi’ora’a, ’ia rave ana’e ’outou i te hō’ē ’ōro’a, tē fa’aite ra ïa ’outou i te Atua ē, ’ua ineine ’outou ’ia fa’ari’i ’e ’ia ha’apa’o i tāna mau fafaura’a.

Fa’aineine i te pae vārua nā roto i te pe’era’a i te mau ha’api’ira’a a Iesu Mesia ’e te ha’apa’ora’a i te mau fafaura’a tā ’outou i rave i mua i te Atua i te taime nō te bāpetizora’a. E nehenehe ato’a tā ’outou e ’imi i te mau mātēria a te ’Ēkālesia, mai te mau pāpa’ira’a mo’a ’e te mau a’ora’a o te ’āmuira’a rahi. E hōro’a te Temples.ChurchofJesusChrist.org i te ha’amāramaramara’a nō ni’a i te mea e tīa’i ’ia haere atu ’outou i te hiero. Tei roto ato’a te mau ha’amāramaramara’a hau atu nō ni’a i te mau fafaura’a o te hiero, te mau ’ōro’a ’e te mau tāpa’o.

Hōho’a nō te hiero nō Nauvoo (Illinois, Marite) nā Eve Tuft

Te tāpa’o

E mea pinepine te Fatu i te ha’api’i ma te fa’aohipa i te mau tāpa’o. ’Ei hi’ora’a, te bāpetizora’a—te haerera’a i raro i te pape ’e ’a ti’a fa’ahou mai ai i ni’a—mai te pohera’a ïa tō ’outou huru tahito ’e te fānau-fa’ahou-ra’a ’ei ta’ata ’āpī (hi’o Roma 6:3–6). Tē fa’atoro nei te mau ’ōro’a nō te hiero i ni’a ia Iesu Mesia ’e tāna tāra’ehara. E mea fifi paha ’ia māramarama i te mau tāpa’o ato’a i te taime mātāmua ’a haere ai i te hiero, e nehenehe rā tā ’outou e tāmau noa i te ha’api’i mai ’a ho’i noa ai i te hiero i te roara’a o tō ’outou orara’a.

Nō te tomo i roto i te hiero, tītauhia ’ia fa’aineine ’e ’ia vai ti’a mā. E nehenehe tā ’outou e fa’ari’i i te hō’ē parau fa’ati’a nō te tomo i roto i te hiero i muri a’e i te hō’ē uiuira’a ’e to ’outou ’episekōpo ’e ’aore rā te peresideni ’āma’a ’e te peresideni titi ’e ’aore rā misiōni. E ui mai teie mau ti’a fa’atere i te tahi mau uira’a nō te ha’apāpū ē, te ora ra ’outou i te ’evanelia a Iesu Mesia. E nehenehe tā tō ’outou feiā fa’atere e paraparau ’oi’oi mai ia ’outou nō ni’a i teie mau uira’a.

Tē hina’aro nei te Metua i te ao ra i tāna mau tamari’i ato’a ’ia rave i te mau fafaura’a i mua iāna ’e ’ia fa’ari’i i te mau ’ōro’a mo’a. Teie mau ’ōro’a, mai te bāpetizora’a ’e te ’ōro’a hiero, e tītau-roa-hia ïa ’ia ravehia i roto i te mau hiero nō te feiā tei pohe ma te ’ore i fa’ari’i i te ’evanelia. E nehenehe tā ’outou e ho’i i te hiero nō te rave i te mau ’ōro’a nō te mau melo o tō ’outou ’utuāfare tei pohe.