Kaukaunop en Pidolong nan Tehnpas Sarawi

Kilel en Tenpas Sarawi en Durban South Africa sang Matthew Reier

Tehnpas en Kauno

Tehnpas sarawi kan kahdaneki “tehnpas en Kauno.” E wia wasa sarawihkei wasa me kitail kak pehm Ngehn en Koht oh Sapwellime limpoak ong kitail. Re pil wia wasahkei me kitail kak wiahda inou sarawih kan oh alehdi tiahk sarawi kesempwal kan me pahn kaunop kitailda en ale mour soutuk. (Inou kan wia inou sarawih kei nan pwungen Koht oh Sapwellime serih kan.) Loalopwot ong atail inou sarawih kan oh alehdi tiahk sarawih kan seweseikitail en kak ehu ong Sahm Nanleng oh Sises Krais.

Kilen en Tenpas Sarawi en Guayaquil Ecuador sang Janae Bingham

Isime kak pidolong Tenpas Sarawi?

Tohn Mwomwohdiso kak wia pepdais ong me melahr akan ni arail pahn lel sounpar 12 Toweh kan kak alehdi arail endaumenma e pahn lel sounpar 18, oh wialahr tohn Mwomwohdiso erein sounpar ehu, oh inengieng en wiahda oh kolokol Inou sarawihkan en tehnpas sarawi (kilang General Handbook: Papah nan Mwomwohdiso en Sises Krais en Souleng en Imwin rahn-akan, 27.2.2, ChurchofJesusChrist.org). Ohl oh lih akan me aledier arail endaumen nan tehnpas sarawi kakehr katengteng pene (kopwopwoud) soutuk nan tehnpas sarawi.

Ke pahn wiahda inou sarawi oh alehdi tiahk sarawih kan nan tehnpas sarawi. “Wiahda inou sarawihkan oh ehu ong Koht katengei kitaildi ong Ih ni soangen ahl ehu me wiahda soahng koaros me pid mour pahn mengeila” (Russell M. Nelson, “Powehdi Sampah oh Diarada Koamoal,” Liahona, Nohpempe. 2022, 97). Tiahk sarawi iei kemwekid sarawi ehu me aramas emen pahn wia sang emen me kolokol mweimwei en prihsduhd Wewehn tiahk sarawi kan me inenen loal. Ni karasepe, ansou me ke patehng tiahk sarawi ehu, ke kin kasalehiong Koht me ke men alehda oh kolokol Sapwellime inou sarawih kan.

Kaunopada pali ngehn sang ni idawehn sapwellimen Sises Krais padahk kan oh kolokol inou sarawi kan me ke wiaiong Koht ansou pepdaiso. Ke pil kak onopki mehn kaweid kan en Mwomwohdisoh, me duwehte pwuhk sarawih kan oh padahk kan en nan kapokon lap akan. Temples.ChurchofJesusChrist.org kiong kitail mehn sawas kan me pid dahme ke kasik ansou me ke pahn pidolong nan tehnpas sarawi. E pil iangahki ire tohto me pid duwen inou sarawi kan en tehnpas sarawi, tiahk sarawi kan, oh karasaras kan.

Kilel en Tehnpas Sarawi en Nauvoo Illinois sang Eve Tuft

Karasaras

Kauno kin kalapw mahsen ni karasaras. Ni karasepe, pepdais—kodihla nan kapin pihlo oh pil pwurehng pwurada—duwehte kowe mehn mahso mehla oh me kapwo pilehu ipwidi (kilang Rom 6:3-6). Tiahk Sarawi en tehnpas sarawi kasalepen Sises Krais oh Sapwellime Tomwo. E kakete apwal en wewekihla karasaras kan koaros tepin ahmw pahn pidolong tehnpas sarawi, ahpw ke kak wie wewekihla ma ke pahn pwurpwurala tehnpas sarawi erein ahmw mour.

Pidolong tehnpas sarawi, ke anahne kaunopada oh warohng. Ke kak alehdi mweimwei en pidolong tehnpas sarawi mwurin ahmw tuhong pisop de prant preseden oh stake preseden de misin preseden. Soun kaweid pwukat pahn idek rehmw peidek pwukat en wia mehn kamelel en me ke momourki rongamwahu en Sises Krais. Ahmw sounkaweid kan kak ididek rehmw peidek pwukat uwen ansou kei.

Sahm Nanleng kupwurki Sapwellime seri koaros en wiahda inou sarawi ong Ih oh alehdi tiahk sarawi kan. Inou sarawi pwukat iei, pepdais oh endaumen, anahne wiawi nan tehnpas sarawi ong me melahr akan me sohte alehda rongamwahuo. Ke kak pwurala tehnpas sarawi oh wiahda tiahk sarawi kan ong ahmw peneinei me melahr akan.