Vakananumi i Peresitedi Nelson

Ni oti e rua na siga mai na gauna ni koniferedi raraba, era a mai vakacaucautaki Peresitedi Russell M. Nelson na iliuliu ni Lotu kei ira na lewe ni matavuvale me vaka e dua na tama dauloloma ka tagane vakawati, itokani lomani, tisaipeli yalodina ni Turaga o Jisu Karisito, ka parofita vakauqeti ni Kalou.

Na bula nei Peresitedi Nelson “a vakadinadinataka na nona ivakadinadina yalodina vaka parofita ka italai ni Turaga o Jisu Karisito,” a kaya o Peresitedi Dallin H. Oaks ena lotu ni veibulu vei Peresitedi Nelson ena ika 7 ni Okotova, 2025, ena Vale ni Koniferedi. A vakatokai Peresitedi Nelson o Peresitedi Oaks, ka a takali yani ena vakacegu mai vale ena ika 27 ni Sepiteba, 2025, me “noqu itokani vinaka duadua ka qasenivuli vinaka duadua.”

A vakatokai Peresitedi Nelson talega o Peresitedi Oaks me “dua vei ira na daukaulotu kaukauwa duadua e Isireli ena cakacaka.” A kaya, “Nona matadredredre, na malumu ni domona, kei na kaukauwa ni nona iserau e dau vakamalumalumutaka na yalodra” na iliuliu ni veimatanitu kei na vei matavakabauta.

O Peresitedi Oaks kei na lima tale era a vosa a dokai Peresitedi Nelson ena nona loloma, veiqaravi, kei na yalodina vua na Turaga o Jisu Karisito kei ira na luve ni Kalou e vuravura raraba.

Ena duavata kei ira era a vosa, a vakavinavinakataki Sisita Wendy Watson Nelson ena nona dau qaravi ka tokoni Peresitedi Nelson tu ena 19 na yabaki ni nodrau bula vakamau. A vakaraitaka talega na nona vakavinavinaka vua na wati Peresitedi Nelson sa vakacegu, o Dantzel White Nelson, kei iratou na lewe 10 na luvedrau ena nodratou yalodina ki na “ka a dau vunautaka ka bulataka o koya.”

O Elder Henry B. Eyring, ka a veiqaravi vata kei Peresitedi Oaks kei Peresitedi Nelson ena Mataveiliutaki Taumada, a vakadinadinataka na veikacivi vakaparofita nei Peresitedi Nelson kei na nona dau rawata ka gadreva me vakalougatataki ira na tani.

“Niu veiqaravi e yasana ena Mataveiliutaki Taumada, tekivu ena Janueri 2018, a yaco meu dua na ivakadinadina ni nona dau vakauqeta na nona parofita na Turaga,” a kaya o Elder Eyring. “Au vakavinavinaka niu a bau mai kilai Peresitedi Russell M. Nelson.”

Ena nodrau vosa, o Elder Jeffrey R. Holland ena Kuoramu ni iApositolo Le Tinikarua kei Peresitedi Camille N. Johnson, Peresitedi Raraba ni iSoqosoqo ni Veivukei, e rau a qoroi Peresitedi Nelson ena nona dau yalovinaka vei ira na tamata ruarua ena loma kei na taudaku ni Lotu.

“Na madigi me da raici koya ni lomani ira na tamata kei na nodra lomani koya na tamata e a so na veika totoka duadua ni ivakananumi,” a kaya o Elder Holland. A nanumi Peresitedi Nelson o koya me vaka e “dau taura tu na ligadra ka dau vakabula na yalodra.”

A kuria o Peresitedi Johnson, “Sa veisautaka vakaidina sara o Peresitedi Nelson na vuravura ena veimaliwai vaka tamata yadua ena veigauna yadua, ka sa sureti keda o koya meda cakava vakakina ena noda vakayagataka na kaukauwa ni Kalou me vaka ni da sa turaga kei na marama ni veiyalayalati.”

E rua vei iratou na luvei Peresitedi Nelson, o Laurie N. Marsh kei Russell M. Nelson Jr., erau kaya ni a dau bula marau na tamadratou baleta ni dau vakanamatataka o koya na nona bula vua na iVakabula o Jisu Karisito ka dau vakaliuca na nona veiqaravi vei ira na tani.

“Keitou a susugi cake ena dua na vuvale e dau vakanamata vua na iVakabula ka vakasinaiti ena reki,” a kaya o Sister Marsh. A kaya ni lalawa ni matavuvale oya me yaco me dua na matavuvale tawamudu.

A kuria o Baraca Nelson ni sega ni dau vakacauoca o tamana ena nona veiqaravi. “A vakaraitaka vakamatailelevu vei keitou o Peresitedi Nelson ni sega ni tu e dua na ‘vakacegu’ ena nona ivakadewa ni Veivakalesuimai.” A kaya o koya ni gauna a kacivi kina me liutaka na Lotu, a yalataka o tamana me qarava na Tamada kei na Luvena me yacova na siga ni nona mate. “A vakayacora sara ga oqori o koya.”

Erau a cabora o Marjorie N. Lowder kei Gloria N. Irion, na luvei Peresitedi Nelson yalewa, na masu ena lotu. A lagasere na Matasere ni Tabernacle ena Lomanibai ni Valetabu.

Na veibulu vei Peresitedi Nelson a muria e na dua na soqoni ni veivakalagilagi ka rokovi kina o koya ena 1 ni Okotova ka kaburaki mai na Valecavu ena Lomanibai ni Valetabu. Eratou a veivakacaucautaki kina o Peresitedi Oaks, Elder Holland kei Eyring, Bisopi Vakatulewa Gérald Caussé, Elder Carl B. Cook ena Mataveiliutaki ni Vitusagavulu, kei na peresitedi Raraba ni Lalai o Susan H. Porter, ka ratou wasea na veika sotavi malumu ena veiqaravi kei Peresitedi Nelson kei na nodratou nanuma me baleta na nona ivakaraitaki, veiqaravi vakalotu va-Karisito, kei na ivakavuvuli veivakauqeti.

Ena nona veivakacaucautaki, a vakatokai Peresitedi Nelson kina o Peresitedi Oaks me “dua na parofita ni loloma” ka dau “vunautaka na kosipeli ni loloma.”

Me baleta eso tale na ka me baleta na bula kei na veiqaravi nei Peresitedi Nelson, raica na In Memoriam: President Russell M. Nelson, 1924–2025, ka tabaki me ikuri ni mekasini ni Lotu ena Noveba 2025.