ʻOku Tali Lelei ʻEne Foakí

ʻI heʻeku kei siʻí, naʻe hiva ʻeku ongomātuʻá ʻi he kuaea homau uōtí. Tautefito ki he Fineʻeikí, naʻá ne manako ʻaupito ke hiva ʻi he taimi Kilisimasí. Naʻe fakatātaaʻi maʻu pē ʻe homau fāmilí ʻi he Efiafi kimuʻa ʻi he Kilisimasí ʻa e talanoa ʻo e ʻAloʻí mo hivaʻi ha ngaahi hiva Kilisimasi. Naʻa mau faʻa fakaʻosi maʻu pē ʻaki e himi ʻoku saiʻia taha ai ʻeku faʻeé, ko e “Pō Mālū.”

ʻI he konga kimuʻa ʻo e taʻu 60 tupu ʻeku faʻeé, naʻá ne puke ʻi he mahaki-helá. Naʻe taʻu lahi ʻene tale mo e feʻao mo e mahakí pea iku ʻo maumau ai hono leʻó. Naʻe mole foki mo ʻene fanongó ʻi he telinga ʻe taha peá ne toe faingataʻa ʻi he fakaʻau ke kovi ange ʻene fanongó ʻi he telinga ʻe tahá. Naʻá ne kei feinga pē ke hiva ka ko e lahi tahá, ʻokú ne faʻa laukonga pē mo fakakaukau ki he fakalea ʻo ha foʻi hiva.

ʻI ha Sāpate ʻe taha lolotonga ʻeku ʻaʻahi ki heʻeku ongomātuʻá ʻi he faʻahitaʻu Kilisimasí, naʻa mau ʻalu ki he houalotu sākalamēnití. Naʻe fakatefito e polokalamá ʻi he ʻaloʻi mo e misiona ʻo Sīsū Kalaisí.

Naʻe fehuʻi mai ʻe heʻeku faʻeé kimuʻa pea kamata ʻa e fakatahá, “He ʻikai ke u toe puke au he mahaki-helá ʻi he moʻui ka hokó, ko ia?”

Naʻá ku tali ange, “ʻIkai.”

Naʻá ma talanoa leva fekauʻaki mo ha ngaahi mahaki fakaesino kehe he ʻikai ke ne toe maʻu hili ʻa e Toetuʻú.

Naʻá ne pehē, “Te u toe lava ʻo hiva.”

Naʻá ku toe tānaki atu, “Fakataha mo e kau hiva ʻo langí.”

ʻI heʻemau hiva ʻa e himi kamatá, “Naʻe ʻAloʻi Mai ʻa Sīsū Kalaisi,” naʻe ʻikai lava ʻa e Fineʻeikí ʻo fanongo ki he tā ʻa e pianó. Naʻá ne kamata hivaʻi ʻa e nota e hiva ʻa e Palaimelí kae ʻikai ko e nota ʻo e Himí, ʻa ia naʻá na kehekehe ʻaupito. Naʻá ku feinga ke fakatonutonu ia, ka naʻe faingataʻa ke ne fanongo mai kiate au. Lolotonga e himi sākalamēnití, naʻe hokohoko atu pē ʻene faingataʻaʻiá. Naʻá ne fuʻu fie hiva, ka naʻe hala ʻaupito e nota naʻá ne hiva aí.

ʻI he hokohoko atu ʻa e houalotu sākalamēnití, naʻá ku ongoʻi ʻa e māfana ʻo e Laumālié pea mo e taʻehalaia ʻa e fānau naʻa nau fakahoko ʻenau fakamoʻoni ki he Fakamoʻuí ʻi he hivá. Pea ʻi he kamata ke hivaʻi ʻe he haʻofangá ʻa e himi tukú, “Pō Mālū,” naʻe hiva foki mo ʻeku faʻeé.

ʻI heʻeku fanongo ki heʻene faingataʻaʻiá, naʻá ku fakaʻamu ʻaki hoku lotó kotoa te ne lava ʻo toe hivaʻi ha ngaahi hiva Kilisimasi ʻo hangē ko ia naʻá ne faʻa faí. Ka ʻi heʻene hivá, naʻá ku ongoʻi ʻa e māfana fakalongolongo ʻo e Laumālié ʻoku folofola mai ki hoku ʻatamaí mo hoku lotó: “ʻOku ou tali lelei ʻene foakí.”

ʻI he momeniti ko iá, naʻe maʻu ongo foʻou e leʻo ʻo ʻeku faʻeé kuo faitāpuekina mo fakamāʻoniʻoniʻi ʻe ha Fakamoʻui ʻofa naʻá Ne ʻafioʻi hono lotó. Pea hangē ko ia naʻá Ne fai ʻi he taimi ne lī ai ʻe he uitoú ʻene kihiʻi paʻanga ʻe uá (vakai, Luke 21:1–4), naʻá Ne hōifua ki heʻene loto-moʻoní mo e foakí.