Si Presidente Nelson Nagsaulog sa Ika-100 nga Adlaw nga Natawhan

Ang mga lider sa Ang Simbahan ni Jesukristo sa mga Santos sa Ulahing mga Adlaw miapil sa pamilya ug mga higala niadtong Septiyembre 9, 2024, sa pagpasidungog sa propeta ug Presidente sa Simbahan nga si Russell M. Nelson sa iyang ika-100 nga adlaw nga natawhan.

Ang kalihokan gihimo sa Siyudad sa Salt Lake ug gisibya sa tibuok kalibotan. Kini adunay pasundayag sa musika, bidyo sa mga pasidungog gikan sa lain-laing mga lider sa tinuohan, mga pakigpulong sa mga lider sa Simbahan ug gikan sa mga sakop sa pamilya ni Presidente Nelson, ug mga bidyo gikan sa mga miyembro sa Simbahan nga nagpakigbahin kon giunsa nila sa pagpangalagad ang usa ka tawo.

Si Presidente Nelson mipasalamat sa pamilya, mga higala, ug sa mga Santos sa Ulahing mga Adlaw sa ilang kamabination ug suporta. Mipakigbahin siya sa iyang pasalamat alang sa dili maihap nga mga mensahe sa adlaw nga natawhan ug sa tibuok kalibotan nga pagtubag sa iyang “99+1” nga imbitasyon, diin giawhag niya ang mga tawo “sa pagtabang ‘sa usa’ sa atong mga kinabuhi kinsa tingali mibati nga nawala o nag-inusara” (Facebook, HUnyo 1, 2024, facebook.com/russell.m.nelson).

Ang propeta mihatag og gibug-aton sa kaimportante sa hugot nga pagtuo, sa mahangtorong panglantaw sa kinabuhi, ug sa maulaong sakripisyo ni Jesukristo. “Akong minahal nga kaigsoonan, ang gidugayon sa inyong kinabuhi dili sama ka importante sa matang sa kinabuhi nga kamo nagpakabuhi,” miingon si Presidente Nelson. “Alang sa matag usa kanato, bisan alang sa 100 anyos nga tigulang nga tawo, ang kinabuhi dali kaayong molabay. Ang akong pag-ampo mao nga inyong ipatigbabaw ang Dios sa inyong kinabuhi. Paghimo og mga pakigsaad uban Kaniya. Pagpabilin diha sa dalan sa pakigsaad. Pangandam nga mobalik sa pagpuyo og usab uban Kaniya.”

Si Presidente Dallin H. Oaks ug si Henry B. Eyring, ang mga magtatambag ni Presidente Nelson sa Unang Kapangulohan mipakigbahin sa ilang mga obserbasyon sa pagtrabaho kauban sa propeta sulod sa unom ka tuig ug tunga. Ilang gihatagan og gibug-aton ang kamainiton, kamatinahoron sa uban, ug Kristohanong pamatasan ni Presidente Nelson.

“Ang anaa sa lawak o sa miting o sa panag-istoryahanay uban ni Presidente Nelson mohatag lang kanimo og oportunidad nga makasinati kon unsa ka sama ang makauban ang Manluluwas,” miingon si Presidente Oaks. “Siya ang representante sa Manluluwas. Ug siya mao ang atong ehemplo nga angay sundon.”