Ewi Wāween Aō M̧aanjabpopo n̄an Bōk Rilo̧mo̧o̧r eo?

Kejekļo̧kjeņ kōn Men ko an Anij

M̧okta: Ke rikanaan Nipai ekar en̄jake “wōtlo̧k,” ear kōļmenļo̧kjeņ “kōn men ko Irooj ear kwaļok n̄ane” (Hilamōn 10:2–3).

Kiiō: Kemejmeji ta ko Anij ear kōm̧m̧ani n̄an kōj, ilo iien em̧m̧an im nana bareinwōt, enaaj letok n̄an kōj kajoor im peran eo n̄an kepaak E im jelm̧ae ilju kōn tamak.

Būreejtōn Henry B. Eyring, Rikakpilōklōk eo Kein Karuo ilo Būreejtōnji eo Kein Kajuon, ekar elmakote bwe jen kejekļo̧kjeņ raan otemjej im ļo̧o̧ke im̧we ko ad. Ear ba: “Kwomaron̄ jar im kejekļo̧kjeņ, kajjitōk kajjitōk ko: Anij eaar ke jilkintok juon ennaan me ekar n̄an baj n̄a? Iaar ke lo Pein ilo mour eo aō ak ilo mour ko an ro ajri ro nejū?”

Em̧ōj ke am̧ lo iakwe eo an Anij, im̧we, ak kōjeraam̧m̧an ko ilo mour eo am̧ rainin?

M̧okta: Mormon ear kajju ilo an kar kemlet bwe e ear “juon rikarejeran Jisōs Kraist” (3 Nephi 5:13).

Kiiō: Elder Jonathan S. Schmitt jen Jiljilimjounn̄oul eo ear rōjan̄ bwe jemaron̄ kalimjōk Jisōs Kraist ilo ad bōke iood jerbal ko kajojo An. Nan waanjon̄o̧k, Jisōs ej “juon wōt inne, rainin, im ilju” (1 Nipai 10:18). Elder Schmitt ear kwaļok bwe jemaron̄ bōk iood eddo in ilo ad niknik im mour kōn gospel in.

Ta āt ko jet ak taitōļ ko an Jisōs Kraist komaron̄ ļōm̧ņaki im rej jerbal n̄an eok?

Kōtļo̧k bwe Rilomo̧r eo en Aiintok Kom̧ n̄an E

Innām: Ilo 3 Nipai 10:4–6, Jisōs Kraist ear keidi E makke n̄an juon lo̧lo̧ eo ej aiintok tokki ko nejin. Pija in ej juon eo aibuojwōj kōnke E ej aolep ien ej jeeaaļetok kōj n̄an itok Ippen bwe E en maron̄ kōjparok im kemourur kōj. Bōtaab jej aikuij kālet itok n̄an E. Ear ba, “Ewi lōn̄ in Aō kar kakwelo̧ktok kom̧ āinwōt lo̧lo̧ eo ej kakwelo̧ktok jojo ko nejin, im kom̧ kar jab kōņaan” (eoon 5).

Kiiō: Jisōs ej wōnm̧anļo̧k ilo an aiintok kōj rainin, ak jej aikuij in kōtļo̧k kōj makke bwe jen kobaļo̧k n̄an E. Koj ke kōtļo̧k eok makke n̄an kobaļo̧k ippen Rilomo̧r eo im bōk kejparok eo An, ak koj ke m̧akoko im pād ejjedmatmet ņae jorāān ko.

Ta kūr eo im Rilomo̧r eo ej lewaj n̄an eok, im ta eo koj aikuiji in kōm̧m̧ane n̄an uwaake?

M̧okta: Ekar bōk jilu alen n̄an an riNipai ro ron̄ ainikien Anij. “Alen eo kein kajilu raar ron̄ ainikien eo, im kar kōpeļļo̧k lo̧jiln̄ier n̄an ron̄jake e; im mejaer eaar reilo̧k n̄an ijo ainikien eo ej itok jān e; im raar kalimjekļo̧k lan̄” (3 Nipai 11:5).

Kiiō: Juon wāwein jemaron̄ in “pen im dim im kalimjekļo̧k lan̄” ej n̄an, ilo naan eo an Būreejtōn Russell M. Nelson, “ļōmņak kōn Selestial.” Ej kemeļeļe bwe juon wāwein ļōmņak kōn Selestial “ej n̄an ļōmņak kōn men ko an jetōb.”

Ta eo komaron̄ kōm̧m̧ane n̄an an ļapļo̧k am̧ ļōmņak kōn men ko an jetōb im pen im dim im kalimjekļo̧k lan̄”?