Ia Outou Oofu i le Alii o Iesu Keriso

A o tuputupu a’e la’u fanau aupito laiti e toalua, sa ou maua ni tusi e mālie ma faatosina loto ae o loo faaaogaina foi faatusa i a latou tala. A o matou faitau faatasi i afiafi, sa ou fiafia lava e fesoasoani i la’u fanau ia malamalama i faatusa sa faaaoga e le tusitala e aoao mai ai mataupu faavae loloto atu, e oo lava i mataupu faavae o le talalelei.

Sa ou iloa i se tasi aso, ua malamalama lelei ina o faatoa amata le talavou o lo’u atalii laitiiti. Sa amata ona ia faitauina se tusi fou ma sa na ona mana’o ia fiafia i le tala, ae sa taumafai lona mafaufau e su’e le uiga loloto atu i mea uma sa ia faitauina. Sa le’i faamalieina o ia, ae sa ataata lo’u loto.

Sa aoao atu Iesu e ala i tala ma faatusa¹—o se fatu o le sinapi e aoao atu ai le mana o le faatuatua,² o se mamoe na se e aoao atu ai le taua o agaga,³ o se atalii faamaumau’oa e aoao atu ai le uiga o le Atua.⁴ O Ana faataoto o ni faatusa ia na mafai ai ona Ia aoao atu lesona loloto atu ia i latou na i ai “taliga e faalogo ai.”⁵ Peitai o i latou e lei sailia le uiga loloto atu o le a le malamalama lava,⁶ e faapei lava foi o le toatele o i latou na faitauina na lava tusi sa ou faitau atua i la’u fanau, sa le’i iloaina lava na i ai uiga e loloto atu ma isi mau mea e mafai ona maua mai na tala.

Ina ua ofoina mai e le Tama Lona Alo Pele e Toatasi e fai ma taulaga mo i tatou, sa avea Iesu Keriso lava Ia ma faatusa aupito taua o le alofa e le mavae o lo tatou Tama oi le Lagi mo i tatou taitoatasi.⁷ Na avea Iesu Keriso ma Tamai Mamoe a le Atua.⁸

Ua tatou maua le avanoa paia ma se faamanuiaga ina ua valaaulia i tatou i se sootaga faalefeagaiga ma le Atua, lea e mafai ai ona avea o tatou lava olaga o se faatusa o lena feagaiga. O feagaiga e fatuina ai le ituaiga o sootaga lea e mafai ai e le Atua ona taiala ma tosinaina i tatou i le aluga o taimi ma siitia ai i tatou ia avea atili e faapei o le Faaola, ma faalatalata atili atu ai i tatou ia te ia ma lo tatou Tama⁹ ma i’u ai lava ina saunia i tatou e ulu atu i lo La’ua afioaga.

O tagata taitoatasi e i le lalolagi, o se atalii po o se afafine faapelepele o le Atua.¹⁰ Pe a tatou filifili e avea o se vaega o se feagaiga, e faalauteleina ma faalolotoina ai lo tatou sootaga ma Ia. Na aoao mai Peresitene Russell M. Nelson e faapea pe a tatou filifili e osifeagaiga ma le Atua, e mafai ona atili vavalalata ai la tatou sootaga ma Ia nai lo le taimi a’o lei osia tatou feagaiga, ma e mafai ai e Ia ona faamanuiaina i tatou i se fuataga faaopoopo o Lona alofa mutimutivale ma le alofa, o se alofa ua ta’ua o le heseta i le gagana Eperu.¹¹ O le ala o feagaiga e faatatau uma lava i la tatou sootaga ma le Atua—o la tatou sootaga heseta ma Ia.¹²

E finagalo lo tatou Tama i se sootaga e loloto atu ma Ona atalii ma afafine uma,¹³ ae o la tatou filifiliga. A o tatou filifili e faalatalata atili ia te Ia e ala i se sootaga i le feagaiga e faataga ai o Ia e faalatalata atili mai ia i tatou¹⁴ ma faamanuiaina atili ai i tatou.

Ua faatuina e le Atua tuutuuga ma matafaioi o feagaiga ua tatou osia.¹⁵ Pe a tatou filifili e ulu atu i lena sootaga, tatou te molimauina o Ia e ala i faatinoga faafaatusa o le feagaiga taitasi faapea ua tatou loto e ola i tuutuuga ua Ia faatuina.¹⁶ E ala i le faamamaluina o a tatou feagaiga, e mafai ai e le Atua ona liligi mai le anoanoai o faamanuiaga folafolaina e o faatasi ma na feagaiga,¹⁷ e aofia ai le mana faateleina e suia ai ma avea atili e faapei o lo tatou Faaola. Ua i ai Iesu Keriso i le totonugalemu o feagaiga uma tatou te osia, ma ua mafai ona maua faamanuiaga o feagaiga ona o Lana taulaga togiola.¹⁸

O le papatisoga e ala i le faatofu o le faitotoa faafaatusa lea tatou te ulu atu ai i se sootaga faalefeagaiga ma le Atua. O le faatofuina i le vai ma toe alu a’e i luga o se faatusa o le maliu ma le Toetu mai o le Faaola i se ola fou.¹⁹ A o tatou papatiso, tatou te oti ma toefanau mai faafaatusa i le aiga o Keriso ma faaalia ai ua tatou loto e tauave i o tatou luga Lona suafa.²⁰ O i tatou lava e avea ma lena faatusa o le feagaiga. I le Feagaiga Fou tatou te faitau ai, “Aua o outou uma lava ua papatisoina ia Keriso, ua outou oofu ia Keriso.”²¹ O lo tatou papatisoga tatou te oofu faafaatusa ai ia Keriso.

O le sauniga o le faamanatuga e faasino foi i le Faaola. O le areto ma le vai o faatusa o le tino ma le toto o Keriso na faamaligiina mo i tatou.²² O le meaalofa o le Togiola e ofoina mai faafaatusa ia i tatou i vaiaso taitasi a o tauaaoina mai e sē e umia le perisitua, ua suitulaga i le Faaola lava Ia, le areto ma le vai ia i tatou. A o tatou faia le faatinoga o le aai ma feinu i faatusa o Lona tino ma le toto, e avea faafaatusa Keriso o se vaega o i tatou.²³ Ua tatou toe oofu foi ia Keriso a o tatou osia se feagaiga fou i vaiaso taitasi.²⁴

A o tatou osia feagaiga ma le Atua i le maota o le Alii, e atili ai ona faalolotoina la tatou sootaga ma Ia.²⁵ O mea uma tatou te faia i le malumalu e faasino atu i le fuafuaga a lo tatou Tama mo i tatou, a o le totonugalemu o le Faaola ma Lana taulaga togiola.²⁶ O le a aoao i tatou e le Alii i lea fuaitau i luga o lea fuaitau²⁷ e ala i faatusa o sauniga ma feagaiga a o tatala atu o tatou loto ma saili ma le agaga tatalo ia malamalama i uiga loloto atu.

E avea o se vaega o le faaeega paia i le malumalu, ua faatagaina i tatou e ofu le ofusa o le perisitua paia. O se matafaioi paia ma se avanoa paia.

I le tele o tu ma aga masani faaletapuaiga, e i ai laei faapitoa i fafo e faia o se faatusa o le talitonuga o se tagata ma se tautinoga i le Atua,²⁸ ma o laei faalesauniga e tele ina fai e i latou e ta’ita’ia sauniga tapuai. O na laei paia e tauaveina se uiga loloto mo i latou e ofuina. Ua tatou faitau i tusitusiga paia e faapea, o aso anamua, sa faaaogaina ai foi laei faalesauniga paia, e ogatusa ma sauniga o le malumalu.²⁹

I le avea ai ma tagata o Le Ekalesia a Iesu Keriso o le Au Paia o Aso e Gata Ai, o i tatou ua filifili e osifeagaiga ma le Atua i le maota o le Alii, e ofuina i fafo ni laei paia faalesauniga i le taimi o le tapuaiga i le malumalu, o se faatusa o laei na ofuina i sauniga o le malumalu i aso anamua. Tatou te ofuina foi le ofusa o le perisitua paia, i le taimi o tapuaiga i le malumalu ma i o tatou olaga i aso uma.³⁰

O le ofusa o le perisitua paia e loloto le avea ma faatusa ma faasino atu foi i le Faaola. Ina ua ‘aai Atamu ma Eva i le fua ma ua tatau ai ona tuua le Faatoaga o Etena, sa tuu atu ia i la’ua ofu pa’u manu e fai mo la’ua ufiufi.³¹ E foliga mai sa taulagaina se manu ina ia faia ai na ofu pa’u manu—o se faatusa o le taulaga a le Faaola lava ia mo i tatou. O leKafā o le upu faavae Eperu mo le togiola, ma o se tasi o ona faauigaga o le “e ufia’i.”³² O o tatou ofusa ua faamanatu mai ai ia i tatou faapea, o le Faaola ma faamanuiaga o Lana Togiola ua ufia’i i tatou i o tatou olaga atoa. A o tatou ofuina le ofusa o le perisitua paia i aso taitasi, e avea lena faatusa matagofie o so tatou vaega.

I le tusi a Roma o le Feagaiga Fou, tatou te faitau ai: “Ua leva le po, ua lata mai le ao: o lea ia tatou faatea ese ai galuega o le pogisa, a ia tatou oofu i ofu tau o le malamalama. … Ia outou oofu i le Alii o Iesu Keriso.”³³

Ou te matua faafetai mo le avanoa e ofu ai le ofusa o le perisitua paia e faamanatu mai ai ia te au faapea, o le Faaola ma faamanuiaga o Lana Togiola e lē i’u o loo ufia’i ai au i la’u malaga atoa i le olaga nei. E faamanatu mai ai foi ia te au a o ou tausia feagaiga sa ou osia ma le Atua i le maota o le Alii, sa ou ofuina faafaatusa ia Keriso, o Ia lava o se ofutau o le malamalama. O le a Ia puipuia a’u mai mea leaga³⁴ tuu mai ia te au le mana ma le malosi faateleina,³⁵ ma avea ma o’u malamalama ma taiala³⁶ i le pogisa ma faigata o lenei lalolagi.

O loo i ai se uiga loloto ma le matagofie faafaatusa i le ofusa o le perisitua paia ma lona sootaga ia Keriso. Ou te talitonu o lo’u naunautaiga³⁷ e ofuina le ofusa paia ua avea ma a’u faatusa ia te Ia.³⁸ O la’u lava lea faailoga patino i le Atua, ae le o se faailoga i isi.³⁹

Ou te matuai faafetai lava mo lo’u Faaola, o Iesu Keriso.⁴⁰ O Lana taulaga togiola mo i tatou na avea ma faatusa aupito sili o le alofa e le gata o Ia ma lo tatou Tama i le Lagi mo i tatou taitoatasi,⁴¹ faatasi ai ma faatusa totino o lena alofa ma le taulaga—o faailoga i lima, ma vae, ma le itu o le Faaola—o loo tumau ai pea tusa pe ua mavae Lona Toetu mai.⁴²

O le tausia o a’u feagaiga ma matafaioi ma le Atua, e aofia ai le ofuina o le ofusa o le perisitua paia, e mafai ai e lo’u lava olaga ona avea ma faatusa patino o lo’u alofa ma lo’u lotofaafetai loloto mo lo’u Faaola, o Iesu Keriso, ma lo’u naunau ia ma mafuta pea ma Ia e le aunoa.

Afai e te le’i faia lava, ou te valaaulia oe e filifili se sootaga e loloto atu ma le Atua e ala i le osia o feagaiga ma Ia i le maota o le Alii. Suesue i lauga a lo tatou perofeta (e aofia ai aoaoga matagofie i vaefaamatalaga o ana lauga, lea o loo i ai i le tele o lauga o le konafesi). Sa ia saunoa soo e uiga i feagaiga mo le tele o tausaga aemaise lava talu ona avea ma Peresitene o le Ekalesia. Aoao mai ana aoaoga e uiga i faamanuiaga matagofie ma le mana ma le gafatia faateleina e mafai ona avea ma a oe e ala i le osia ma le tausia o feagaiga ma le Atua.⁴³

Ua ta’ua i le Tusitaulima Aoao e le manaomia ona i ai se valaauga faamisiona pe faamau e faaipoipo ai e osia ai feagaiga o le malumalu.⁴⁴ E tatau ona le itiiti ifo ma le 18 tausaga le matua o se tagata, ua le o toe i ai i le a’oga maualuga po o se tulaga talitutusa, ia le itiiti ifo ma le tausaga e tasi talu ona avea ma se tagata o le Ekalesia. O loo i ai foi tulaga faatonuina o le paia patino e manaomia.⁴⁵ Afai e te manao e faaloloto lau sootaga ma lou Tama oi le Lagi ma Iesu Keriso e ala i le osia o feagaiga paia i le maota o le Alii, ou te valaaulia oe e talanoa ma lou epikopo po o le peresitene o le paranesi ma faailoa atu ia te ia ou manaoga. O le a ia fesoasoani ia te oe ia iloa le auala e saunia ai e maua ma faamamaluina na feagaiga.

E ala i se sootaga i le feagaiga ma le Atua, e mafai ona avea o tatou lava olaga o se faatusa ola o lo tatou tuuto ma se alofa loloto mo lo tatou Tama o i le Lagi, o lo tatou heseta mo Ia,⁴⁶ ma lo tatou naunau ia agaigai i luma ma i’u ai ina avea e faapei o lo tatou Faaola, ua saunia e ulu atu i lo La’ua afioaga i se aso. Ou te molimau atu e matuai aoga le tau o faamanuiaga silisili o lena sootaga i le feagaiga. I le suafa o Iesu Keriso, amene.