Uhtohrala kin Kakehlakai Kitail

Pwehn uhtohrala anahne kasukuhl, peik, oh pwersekin doadoahk Kitail kin wia atail kak koaros en apwalih pein kitail, oh kitail kak peki sawas rehn mehteikan ansou mie anahnepe. Ahpw, pwehn uhtohrala ni mehlel, kitail anahne esehla ahniki pwoson Sises Krais. Eri ansou kitail pahn doadoahk ohng pein sawaspatail, E pahn ketin kakehlakai kitail.

Uhtohrala ni Palingehn

Kitail kak kalaudehla atail uhtohrala ni palingehn ni atail pahn nantiheng kakehlaka atail kadehde ohng Sises Krais. Kitail kin wia met ansou kitail kapakap, wadek pwuhk sarawi, kohla sarawi, peikiong kosonned akan, oh wia soahng teikan pwe kitail en karanihla Krais. Ni atail ese me E kin ketin men sewese kitail pahn kiheng kitail pwoson en ahniki kehlail mendahte ansou mour apwal.

Uhtohrala ni anahn akan en mour iangahki pein kak apwalih anahn sansal akan en momour ohng pein kitail oh atail peneinei. Met iangahki mwenge, wasahn kousoan, roson mwahu, oh anahn teikan. Kitail kin wia met ni atail alehdi kasukuhl mwahu, esehla de kalaudehla koahiek anahn kan, pwersekin doadoahk, esehla doadoahngki atail ansou, oh apwalih neitail mwohni mwahu.

Uhtohrala ni Pepehm

Uhtorala ni pepehm iei koahiek en kak apwalih kahpwal akan en pepehm ni komwad oh pwoson. Kitail koaros kin ahniki kahpwal kan oh paisuwed kan. Kalahngan ohng rongamwahu wet, kitail ese me kitail kak pilada ia mwomwen atail pahn powehdi kahpwal. Powehdiki pwoson ohng Kauno kin kalaudehla atail kehl ohng sohpai soahngen kahpwal teikan ni koapwoaroapwoar.

Kitail anahne kin kaskasukuhl ansou koaros. Koht ketin kupwurki kitail en kasukuhlih nan moangetail oh kalaudehla atail koahiek erein mour wet oh lela mour teio. Ni atail pahn esehla soahng tohto, e pahn kalaudehla atail kak en kaweid mwahu oh apwalih pein kitail, atail peneinei, oh mehteikan me anahne.

Kapai kan en Pein Uhtohrala

Soukohp akan padahkier me ansou kitail pahn kalaudehla atail uhtohr, kitail pahn pil kapaikihla koapwoaroapwoar oh meleilei laud. Kitail pahn kak sewese atail peneinei oh mehteikan me ahniki anahn. Oh kitail pahn kapaikihda paiamwahu tohto oh koahiek en doula mwowe ni keirda.

Amwail steik kak kihda kaskuhl ong pwihn akan en uhtohrala. Mepwukat kak kasukuhlih kinuhk padahk kan en uhtohrala oh koahiek kan me duwehte apwalih noumw mwohni de rapahkihda doadoahk mwahu. Ke pahn kak diar sawas teikan nan Wasahn Kamarain en Rongamwahu wet. Pilada “Pwuhk oh Kasukuhl Kan” oh mwuri “Uhtohrala.”