អ្នកចម្រៀងអន្តរជាតិចូលរួមជាមួយក្រុមចម្រៀងរោងឧបោសថសម្រាប់សន្និសីទ

ជាលើកដំបូងហើយដែលអ្នកចូលរួមរស់នៅក្រៅសហរដ្ឋអាមេរិកបានចូលរួមច្រៀង ជាមួយក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធអំឡុងសន្និសីទ ទូទៅ ។

ប្រធានក្រុមចម្រៀង ម៉ាយខល អូ ឡេវីត ដែលរៀបរាប់អំពីកម្មវិធីសាកល្បងនេះថា ជាការរីកចម្រើនបែបធម្មជាតិមួយនៃការកើនឡើងរបស់ក្រុមចម្រៀង បានមានប្រសាសន៍ថា ៖ ថ្មីៗនេះក្រុមចម្រៀងបានពង្រីកបេសកកម្មរបស់ខ្លួនទៅដល់ទស្សនិកជនទូទាំងពិភពលោក ។ លោកបានថ្លែងថា ៖ « យើងកំពុងតែធ្វើវាតាមរបៀបតែមួយគត់ដែលយើងដឹងថា នេះជាជំហានបន្តិចម្តងៗ—គឺការរៀនសូត្រ ការកែលម្អ និងការសូមព្រះអម្ចាស់សម្រាប់ការណែនាំបន្ថែមទៀត » ។ « ជាមួយនឹងជំហាននីមួយៗ ឥឡូវវាកាន់តែច្បាស់ឡើងថា រឿងនេះអាចកើតមានឡើង » ។

ដោយសារតែកាលវិភាគហាត់សមយ៉ាងតឹងរឹងរបស់ក្រុមចម្រៀង សមាជិកក្រុមចម្រៀងត្រូវបានតម្រូវឲ្យរស់នៅក្នុងចម្ងាយ ១០០ ម៉ាយ ( ១៦០ គីឡូម៉ែត្រ ) ពីរោងឧបោសថប្រវត្តិសាស្ត្រនៅទីក្រុង សលត៍ លេក ។ ទោះជាយ៉ាងណាក៏ដោយ បងប្រុសឡេវីត បានមានប្រសាសន៍ថា កម្មវិធីសាកល្បងនេះបើកទ្វារសម្រាប់អ្នកផ្សេងទៀត ដែលមានសមត្ថភាពតន្ត្រីពិសេសក្នុងការចូលរួមជាបណ្តោះអាសន្នផងដែរ ។

រួមជាមួយនឹងសមត្ថភាពសំឡេងរបស់ពួកគេ អ្នកចូលរួមអន្តរជាតិត្រូវបានតម្រូវឲ្យបង្ហាញពីជំនាញក្នុងទ្រឹស្តីតន្ត្រី និងភាសាអង់គ្លេសក្នុងអំឡុងពេលដំណើរការជ្រើសរើស ។

អ្នកដែលបានជ្រើសរើសច្រៀងជាមួយក្រុមចម្រៀងបានមកពីប្រទេសចំនួនប្រាំមួយ ៖

អាលវ៉ារ៉ូ ហ្សក ម៉ាធីន មកពីទីក្រុង ណេតាល់ ប្រទេសប្រេស៊ីល សម្លេងប្រុសទាប
រ៉ូឌ្រីហ្គោ ដូម៉ារ៉េដឃី មកពីទីក្រុង ខូរីទីបា ប្រទេសប្រេស៊ីល សម្លេងប្រុសទាប
ថាលីតា ដេ ខាវ៉លហូ មកពីទីក្រុង សៅប៉ូឡូ ប្រទេសប្រេស៊ីល សម្លេងស្រីខ្ពស់ទីពីរ
តូបូ អូរ៉េរីបា យ៉ូសែប អេលីស្សា មកពីទីក្រុង អាហ្គ្រា ប្រទេសហ្គាណា សម្លេងប្រុសខ្ពស់
ចូណាថាន់ ហៅ មកពីទីក្រុង កូឡាឡាំពួ ប្រទេសម៉ាឡេស៊ី សម្លេងប្រុសខ្ពស់ទីពីរ
ដេននីស អ៊ីឡាស្សា អាវ៉ាឡូស មកពីទីក្រុង ទីចូអានណាប្រទេស ម៉ិកស៊ិក សម្លេងស្រីខ្ពស់ទីពីរ
ចចជីណា ម៉នតេម៉េយើរ វ៉ុង មកពីទីក្រុង ម៉ុនធើរ៉ៃ ប្រទេសម៉ិកស៊ិក សម្លេងស្រីខ្ពស់ទីពីរ
រ៉ូណាល់ បា មកពីទីក្រុង ខាហ្គាយាន ឌឺ អូរូ ប្រទេសហ្វីលីពីន សម្លេងប្រុសខ្ពស់
សាន់ដេ មេ អ៊ីនឌីណូ មកពីទីក្រុង ខាហ្គាយាន ឌឺ អូរូ ប្រទេសហ្វីលីពីន សម្លេងស្រីខ្ពស់ទីមួយ
ប៉ី ស្សាន ចឹង ( ខាយលី ចុង ) មកពីទីក្រុង តៃប៉ិ ប្រទេសតៃវ៉ាន់ សម្លេងស្រីទាបទីមួយ

អ្នកចម្រៀងអន្តរជាតិទាំងនោះបានចូលរួមក្នុងការហាត់សម ចូលរួមសាលាក្រុមចម្រៀង បានទៅទស្សនាកន្លែងប្រវត្តិសាស្ត្ររបស់សាសនាចក្រជាច្រើនកន្លែង ហើយបានធ្វើដំណើរទៅកាន់វិសាលដ្ឋានសុខុមាលភាពរបស់សាសនាចក្រ វិសាលដ្ឋានព្រះវិហារបរិសុទ្ធ និងមជ្ឈមណ្ឌលឃ្លាំងរបស់ប៊ីស្សព ។

នៅពេលបញ្ចប់សន្និសីទទូទៅ សមាជិកក្រុមចម្រៀងដែលមានមូលដ្ឋាននៅរដ្ឋយូថាហ៍បានច្រៀងបទ « សូមព្រះអង្គគង់ជាមួយនឹងអ្នកផង » ទៅកាន់អ្នកចម្រៀងអន្តរជាតិទាំងនោះជាការលាគ្នាចុងក្រោយ ។

ប៊ីស្សពជាអធិបតី ហ្គែរ៉ល កូសសេ បានសម្តែងនូវក្តីស្រឡាញ់ និងអំណរគុណចំពោះអ្នកចម្រៀងអន្តរជាតិទូទាំងពិភពលោកទាំងនោះ ។ លោកបានថ្លែងថា ៖ « ខ្ញុំសង្ឃឹមថានៅពេលបងប្អូនត្រឡប់ទៅប្រទេសរបស់ខ្លួនវិញ បងប្អូននឹងធ្វើជាសាក្សីពីបទពិសោធន៍នេះ ហើយបងប្អូននឹងបង្កើនអ្នកចម្រៀងជំនាន់ថ្មីនៅគ្រប់ទីកន្លែងទាំងអស់នៅទូទាំងពិភពលោក » ។

បទពិសោធន៍រយៈពេលពីរសប្តាហ៍នេះបានជួយក្រុមចម្រៀងអន្តរជាតិទាំងនោះឲ្យមានអារម្មណ៍នៃការភ្ជាប់ទំនាក់ទំនង និងការរួបរួមកាន់តែខ្លាំងជាមួយសហគមន៍សាសនាចក្រ ។ « ខ្ញុំបានចំណាយពេលជាច្រើនជាមួយនាយកដ្ឋានតន្រ្តីសាសនាចក្រ ។ ប៉ី ស្សាន ចឹង បាននិយាយថា នៅពេលជួបពួកគេ ខ្ញុំពិតជាមានអារម្មណ៍ថា ថ្នាក់ដឹកនាំសាសនាចក្រសង្ឃឹមថា ពួកបរិសុទ្ធថ្ងៃចុងក្រោយនៅជុំវិញពិភពលោកអាចមានបទពិសោធន៍ខាងវិញ្ញាណកាន់តែជ្រាលជ្រៅតាមរយៈតន្ត្រី » ។