Kapai kan en Prihsduhd

Prihsduhd iei manaman oh mweimwei en Koht. Ohlakan me warehng me kolokol Prihsduhd en Melkisedek kin doadoahk ni mwaren Sises Krais ni arail kin wia kapai en prihsduhd kan. Ni arail kin wia doadoahken kapaida pwukat, irail kin idawehn karasaras en Sounkomouro ni ah kin ketin kapaiada mehteikan.

Kilel ehu sang David Winters

Duwen Kapai kan Ah kin Wiawi

Kapai kan en Prihsduhd kin wiawi sang ni pwilpwildien peh kan. Emen me kolokol Melkisedek Prihsduhd kiheng pehkan pohn moangen me pahn ale kapaio. Eri e ahpw kin wia kapai wet sang ni kaweid en Ngehno. Irail ko me kin wia doadoahk en kapaio oh irail ko me kin alehdi kapaio kin doadoahngki arail pwoson Koht oh likih Sapwelime koasoandi oh ansou.

Mwurin seri men ah ipwidi, emen me kolokol prihsduhd kin kiheng ede oh kapaiada (kilang Doctrine and Covenants 20:70). Met kin kalapw wiawi nan mihting en kaisihsol oh kadehde. Keiou serio kin alehdi mahs ede. Mwuri me kolokol prihsduhdo kin kapaiada serio.

Kilelehu sang Welden C Andersen

Kapai kan ong me Soumwahu

Me ahniki Melkisedek Prihsduhd kan kak kapaiada aramas me soumwahu. Soangen kapai wet mie pali riau: keiehkihdi leh oh katengetengdien keidio. Keiou, emen me kolokol prihsduhd kin kiheng ehu dingiding en lehn olip me kasarawihlahr, de kapaiadahr, pohn moangen aramaso oh wia ehu kapakap mwotomwot. Mwuri emen me pil kolokol prihsduhd kin katengehdi lehu oh kiheng aramaso kapai sang ni kaweidpen Ngehn Sarawi.

Irail kan me kolokolPrihsduhd en Melkisedek kak kiheng kapai en kaloalamwahu oh kaweid ong tohn peneinei oh mehteikan me anahne. Pahpa men me kolokol Prihsduhd en Melkisedek kak kiheng kapai en pahpa ohng nah serihkan. Mepwukat kak keioun sawas ansou me serihkan sohsohpai kahpwal kesempwalkan.

Ansou me towehkan en Mwomwohdso kin alehdi arail pwukoahkan, irail kin alehdi kapai ni arail kin kasarawihala en papah. Emen sounkaweid en prihsduhd kin kapaikinirailda manaman en doadoahk nan arail pwukoah. Sounkaweid en prihsduhd pil kin kiheng irail kapai mehn sawas nan arail pwukoahn sahpis.

Kilel ehu sang Shauna Stephenson

Kapai kan en Peitriark

Tohn Mwomwohdso koaros me warehng kak alehdi kapai en peitriark. Kapai wet kin kiheng emen emen pein ah kaweid sang Kauno. E kak wia mehn kaweid oh kaloalamwahu nan en aramas mour. E pil kak kasalehda en emen aramas dih en peneinei sang nan mehn Isrehlkan Peitirark me kasarawilahrte me kak wia soangen kapai wet.