Peneinei Soutuk

Aramas koaros wia serihn Sahm oh Ihn en nanleng. Kitail koaros wia kisehn peneinei en Koht. Kitail koaros ahnki sohso sarawi oh mie wasa kitail kohkohlahng. Ma kitail momourki mour pwung, kitail kak pwurala oh kousoan rehn Sahm Nanleng ni atail wia kisehn Sapwelime peneinei kohkohlahte.

Kilelen kapwopwoud sang Joseph Kaluba

Peneinei Soutuk kan

Ansou me ohl emen oh lih emen kapwopwoud nan tehnpas sarawi oh momourki ara inou sarawi kan, ara pwopwoud pahn poatoapoat. Tiahk sarawi en nan tehnpas sarawi wet kahdanki katengetengedi. Serihkan me ipwidi mwurin nohno oh pahpa kan ahr katengetengdier ipwidiongehr nan inou sarawio. Serihkan me ipwidi mwohn arail pahpa oh nohno kan ahr katengetengedi kak katengteng ong ira nan tehnpas sarawi pwe irail en kak wia peneinei soutuk. Towehkan en Mwomwohdiso kin wia poadoapoad en peneinei oh doadoahk en nan tehnpas sarawi pwe irail en kak katengetengpene arail peneinei kan nan dihkan koaros. Kapai en peneinei soutuk mie pwehki Sises Krais oh Sapwelime Tomwo.

Pwopwoud nan pwungen ohl emen oh lih emen kasarawilahr sang Koht. Sapwelimen Sises Krais rongamwahu kaweidki ohl pwopwoud kan oh lih pwopwoud kan en loaloapwoatehng emen emen oh mehlelehng arail inou sarawi en kapwopwoudkan. Irail anahne mehlel nan madamadau, lokaia, oh wiewia. Pwopwoud kin ehupene ni pahrek, oh emen emen anahne kangoange, kaloalamwahuih, oh sewese mehteio.

Pahpa oh Nohno kan oh Serihkan

Koht mahsani ong Adam oh Eve en nainki seri. Sounkaweid kan en Mwomwohdiso padahngkiher me kosonned wet wie manamante. Nohno kan oh pahpa kan doadoahkpene oh apwalih neirail serihkan ki limpoak oh mour pwung (kilang Doctrine and Covenants 68:25–28). Serih kan en alehdi kaweid en wauneki oh peikiong arail nohno oh pahpa kan (kilang Exodus 20:12).

Pahpa oh nohno kan en padahkiong neirail serihkan en poakohng Koht oh peikiong Sapwelime kosonned kan. Mouren nan peneinei kihong kitail ansou mwahu en pehm duwen popohl oh esehla kanengamah oh kesempwalki mehteikan. Mwohmw pwukat sewesei kitail en duwehla Koht oh kaunop ong kitail en mihmipene nan peneinei kohkohlahte.

E anahne mie doadoahk, loaloapwoat, oh kanengamah pwehn apwalihada peneinei pweida ehu. Padahk kan en Rongamwahu me duwehte pwoson, kapakap, mahk, limpoak, doadoahk, oh mehkot mwahu oh kaperen kak swewesei kitail diar popohl nan mouren peneinei. Kitail pil kak alehdi pein atail kaudiahl pwehn esehla ia mwomwen atail pahn kakehlaka atail peneinei kan.

Mwomwen Krais, sang Heinrich Hofmann

Kapai kin mweimwei ong koaros

Kaidehn koaros ahnki ansou mwahu en wia kisehn ehu peneinei mwahu pohn sampah. Ahpw Koht inoukiher me koaros me momourki Sapwelime kosonned kan pahn alehdi kapai kan koaros en peneinei soutuk. Kitail kak likih Ih oh ahnki pwoson nan Sapwelime ansou.