Mêku Adi Tshiendelela

Bantu bonsu badi bana baluma ne bana bakaji ba nyuma ba baledi ba ku diûlu. Tudi bonsu tshitupa tshia dîku dia Nzambi. Tudi bonsu ne bumuntu bua bunzambi ne dipungila dia bunzambi. Bituikala ne moyo muakana, tudi mua kupingana bua kusomba ne Tatu wetu wa mu Diûlu bu tshitupa tshia dîku dienda bua kashidi.

Foto wa Dibaka kudi Joseph Kaluba

Mêku a Tshiendelela

Padi muntu muluma ne mukaji baselangana mu ntempelo ne balama bipungidibiabu, dibaka diabu nedikala bua tshiendelela. Mululu wa mu ntempelo ewu, udi ubikidibua ne disuikibua. Bana badi baledibua panyima pa baledi babu basuikibua, badi baledibua mu tshipungidi atshi. Bana badi baledibua kumpala kua baledi babu kusuikibua, badi mua kusuikibua kudibu mu ntempelo bua bikala dîku dia kashidi. Bidimba bia Ekelezia bidi bienza muyuki wa dîku ne mudimu wa ntempelo bua ne bidi mua kusuika mêku abi pamua bua bikondu bionsu. Dibenesha dia dîku dia tshiendelela didi dipepeja kudi Yezu Kilisto ne Bupikudi buenda.

Dibaka pankatshi pa muntu muluma ne mukaji didi dijidila kudi Nzambi. Lumu luimpa lua Yezu Kilisto ludi lulongesha baluma ne bakaji bua kuikala balulama umua ne umua, ne lulamatu mu bipungidi biabu bia dibaka. Badi ne bua kuikala balelela mu meji, mêyi, ne mu bienzedi. Dibaka didi dikuatshishangana dia momumua, ne babaki badi ne bua kudikankamika, kudikolesha, ne kudiambuluisha.

Baledi ne Bana

Nzambi wakelela Adama ne Eva mukenji bua bikala ne bana. Balombodi ba Ekelezia bakalongesha ne, mukenji ewu utshidi koku. Bamamu ne batatu badi benza mudimu pamua bua kukolesha bana babu mu dinanga ne mu buakana (tangila Dilongesha ne Bipungidi 68:25–28). Bana badi balongeshibua bua kunemeka ne kutumikila baledi babu (tangila Ekesode 20:12).

Baledi badi balongesha bana babu bua kunanga Nzambi ne kutumikila mikenji yenda. Moyo wa mu dîku udi utupesha mishindu ya kumvua disanka ne kulonga lutulu ne dinanga dia bakuabu. Bintu ebi bidi bituambuluisha bua kulua bafuanangana ne Nzambi ne bitulongolola bua kuikala ne disanka bu mêku a kashidi.

Bidi bilomba mudimu, didijidila, ne lutulu bua kuibaka dîku dishuwa. Malongesha a lumu luimpa bu mudi, ditabuija, dibuikidila, dinanga, mudimu, ne manaya mimpa, bidi mua kutuambuluisha bua kupeta disanka mu moyo wa dîku. Tudi kabidi mua kupeta dibuluila dia nkaya bua kumanya mushindu wa kukankamika mêku etu.

Foto wa Kilisto, kudi Heinrich Hofmann

Mabenesha Makubanyina Bonsu

Bantu bonsu kabena anu ne mushindu wa kuikala mu dîku dimpa pa buloba apa to. Kadi Nzambi mmulaya ne, bantu bonsu badi balama mikenji yenda, nebapeta mabenesha onsu a dîku dia tshiendelela. Tudi mua kumueyemena ne kuikala ne ditabuija mu diba dienda.