Bua Tshinyi Tudi Tufuta tshia Dikumi

Umua wa ku mikenji ya Nzambi udi wa kufuta tshia dikumi mu Ekelezia, tshidi tshikala tshimua tshia pa dikumi tshia bitudi tupeta. Patudi tufila tshia Dikumi, tudi tuleja disakidila kudi Nzambi bua mabenesha etu. Tudi tuleja ne tudi ne lulamatu mu Mukalenga ne tudi basua kumutumikila mu malu onsu.

Melekisedeke—Mulami wa Nzumbu wa Tshibutshilu, kudi Clark Kelley Price

Malongesha a mu Dipungila Dikulukulu

Bantu ba Nzambi bakafuta tshia dikumi kumbukila mu tshikondu tshia Dipungila Dikulukulu. Tshilejilu, Abalahama wakafuta tshia dikumi (tangila Genese 14:18–20). Mukenji wa tshia dikumi wakalongeshibua kabidi kudi bambi ba kala, bu mudi Mose ne Malaki (tangila Lewitiki 27:30–34; Nehemiya 10:35–37; Malaki 3:10).

Mu 1838, Muambi Joseph Smith wakakonka Mukalenga mushindu uvua bidimba bia Ekelezia ne bua kufuta tshia dikumi. Diandamuna dia Mukalenga didi difunda mu Dilongesha ne Bipungidi 119, didi diamba ne bidimba bidi ne bua kufuta tshia dikumi tshia pa makasa abi mu Ekelizia (tangila mvesa 4). Balombodi ba Ekelezia bakalongesha ne “makasa” adi umvuija bidi bipetshibua.

Foto wa Jamie Dale Johnson

Mushindu wa Kufuta tshia Dikumi

Tudi mua kufuta tshia dikumi mu kuwuja kakanda ka difila kadi mu nshinga ku donations.ChurchofJesusChrist.org. Anyi tudi ne bua kufunda pa dibeji ne kufila makuta kudi tshidimba tshia mu buepiskopo anyi tshia mu bulombodi bua ditamba. Makuta onsu adi atumibua ku tshishikaminu tshia Ekelezia, kudi balombodi ba Ekelezia (Bulombodi Bukulu bua Kumpala, Mpuilu wa Bapostolo Dikumi ne Babidi, ne Balombodi Bakulu ba Buepiskopo) badi bapangadika mu disambila, mushindu wenza makuta â mudimu.

Mukalenga wakalaya ne bonsu badi bafuta tshia dikumi, nebabeneshibua mu mubidi ne mu nyuma. Tshia Dikumi tshidi kabidi tshibenesha bana bonsu ba Nzambi ne mushindu wa kumulonga ne kukola mu lumu luimpa.

Tshidi Makuta a Tshia Dikumi Enza

Makuta a tshia Dikumi adi akuata mudimu wa kuibaka Ekelezia wa Mukalenga mu buloba bujima. Etshi tshidi tshiangata dibaka dia ntempelo ne bibambalu bikuabu bia Ekelezia, dipatula dia mifundu ne mikanda mikuabu, kufuta tulasa tua Ekelezia, ne kuambuluisha tshibambalu tshia muyuki wa dîku ne mudimu wa bukenji.

Musangu umua ku tshidimu, bidimba bia Ekelezia bidi bimonangana ne muepiskopo (anyi mulombodi mukulu wa ditamba) bua kujadika ne badi bafutshi ba tshia dikumi tshionsu.