Bwe Ren Jeļā Kwe

Jejjo̧ iiō remootļo̧k, eaar wōr aō en̄jake in oktak ilo kweilo̧k in kwojkwoj eo ilo ward eo ammim ilo Arizona. Āinwōt an jar in kwojkwoj eo kwaļo̧k ad kōņaan n̄an “bōk ioer [etad make] etan [Jisōs Kraist],”¹ bwe Jetōb Kwojarjar en kakeememej eō bwe Jisōs elōn̄ etan. Kajjitōk in eaar itok n̄an būruwō: “Āt rot eo etan Jisōs ij aikuj bōke iooū make wiik in?”

Āt ko jilu etan Jisōs raar itok n̄an ļōmņak eo aō, im iaar je. Kajjojo iaan āt kein jilu epād ie mour Āinwōt Kraist me ij kōņaan lukkuun mour kake. Ilo wiik eo, iaar mije āt ko jilu im kar kajjieon̄ in jerbali im mour kaki m̧wiļ kein. Jen tōre eo, iaar ļōmņake wōt kajjitōk in āinwōt m̧ōttan aō kabun̄jar: “ĀĀt rot eo etan Jisōs ij aikuj bōke iooū make wiik in?” Uwaaki kajjitōk in im kajjieon̄ kōļapļo̧k m̧wiļ Āinwōt Kraist ekar kōjeraam̧m̧an mour eo aō.

Ilo jar eo An, Jisōs ekar kwaļo̧k m̧ool in: “Im men in mour indeeo, bwe ren jeļā Kwe juōn wōt e m̧ool, im Jisōs Kraist, eo Kwaar jilkintok.”² Rainin, ikōņaan kwaļo̧k n̄an kom̧ kōjeraam̧m̧an ko im kajoor eo ej itok jān jeļā Jisōs Kraist kōn āt ko Etan.

Juon wāween eo epidodo n̄an jeļā kajjien ro jet ej jeļā etaer. Em̧ōj kar ba bwe “āt eo etan juon armej ej āt ej make wōt aorōk im em̧m̧antata ilo jabdewōt kajin.”³ Kwonan̄in ke kar ioone n̄an kūr jet kōn bōd in etaer ak meļo̧kļo̧k etaer? Kōrā eo ippa, Alexis, im n̄a kar andein, ilo juon tōre, kar kūr juon iaan ajri ro nejum̧ro “Lola.” Ejerata, ilo ami ļōmņake, Lola ej etan kidu eo nejumim! N̄an em̧m̧an ak nana, meļo̧kļo̧k etan juon armej ej kwaļo̧k n̄an armej eo ke kwojjab lukkuun jeļā etan.

Jisōs ejeļā im ej kūr armej kōn etaer. N̄an Israel eo etto, Irooj eaar ba, “Kwōn jab mijak: bwe em̧ōj Aō lo̧mo̧o̧ren eok, Iar ān̄in̄in eok; kwōj Aō.”⁴ Ilo juon jibbon̄in Ijtō, Meri eaar kam̧ool jerkakpeje eo an Kraist eaar ilbōk ke Jisōs eaar kūr etan.⁵ Ejjeļo̧k oktak, Anij ekar kūr Josep Smith kōn etan n̄an uwaake jar eo an kōn tōmak.⁶

Ilo jekjek ko jet, Jisōs eaar leļo̧k n̄an rikaļoor ro An āt ko rekāāl me ekar kwaļo̧k piktokier, aorōkier, im tokjeer. Jeova ear leļo̧k n̄an Jekab āt eo etan ekāāl Israel, eo ej meļeļein “Juon eo ej anjo̧ ippān Anij” ak “Anij En Anjo̧.”⁷ Jisōs ekar leļo̧k n̄an Jemes im Jon etaerro Boanerjis, meļeļein “ro nejin jourur.”⁸ Lo tōl eo an ilju im jekļaj, Jisōs eaar leļo̧k etan Saimōn Cephas ak Piter, meļeļe juon ejm̧aan.⁹

Āinwōt an Jisōs jeļā kōj kajjojo kōn etad, juon wāween emaron̄ em̧m̧anļo̧k ad jeļā etan Jisōs ej jeļā kōn elōn̄ āt ko Etan. Āinwōt etan Israel im Piter, elōn̄ āt ko etan Jisōs rej taitōļ me rejipan̄ kōj meļeļe jerbal eo An, kōttōbar, pikotkin, im m̧wiļ ko. Ilo ad jeļā kajjien āt ko etan Jisōs, enaaj em̧m̧anļo̧k ad meļeļe mijen eo An ekwojarjar im piktokin Make. Jeļā elōn̄ āt ko Etan ebarāinwōt im̧we kōj n̄an erom̧ eļapļo̧k āinwōt E—n̄an kōļapļo̧k m̧wiļ n̄an mour Āinwōt Kraist me ej bōktok m̧ōņōņō im kōttōbar ko n̄an mour ko ad.

Jejjo̧ iiō rem̧ootļo̧k, Būreejtōn Rjussell M. Nelson ekar ekkatak aolep eoon ko rej kōnono kōn Jisōs Kraist ilo Unin Tōl n̄an Jeje ko Rekwojarjar.¹⁰ Innām ekar kūr ro rōm̧m̧an ded n̄an ekkatak ejja eoon kein. Kōnono kōn elōn̄ etan Jisōs, Būreejtōn Nelson ekar ba, “Katak aolep men kōn Jisōs Kraist ej ilo jar im lukkuun kappukote n̄an meļeļe ta taitōļ ko An im meļeļein āt ko n̄an kwe make”¹¹

Ālkin kūr eo an Būreejtōn Nelson, iaar jino kōļapļo̧k aō make laajrak in āt ko elōn̄ etan Jisōs. Laajrak eo aō make kiiō ewōr 300 āt ko, im ij jeļā bwe elōn̄ļo̧k ko me ijjab maron̄ loi kiiō.

Ilo an lōn̄ āt ko etan Jisōs me rej jerbal wōt kōn E,¹² imaron̄ kwaļo̧k ļalem āt ko im taitōļ ko me rej jerbal n̄an kōj kajjojo. Ij kūr kom̧ n̄an kōļapļo̧k laajrak eo am make ilo am jeļā kajjien Jisōs kōn āt ko elōn̄ Etan. N̄an kōm̧m̧an āindein, kwonaaj loe bwe ewōr āt ko jet—ippānļo̧k m̧wiļ ko n̄an mour Āinwōt Kraist—me kwonaaj kōņaan bōk ioom̧ make āinwōt rikaļoor in bujen ro an Kraist.¹³

Moktata, Jisōs ej Seperd eo Em̧m̧an¹⁴ Aaet, Jisōs ejeļā sip ko An,¹⁵ “ej kūrsip ko an kōn etae,”¹⁶ im, āinwōt Lam in Anij, eaar leḷọk An mour kōn sip ko.¹⁷ Ejjeļo̧k oktak, Jisōs ekōņaan bwe jen seperd ro rem̧m̧an, eļaptata ilo baam̧le ko ad im āinwōt rikarejar jeiū im jatū. Juon wāween jej kwaļo̧k ad iakwe n̄an Jisōs ej n̄an naajdik sip ko An.¹⁸ N̄an sip ko rej jebwābwe, seperd ro rem̧m̧an rej ilo̧k n̄an āne jem̧aden im pukot sip eo ejebwābwe innām pād ippāer m̧ae iien relukkuun ro̧o̧l ilo jokne.¹⁹ Āinwōt seperd ro rem̧m̧an im n̄e ijo jokwe emālim, jej aikuj kappukot n̄an joļo̧k eļap iien n̄an jerbal in karejar n̄an armej ro ilo m̧oko im̧weer. Ilo ad jerbal in karejar, jeje im techonology eaikuj jerbal n̄an kōļapļo̧k, jab bōk jikin, n̄an loļo̧k an juon make.²⁰

Kein Karuo, Jisōs ej Pris eļap n̄an Men ko Rem̧m̧an Renaaj Itok²¹ Jeļā bwe dōbwāāl eo An ekar jilu wōt awa, Jisōs ekar ba: “Men kein Iar kōnono n̄an koṃ, bwe ilo N̄a koṃwin aenōṃṃan. Ilo laḷ koṃij en̄taan, a koṃwin ṃōṇōṇō; Ña Iar bōk anjọ ioon laḷ.”²² Rainin, ilo an laļ in ad emakijkij an oktakļo̧k im jenoļo̧k, ewōr juon aikuj eļap n̄an kōj n̄an kwaļo̧k im kammineneiki, kijenmej, im kōjatdikik. Joļo̧k aolep apan̄ ko kar m̧okta, tōmak ej aolep iien ba kajjien ilju jekļaj,²³ obrak kōn kōjatdikdik, kōtļo̧k ad obrak kōn kūr eo an Jisōs n̄an m̧ōņōņō.²⁴ Mour kōn gospel in ejipan̄ kōj erom̧ rikaļoor ro an men ko rem̧m̧an renaaj itok.

Bar taitōļ eo juon an Jisōs ej bwe E ej Āinwōt, Inne, Rainin, im Indeeo²⁵ Jim̧we ej juon m̧wiļ Āinwōt Kraist. Jisōs eaar aolep iien kōm̧anm̧an ankilaan Jemān,²⁶ im Ej erļo̧k Pein n̄an lo̧mo̧o̧ren, jipan̄ im kōmour kōj.²⁷ Ilo ad jim̧we im mour kake gospel in, jenaaj erom āinwōt Jisōs.²⁸ Men̄e laļin enaaj ioon eļap okoktak ko āinwōt an armej ukōti im m̧akūtkūt kōn jabdewōt kōto in katak,²⁹ jim̧we im mour kōn gospel eo ejipan̄ kōj pen im dim im jān lan̄ ko an mour in.³⁰ Jemaron̄ bar kwaļo̧k jim̧we n̄an bōk kūr eo an Būreejtōn Nelson n̄an “kōm̧m̧an iien n̄an Irooj.”³¹ Kajoor ilo jetōb ej itok jān men ko reddik im ļam̧ waan³² n̄an kōļapļo̧k “m̧wiļ ko rekwojarjar im imminene ko rejim̧we”³³ n̄an jar kajjojo raan, ukweļo̧k, ekkatak jeje ko rekwojarjar, im jerbal in jipan̄ ro jet.

Emān, Jisōs ej Ri Kwōjarjar eo an Israel³⁴ Mour eo an Jisōs ekar juon jon̄ak ekwojarjar. Ilo ad ļoor Jisōs, jemaron̄ erom̧ juon rikwojarjar an Israel.³⁵ Jej kajoorļo̧k ilo kwojarjar ilo ad etal emakijkij an tampeļ, ijo ilōn̄ in jikin deļo̧n̄ eo ej ba “Kwojarjar n̄an Irooj.” Kajjojo iien jej kabun̄jar ilo tampeļ eo, jej bōk menin letok kwojarjar an tampeļ kōn eļap kajoor n̄an kōm̧m̧an bwe m̧oko im̧ōd ren jikin ko rekwojarjar.³⁶ N̄an jabdewōt ro kiiō ejjeļo̧k aer peba in mālim n̄an deļo̧n̄e tampeļ eo ekwojarjar, ij kūr kom̧ n̄an ioon bisop eo am̧ im kepooj eok make n̄an deļo̧n̄ ak bar ro̧o̧l n̄an jikin eo ekwojarjar. Iien eo ilo tampeļ enaaj ļapļo̧k an kwojarjar ilo mour ko ad.

At eo juon etan Jisōs ej bwe E ej Tiljek im Mool.³⁷ Āinwōt an kar Jisōs tiljek im m̧ool iien otemjej, kōņaan eo An ej bwe jen bōk m̧wiļ kein ilo mour ko ad. N̄e em̧ōjņo̧ tōmak ko ad, jemaron̄ jar lam̧ōj n̄an Jisōs, “Irooj, lo̧mo̧o̧r eō,” āinwōt kar Piter ke eaar jino rum̧ļo̧k ilo lom̧alo in Galilee.³⁸ Ilo raan eo, Jisōs ekar leļo̧k pein im lo̧mo̧o̧ren rikaļoor eo erum̧ļo̧k. Eaar kōm̧m̧ane bar n̄an n̄a, im E enaaj kōm̧m̧ane ejja n̄an kwe. Jab ebbweer jān Jisōs—E eban ebweer jān eok!

N̄e jej tiljek im m̧ool, jej ļoor kūr eo an Jisōs n̄an “Kom̧win pād ilo N̄a,” bar meļeļe “pād ilo N̄a.”³⁹ N̄e jej ioon kajjitōk ko, n̄e rej kajjirere kōn tōmak eo ad, n̄e rej jitōn̄ kōn pein kajjirere n̄an kōj jen ro ilo m̧weeo ekilep im ļap, jen tiljek im jen m̧ool. Ilo tōre kein, jen keememej naan eo an Jisōs, “Reitok n̄an Eō ilo ļōmņak otemjeļo̧k; jab pere, jab mijak.”⁴⁰ Ilo ad kōm̧m̧an āindein, Ej letok n̄an kōj tōmak eo aikuji, kōjatdikdik, im kajoor n̄an pād wōt Ippān.⁴¹

Ro jeiū im jatū rejitenbōro, Jisōs ekōņaan bwe jen jeļā Kajjien kōnke Etan wōt ium̧win lan̄ jemaron̄ in lo̧mo̧o̧r.⁴² Jisōs ej Iaļ eo, M̧ool eo, im Mour eo—ejjeḷọk armej ej itok n̄an Jema eḷan̄n̄e jab kōn Eō.⁴³ Jisōs wōt iaļ eo! Kōn wun in, Jisōs ej akweļap, “Itok n̄an Eō,”⁴⁴ “Ļoor Eō,”⁴⁵ “Etetal Ippa,”⁴⁶ im “Katak Ippa.”⁴⁷

Kōn aolepen būruwō, ij kwaļo̧k kam̧ool kōn Jisōs Kraist—bwe E ej mour, bwe E ej iakwe kōj, im bwe E ej jeļā kajjiem̧ kōn etam̧. E ej Nejin Anij,⁴⁸ Make Wōt Nejin Jemān.⁴⁹ E ej Aō Ejm̧aan, Eo ij ko n̄an E, Aō Likōpejn̄ak, Aō im̧ōn bar e utiej, im Aō jikin Tilekek.⁵⁰ E ej Meram eo ej Romaak ilo Marok.⁵¹ E ej ad Rilo̧mo̧o̧r⁵² im ad Ripinmuur.⁵³ E ej Jerkakpeje eo im Mour eo.⁵⁴ Ikdeleel eo aō in bwe kwonaaj jeļā kajjien Jisōs kōn āt ko elōn̄ etan im bwe kwonaaj erom̧ āinwōt E ilo am̧ kwaļo̧k m̧wiļ ko An rekwojarjar ilo mour eo am. Ilo etan Jisōs Kraist, amen.