?Wanem Nao Olgeta Raeting blong Aesea Oli Tijim Mi abaot Jisas Kraes?

From se oli raetem moa long 2,700 yia i pas finis, ol toktok blong Aesea, samtaem, oli bigbigwan o oli mekem tingting blong yumi i konfius. Be yet, taem yu ridim Buk blong Aesea, hem i wan long ol bes wei we yumi save lanem moa abaot Jisas Kraes. Nifae i kwotem Aesea blong mekem se “[hem i] save winim ful tingting blong olgeta blong oli bilif long Lod, Ridima blong olgeta” (1 Nifae 19:23). Blong andastanem gud moa Aesea, traem mekem se stadi blong yu i lukluk nomo long ol tijing blong Aesea abaot Sevya.

Lukaotem ol ansa long ol kwestin ia taem yu stap stadi long ol japta ia:

• ?Olsem wanem Eliakim i stap ripresentem Jisas Kraes? (Luk long Aesea 22:20–25.)

• ?Wanem nao Kraes bae i mekem blong yumi long taem blong Laef Bakegen long Ded? (Luk long Aesea 25:8.)

• ?Olsem wanem nao Kraes i stap tijim ol pipol blong Hem? (Luk long Aesea 28:10.)

• ?Olsem wanem Aesea i tokbaot Restoresen blong gospel blong Jisas Kraes long ol las dei ia? (Luk long Aesea 29:14.)

• ?Bae i olsem wanem taem bae Kraes i kam bakegen? (Luk long Aesea 35:10.)

“Aesea i bin tokbaot plante taem abaot hiling paoa mo paoa blong putum pis we i kam long Lod. … Spirit blong Hem i hilim; i klinim; i kamfotem; i givim niu laef long ol hat we oli lusum hop. Hem i gat paoa blong jenisim evri samting we i no naes mo i wael mo no gat valiu long laef, i kam long wan samting we i hae mo i gud we i gud tumas. Hem, Hem i gat paoa blong tanem ol doti blong laef long wol ia, i kam long ol naesfala samting blong laef we i no save finis” (Tad R. Callister, The Infinite Atonement [2000], 206–7).