Ìdarí nípasẹ̀ àwọn Wòlíì Alààyè

Àwọn wòlíì ngba ìfihàn láti ọ̀dọ̀ Ọlọ́run. Nígbàtí àwọn wòlíì bá ní ìmísí láti kọ́ wa, ó jẹ́ ìkannáà bíi pé Ọlọ́run nbá wa sọ̀rọ̀ (wo Ẹ̀kọ́ àti Àwọn Májẹ̀mú 1:38). A lè ní ìgbẹ́kẹ̀lé pé wọ́n nsọ̀ ohun tí Ọlọ́run nfẹ́ kí a mọ̀ fún wa.

Gbogbo àwọn wòlíì jẹri nípa Jésù Krístì. Wọ́n kọ́ wa pé Òun ni Ọmọ Ọlọ́run. Wọ́n kọ́ wa nípa ayé, àpẹrẹ, àti Ètùtù Rẹ̀. Wọ́n sì nfi hàn wá bí a ó ṣe tẹ̀lé E tí a ó sì gbọ́ran sí àwọn òfin Rẹ̀.

Àwọn wòlíì nkọ́ni ní ìhinrere Jésù Krístì. Wọ́n nṣe àlàyé àwọn ìbùkún tí a ngbà nígbàtí a bá gbọ́ran sí àwọn òfin àti àwọn àbájáde tí à ngbà bí a kò bá ṣeé. Ní ìgbàmíràn, wọ́n lè ní ìmísí láti sọ fún wa nípa àwọn ìṣẹ̀lẹ̀ ọjọ́ iwájú.

Ọlọ́run ti kọ́ àwọn ènìyàn nípasẹ̀ àwọn wòlíì làti ìbẹ̀rẹ̀. Nínú àwọn wòlíì tí wọ́n gbé ní ìgbà Májẹ̀mú Láéláé ni Ádámú, Nóàh, Ábráhámù, Mósè, Ìsàíàh, àti àwọn míràn. Àwọn wòlíì wà bákannáà ní àárín àwọn ènìyàn Ìwé ti Mọ́mọ́nì. Nínú àwọn wòlíì wọ̀nyí ni Léhì, Mòsíàh, Álmà, àti Mórónì. A lè kọ́ ẹ̀kọ́ ohun tí wọ́n kọ́ni nípa kìka àwọn ìwé-mímọ́.

Joseph Smith ni wòlíì àkọ́kọ́ ní ìgbà òde-òní. Ó mú Ìjọ Jésù Krístì padàbọ̀sípò sí ilẹ̀-ayé. Russell M. Nelson ni wòlíì àti Ààrẹ Ìjọ ní òní. Àwọn olùdámọ̀ràn Rẹ̀ nínú Àjọ Ààrẹ Kínní àti àwọn Àpóstélì Méjìlá jẹ́ àwọn wòlíì, aríran, àti olùfihànbákannáà.

Wòlíì nbá wa sọ̀rọ̀ nínú ìpàdé àpapọ̀ gbogbogbò àti ní àwọn ìgbà míràn. Ó nkọ́ wa ní ohun tí Ọlọ́run fẹ́ kí a mọ̀ àti bí a ó ṣe tẹ̀lé Jésù Krístì ní òní. A lè rí àwọn ìkọ́ni rẹ̀ nínú Làìhónà àti ní ChurchofJesusChrist.org.

A ó di alábùkún-fún bí a bá tẹ̀lé àwọn ìkọ́ni ti wòlíì. Nígbàtí a bá tẹ̀lé wòlíì, a lè mọ̀ pé à nṣe ohun tí Ọlọ́run fẹ́ kí a ṣe. A lè ní ìmọ̀lára àlááfíà nínú ayé wa kí a sì súnmọ́ Jésù Krístì si.