“Elda James W. McConkie III,” Liahona, Mei 2022.
Elda James W. McConkie III
Jeneral Atoriti Seventi
Taem we Elda James W. McConkie III i kasem Tsekoslovakia long 1990 olsem wan yang misinari, kantri ia i jes kamaot long komunis gavman, mo i rere blong stat lukluk long ol nara relijin mo bilif bakegen. “Mi bin stap long raet ples long wan raet taem, wetem ol raet pipol,” hem i talem.
Afta long hemia, hem i bin gobak long ples ia olsem wan yang profesonol, i stanemap wan fandesen we i no mekem profit, mo afta, i stap olsem presiden blong Tsek/Slovak Misin.
Taem we hem i gat 12 yia, papa mo mama blong hem i invaetem hem blong stadi long ol buk we oli kam long ol lida blong Jos, mo afta, toktok raon long wanem we hem i bin ridim. “Papa mo mama blong mi oli bin biliv se i impoten blong tijim gospel long ol pikinini blong tufala, olsem we oli talem long Doktrin mo Ol Kavenan,” Elda McConkie i talem. “Seksen 68 i invaetem ol papa mo mama blong tijim ol pikinini long saed blong ‘doktrin blong fasin blong sakem sin’ mo ‘fet long Kraes’ (ves 25). Papa mo mama blong mi i tekem invitesen ia i series.”
Filing ia blong paoa blong gospel i save jenisim ol pipol, i go dip insaed long sol blong hem. Hem i bin luk semfala samting i hapen long Ol Sent long Tsek Ripablik mo Slovakia.
Elda James Wilson McConkie III i bin bon i kam long wol ia, long Sol Lek Siti, Yuta, YSA, long 27 Ogis 1971; papa mo mama blong hem i James Wilson McConkie II mo Judith Miller McConkie. Hem i maredem Laurel Springer long Julae 1995 insaed long Sol Lek Tempol. Tufala i gat fo pikinini.
Elda McConkie i graduet long Yunivesiti blong Yuta wetem wan bajela digri long saed blong histri, long 1995, mo hem i bin winim wan loa digri long 1999 long National Law Center long George Washington University. I no longtaem i pas, hem i bin wok olsem wan loya long Workman Nydegger, mo olsem wan daerekta blong Wallace Toronto Foundation, we hem i bin help blong stanemap.
Elda McConkie i bin stap olsem wan stek presiden long taem we koling ia i kam. Hem i bin givim seves tu olsem wan bisop, hae kaonsela, bisoprik kaonsela, wod misin lida, kaonsela blong presidensi blong kworom blong ol elda, misin priperesen tija, Gospel Doktrin tija, mo wod Yang Man presiden.