Ia Faamaloloina le Lalolagi

Uso e ma tuafafine, i lenei vaitau mamalu o le Eseta, ua matuā faamanuiaina i tatou e potopoto ma maua fautuaga ma taitaiga mai auauna a le Atua.

O le taitaiga ma aoaoga paia mai lo tatou Tama Faalelagi e fesoasoani tatou te faatautaia ai le olaga i nei aso faigata. E pei ona sa valoia, “o afi, ma matagi tetele,” “o taua, ma tala o taua, ma mafui’e i nofoaga eseese,” “ma mea inosia uma,”¹ “o mala,”² “oge, ma faama’i”³ ua faataumaoia ai aiga, nuu, e oo lava i atunuu.

O loo i ai se isi mala ua salalau i le kelope: o osofaiga o lo ta saolotoga faaletapuaiga. O lenei uiga faatupulaia ua taumafai e aveesea tapuaiga ma le faatuatua i le Atua mai nofoaga faitele, a’oga, tulaga faatauaina e nuu, ma talanoaga o atugaluga o tagata lautele. Ua saili le au tetee i le saolotoga faaletapuaiga e faamalosia le vaoia o faailoaga o talitonuga maumaututu mai le loto. Ua latou faitio foi ma faatauemu i tu ma aga o faatuatuaga.

O na ituaiga o uiga faaalia ua faaaunu’ua ai tagata, ua le faatauaina ai mataupu faavae patino, lē faaitu’au, faaaloalo, faaleagaga, ma le filemu o le mafaufau.

O le a le saolotoga faaletapuaiga?

O le saolotoga e tapuai ai i ona ituaiga uma: saolotoga e faapotopoto ai, saolotoga e tautala ai, saolotoga e faatino ai talitonuga faaletagata lava ia, ma le saolotoga mo isi e faia ai foi le mea lava lea. O le saolotoga faaletapuaiga e mafai ai e i tatou taitoatasi ona filifili mo i tatou lava le mea tatou te talitonu i ai, pe faapefea ona tatou ola ma faatino e tusa ai ma lo tatou faatuatuaga, ma le mea o faamoemoeina mai ai le Atua ia i tatou.

O taumafaiga e faamalosia ai ona faasa lena saolotoga faaletapuaiga e le fou. Mai lava i le talafaasolopito atoa, sa matua’i pagatia ai tagata o faatuatuaga i lima o isi. E leai foi se mea e ese mai ai tagata o Le Ekalesia a Iesu Keriso o le Au Paia o Aso e Gata Ai.

Mai lo tatou amataga, e toatele na sailia le Atua sa tosina mai i lenei Ekalesia ona o ana aoaoga o aoaoga faavae autu paia, e aofia ai le faatuatua ia Iesu Keriso ma Lana Togiola, salamo, o le ata o le faaolataga, ma le Afio Mai Faalua o lo tatou Alii.

O tete’e, sauaga, ma soona mateletele na puapuagatia ai lo tatou uluai perofeta o aso e gata ai, o Iosefa Samita, ma ē na mulimuli ia te ia.

I le lotolotoi o le fenumia’iga i le 1842, sa lolomi ai e Iosefa ia mataupu faavae e 13 o le Ekalesia ua faatupula’ia, e aofia ma lenei: “Ua ia i matou le aia tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea aia tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.”⁴

O lana faamatalaga e lautele e aofia ai le, faasaolotoina, ma le faaaloalo. O le fatu lena o le saolotoga faaletapuaiga.

Sa faaupuina foi e le Perofeta o Iosefa Samita:

“Ou te toa e folafola atu i luma o le Lagi ua tutusa lava ma lo’u saunia ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ekalesia o e atonu e le ta’uta’ua pe e vaivai tele foi e puipuia i latou lava.

“O le alofa o le saolotoga lea e musuia lo’u agaga—o saolotoga faaletagata ma le faalelotu o tagata uma lava.”⁵

Ae, na osofaia lava uluai tagata o le Ekalesia ma tutuliese i le fiaafe o maila, mai Niu Ioka i Ohaio i Misuri, i le mea na tuu atu ai e le kovana se poloaiga faapea o tagata o le Ekalesia “ua tatau ona taulima o ni fili ma e tatau ona fasiotia pe tutuliese mai le setete.”⁶ Na latou sosola i Ilinoi, ae sa faaauau pea sauaga. Sa fasiotia e tagata leaga le Perofeta, ma le mafaufau o le fasiotia o ia o le a faaumatia ai le Ekalesia ma faasalalau solo le autalitonu. Ae sa tumau faamaoni le au faatuatua. O le na suitulaga ia Iosefa, o Polika Iaga, sa ta’ita’ia le fiaafe i se malaga umi faia faamalosi i le 1,300 maila (2,100 km) i sisifo, i le mea ua avea nei ma Setete o Iuta.⁷ O o’u lava augatama o nisi o na uluai paionia.

Mai lava i na ona po o sauaga ogaoga, sa tumau le faatupulaia o le Ekalesia a le Alii i le toetoe 17 miliona ona tagata auai, ma le silia mamao ma le afa o loo nonofo i fafo atu o le Iunaite Setete.⁸

Ia Aperila 2020, sa faamanatu ai e la tatou Ekalesia le 200 tausaga o le Toefuataiga o le talalelei faatasi ai ma se folafolaga i le lalolagi, sa saunia e lo tatou Au Peresitene Sili ma le Korama a Aposetolo e Toasefululua. E amata faapea, “Matou te folafola atu ma le faamaoni e alofa le Atua i Lana fanau i atunuu uma o le lalolagi.”⁹

O lo tatou perofeta pele, o Russell M. Nelson, ua toe ta‘ua foi:

“Matou te talitonu i le saolotoga, agalelei, ma le le faaituau mo fanau uma a le Atua.

“O i tatou uma o uso ma tuafafine, o fanau taitoatasi a se Tama o i le Lagi alofa. O lona Alo, o le Alii o Iesu Keriso, e valaaulia tagata uma e o mai ia te Ia, ‘e uliuli pe pa’epa’e, e pologa pe saoloto, o tane ma fafine’ (2 Nifae 26:33).”¹⁰

Tatou mafaufau faatasi i auala e fa e manuia ai sosaiete ma tagata taitoatasi mai le saolotoga faaletapuaiga.

Muamua. O le saolotoga faaletapuaiga e faamamalu ai poloaiga sili muamua ma le lua e tuu ai le Atua i le totonugalemu o o tatou olaga. Tatou te faitau i le Mataio:

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.”¹¹

“E faapena foi le lona lua, E te alofa atu i le lua te tuaoi, ia pei o oe lava ia te oe.”¹²

Pe o totonu o se falesa, sunako, faletapuai musalemi, po o se faleo’o, e mafai lava e so’o o Keriso, ma le autalitonu faapena, ona faaalia le tuuto i le Atua e ala i le tapuai atu ia te Ia ma le naunautaiga e auauna atu i Ana fanau.

O Iesu Keriso o le faataitaiga atoatoa o lena ituaiga alofa ma le auauna atu. I le taimi o Lana misiona, sa Ia tausia e matitiva,¹³ faamalolo i e mama’i¹⁴ ma e tauaso.¹⁵ Sa Ia fafagaina e fia aai,¹⁶ sa faamafola atu Ona aao i tamaiti laiti,¹⁷ ma faamagalo i latou o e sa sese ia te Ia, e oo lava i e na faasatauroina o Ia.¹⁸

O loo faamatala mai i tusitusiga paia e faapea “sa femaliuai[Iesu] ma agalelei.”¹⁹ E tatau foi ona tatou faia.

Lona Lua. O le saolotoga faaletapuaiga e atia’e ai faaaliga o talitonuga, faamoemoe, ma le filemu.

I le avea ai o se ekalesia, tatou te aufaatasi ai ma isi tapuaiga i le puipuia o tagata o faatuatuaga uma ma faatauanauga ma a latou aia tatau e talanoa mai ai i o latou talitonuga maumaututu. E le faapea ai tatou te talia o latou talitonuga, pe latou te talia foi o tatou, ae e tele atu mea e tutusa ai tatou nai lo i latou o e mananao e faaumatia la tatou tapuaiga.

Talu ai nei sa avea ai a’u ma sui o le Ekalesia i le Fonotaga a Faatuatuaga Eseese [G20 Interfaith Forum] i Italia. Sa faalototeleina a’u, ma faamalosia, ina ua ou feiloai ma taitai o malo ma faatuatuaga mai le salafa o le lalolagi. Sa ou iloa o manu’a ma eseesega e mafai ona foia e faamaloloina foi pe a tatou faamamaluina le Atua, le Tama o i tatou uma, ma Iesu Keriso, Lona Alo. O Le Faamalolo Sili o lo tatou Alii ma le Faaola, o Iesu Keriso.

Sa i ai si o’u taimi malie a o faamae’aina la’u lauga. O failauga e fitu na muamua atu, e lei faaiuina i se tulaga o se agamasani o le faatuatua pe i le suafa o le Atua. A o ou tautala, sa ou mafaufau, “Pe tau ina ou faafetai atu ma nofo i lalo, pe ou te faaiuina ‘i le suafa o Iesu Keriso’?” Sa ou manatua lo’u faasinomaga, ma sa ou iloa sa finagalo le Alii ou te ta’uina Lona suafa e faaiu ai la’u savali. O lea sa ou faia ai. I le toe tepa i tua, sa ou maua le avanoa e faaali atu ai o’u talitonuga ma sa ia te a’u le saolotoga e tuu atu ai la’u molimau i Lona suafa paia.

Lona Tolu. O le tapuaiga e musuia tagata e fesoasoani i isi.

“Pe a tuuina atu i tapuaiga le avanoa ma le saolotoga e lauolaola ai, e faatino e tagata talitonu gaoioiga faigofie ma o nisi taimi o ni faatinoga lototoa o auaunaga. O le fasifuaitau “tikkun olam,” a Iutaia anamua, o lona uiga “ia toelipea pe faamalolo le lalolagi,” ua toe atagia mai i ona po nei i taumafaiga a le anoanoai o tagata. Ua tatou faipaaga ma Faalapotopotoga Alolofa a le Katoliko, ua faaigoaina o le Caritas Internationalis; Islamic Relief; ma soo se faalapotopotoga Iutaia, Hindu, Puta, Sikh, ma Kerisiano e pei o le Salvation Army ma le National Christian Foundation. Tatou te tautuaina faatasi le faitau miliona o e manaomia le fesoasoani, talu ai nei e ala i le fesoasoani atu i le au sulufa’i o le taua i fale’ie, o taga moe, ma le sapalai o meaai,²⁰ ma le tuuina atu o tui, e aofia ai tui mo le ma’ipipili²¹ ma le KOVITI.²² E matuai umi tele le lisi o mea na faia, ae faapena foi manaoga.

E le fesiligia, tagata o faatuatuaga, e galulue faatasi, e mafai ona faia ai se faasalaveiga puipui maoae. I le taimi lava lea, o galuega fesoasoani ta’i-tasi-tasi e tele ina lē faaleoina ae suia lēleoa ai olaga.

Ou te manatu o le faataitaiga o i le Luka ina ua aapa atu Iesu Keriso i le fafine Naina ua oti lana tane. Na maliu ane Iesu faatasi ma se vaega o ē na mulimuli ai, ma tau atu ai i le solo o le tanuga o le tama e toatasi a le fafine ua oti lana tane. O le leai o ia, sa feagai ai o ia [le tina] ma se faatama’iaga faalelagona, faaleagaga, e oo lava i mea tautupe. Ina ua silasila atu Iesu i ona foliga loimatā, sa fetalai atu, “Aua e te tagi.”²³ Ona Ia pa’i atu lea i le fata sa tausoa ai lona tino, ona tu ai lea o le solo.

“Le taulealea e,” na Ia poloai atu ai, “Ou te fai atu ia te oe, Tulai ia.

“Ona nofo ai lea i luga o le ua oti, ua amata ona tautala. Ma na tuuina atu [e Iesu] o ia i lona tina.”²⁴

O le faatula’i mai o e ua oti o se vavega, peitai o faatinoga uma o le agaalofa ma le popolega mo se tasi o tauivi, o le ala lea o le feagaiga e taitasi ai foi i tatou ona “[o atu] e faia mea lelei,” ma le iloa “o loo faatasi le Atua ma i [tatou].”²⁵

Ma le lona fa. O le saolotoga o tapuaiga e faatino o se malosiaga soofaatasi ma galulue faatasi mo le mamanuina o mea e faatauaina ma le ola mamā.

I le Feagaiga Fou tatou te faitau ai i le toatele na liliuese mai ia Iesu Keriso, ma muimui i Lana mataupu, “O le upu faigata lena; o ai ea e mafai ona faalogologo i ai?”²⁶

O loo lagonaina pea lena muimui i ona po nei mai ia i latou o e saili e faate’aese tapuaiga mai talanoaga ma tosinaga. Ae pe afai e le o i ai iina le tapuaiga e fesoasoani ai i le mamanuina o le tagata ma manatunatu loloto ai i taimi faigata, o ai la na te faia? O ai o le a aoao atua le faamaoni, lotofaafetai, faamagalo, ma le onosai? O ai o le a faaalia le alofa mama, mutimuti alofa, ma le agalelei mo i latou ua le amana’ia ma lotomafatia? O ai o le a opomaia i latou o e ‘ese ae ua tatau i ai, aua o fanau uma lava a le Atua? O ai o le a limafoai ia i latou e manaomia ma e le saili foi mo se taui? O ai o le a ava ma migao i le filemu ma le usiusitai i tulafono e sili atu nai lo mea ua lolo i ai i le taimi nei? O ai o le a tali atu i le aioiga a le Faaola “Ina alu ia ma ia faapea ona fai”?²⁷

O le a tatou o ma faia! Ioe, uso e ma tuafafine, o le a tatou o faia.

Ou te valaaulia outou ia taulamua i le faamoemoe o le saolotoga faaletapuaiga. O se faailoaga o le mataupu faavae na tuuina mai e le Atua o le faitalia.

O le saolotoga faaletapuaiga e aumaia ai le paleni i filosofia faatautava. O le lelei o tapuaiga, o lona aapa atu, ma faatinoga i aso taitasi o le alofa lea e na o tapuaiga e musuia ai, e faateleina pe a tatou puipuia le saolotoga e faaali atu ai ma faatino i luga o talitonuga autu.

Ou te molimau atu o Russell M. Nelson o le perofeta soifua a le Atua. Ou te molimau atu o loo ta’ita’i ma taiala e Iesu Keriso lenei Ekalesia. Na togiola o Ia mo a tatou agasala, sa faasatauro i luga o se satauro, ma sa toetu mai i le aso tolu.²⁸ Ona o Ia, ua mafai ai ona tatou toe ola mo le faavavau atoa; ma o i latou o e mananao ai e mafai ona mau faatasi ma lo tatou Tama o i le Lagi. Ou te folafola atu ai lenei upumoni i le lalolagi uma. Ou te faafetai mo le saolotoga e faia ai. I le suafa o Iesu Keriso, amene.