Papah nan Pwukoah Malipilip kan en Mwomwohdiso

Irail kan me kin papah nan Mwomwohdiso kin malipilip sang Koht. Kaun en Mwomwohdiso kan kin kapakapki en kak ale pepehm en ese ihs me irail pahn peki en alehda ehu ehu pwukoahn papah kan. Kaun emen ahpw pahn peki rehn toweh men en papah oh kawewehiong duwen pwukoah doadoahk kan en malipilipo. Toweh kan kin ale utuht nan mihting en Mwomwohdiso wasa me toweh kan en wardo de brancho kin kasalehda arail usuhs en utuht. Met wewehki me irail inengieng en utungada mehlel aramas me alehda pwukoaho. Toweho ahpw pahn ale kapai sang emen kaun en prihsduhd. Met me kin kadaniki kasarawihong pwukoah doadoahk. Toweh meno ahpw pahn mweimweihong en ale mweimwei en wia pwukoah doadoahko oh ekei kapai kan me pahn sewese ih (ohl) de (lih) papah.

Pisop me wia kaun en ward ehu. (Nan branch, branch preseden men duwehte pisop men) Steik preseden pahn pilada emen prihsduhd me warohng en wia pisop. Presedensi Keieu pahn kamanahla pwukoaho. Pisopo ahpw pahn ale utuht oh kasarawiala pwehn kak wia ah pwukoahn papah. E pil pahn alehdi prihsduhd kih kan, me wewehki me e ahniki mweimwei en kaweid wardo. Ni ah wia pisop men, e pahn papah oh kaweid toweh kan koaros en wardo,

Prishduhd kohrum kan oh Relief Society, Peinakapw Pwulopwul kan, Primary, oh pwihn en Santi Skuhl kan kin mih pahn kaweid pen presedensi kan, me kin iangahki emen preseden oh sounsawas riemen. Presedensi kan en kohrum en pwihn en me Mah kan kin malipilipda oh kasarwaiahla sang irail steik presedensi. Pisoprik kin peki rehn toweh kan en papah nan ekei pwukoah en presedensi kan en wardo oh kasarawih iraila. Kaun koaros kin papah toweh kan nan arail kohrum kan de pwihn kan. Irail kin minisder de papah toweh kan ong arail anahn kan oh sewese irail en kehn limpoak en Koht.

Ekei pwukoah malipilip kan me iangahki sounpadahk, sawas nan palien keseng, apwalih rekohd kan, pilahnih kemwekid kan ong me pwulopwul de serih kan, oh papah nan soahng teikan. Ehu ehu pwukoah nan Mwomwohdiso me inenen kesempwal oh e kiheng toweh kan arail ansou mwahu en papah mehteikan oh papah Koht. Ni atail koaros ah pahn doadoahk pene oh kapwaiada atail pwukoah malipilip kan, kitail kakehlakahla mehteikan oh sewese Mwomwohdiso kekeirda.