Kev Khi Lus Muab Peb Khi rau Vajtswv

Thaum peb khi lus thiab ua raws li peb tej kev khi lus peb yuav tau koob hmoov.

Ib txoj kev khi lus yog Leej Txiv Saum Ntuj Ceeb Tsheej txoj kev cog lus rau Nws cov me nyuam. Nws tsa tej kev cai rau tej kev khi lus uas peb khi nrog Nws. Thaum peb ua raws li Nws hais, peb txais tau cov koob hmoov ntau heev. Thiab tsis yog peb tau koob hmoov hauv lub ntiaj teb no xwb—thaum peb ua raws li peb tej kev khi lus, ces yuav muaj ib hnub peb yuav rov qab mus nrog Vajtswv thiab peb tsev neeg nyob saum ntuj.

Kev Khi Lus thiab cov Kab Ke

Peb khi lus thaum peb ua cov kab ke. Peb yuav tsum ua cov kab ke ntawd thiab ua raws li tej kev khi lus ntawd kom peb yuav rov qab mus nrog Vajtswv nyob. Cov uas muaj txoj cai pov thawj hwj yuav tsum ua cov kab ke no. Cov kab ke no yog kev cai raus dej, kev pom zoo, kev txais lub Pov Thawj Hwj Mekhixedes (rau cov txiv neej), thiab cov kab ke uas peb txais hauv lub tuam tsev. Thaum lawv txais lub cim nco txog, cov mej zeej hauv lub Koom Txoos rov qab cog lus rau Vajtswv (saib Lus Qhuab Qhia thiab Kev Khi Lus 20:77, 79).

Tej Kev Khi Lus Pab Peb Ua Neej Ncaj Ncees

Thaum peb ua kev cai raus dej, peb cog lus tias peb yuav coj raws li Yexus Khetos, nco ntsoov txog Nws, thiab ua raws li Nws cov lus txib (saib Lus Qhuab Qhia thiab Kev Khi Lus 20:37). Vajtswv cog lus tias tus Vaj Ntsuj Plig Dawb Huv yuav nrog nraim peb nyob.

Thaum cov txiv neej txais lub pov thawj hwj, lawv cog lus ua neej kom tsim nyog txais Vajtswv lub hwj chim pov thawj hwj. Vajtswv cog lus tias Nws yuav foom koob hmoov rau lawv. (Saib Lus Qhuab Qhia thiab Kev Khi Lus 84:33–40.)

Tej Kev Khi Lus hauv lub Tuam Tsev

Thaum cov mej zeej ntawm lub Koom Txoos txais lawv qhov vaj txiaj ntsim, lawv cog lus tias lawv yuav ua neej ncaj ncees thiab ua kev cai txi rau txoj moo zoo. Vajtswv cog lus tias lawv yuav txais hwj chim (saib Lus Qhuab Qhia thiab Kev Khi Lus 38:32; 109:22)

Nyob hauv kev cai sib khi hauv lub tuam tsev, ib nkawm niam thiab txiv sib yuav rau yav mus ib txhis thiab cog lus tias nkawd ib leeg yuav coj ncaj rau ib leeg thiab rau Vajtswv. Vajtswv cog lus tias nkawd muaj peev xwm rov qab mus nrog Nws nyob thiab nyob ua ke nrog nkawd tsev neeg mus ib txhis li. (Saib Lus Qhuab Qhia thiab Kev Khi Lus 132:19–20.)

Peb Yog Ib cov Neeg Khi Lus

Cov uas los ua mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej los ua Vajtswv cov neeg khi lus. Lawv kuj txais tau cov koob hmoov thiab tej kev lav ris los ntawm Anplaham txoj kev khi lus los ua lawv tug (saib Kalatias 3:27–29). Qhov uas peb yog Vajtswv cov neeg khi lus txhais tias peb siab pab thaum peb los nyob ze Khetos zuj zus tuaj. Qhov no kuj txhais tias peb ua hauj lwm kom txhawb Vajtswv lub Koom Txoos lub zog nyob hauv lub ntiaj teb no. Thaum peb ua raws li peb tej kev khi lus, Vajtswv yuav muab dab zog thiab hwj chim rau peb.

© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, Ob Hlis Ntuj 2022. Hmong. 18313 295