Ahyɛmudzi horow ma Yɛnye Nyankopɔn nya Nkitahodzi

Ayɛdze horow bi mu no yedzi ahyɛmu horow. Ohia dɛ yɛgye ayɛdze horow no na yɛyɛ setsie ma ahyɛmudzi horow no ama yɛaasan nye Nyankopɔn akɛtsena. Asɔfodzi tumdzi na wɔdze yɛ ayɛdze horow no. Enuma na pisi, Melchizedek Asɔfodzi ne nhyɛe (wɔdze ma mbanyin), na ayɛdze horow a yɛgye no wɔ temple no kã ho. Sacrament ber mu no, Asɔrmba kenyan anohoba a wɔabɔ ama Nyankopɔn no fofor (hwɛ Nkyerɛkyerɛ na Ahyɛmudzi 20:77, 79).

Enuma ber no, yɛbɔ anohoba dɛ yɛbɛka Jesus Christ do, yɛbɛkaa No aber nyina, na yeesie mbrasɛm no (hwɛ Nkyerɛkyerɛ na Ahyɛmudzi 20:37). Nyankopɔn bɔ anohoba dɛ Sunsum Krɔnkrɔn no nye hɛn bɛtsena aber nyina.

Sɛ mbanyin gye asɔfodzi no a, wɔbɔ anohoba dɛ wɔbɔbɔ bra dze afata Nyankopɔn n’asɔfodzi tum. Nyankopɔn bɔ anohoba dɛ obehyira hɔn. (Hwɛ Nkyerɛkyerɛ na Ahyɛmudzi 84:33–40.)

Sɛ Asɔrmba gye hɔn endowment wɔ temple a, wɔbɔ anohoba dɛ wɔbɔbɔ bra tsenenee na wɔabɔ afɔr ama asɛmpa no. Wɔdze tum fi Nyankopɔn hɔ bɔ hɔn anohoba (hwɛ Nkyerɛkyerɛ na Ahyɛmudzi 38:32; 109:22).

Temple nsɔwano ber mu no, wɔwar kun na yer ma mfesantsen na wɔbɔ anohoba dɛ wɔbɛyɛ nokwafo ama hɔnho nkorkor na ama Nyankopɔn. Nyankopɔn bɔ anohoba dɛ wobotum asan akɔ Ne nkyɛn na wɔatsena dɛ ebusua ebusua afebɔɔ. (Hwɛ Nkyerɛkyerɛ na Ahyɛmudzi 132:19–20.)

Hɔn a wɔbɛka Jesus Christ N’Asɔr a ɔwɔ hɔ ma Nda a odzi Ekyir Ahotseweefo mba ho no, ba bɛyɛ Nyankopɔn n’ahyɛmu nkorɔfo. Wɔsan so yɛ Abraham n’ahyɛmudzi ho nhyira na asodzi horow adzedzifo (hwɛ Galatiafo 3:27–29). Yɛreka Nyankopɔn n’ahyɛmudzi nkorɔfo ho n’asekyerɛ nye dɛ yɛboa hɛn ho nkorkor ber a yɛtwe bɛn Christ. Ɔsan so kyerɛ dɛ yɛyɛ edwuma dze hyɛ Nyankopɔn N’Asɔr dzen wɔ asaase do. Sɛ yesie hɛn ahyɛmudzi a, yebotum enya tum na ahoɔdzen efi Nyankopɔn hɔ.