Yavu ni Kosipeli
Na Lutu A Tiki ni Nona iTuvatuva na Kalou
Ena vuku ni Lutu, eda na lako mai kina ki vuravura ka na rawa ena dua na siga meda lesu tale ka laki bula vata kei Tamada mai Lomalagi.
Atama kei Ivi ena Were ko Iteni, mai vei Robert T. Barrett; Vakatalai tani ko Atama kei Ivi mai na Were ko Iteni, mai vei Gary L. Kapp, e rawa me kua ni lavetaki; Atama kei Ivi, mai vei Jay Bryant Ward; Na Tucake Tale, mai vei Harry Anderson
Ena Were ko Iteni, na Kalou a vakaroti Atama kei Ivi me rau kakua ni kania na vua ni vunikau sa kilai kina na vinaka kei na ka ca. A qai kaya vei rau o Koya, “Sa soli tu vei iko mo lewa, ia mo nanuma ga niu sa vakatabuya vei iko” (Mosese 3:17). A temaki Ivi o Setani me kania na vua ni vunikau. A kaya vua, “Ia drau na vaka na Kalou, ni drau na kila na ka vinaka kei na ka ca” (Mosese 4:11). A kania o koya na vuanikau ka qai wasea vata kei Atama. Na Kalou a vakatalai rau tani mai na Were ko Iteni.
Na Lutu
Ena gauna erau a biuta kina na Were o Iteni o Atama kei Ivi, erau a sa sega tale ni tiko ena i serau ni Kalou. Na tawasei oqo mai vua na Kalou e vakatokai na mate vakayalo. Na biubiu talega mai na were e kena ibalebale ni o Atama kei Ivi erau sa yaco me vakayago ka sa rawa kina me rau na mate. E dina ga ni rau sa sega ni tiko vata kei na Kalou o Atama kei Ivi ka rau sa mai bula vakavuravura, erau a marau ka sinai ena vakanuinui ni rau raica ni rawa ni rau tubu (raica na Mosese 5:10–11). “Sa lutu ko Atama me sucu kina na tamata, ia sa sucu na tamata me rawata na marau” (2 Nifai 2:25).
Na Gauna ni Vakatovolei
Ena gauna eda sucu kina, eda sa bula vakatikitiki mai vua na Kalou, me vakataki rau o Atama kei Ivi ni oti na Lutu. Sa temaki keda o Setani meda digidigi cala. Na veitemaki oqo e vakatarai keda meda vakatovolei meda digitaka na dodonu se cala (raica na Alama 12:24). Ena veigauna kece eda ivalavala ca kina ka sega ni veivutuni, eda sa vakayawaki keda tiko mai vua na Tamada Vakalomalagi. Ia kevaka eda veivutuni, eda na toro voleka vua na Tamada Vakalomalagi.
Mate vakayago
A buli na vuravura ena vukuda (raica na 1 Nifai 17:36). Na Lutu a rawa kina vei Atama kei Ivi me rau vakayacora na ivakaro ni Kalou me rau vakaluveni, ka rawa kina vei keda me da lako mai ki vuravura ena dua na yago. Ena mate na yagoda ena dua na siga, ia na yaloda ena bula tikoga. Ena vakaduavatataki tale na yagoda kei na yaloda ni da sa tucake tale.
Vakabulai mai vei Jisu Karisito
Mai na kaukauwa ni veisorovaki i Jisu Karisito, eda rawa ni ulabaleta kina na mate vakayago kei na mate vakayalo. Baleta ni a tucaketale na Karisito, o ira kece era sucu mai ena vuravura oqo era na tucaketale ka bula tawamudu. Ena vuku ga ni sa mai vakararawataki o Karisito ena vuku ni noda ivalavala ca, sa rawa kina ni da veivutuni ka vosoti me rawa ni da bula vata tale kei Tamada mai Lomalagi.