“Muyuki wa Dîku Udi Wambuluisha Bankambua Betu,” Liahona, Ngondo wa Dikumi ne Muibidi 2021
Mukenji wa ku Ngondo wa Liahona Ngondo wa Dikumi ne Muibîdi 2021
Muyuki wa Dîku Udi Wambuluisha Bankambua Betu
Muyuki wa dîku udi dijandula ne dilonga pa bidimba bia dîku dietu. Tudi tupeta kabidi ngumu pa bankambua betu ne tudi mua kuenza mudimu wa ntempelu buabu.
Mêku qdi munkatshi mua dilongolola dia diakalenga dia Tatu wa mu Diûlu. Wakalongolola mushindu bua mêku atungunuka kashidi. Patudi tuenza muyuki wa dîku dietu ne mudimu wa ntempelu, tudi tuambuluishi disangila pamue dia bidimba bia dîku dietu, badi ne moyo ne badi bafua. (“Mudimu wa ntempelu” udi umvuija kupeta milulu ya ntempelu buetu, bumudi disuikibua ne mubaki wetu, ne momumua kabidi ne kukumbaja milulu mu ntempelu bua bankambua betu.)
Muyuki wa Dîku ne Mudimu wa Ntempelu
Muntu yonsu uvua anyi walua pa buloba udi dijinga ne milulu ya lumu luimpe. Pikale bankambua betu kabayi bapeta diakalenga edi, tudi mua kubakumbajila milulu eyi mu ntempelu. Umue wa ku milulu eyi udi kusuikibua ku bidimba bia dîku. Kuikala “basuikibua” kudi kumvuija ne, kuikala bakumbana bua kuikala ne mêku etu bua kashidi bituikala bakana. Tudi mua kusuikibua ku mêku etu anu mu ntempelu.
Mabenesha a Mudimu wa Muyuki wa Dîku
Muyuki wa dîku udi mua kuambuluisha bua kukolesha malanda etu ne bidimba bidi ne muoyo mu dîku dietu. Mu dilejangana malu a kala, foto, ne bikuabu bivulukilu kudi umua ne umua, tudi tuibaka bulongu. Tudi kabidi tukolesha dinanga ditudi nadi bua umua ne umua. Bambi bakalaya kabidi ne, kuenza mudimu pa muyuki wa dîku dietu kudi kutusemeja pabuipi ne Yezu Kilisto.
Kupeta Bankambua Betu
Tatu wa mu Diûlu mmusue bua tusuikibua ku dîku dietu didi ne moyo ne kudi bankambua betu. Kumpala kua kusuikibua kudi bankambua betu, tudi ne bua kupeta ne kulama ngumu idi ibatangila. Kadi muyuki wa dîku kawena wimanyina pa dikeba dia mena, matuku ne muaba to. Bituikala tulonga pa bankambua betu, netudiumvua batuangana nabu menamena.
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, December 2021. Tshiluba. 17476 760